Lets bark again

Posted by: "Hau Za Cin" suante2002@yahoo.com   suante2002

Thu Jun 3, 2010 6:06 am (PDT)

Lets Bark Again (Hang Kik Dih Ni E): 
 
Zomi te pen a hang nuam mahmah minam hi cit ciat hi. Polhteh zaw lai. Khaksawh khawng la damdam. Cil lah utna peuh ah sia ziau. Na hoihlo khat mu leh bawlpha ning cih sangin HAN'SAN! Thuiiiii.... .!! Lampi ah singbul suangbul khat suikha leh, "Lawlawm, na paina ding en ve," ci pah. A meh huan phuulsak in a tui leet leh, "Lawlawm, na meh huan en lo maw," ci pah. Haan bekbek, haan bekbek.... TEK LEH MO film ah, "Paupau kei in ka kiu phul kha ding na hi..." ciin a teek in a monu kiuhsawm, ngiim teetaa..... Zomi te pen hih bang tawh  a kipelh nai mello minam ihi hi. 
 
Tua ahih manin i pelh ma in tawm khat hang kik dih ni. 
 
Gam leh lei neih mateng Zomi hi hang cih pen mite in a thu in thei bek dinga, a taka i  lah theih ding om nailo hi. Tua gam neih nang in bang sem leng piang ding hiam cih pen limtakpi a kikup huai mahmah hi. 
 
Minam a om phot kei leh "hih ciang ka minam te uh tenna hi a, hih ciang ka gam ding uh in ciamteh ni" cih ding hi theilo ahih manin minam min khat zong a kician khat i neih kisam ding hi. Tua khit ciang tua minamte tenna tua gam tua khua, tua lei teng hi kici thei ding hi. 
 
Minam min nei dingin namdang tawh i kilamdanna khat mite i lah siam kul hi. Minam dang tawh i kilamdanna pawlkhat - min phuah dan, kizep dan, kiten kipui dan, nopni dahni zat dan cihte mite aa tawh a kibatlohna mite i lahsiam kisam ding hi. Tua pen ngeina kep bit i cih pen hi. Mite zat dan tawh kibanglo nei napi mite a tawh kibang i zatsawma, mite cih bang i zuih pianpian leh ei-aa Zomi cih pen omlo dinga, "Zomi kici om nawn kei e, ngeina tuam nei nawn kei uh, mikang te aa zuita uh, mivomte a zuita uh, kawl leh vaite a zuita uh, minam tuam a hihna uh om nawnkei" hong kici ziau dinga ei i val ding hi. 
 
Minam ngeina tuam kep bit den na dingin i ngeina te a kizat den kul hi. I pawi ni thupi te i zat tangtang kul hi. Khuado Pawi leh Sialsawm Pawi te zat kisam ding hi. Christmas leh Good Friday te pen biakna pawi ahih manin Zomi te minam tuam ihihna lahna hilo hi. Mopawi zat dan zong mikangte kipi dan kiten dan te i zuih ziau a, biakinn leh biakinn kong khawngah a hiam, Hotel khawngah a bei ziau leh minam ngeina ahihna a omlo ding khat hi. 
 
Zomi hihna kepna dingin kizepna zong Zopuan, Zongeina kizepte i zat den kei leh Zomi hihna om  tuanlo a, a siing deuh nungak ten a teen a, a mong palh deuh tangvalte in a teen leh tua pen Fashion hilel dinga, tulai mikhempeuh kizepdan hilel hi. Zonik, Khephiau, Puandum, Puanlaisan, Tangciin cihte i limzat mahmah kei leh minam tuam ihihna om tuanlo a, Bazar ah a kizuak peuh lei a kizep ding hilel hi - Suit, Tie, etc. tawh e...
 
Meh huan dan zong Zomi meh huan Zohuan cih pen i limzat kei leh mite in Zomi te meh huan dan theilo dinga, Zomi te meh a tuam in om hi cih zong theilo ding hi. Zomeh a min tawh a huandan tawh nei lehang Zomi pen minam tuam khat hi hang cih kitel ding hi. Tua bang i lah theihding a om kei leh Zomi hihna om tuanlo a "one of the mongoloid races" kihi lel hi. 
 
La sak zia zong a tuam i neih om a, mi a tawh a kibanglo om hi. Tua pen tulai ciangin kizang nawn mello a, mikang music leh mikang lasak zia khawng bek kilimzat ta hi. Zomi ngeina lasak zia leh minphuahziate mite a tawh a kibang hetlo ahi hi. Sannem la, Lapi, Latung, Laphei, etc cihte pen minam dang a zang kitheilo hi. Ahi zongin Zomi te in zong kimansuah pianpian ta hi. English music sinna dingin guiter leh drums khawng sum tul tampi man bei in kilei ngam a, Zomi music van khuang leh dakte leina ding in i sum kizang ngamlo hi. Zang ngamlo bek thamlo kizahpih lai hi ta zen hi hang. 
 
Minam tuamtuam paikhawmna ah "Kei Zomi hi ing" ci kenkaan se nai ve, ahi zongin tua na lawmpa in na Zomi ngeina khat uh hong lak aw, ci leh bang na lak dia?? "Van a tung Solkhapi a taan lai tengin" cih la na sa suk mai diam?? Ahih kei leh Cingpian dandan e cing pian dandan e na sa zaw diam?? "Lam khat hong lak in ci leh Break dance na lak diam?" ahih kei leh "Saipi Khupsu na lak zaw diam??
 
Zomi aw, i kitot, i kihawmthawhna te i ki pulak ngeina ahih mah bangin tuni in Zomi ihih noplai takpi leh hih i Zomi hihna te i kepcing kisam hilo hiam ciin kong pulak hi. 
 
A sem ding eimah tek hi hang. Na ngeina na zumpih leh na minam a zumpih hi a, na minam na zumpih leh na minam mangthang ding hi. Na minam mangthang leh nang zong mangthang dinga, minamdang khat suak lel ding hiteh. Zomi ihihna it huai i sak leh Zomi hihna hong lak gamtatziate khempeuh a kem ding eite mah hilo ihi hiam?
 
Mi gam mi lei ah teeng in mite minam mite phung tang khin ding maw? Ahih kei leh minam tuam khata hong bawl Pasian hong bawlna kem cing ding? Na tu na ta na pattah ding nang tavuan hi a, na lawm na gual tavuan hi masa lo hi. 
 
Mangthang ding a Zomi a piang hi diam? 
 
Mangthang khawm liai liai lel ding i hiam? Midang nam dang zi leh pasal nei in amau zia leh tong zui in amau minam suak toto lel ding i hiam? Biakna thak zui toto in mite minam suaktoto lel ding ihi hiam? 
 
Ngaihsut ding om in na thei hiam? 
 
Zomi khat khantoh ding sangin Zomi khat nengniam ding leh hazat ding bek a i ngaihsut den pen i pilna tua ciang bek mah hi lai hi ding hiam? "Zomi kiamkiam, namdang khangkhang" ciin nau awihla phuak thak mai ding i hiam? Namdang lah phu ngam keek lo in Zomi leh Zomi mah kisimmawh ngakngak ding i hiam?
 
Lets bark again, are you ready?
 
 
Hau Za Cin
Phuitong Liim
www.hauzacin. blogspot. com