USA ah na et teitei ding

Silver Springs, USA

Posted by: "Hau Za Cin" suante2002@yahoo.com   suante2002

Mon May 3, 2010 4:38 am (PDT)

Silver Springs, USA
 
USA na zin peuhmah leh na et teitei dinga hoih khat pen Silver Springs hi. Silver Springs ah leitungbup a minthang Glass Bottom Boats om hi. Lawm Andrew Khai tawh hih World Famous Glass Bottom Boat ah ka tuan laitak un a kim a kiangah vasa leh vatawt tuamtuam leng diaidiai a, sumkuang lian leh neu tui thuk sungah leeng diaidiai te kimu in, ngasa kaikuang leh tui gul namtuamtuam nuamsa a tui bual zong hoihtakin kimu thei hi. USA a kimuh cil laia gunkuang tawh hih Tuilipi tungah a paite zat hidinga ki ummawh gunkuang tui taw ah a kia zong Titanic tembaw tuitaw ah om bangin kimu a, a tui siang mahmah ahih manin tui taw meter tampi kimu hi. Hih banga gunkuang taw ah limlang kithuah pen ka khatvei tuanna ahih manin nuam kasa hi. Lamdang zong kasa a, manpha lah ka sa hi. Gunkuang bawlna dinga singluang hoih penpente tampi hih Silver Springs Tuilipi sungah kikhia te zong tui taw ah kimu thei a, mihing sangin tuitaw ah a om singluang te nangawn kum za tampi
sialo himaw ka ci hi. 
 
Jeep Tours zong om a, hih bel khe tawh a vak ngap mello pitek putek leh naupangte in Silver Springs huang sung khempeuh a muh theihna dinga vakna ahih manin ko bel ka tuang kei uh hi. Khamtung Mawtaw ka khe mah uh zangin ka pai ngiatngiat zaw uh hi. Vompi nam nih om a, a khat pen Himalayan Black Bear hi a, a khat pen Polar Bear hi. A nunungzaw pen lian lua mahmah ahih manin suangtumpi hileh kilawm hi. A masa zaw pen bel ka muhmuh ngeite hi lel ahih  manin ka olmawh khol kei hi. Lawm Khai in zong liansapian hi ding ‘vompi taktak hi mawk ei’ ci ngeu sam hi. 
 
Gunkuang neu ei leh ei kihawt tawm theihna zong om a, hawt man hi leng noptuak  mawhlo hi. No na hawh uh ciangin va hawt le uhcin maw…
 
Gamsa tuamtuam sakhi, sazuk, awle, mupi, vompi, sahang, etc leh a tuamtuam zong et theih dingin om a, ganhing lam lunglutte adingin et teitei ding hoih hi. Ganhing bek hilo, ganhing anpiak dan, annek dan cihte zong muh theih hi. Alligator anpiak dan et pen mikangte bangin nop asak uh khat hi a, gator annekdan pen mitphelo liangin a et nop uh khat hikeei sam hi. Lamdang song. 
 
Tuilipi tungah zong gunkuang leh tembaw neute pawlkhat kizang ngei hi ding hi ven tembaw lamlak Lighthouse om a, tua Light House tungah kah tohna dingin pingpeipi khat kibulh gemgam a, tua tungah kahtoh pen a tuampi khat hi. I lu hong vai dektak liangin hong pei duaiduai in, kipei vualvual in vantung lamah kahto diaidiai in a tawpna ah singkung sang pipit e dawn pekah kitungto in – Tuilipi leh a huang sungteng, a huan leh awle khawina, ganhing khawina, cinema etna, lasa siamte consert neihna te khawng kisuk et zezaa hi. Vanleng tungah tuang lah hibuanglo dingin taw ngakna sangpian hi. Nungak pawlkhat bang a nuailam en ngamlo in a lawmpa te uh kawi cip vetse uh hi. 
 
Hih Silver Springs Tuilipi ah a lamdang kasak khat pen Sumkuang kum 100 sanga upa zaw hi a cih uh om hi veh aw. Tangvetlo in om hithiat a, a nek ding ganhing ngakin om hithiat a, a kiangah hong pai thankik, ngasa, kauphe cihte na man ziauzel hi. Tua hi kei leh upa piñata ahi tam maw – vakkhia zo mel nawnlo hi. 
 
