Goodbye England, Sorry USA:
Korea lam i mitsuan kal in USA zong na kia demdam mawk hilo maw. Pawi teei ei... USA in quarter-final beek tung teitei inteh ka cih hiven, zong ka up, ka deihsak hiven. Ghana te siamzaw mawk hilo maw. Amau Humpi, Sahang, Gialbem, Cinghpi, Sai cih khawng tawh a suk a to singnuai gammual ah Zomi te Mikangte hong tunma mah banga kidelhdelh lai uh ahih cianga hatlua, gim theilo, tawl theilo, bawhlung lah siam veve si, USA adingin bel a cihna ding om vetlo himai; U Suanpi cih bangin a 'khitui uh nul a nungakte vaidawnna chocolate leh coke dawn ding bek hita', kum li zawh ciang Brazil ah a ki "samba" zo diam maw, qualifier games acih khat uh omlai mawk ven, tua pelh toh ding zong a ol hi zenzenlo a, bangcih ta ding, pang ni ei ei USA pawl. Takkheh. Nuclear leh galvan tawh kidemna hi leh bel final beek tung ding hiven maw. Mi cimawh panpih leh a kisamte huh, veh, khoi, kem cih bang hileh zong final kah pelmawh inteh, ahi zongin bawhlung pumkhat bek mi 22 in a
sui masa ding kituh cih lamsang ah bel a hizo nailo suak phot ei.
"Don't Cry For Me England" ci a Argentina mipite kiko aw zak ding zong uthuai kei tak ei, English te hile'ng. Amau gel a kia masasa pen a kidawm vetlo, a kiko ziahziah, a kiciamnuih ziahziah, a ki eng hetlo te ahi uh hi. Tuni a Germany in 4-1 a England a zawh tak ciang, German te bek lungdam ding nahilo a, Argentina te zong na lungdam ding hi keei mawk ai ve. Leitung bel bawhlung banga bem hi in, kipeipei lel in, khat gualzo zel, khat guallel zel, angeina hi. "Ko patsa hi, ko zawh teitei ding hi" ciin England te in football khaam thei tuanlo hi. Amau patkhiat ahih leltak hang, a siamzawzaw in kidemna tualpi ah zo ding hita mawk hi. Tua manin "Goodbye England" hita mawk hi.
Mikhat in, "Germany te in kum 44 zawh ciang a goal kiguksak pen ngah kik pan uh ei" ci hi. Lampard goal khum, line peel hi napi puanlapvikpa leh phitmutpa in a muhloh pen uh a genna hi. Kum 1966 kuma Geoff Hurst in a goal khum pen German goal line pello in tuankik a, tua pen German te in "Ka goal uh hong guksak" ci uh a, mi khat in, "Tuni in ngahkik ta uh ei" ci hi.
Bangbang ahi zongin England in lel lua peuhmah hi ci lel hi. Bawhlung siamte khat in, "German in hong zo bek hi kei, hong su gawp uh hi (we were hammered) " ci hi. Hong zo dimdem uh hi. England in hihzah a lelh om ngei nailo hi. Tunai sungteng in hih zah in kuamah kilel ngeilo a, bang hang hiam, a siamteng bang suakta uh hiam, a kihilhzia, a kisinsak zia uh bangci hiam cih FA (Football Association) in a etphat kul ding hi, ci hi. Lampard goal a kimulo pen gen tham kei, tua zawh ciang zong hun tamzaw omlai, tua manin tua goal pen paulap theih hilo hi, a lel lua dimdem kihi a, i kivelphat ding hizaw hi. "Golden Generation" kici lianga bawhlung siam hizah England pan i neih laitak a WC ah hizah a i kiat mawkpen lamdang hi. Games 4 kisui a, hoih mahmah cih a om vetloh pen English Football bang hita hiam?? aci hi.
Twitter ah mi khat in bel, "Hih banga a kizawh uh pen penalty a pelh theihna uh lampi namkhat ahi" ci a, a lawmte in nuihsan ngeingai hi.
Rooney in WC 2010 sung leh amasa zaw ah khatvei zong goal khumlo ahih manin mite in lamdang sa uh hi. Tua hi a, English League ah "thunei lua" a phitmutte in zahtak lua ahi kha diam, suahtakna tuam ngah ahi diam ci nuam phial uh hi.
Tuzan a England nungthuap li teng pen FLOP peuhmah uh hi. Terry, Upson, Cole leh Johnson. Bawhlung suihkhia theilo, nang theilo, pia theilo. A khe uh siksekna ah puakkik ding in hoih hi.
