WC mah aw: The Blue Samurai Fell Yet Again: murlen

WC mah aw: The Blue Samurai Fell Yet Again:
 
 
Japan team te pen "The Blue Samurai" cise uh hi. Tua pen News leh Media ten tutung World Cup ah Japan team te a cihna uh hi. Brazil te The Selecao ci uh a, tua pen "the selection", a kiteltuamte "teltuamte" cihna hi. 
 
Tutung in Japan in sangpi hong tung a, tuni a penalty tawh 5-3 in Paraguay te lel zenzen kei le uh quarter final ah a lutto ding hizen uh hi. Ahi zongin Samurai team te football ah Kungfu bang phialphial in a leeng vava uh hang, zozo lo a, khitui naptui tawh a ciah uh kulta ding cihna hi. Kungfu tawmtawm hel uh ahih manin amau leh amau zong hong kiphu tuah gawp kha uh a, a langlamte zong flying kick phialphial in huihlak ah kibawh phial uh hi. Ahi zongin WC bawhlung pen Chinese Film "Shoalin Soccer" dana suih nahilo a, leilak ah a siam kidemna hizaw hi. Japan te'n kungfu style themkhat hello hi leh Drogba a khut a kitan veve tam? Drogba khut kitanlo hi leh Ivory Coast te in Brazil a zo diam? Zo hileh Brazil hih ciang a tung tam? Bangbang hi leh Japan te in WC kik ciang --- friendly hi in, competition ah hitaleh kungfu style dan pian hong khiam deuh le uh a hoih dia? 
 
I cih sam hang U Suanpi in bel hong thukimpih diam thei keng, Asian team te pen a sui nunung a ciah nunung hong hipian veh aw maw... he he.. limtak i dawn kullo dia. India Kawlgam cih khawng WC ah kilutzo pak lo ding ahihteh a dawn pawl, niangbel khai pawl bek ah na pang lenghilo dia. Niangtui minthang Indian Tea, Laphettoh, cihte zong tawi mangngilh kei leng maw, vaidawn mual ah...
 
Hih ka  at laitak in Kawlgam in Rakhine ah Sai Kang (white elephant) man hi cih ka simkha hi. English te in Sai Kang khawi pen "meetna omlo gimna bek pia nasep" cimah le uh Kawlgam in bel "hamphatna leh lawhcinna hong pia ding ganhing hi" ci bilbel uh hi. Kua a maanzaw cih bel a thei omtuanlo hih tuak. 
 
FIFA President in "Lampard goal a kisaansakloh pen pawi kasa uh hi" ciin pulak a, "Mexico lam ah goal khum masa (Tavez goal khum) pen zong off side hi" ci kik uh a, "pawi" mah sa kik uh hi. Mipil gamtat i cih pen khialh leh khial kha ung ei, ci uh a, Zomi te bang ei khialhna pi zong midang khat i nopneh zawh penpen mawhsak sawm cih bang hilo bilbel hi. Tua hi a, Pu ML Thangboi in, Kum 2098 ciang WC pen Zogam ah hong tung ding hi acih bang tuama in i Zomi zia honkhat i khel man kei leh hih leitungah i mihinpihte zong a hai milmel hi khin tuanlo uh a, ei vaimim leh gatam khawng hong lunggulh masa khollo maithei hi. Ahi zongin mite kholhpih siam in, mipil gamtat in, thumaan thutak leh cihtakna tawh Vaphual lungsim kiplet in i khahsuah kei leh hong piang takpi ding hi. 
 
Ngia in Tuuno a neknop ciang, "Ka tui dawn  ding nong sik nit sak hi" ci a luinak pan luitaw ah om Tuuno a mawhsak sawm bang lungsim Zomi te in i paihmang vingveng ding kisam lua hi. Tua hi kei leh Aesop in a thugelh te hangin lungdam in a khankhuk sung pan na nuinui lai ding hi... Ka ci mah veh, Zomi te tawh kituak... ka ci mah ve... ci ci kha ding hi. A = Ak khuangta (leitung pilna huih in hong mut ta), thawh hun ta (ei zong mite bangin pil in i hai lai hunte nusiat hunta). 