Hih mun ah hong hawhpih lawm Andrew Khai in tu laitaka pawi kizang Halloween Area ah hong vakpih khit ciangin Alligator tuamtuam – a kang, a vom, a sanpian leh a lian a neu ban ah Sahang omna mun khawng en in lungsim a Halloween Area sikha lim tuamtuam te mangngilh tawmtawm in inn lam ka zuan uh hi. Muh ngeiloh mu ka hih manun lungdam, lungkim leh lungtai takin inn ka tung uh a, kum kivei khit nungin zong kimangngilh thei nailo hi. 
 
 
Hau Za Cin
Phuitong Liim

LIGHTHOUSE at St. Augustine, USA

Posted by: "Hau Za Cin" suante2002@yahoo.com   suante2002

Mon May 3, 2010 4:38 am (PDT)

LIGHTHOUSE at St. Augustine, USA
 
St. Augustine, Florida ah ka hawh ni un lawm Andrew Khai in tembaw khawlna lamlak meivak Lighthouse ah hong hawhpih a, ka pianzawh hih bang mun ah ka khatvei hawhna ahih manin hampha ka kisa a, ka angtang mahmah hi. Lighthouse cih pen Pasian la phuakte in Christian nuntakna ah Topa Zeisu tawh na teh uh ahih manin tua ka mikha ah hong kilang den hi. Tembaw in Tembaw khawlna lam a zuat laitak in meivak Lighthouse ah na om kei leh a khawlna ding mun theilo in luigei peuh phu kha in tembaw kitamzan thei hi. Accident tampi tua banga om hi kici hi. Tua pen Lighthouse ka meltheihna hi a, a taktak a ka muh ngeiloh leh a thu ka tam theihloh, mualtunga ka ten manin lui lam vante ka meltheih tawm hi. Tua ahih manin hih Lighthouse hawh pen a lamdangpi hi a, a manpha mahmah hi. Alligator Farm ka hawh khit uh ciang ka hawh uh ahih hangin ‘nuam deuhdeuh hi’ cih bangin ka lawp deuhdeuh hi. 
 
A gal pan et pak in sanglua khollo tawh kibang napi, a tung ka kah tak ciangin a nuai khua kidak ngam mello hi. Huih lah nung ziahziah. Sam bang leng ziahziah, huih in sam nunglam ah hong mutsak leuhleuh lel hi. Puansilh leh pheituamte zong a gei ah tawm khat a kai deuhte bang huih mut in puak keukeu hi. A gei a let dingte lenlo in kivak khia nuam mello hi. A dawn dong kah tampi pen khuadak vetlo a kumkik zong bangzah hiam om hi. Ko bel ki pasalsak in ka dak uh hi. 
 
Lighthouse dawn pan khuadak leng gamlapi kimu a, tuipi tung a tembaw leh gunkuang vakte kimu thei sitset a, St. Augustine khuasung zong tampi kimu a, leilak ah mihing leh mawtaw taite bang khuttum ciacia bekin kimu hi. Lighthouse dawna meivak pen a kipei thei dingin kibawl a, tua pen meitha tawh kipei hi. Degree 360 kimvial in kipei ahih manin tembaw in gamlapi panin hih meivak mu in hih mun lam zuan thei uh hi. A meivak bawlna uh pen limlang kilengh thei khat tawh kithuah a, tua in meizang khauhsak in meivak kapna gamlapi tu hi. 
 
Meitha a kizatma in meivak ding pen meitui tawh meitawh uh hi. Meitui pen lei pan phelkhai tawh khaito in lighthouse dawnah meikhulna sungah va sungzel uh hi. Tua meitui pen khatvei khai in liter 15 khaito uh a, meikhulna sungah va sung zel uh hi. Lei pan lighthouse dawn dong a khaito dingin mihing tha mah kizanga, pasal thahat mahmah kisam hi. Pasal thahatlote in khaito zolo hi, kici hi. Meitui litre 15 pen 15 Kg / 22 pound bang pha a, tua pen lei pan lighthouse dawn dong minit 10 sunga tunpih ding kisam hi. A gen uh ciangin a tamzaw pen sila (Negro) a cihte un sem uh a, a thahat bek mah kizang hih tuak hi. 
 