German te a siam lua tuam zong hi kei, ahi zongin a tha uh kikim, a kipat pan kipan a tawptan in tawlnga vetlo in tai den uh a, a tempo uh khiam tuanlo uh hi. Pressure pia pah uh ahih manin English te buai pah hi. Tua pen technically leh tactically a a saan zawkna uh ahi hi. Tua ciang amau German League ah tua bang vive in kimawl a, EPL ah bel English lo mi tamlua ahih manin amau individual style ciat a zat uh kisam ci hi. France team te mah bangin 11 indidual players dan suak mawk uh hi.
TEAM WORK kisam ei Zomi ei zong gualzawhna dingin.
Oh, France te buaina pen amau pawlsunga siampen a kingaihsun Yoann Gourcuff kicipa Anelka leh Ribery in a hazatman uh hi, kici hi (hazatman?.. . guai Zomi te hong kisuanglah sak phialphial hiam aw,,, hazatman...) . Tukum France Ligue 1 ah a siampen a kitel, tua ciang khangthak lak pan zong a siampen (young player of the year) in a kitel Yoann Gourcuff pen France Coach Domenech in pakta ahih manin France kimawl ciang amah in bawhlung hawm ding ciin gen hihtuak. Tua pen upa pawl ci ni, senior player Anelka (Zokam hi leh Anel-ka, aneel -- kaa, ka mah inteh) leh Ribery cihte pawl in utlo, amau zong kimuang lai uh ahih manin leh tua khangthak pa hong minthanglua ding lau uh ahih manin hazatna tawh France 1st play ah bawhlung pia nuam lo uh a, amau teng bek kipia uh hi. Tua pen a coah in zong a lawhna ding thei tuanlo a, 2nd play ah kimawlsak lo hi. Ahi zongin 3rd play ah suisak kik mahleh Red Card mu hi. Tua in amau sung buaina themkhat daisak deuh hi.
Tua bang ahih manin France team sungah Hazatna lianpi om pen alamdang mahmah khat hi. Amau France te in tua bang lungsim a neihsa mah uh ahi diam? France leh Zomi pen kinaihna khat nei le'ng kilawm veh aw mate?? Amau kiang pan Zomi te'n va taw ihi diam, ahih kei leh ei aa vapuakzaw ihi diam? He he...
WC sung nausuak bangzah hiam omta a, bawhlung siamte bangzah hiam PA suak uh hi. Tua lak ah Holland te goalkeeper khat zong kihel a, South Africa pan Holland ah a tapa mel en dingin ciahpak a, ni khat a taam zawh ciang hong kilehkik a, Holland kimawlna ah kihelthei kikta ding hi.
Japan te gualzawh lungdamlua pawlkhat Osaka Ontobori lui ah na tuak gawp uh a, palik te in ngen tawh luakkhia kik uh hi. Gualzawh pawi bawl dan a tuamtuam hi. Ghana te in bel Bel seek lialua uh hih tuak a, Swiss te in bel bawnglong leh biakinn dak sat gawp uh hih tuak hi.
Maradona in WC USA 1994 laia drugs a nek zawh tutan in WC 4-vei sungah zatui kisun om nailo, thahatna zatui a zang om nailo hi kici a, FIFA te lungdam mahmah uh hi.
Brazil coah Dunga leh FIFA Secy Valcke te Jabulani bawhlung hangin kinial a, Dunga in, "Amah hong pai in hih bawhlung hong sui phot leh tel pan inteh," ci a, Valcke in, "WC bei mateng Jabulani vai kikup theih loh dinga, WC bei ciang coaches leh referee te tawh tukhawm in ka kikum ding uh hi, FIFA zong mite phunna a mawk ompih, a zalo kineih hilo hi," ci hi. WC 2014 ciang bawhlung min ding bang hong hizel diam maw...Zomihita cih khawng peuh hong hi thei tam maw?
Germany leh Argentina v Mexico a zo zawzaw ahih manin quarter final bel muhnop kha ding hi. Bangbang ahi zongin lungnuamtak in (kilungnuamsak in cizaw ni) USA leh England te, leitunga Democracy gam thupi te gel WC 2010 bawhlung pan mangpha khak phot leng hilo dia mate. England te bel phamawh sak tuak kei, amau Wimbeldon cih khat khialah tuak pian hihtuak. A ciahna lampi tawntung vuah 'goal-line technology' zat ding hita, zat hun luata cihte paulap kikup thupi pen in na neito uh henla... Carraghar in a gensa, a tapa ading Vuvuzela a puak ding mangngilh kei henla... till then, Tommys and Uncle Sams!
Bye... see ya.
Hau Za Cin
Phuitong Liim
No comments:
Post a Comment