Sen Ngaihno Tawh Kum Sawmnga

Posted by: "Hau Za Cin" suante2002@yahoo.com suante2002

Mon Feb 1, 2010 3:38 am (PST)

Laibu: "Sen Ngaihno Tawh Kum Sawmnga"


Upa N. Thang Za Khen in a nupa suahzawh uh Kum 50 cinna Golden Jubilee phawkna in laibu khat bawl a, "Sen Ngaihno Tawh Kum Sawmnga" ciin minvawh hi. Hih laibu ka muh nitak in sim nop ding hiam ciin ka vel a, ka lumletlet hi. Ahi zongin a sung leh pua etpak leh zong sitai mello ahih manin ka hawmthawh pian a, dama sim ding hi ciin ka koih bawl pian hi. Innkuan kikhop ka neih khit uh ciangin ka koih ma in ciin a kawm sunglam tawmkhat ka sim leh ka mit hong la in, ka lungsim hong zen a, ka pumpi hong zeel in ka khah thei nawn kei hi. Laibu ka ciap khak lakah a limpen pawl ah ka hel a, a tawptan ka simkhit matengin ka sim leh zingsang khuavak philhphelh hi. Zanhak lianga sim ka hi mawk hi. Tua banga ka simkhak laibu tam lualo ahih manin 'lamdang' kasa hi. KHA SIANGTHO in ompih hiding ciin ka ngaihsun hi.



Ama tangthu gelhna hipen a, ka neu gensakna hilo in, a thupilua omtuanlo hi. Midang nuntakna thu tawh a kibang tam hi, ahi zongin sim kipan leng kikhah thei nawnlo a, Lamdang cihloh ka gen dan ding ka thei kei hi.



A haksat tuahte midang asangin lianzaw tuanlo a, a khualzinnate midang khualzinna sangin piandang tuanlo a, a zi neih dan, a ta kep dan, a biakpiak dan, a lawm leh gual tawh kikholhdante a lamdangpi hi tuanlo hi, ahi zongin Pa Khen (kei sap dan) laibu tuam ngiat hi. Midangin a sim uh ciang bangci in a mu uh hiam, bangci zeel hiam cih ka thei kei, kei adingin a lamdangpi khat ahi hi.



Innkuan Crusade a neih khawng uh midang zong a nei om veh aw, antang thungetna zong midang mah bangin nei hiveh aw, thunget a hahkatdan zong mi tawh kilamdang tuan kei, ahi zongin a ompih khat om tawh kibangin i sim kawmkawm in hong 'hopih' daudau hi.



New Delhi ah Sia Thawn tawh a kithuahna uh, Delhi ZCF Jubilee ding lai thu a gen khawng, min thak a ngahna khawng leh mi ading a thungetsak dante khawng na lamdang kibawl ngeina tawh kibanglel veh.



Ahi zongin, ka theihloh, a lamdang tuam khat om hi ding hi ciin ka ngaihsun a, ka thei nai tuan kei hi. Hibanga mi laibu in ka lungsim hong lawng, ka pumpi hong zeel, ka ngaihsutna hong hingsak tamlo ahih manin lungdampihna leh pahtawina, zahtakna leh itna, phawkna in hih laiah tomcik in hihbangin kong luikhia hi.Â



Pa Khen tawh ka kimuh nunung uh Delhi ZCF Silver Jubilee dinglai hi. Nipini zingsang EBC Delhi Biakinn ah kikhop khit ciangin nitaklam ZCF Jubilee kikhopna ah kikhawm dingin amau Mawtaw tawh Rev. Dr. J.M. Ngul Khan Pau te nupa tawh ka tuangkhawm uh hi. Tua zawh leh tu kikal in Topa in thupha hong piaksak in Nupa Kiten Golden Jubilee thupi tak na zang uh hi.



Sia te, Evangelist te leh Makai te nungzui a Pasian min tawh a kalsuanna khempeuh Topa in 'tonpih' bek hilo in, 'thupha pia' hi dingin ka um hi. Tuni in a tate kumpi nasem hi khinta uh a, a ut leh saklam ah, a ut leh khanglam ah zin kawikawita hi. Hih bang thupha sang Pasian phawk, Pasian ading kuhkal taka sem mi mit tawh ka muh khak pen 'hampha' ka kisa hi.



Pasian in Pa Khen thupha hong piaksak in, a nupa un kum tampi dam in Ama minthanna dingin hong zatsak toto laita hen.Â



Hau Za Cin

Phuitong Liim