MURLEN VENGPI SILVER JUBILEE 1962-1967

MURLEN VENGPI SILVER JUBILEE 1962-1967

Biakinn kong tualah Mualsuang kiphut a, Mualsuang tungah hih bangin kigelh hi.

1942-1967

MURLEN CC

PRESBYTERIAN SILVER JUBILEE

                                                Lawmnate:     Lawi    -1

                                                                        Sial     -1                     Dated

                                                                        Bawng-1                     20-23, January, 1967

                                                                        Vok     -1

                                                                        Kel      -1

                                                                        Beram -1

                                                                        Ar        -2

            Murlen CC cih pen Chuangchung cihna hi. Tua hun lai-in Lusei inn 30 leh Zomi inn 60 bang kipha ahih manin kitam zaw cihna tawh Vengpi ci-in zong kilo hi. Lusei veng leh eimi veng kikalah lui neu khat in hong hal hi. Mizogam Presbyterian Pawlpi in khua khatah Pawlpi nih om  a kikhensiam theihna dingin Lusei veng pen a leitang niam zaw ahih manin  Murlen Chuanhnuai ci-in ciamteh a, eimi veng pen a mual zong sangto zaw ahih main Murlen Chuanchung  ci-in hong ciamteh hi. 1967 Silver Jubilee Pawi bawlna-in gan namkim kigo hi.

            Sia Khup Za Go zong sangkah laitak ahih manin hih Pawi zang thei lo hi. Kei zong sangsia ka sep laitak hi a, Mizogam buai 1966 March kha a kipan sang kikah thei lo hi. Jubilee Pawi zang dinga khuamite leh Pawlpi mite a lin’ dimdim laitakin 1966 December kha-in Aizawl ka pai hi. Aizawl ka tun ciangin Aizawlah sangsia kisem thei hi cih thu ka theih ciangin Sangsia sem nuamin ka tam suak hi. Tua lai-in khualzin gamvak lau huai hi. Papite pau leh sing leh gua a kigawi laitak hi a, MNF ahi zong galkap ahi zongin lauhna vive ahi hi. Adiakin khangno tangvalte adingin lauh huai phadiak hi. Ka Pu Luah Khan Thang (kei sang nau zaw) zong police nasem Murlen pan Aizawl a pai pen Aizawl a tun kithei a, ahi zongin Police zom thei loin hong ciahkik hi napi khua hong tung loin lamkalah mang suakin tuni dongin a sihna kithei lo hi. MNF khut sung tung maw galkap khutah si maw cih kithei lo hi. Tua ahih manin kei zong ka paikik theih loh khak ding lau-in khua ciah nawn loin Aizawl ka tamsuak hi. Lungdam Bawl leh Kumthak zong Aizawlah ka zang hi. Dawrpui Veng kici tu laitaka Bazar omna lampi tungah sikkang tawh hampheng kilam khat sapin ka om hi. A lang lamah ko khuapihte ka zawlte uh nungak nih in inn sap mahin om hi. Aizawl a kihal khit phet hi a, sikkang zong a kangbang, a sia bang kikaikhawm tawh inn neu kilam tawm ahi hi.

             January kha hong tungin Jubilee Pawi khua-ah nuam takin kizang ding ci-in ka ngaihsun hi. A ni hong tun ciangin ka omna inn tual panin Murlen khua mual dawn kimu thei ahih manin tua lam enin ka dak niloh hi. Ka lung hong zuang mahmah hi ding hi ven, kei zong la khat ka phuak dep sam hi. Zola zong a sa thei lo, a phuak ngei vet lo kah hih hangin lungsimah hong phuut om hi ding hi ven hih bangin ka phuak hi.

a)     Zing ka zinna gam vangla pan,

      Pianna vangkhua galin don ing.

b)     Kholhpih lia leh tangte nunuam va bang leng ding

      Kei lah khat tang sawl bang hei ing.

Hih bangin ka phuak khit ciangin tua hun lai-in tangval kihi sam ahih ciangin nungak cih simsim zong kinei veve a, tua hun laia a thang nungak tangval in a deih tau pawl khat lei-in nungak cihsimism pen ka khak hi. Amah pen meel hoih a gen ding hi lo napi vompian ngaih bang cih pawl hi. Nungak lungsim hoih, thumang, mi dik a kigen hi. B.S. Carey in Zomite pen zi ding a zon uh ciangin mel leh puam tawh en loin, mi thanuam lokhawh hat, lungsim hoih panin en zaw uh hi acih bang dan hi. Tua hun lai-in nungak leh tangval khawng a tuama kiho leh kamkup cih bang, thugen cih bang kinei ngam vet loin mit hek leh omzia tawh a kilak hi mai hi. Lungsimah kitheihna pian khat om a, kigen khia ngam vet lo hi. Maan (photo) khawng bel kilakpih sam e, Black and White om panpan ta ahih ciangin.Tua dan khawng pen a nuam mahmah na hi hi. Tun amah zong Pyidawtha-ah innkuan picing takin om hi. Kei 1967 April kha ciangin Aizawl panin Lamka pai-in sangkah ka zom suak hi. 1967 kum tawp kuan ciangin Mizogam buaina hangin khuagawm (grouping system) kici hong om ciangin Murlen pen Hnahlanah kigawm hi. Ahi zongin galkap khut sunga om ding ut loin eimi a tamzaw Kawlgam leh Manipur gamah kitai zakin kigawm kik zo nawnlo hi. Khangual nungak leh tangvalte zong kimuh kik om nawn loin mun khat tekah sial ek den kek a gen bangin ki thehthang hi. Tu-a khua-a tengte pen 1973 khit cianga khua lui-ah a ciakik teng hi a, inn 100 phakik dek ta hi. Eimi veng pen a mun zong khamin nuam lo ahih manin kipuah nawn loin Lusei veng lamah kiteng khawm khin ta hi.

            Khangno thahat lai, khangual tam neih laitak hi a, hih bang Pawi thupi hunah ka om khak loh pen tu dongin ka kisik hi. Tua bangin Murlen khua Silver Jubilee Pawi 1967 kuma kibawl pen ka zang kha kei a, tukum a kum 75 Pawi (Platinum Jubilee) zong ka zang thei kei hi. Ahi zongin pianna khua, khankhiatna khua pen kimangngilh ngei lo hi cih kuamah tek in i thei hi. US khawngah i om hangin zong pianna khua pen kiphawk den hi. Tua ahih manin no Murlente khua kineisak nong ci phial uh ahi zongin Murlen tangthu a gen hun lai ahih manin Dr. Cinpu hong thugente kong behlapna hi. Khat veivei hun lui lai khawng gen lehang nuam hi ei guai. Lungdam. GK