Khatvei hih lighthouse meivak meitui puapa gimlua ahih manin ihmu kha a, a khanlawh ciangin a meivak na mit hi. A zingsang ciangin luigei ah tembaw khat tuahsia kimu a, tua pen tui nuai pan kitawmkik in tu in tua lighthouse gei inn khat Museum ah kikoih hi. 
 
Tembaw khawlna lamlak meivak et zong a kimangngilh theilo mitmuh khat himawk ei. Tua zawh ciang Mexican annek lailai pen la phuakte in ‘mi hampha ihi’ acihte uh hi; mit lah tai, gil lah vah hiven. 
 
 
Hau Za Cin
Phuitong Liim

The Village, USA

Posted by: "Hau Za Cin" suante2002@yahoo.com   suante2002

Mon May 3, 2010 4:41 am (PDT)

The Village, USA
 
USA gama pitek putek nasepna pan pension khinsate omna dinga kibawl lak pan a minthang pen The Village ah lawm Andrew Khai makaihna tawh ka hawh ni un ka muh ngeiloh mu ka hih manin hampha ka kisa hi. Barack Obama USA President dinga kitel madeuh hi a, a zi Michelle leh a running mate Joe Biden in zong tua mun hong veh hi. George Bush, Al Gore, leh politician minthang tampi in a veh denna uh hih The Village ah a lamdangpipi tam hi. 
 
Pitek putek te zat dingin mawtaw pei thum nei tampi kibawl a, tuate ah tuangin khuasung vak uh a, khe tawh a vak zolote in zong a hawh utna peuh uh hawh thei uh hi. A compound pen zai mahmah, siangtho mahmah, nuam mahmah hi. Cimthoihna ding, van leina ding, tuibualna ding, lamsiauhna ding cih bangin hoihtak in kibawlsak hi. 
 
Nitaklam ciangin pitek putek te lamna ding stage kibawl a, tua ah DJ khat kikoih in tuapa in la tuamtuam sasak in pitek putek te lam ziahziah uh a, pi leh pu a veh tanu tapa leh tute naupangte zong a ut peuhpeuh lam thei uh hi. A pi a pute uh tawh a lamkhawm tam mahmah a, gualnuam mahmah hi. Nai nih sung khawng lamna a bawl sungun a lam nuamte amau ut tan lam in ciah zel uh hi. Adang hong pai in lam kik zel uh a, a ut tan mah uh lam kik lel uh hi. Annekna ding a gei ah ompah a, van nengneng leina ding zong a gei ah om pah hi. Kei zong US ARMY lukhu khat leh sun glass khat ka lei hi. 
 
Inn lama nitak cianga veng leh pam kihawh tuah a, niangtui, tuibuk, bal, mai, vaimim peuh ne khawma kikholhkhop tawh kibanga US gamah hih banga kithuahkhopna a tampi kimulo ahih manin a lamdang zong suakmai hi. Miami Beach gei ah zong hih bang free entertainment cih khat om a, lasa siam leh music tum siamte in tuipi geia vakte ngaih theih dingin tum uh a, sum la lo in, a cim, a lungzuang peuh in tua mun ah vatu in va ngai uh hi. Tua bang kikholhna ei Zomi te in inn lamah kihau lel ahih ciangin ei adingin a lamdanglo suak a, US ah bel tua banga kikholhna tamlo, night party khawng cih loh, ahih manin a tuampi khat suak hi. 
 
Hih The Village pen pitek putek te in a thahat lai vua a kholsa uh pension sum leh savings te tawldam taka ne a ahun tawplam uh a zatna mun uh ahi hi. Amau a tu a tate in a pu a pate uh kem nawnlo uh hi (pitek putek khoina ah koih uh ahih manin). Tua manin hih mun pen a nuam thei bangpen in kibawl a, zong nopci takpi hi. Ahi zongin ngaihsun leng pitek putek te hun nunung zatna mun ahih manin lunglen huai hi. 
 
Hau Za Cin
Phuitong Liim