Zomi Siamsin Magazine Vol.III, Nov 2009 melmuhna -1

Zomi Siamsin Magazine Vol.III, Nov 2009 melmuhna -1

Posted by: "Hau Za Cin" suante2002@yahoo.com   suante2002

Sun Jun 20, 2010 5:07 am (PDT)

Zomi Siamsin Magazine Vol.III, Nov 2009 melmuhna -1:
 
Khatvei lawmte khat in, "Laisim ding na deihna?" hong civat a, "Deih mah lo dia, bang laibu a hia?" ka cih leh, "Siamsin Magazine Vol.III na hi" hong ci hi. "Hoih teu ei, hong simsak dih o," ka cih leh a thungpi sung pan hong dokkhia a, a mel ka muh ciangin ZOMI ahihna kidawkpah a, ka etciik deuh leh SIAMSIN MAGAZINE ahihna kitel mahmah hi. Hih banga a kawm tung ah Zomi leh Zomi Siamsin te khutma ahih na a kilangsak dinga a geel (excellent cover design) te siam kasa mahmah a, inn tun ding ka ngaklah mahmah hi. Inn ka tun ciang ka simpah a, nitak ann nekding nangawn 'hih ka sim zawh ciang' ci in sawttoto kha in zan nai 9 hong sat man a, ihmut ding mangngilh in khuavak dong ka sim kha hi. Well done and Congratulations Zomi Siamsin Kipawlna, Universities, Kalay!
 
Laibu kawm ah Zolia leh Zotaang melhoih mahmah Zopuan silh in kituangsak a, i et ciil in tua kimu masa pen ahih manin ZOMI te a hi cih kitheipah a, ciik etdeuh leng tuate nungah (background) Kalay University Gate maan kikoih a, tua in Siamsin tawh kisai hi cih hong lak leuleu a, Kalay Unversity huang leh lampi zong kimu khawm lai a, taklam gual tungnungah ZOMI SIAMSIN MAGAZINE cih kigelh nuamtakin kisim thei pah in, nai et mahmah leng Zomi Siamsin Kipawlna ciamtehna symbol veilam gualtungnungah a kikoih kimu thei hi. Zomi Siamsin Kipawlna ciamtehna sungah Vaphual nupa lim leh laizawhna lukhunelkai banah leitung khantohna tawh kituaka khangto IT van pawlkhat kidawk a, a kimvial in Zomi Siamsin Kipawlna, Universities - Kalay cih kigelh hi. Hih a kawm tung bek vel leng zong Zomi Siamsin te khutma hi cih kimu a, a sung lut leng Zomi Siamsin te thupizia kimu suksuk hi. 

Sanginn huang tawh a kibang inn leh kongzingte koilai cih ka thei kei a, laibu kawm gualnuai ah kawllai tawh umna (bracket) kikoih in a kigelh lai te zong ka sim thei kei hi. 
 
A kawm sunglam tuak ah (inner cover) ah mi khempeuh cih dan in makaite leh vaisaite maan kisuang a, kilawm in hoih mahmah a, hibang ding mah ahi hi. A nunglam ah Zomi siamsin te maan (passport size photo) kituangsak a, hih laibu bawllai tua teng tua teng sangkah hun hi cih tuzawh kum 50, 60 zawh ciang zong a kienthei ding ahih manin makaite gelsiam kasa hi. Thugelh leh la gelh peuhmah maan zong amau article san tekah kisuang ahih manin picing mahmah, upto date mahmah hi. 
 
Laimal khatzong sim nai hetlo in zong tuazah a hoihna leh Zomi hih a angtanhuaina Magazine Bawlte in hong neisak khin hi. Tua pen art kici a, siamna hi. Laithei hetlo khat in zong enleh hih pen Zomi te khutma hi, Zomi te aa hi, Zomi hong lamsang hi ci theilua ding hi. College kahte hi, University kahte hi cih hong theihpih ding uh hi. Zomi hih nuam ngaungau hi. Laibu hong kawm lawmpa tung ka lungdam ngaungau hi. Kei copy ding koi pan ka ngahtam maw!
 
A lai kigelhte sim leng hih laibu kideih semsem hi. Laibu pawlkhat i sim ciang i simkhit ding kal kingaklah a, simkhit mengmeng a laibusaal ah kep dingin ki iplah hi. Hih Magazine bel simkhit pah dingin pammaih kisa, lah kisimkhin ut, Lia leh Taang kingaihnate, Ciampello itna kipiate, etc... na sim mai in, gensiam khang, simloh dingin pammaih cileng kikhiallo pen inteh.  
 
