Posted by: "CSKhai" ngeisok@gmail.com
Thu Apr 1, 2010 3:13 pm (PDT)
Sunday School ka kahlai in, bang hangin Christiante Bawlsiatna om a, Bang
hang in Roman te Galkapbu General Titus in AD 70 kum in Jerusalem susia
hiam? cihte nipi sanglai vuan na ah hong ki dot theih zel, ka phawk kik vat
hi. A man a hi a, a khial a hi zong in Sunday School a hong kigeen Tangthute
kong sut kikding a, a dik lo a om leh nong bawlphatnading un kong thum masa
hi.
AD 54 kum in, Nero a kicipa, a ma piankum kum 15 a phaklaitak in, Roman
Empire te kumpi hong suak hi. Kumpi a suah zawh kum 10 a cin ciangin, a ma
tenna Khuapi Rome, meitawh hong hal hi. Sun 6 leh zan 7 sung meitat satlo in
a kuannung in, Roman khuapi vut le vai hong suakta hi. Hih kumpi Nero pen a
cikzialo kumpipa ci in kiciam teh hi, a hangin, Apianna a nu leh, a it
mahmah a zi a thatpa a hihi. Roman mite kisak theihpih cikmah hun a kisia
ngeilo ding, bangmahin a suksiat zawhloh ding khuapi hibang in vut le vai
hong suah tak ciangin, thu kante in thu nakpi in hong kan uh a, a hi zongin
hong kipat khiatna thu mu khia zo mahmah lo uh hi. A tawpna ah, tua
hunlaitak a, Roman gamsung khempeuh a uk, Kumpi Nero hi bang in ci hi: Roman
khuapi meitawh a hal pen midang hi lo in, Christiante hi ci in tangko hong
kipat phet leh, a munmun a om, Christian te bawlsiat leh thahna hong kipan
pah ziahziah hi. Nungzui Peter (Pitazuh) zong hih Nero persecution hun sung
ah a bungbu leh lamin ki khai lum hi leh ki lawm hi.
Rome khuapi siatna bang hangin Christian te ki ngawh?
Nero in a genna ah, BC 150 kim pawlin Roman mi Antiochus,Palestine gamah
Ukpi dingin ki koih hi. Judah te in Kumpi Antiochus deih lo lua mahmah uh a,
tamveipi a thu nial in, do den uh hi. A hi zongin zozo lo uh hi. Khatvei
Antiochus Egypt ah galdo ding in hong kuan hi. Thuman lo khat, hong gingkhia
a, tua thuin, Palestine gamukpa Antiochus, a gal simna ah sita hi cih thu a
hihi. Hih Antiochus sihna thu a zak uh ciangin Palestine a om Judahte a
lungdam dan uh ki gen thei lo a, Kumpi Antiochus sihna hangin lungdamna pawi
bawl ziahziah uh hi. A hi zongin hih thupen, thu man hilo ahih man in, Ama
sihna hang in lungdam in Judah mite in Pawi a bawlna thu Antiochus in a zak
takciangin hehlua mahmah a, Jerusamlem hong tunkik phetin, Jews mite sim
mawh bawlsiat hong kipan pah ngekngek hi. Judah mite in a siangtho penpen
mun ci in a ngaihsutna uh Jerusalem Biakinnpi sung, Siangtho pen munah,
Judah mitein niin hi ci a a ngaihsut uh vok tawh Biakpiakna neisak mikmek
mawk hi. Hih thu hangin Judah mite lainatna leh thangpaihna nasia tak in
hong ki beh lap hi.
Emperor Nero in a genna ah Judah te leh Christian te pen a ki pawl theiden
uh a hihi. Antiochus in Judahte a simmawhna hangin Jerusalem Biakinnpi,
Siangtho penmun vok tawh a thoihsakna, hih hehna leh lungkimlohna thu Judah
te sungah om den a hihman in Rome khuapi hal tumna tawh, a lungkim lohna uh
hong thukkik uh ahihi ci hi. A hi zongin Judah te in, Christian te zang a,
Rome khuapi hong halsak uh ahihi ci hi. A hangin Judah te in Rome khuapi
hong halsak hi mawk leh, hih thu ki theibaih lua mahmah ding hi ci hi. Hih
bang thu bialbual kawm kal ah, thuman a hih leh ki seelcip theilo a, Rome
hongkat kipatna thu hong ki kankan ciang kumpi Nero ngawh loh theihloh hong
hi ta hi. Hih thu nial theih ding hong hi nawn lo a hih manin a tawpna ah
Emperor Nero a mah leh a mah hong ki that lumta hi.
A hi zong in Judah leh Roman ki kal buai na veng tuan lo in hong khauhpai
semsem a, AD 70 kum takciang in Roman Galkapbu, General Titus in Judah te
khuapi Jerusalem suksiat sak ta hi.
Antiochus a galsimnaah silo pi, si hi ci in, ki genkha mawk a, Judah mite na
lungdam luain, Pawi na bawl kha man zawzen uh hi. Ukpi Antiochus nak muh dah
zen si un teh ma taw.... Tua bang kumpih hih ding zong ut huai kei mah si
ee..... Hong ki phawkzo kei a, hong ki it zo kei zongin, hong ki muhdah kei
beek leh ee, tua bang mite nuntaakna a khasiat huai penpen nuntakna a hihi.
CSKhai
April 1, 2010
No comments:
Post a Comment