“ZOSECA’93” at Shillong

Ka Dalzazi Pan: “ZOSECA’93” 
 
Ka dalzazi ka lemlem leh ZOSECA’93 ka mu kha a, lungzuangsak ahih manin tawm kong pholhkhia hi. 
 
April 7-11, 1993 sung Shillong khuapi ah Zomi sangnaupangte in kumtawp exam zawh ciangin Zomi Students Evangelistic Camp (ZOSECA’93), Pinebrroke Centre, Umbang ah kinei a, Mr. Kap Za Mang, M.A. (Geography) (tu’n USA ah pastor semin om) in Camp Director sem a, Rev. Khai Za Kham, Principal, Dinwedi Bible College, Lamka; Rev. J.M. Ngul Khan Pau, Students’ Chaplain, Shillong leh Mr. G. Buhril, New India Insurance Officer teng thugenpi hi. 
 
Thulu: “Taste and see…” Psalms 34:8 sung kizanga, a Zokam in, “Topa hoihna sin unla, hoih hi, ciin thei un, Amah a bel mite mi lungdam ahi hi,” cih ahi hi. 
 
Rev. L. Taithul, Translation Consultant, Bible Society of India, Shillong Auxiliary in ZOSECA’93 honna leh apna hun ah Piancil 21:19 “Tua ciangin Pasian in ama mit haksak a, amah in tuikhuk khat a mu hi. Amah paiin tui tawh tuithawl dim in dimin naupang a dawnsak hi,” cih a sim khit ciangin, “Tuni a Camp ineihna pen Umbang khua hi. Umbang (Khasi pau) a khiatna Zokam in ‘tuilim, tuitui’ cihna hi. Tuni in Jesu in, “Tuilim ken kong pia ding hi,” a cih dawn ciat dingin kuamahpeuh ikicial hi. Socrates in a pilna hih bangin mite kiangah a gen hi. “Kei pen no tengin nong minthangsak uh a, ahi zongin kei pen hai ka kisa semsem hi. Mite tawh ka kibatlohna pen ken bangmah ka hihloh lam ka thei a, mite’n ahih leh bangmah ahihloh lam uh a kithei kei uh hi.” “Awle, khan tawp neilo bangin eite Pasian thu ah khawllo a i khan ciat ding kong deihsak a, ka lamen hi.”
 
Camper 102 pha in, group 4 in ka kikhen uh hi a, Group Leader te in amau group min puate tangthu ciat (a tomin) hong gen uh hi.  
 
1. Rev. Thang Kai: Kum 57 sung Pasian na sem hi. Sialkot, Lushai Hills ah piang. 1908 in Zirtan zo. 1910 in Lower Primary pass. Mizogam a missionary Rev. Watkin Roberts makaihna nuai ah khangkhia hi. 1953 kum in Saikot, Lamka ah Pastor Ordination kipia hi. August 21, 1969 in Topa kiang hong paisan hi. A zi Kim Za Ting, tanu 4 leh tapa 3 nei. “Pasian itna thu” cih a gen tam pen ahi hi. 1953 in Vaiphei Bible apna ah LS mun khat sim dingin kiseh a, “I kipahna pen Topa tung bek ah ahi hi,” cih kammal sim hi. 
 
2. Lia Ngai Za Siam: August 6, 1965 kumin Cikha khua ah piang. 1983 kum in tui kiphum a, Nipisang sia sem hi. 1987 kum in CCOC ah lut hi. Kum 3 semte Gold Medal kipia ahih manin tua ngahsawm in a hanciam tentan hi. Ngah manlo in May 24, 1988 kumin hong nusia hi. CCOC numei a si masa pen ahi hi. A sih ding laitak in Pa Kou in Mangmuhna 14:13 sung ana simsak hi. “…Topa thu ah a si mite mi hampha mahmah ahi hi… Amaute nasepna thaman in amaute zui ding ahih manin a nasep gimna pan un tawlnga in nuamsa in om ding uh hi…”
 
3. Pa Kam Za Thang: 1975 kumin Burma Naga lakah missionary sep a ut a, 1983 in kuan hi. Tua kum mah in hong nusia hi. Topa’n a sepna mun ah, mite etteh dingin, na laksak hi. 
 
4. Taang Cin Khaw Thawn: August 22, 1966 niin piang a, April 18, 1982 kumin tui kiphum hi. Kum 18 a phak March 10, 1988 niin CCOC dingin kipia in April 10, 1989 in kuankhia hi. A sepna Paletwa mun ah kha khat bek (one month) sem manin si a, a lutang phum masa penpen ahi hi. TTBA in a office vuah amah phawkna in mualsuang phuhsak uh hi. 
 
5. Rev. Khup Za Pau Singson: Old Churachandpur a Pa S.T. Lianpu leh Nu Khan Nem sung pan July 14, 1934 in piang a, Thawn Za Niang tawh kitengin tapa 3 leh tanu 2 nei hi. Lai Siangtho G.Th, B.Th, B.D. sintoto a, December 31, 1979 in hong nusia hi. A nasepnate – Executive Secretary, NEIG Mission, Living Bible translator cum coordinator, Executive Secretary, EFCI leh Bible Society of India Churachandpur Branch ah Vice Chairman ahi hi. 
 
Hih Camp sungah a kithupi bawl mahmah khat pen “Quiet Time” or “a time with God” ahi hi. Topa tawh gamdai taka kikholhna, hun siangtho, dai dide a Topa tawh hunzatkhopna. Koi mun peuhah kinei thei a, bang hun peuh in kinei thei in, a manpha thei pen ding na cih bangin na zat ding hi, hong kici hi [A time with God: at any time, at any place, in any way you feel comfortable and you thought to be the best way to devote to God]. Tuni tan in manpha lai hi. 
 