Lai gelhte i sim ciang Zomi khutsuak hi cih kithei a, Zomi lungsim - CIHTAKNA, ITNA, KUHKALNA, THUKHUALNA, GAM LEH NAM ITNA cihte bulphuh vive a ki at laite ahi hi. Ka lungdam mahmahna khat ah a gelh a tamzaw pen sangkahlai Siamsin te hipah hi. Tua in SIAMSIN MAGAZINE ahih na kilangsak a, ei a ahihna kilangsak hi. Nuam siing. Angtang siing. Ka sim kawmkawm in laibu hong kawmsak lawmpa bang thupha ka piapia tazen hi. Lungdam lua cihna hi. Tuahpha kisa lua. 
 
Laibu a kibawl peuhmah ciangin a bawlte deihna a kilat mahmah ding a thupi penpen ahi hi. Biakna Jubilee Souvenir ahih leh tua biakna tawh kisai a kilat mahmah ding thupi pen hi. Khangno Magazine ahih leh tua bang mah, Lai lam saipawl ahih leh lai tawh kisai ahih ding ahi hi. Tuni a hih Siamsin Magazine in Siamsin te a ahihna taktak hong lakkhia lua ahih manin hih lai ka at ding kal ka ngaklah hi. Magazine sunga lai atte leh vaisaite in hih a simkik kha diam ka thei kei hi. Hihtuak lua uh hoihlua ahih manin ka angtanna hong theihpih le uh ka ut hi. 
 
A sungah thu omte in Zomi hihna a kilangsak tampi kigelh a, Siamsin ahihna a kilangsak dingin siamsinna tawh kisai leh a kisin laitak mimal khat adingin a kisam tampi kituangsak a, tua pan a kisin utte na kisin ding a, tulaitak i tuahkhak thu -- parcel zi neih, sangkahna ah kimu lawm kingai thu, a hau nungak leh a zawng tangval ki itna thu (vice versa), kingai pipi a gamdang kizinsanna thu, kum tampi kizinsan khit hang ki itna akip den lawm kingaite thu, etc cih bang kigelh hi. Tu laitak tua bang i tuak man hi. Zomi History a kikankik ciang hih hun in Zomi te gamdang na paipai ta uh ahi ve maw kici ding hi. 
 
Zom nuam lai ding ihih manin tuni adingin thu nih tawh khin leng: 
 
 
"U Thang ken nang kong ngaihluat mana gamdang ka pai ding khawl hi veng, tun nang..."
 
"Niangbawi, koikoi ah i om zongin ka lungsim kidangsaklo ding kai maw, ken hong ngailua ing..."
 
"Nu lukhunelkai ka lak ni ciang ka U Thang omlo ding mate..."
 
"...ka U Thang om thei leh nak nop ding hi ven...."
 
Kum thum khit ciang...
 
"... Tun i kiten taktak ciang, ciampello Phualva bang nong itna te tel taktak ta ing ei, U Thang.."

********
 
 
 
"Ring... ring... ring..."
 
"Hello, hello"
 
"U Singpi maw"
 
"Himah ing ei, nang e leh?"
 
"Kei Tawipal hi'ng ei"
 
"Oh, Tawipal, " ciin Singpi lungsim hong sukha pianpah hi. 
 
"Bangvai a, Tawipal"
 
"U Sing, kei maw... New Comer hiveng, Ciimnuai University ah ei zong i ut veleh.. Hi. .. hi... hi.."
 
"Nang student council ah Pawllutang cih Zomi Siamsin Magazine pan na mu ing, nang nong theihloh hang.."
 
"Sese cei, Tawipal aw, maithak muakna ah na lutpah kul ve... ci dihdih le'ng, na major bang ahia?"
 
"E-major (English) hi'ng ei"
 
"OK mahmah ei"
 
"Tuazah ci ni, U Sing"
 
"Aw.... tuazah maw leh"
 
"Sunpha maw"
 
"Hi ei, sunpha"
 
 
(zoplai ding)
 
 
 
Hau Za Cin
Phuitong Liim
www.hauzacin. blogspot. com
"He knows how you feel"