Pianthakna thu, nuntakna thak, nuntakna kicing neihna ding hong kihilh a, khantawn lawhcinna ding lampi zong hong kihilh hi. Tomvei nuntak sung lungnopna ding lampi zong hong kihilh in, khangkhat nuntak ciatciat a manpha, a namtui a nuntakzia ding zong hong kisinsak hi. 
 
Tak kung laka thungen dinga ka pai uh ciang Takteh ging sengsengte ka bilkha ah thamden a, gamsung huihvot nung hiauhiau leh gamsung gim nam te ka mitkha ah a mang thei kei hi. 
 
Tua ZOSECA’93 mahmah aw! 
 
 
Hau Za Cin
Phuitong Liim

ZONET Kum 10 Cingta Hiam?

Posted by: "Hau Za Cin" suante2002@yahoo.com   suante2002

Wed May 19, 2010 12:32 pm (PDT)

ZONET Kum 10 Cingta Hiam?
 
ZONET pute leh ZONET simte khempeuh tungah lungdamna leh zahtakna tawh…
 
Khatvei lawmte khat in, “ZONET zong kum 10 sungah a lutlut hita ei,â€� hong ci vat a, “Oh, hi maw, lungdam huai si e; leitungbup Zomi te khua khat, munkhat ah om banga hong kihosak, hong kizomsak hiven,â€� ka ci phei buatbuat hi. 
 
A gel masa te in tuni ding galmuh uh ahih manin lawptak in haksa taleh na pan veve uh hiding hi. Tua hun in tu hun bangin Zomi hizah in noptuampih, phattuampih, kinpih, lawppih, zatpih theilo kha ding hi. Ahi zongin suangmanpha khuk to bangin a sungah na hoih om hi cih thei uh ahih manin lungkialo in sem teitei uh hi ding hi. Mi hizah in i noptuampih uh manpha lua hi. Nopna dahna iki hilh ziauziau uh a, khualzin leh gam tuamtuam lengte in zong inn lam tawh thu ikiza ziauziau uh hi. Bangzahtak in manpha a, bangzah takin lungdamhuai, angtan huai ahi hiam. ZONET omlo hileh a kithei ding tampi kitheilo dinga, a ki it ding tampi ki it khalo ding hi. Omdan khawldan, zinsuk zintoh dan, gam leh nam kep ding dan, sum leh pai zonzia ding honkhat, pilna siamna zonzia pawlkhat, kim leh pam kepzia a hoihzaw, laigelh laibu bawlzia cihte leh a dang tampi ithei kei ding hi. 
 
Mun leh gam gamla pipi ah a kikhenta Zomi sungah kipahtawina leh kithupibawlna cihte hizah in na omlo kha ding hi. I tenna gam ciat omzia leh khantohziate, biakna paizia leh nek leh dawn zon dan a tuamtuam paizia te, kumpi vaihawmzia leh khuasung vengsung kikepzia cihte hizah in ithei kei ding hi. Sau gen deuh leng - Malaysia ah Zolai sinna sanginn om hi cih kitheilo dinga, USA ah Zomi World Cup cihte om hi cih kitheilo dinga, Australia ah Zomi Khuado kimangkhawm zel hi cih kitheilo dinga, Phillipines pan kumsimin Zomi hon khat in degree a sangpenpen te zong hong zo zel uh hi cihte kizalo, kitheilo ding hi. 
 
I Zolai mahmah zong hizah in kizuun, kipuahlo dinga, Zolai zuunsiam, Zolai gelhsiam leh Zolai atsiam hizah in kibehlaplo ding hi. Zolai tawh leitung thupiang khatpeuh kigelh ziauziau thei cih kitheilo kha dinga, Roman laimal zangin computer ah Zolai olno takin ki at ziauziau thei hi cih zong kitheilo kha mai ding hi. Ut veva man hi masalo a nu leh pa u leh nau sunghta putu kipaisan a kikhen vengvengte thu kizakkikna khat pen ZONET tungtawn mah na hi veve mawk hi. Mun pawlkhat ah bang “Inn lam ah bang thu om hiam cih a dotnop ciangin ‘ZONET ah bang thuthak a om hiam?’â€� ci uh hi. ZONET simte in inn lam thu thak thei a, innlam thupiang tampi kiza ahih manin inn lam leh gam lama omte kizopna bulpi khat a suak hi. Tua ahih manin Zomi te hong khihkhawm, hong khilkhawm leh thu leh la tawh hong zomkhawm ZONET ahi hi. 
 
Mailam ah hihsangin hong khangto zaw lai dinga, a tamzaw in ngaihsutna hoihte kiza dinga, a tamzaw in thuhoih nono hong kigelh zel dinga, a tamzaw in inn lam leh gamlam kizopna hong manlang semsem ding hi. Kum 10 pha pan bek hi mah leh naupang melmawl banglo khangham bangin ngaihsun a, khangham bangin thu leh la hong hawmkhia ziahziah ahih manin ZONET a manpha mahmah hi. 
 
A tamzaw kumte in hong ngaklai a ZONET a khangto semsem, a manpha semsem ding ahi. ZONET sungah u leh nau a kuamah peuh in a sai, a zuun, a sem a bawl, a gim a tawl te khempeuh lungdampih in, thapia den ni. ZONET pute na vekpi uh tungah lungdam ung ei. 
 
ZONET mainawt zel in khansau hen. 
 
 
Hau Za Cin
Phuitong Liim