Scotland te in Englang te na thupi muh hetlo uh a, "ko zong WC qualified hi peuhmah le ung England te tunna ciang bel tungzo peuhmah nung" ci uh hi. 
 
Asian te tunna ciang bek a tungzo "Bawhlung ko patkhiat hi" a ci gamte pen Scotland in zong na zahpih pian uh hihtuak hi. Lamet zah mihing i tunloh ciang mite hong muhna kiam thei mah hi. Ahi zongin tua bang niamkiatna pan hanciam kik a tha a saan kik uh leh a kik ciangin gualzo thei veve ding hi. Ahi zong tu laitak bel England leh St/ George Flag pen English te mahmah in zong munuam phalo hih tuak hi. WC kipat ma a England bawhlung puan tampi mante (aman zah lian theilo, 100 pawl ahi tam maw) tu in GBP 3 (pek thum) bek manta hi kici hi. Key Chain GBP 32 mante tu in GBP 2 (pek nih) manta kici hi. 32 man te pek 2 in kingah ahih leh pek 30 niam cihna hi a, tua sangin England team te lungsim leh mipi te lungsim niam zaw lai, man tawm zaw lai ding hi ci uh hi. In God We Trust hilo in, Long Live The Queen himawk ahih cianga a kumpinu un a lapsang zawh kei leh Pasian bel a nihna ah koih mawk uh ci leng...
 
Sepp Blatter in July cianga ka tutkhop uh ciang a kisam bangin video technology, goal-line technology pen ka etkik uh kul maithei hi, ci hi. Ahi zongin USA te goal a kisaansak loh thu pen genvet lo a, USA te in bel, "Ko pen phun hat, gensiat hat cihte ka zang kei uh hi" a cihsa uh hi. Khutbetna tawh muak ding tua bang lungsim thupite hizaw hi, Zomi. Kimawlna bek ah hilo, laivuanna bek ah hilo, lasak bek ah hilo, a dang tampi ah zong mihing pen kikhial thei hi cih a tel mahmah khin gam leh minam te lungsim i theih ciang ei zong tua bang lungsim nei dingin i kisin ding a thupi hi a, tua bang lungsim thupi neite i zakciang khutbenga muak ding pawl ahi hi. Zomi kikhopna ah Zola sa thei teenglo in kawlla, mangla, vaila khawng hong sa duangduang, siam tumteng lolai, na sakma ngai siing maw i cihte pawl ah "a kilawmsakna a" khut i bet lunglung khawng gim huai, a taktak in "Ei leh ei a kikhemkhem" hi lel hang. I thupitlohna a lakkhiakhia hilel hang. Pahtakhuai,
a thupi taktakte bek mah pahtak ngam ding ahi hi. "Na-le-muh" pen zang tam kei leng hoihzaw sa ing, Zomi ngeina ah omlo hi. Zomi i mangthangsak nading vai khat ahi hi. Vaphual mei botbot i hi lel a, vaphual kha botbot ihi lel hi. A leng theilo dinga ei leh ei a kibawlbawl ihi lel hi. Zomi aw, khanlawh hunta, hip-hop, hip-hop.... :)
 
FIFA in France (ci ta ni, piantit cih a zang teitei nawnlo pawl zong omta ding ihih ciang) President Sarkozy kiangah, FFF pen na buaipih lua kei un, ko FIFA in a kisap leh ka buaipih ding uh hi ci hi. FIFA in bawhlung tawh kisai ah politics a kigolh ding deihvetlo a, a kigolh a theih leh tua gam FIFA bawhlung suihna khempeuh ah kihel theilo, tua bek hilo, bawhlung peuhpeuh a mau gam ah zong sui theilo, bawhlung tawh kisai peuhmah vai sai theilo in koih hi. Tua pen bawhlung leh politics a kimeh khak loh ding deihna hi. ZOFA ah zong bawhlung leh politics kihel lo dingin lamen ing. Play the game in the rules of the game. Manipur gam Miss Kut kitel banga a zo ding theihsa a bawhlung sui cih bang a omloh ding thupi hi, NO POLITICS PLEASE a kici giap bawhlung hi. Bawhlung pawi kipatma pan "Champion lopna ding" ci a a theisa om theihloh hi. 
 
Messi leh Maradona te sum na kikham uh a, Messi in Mexico tawh a kisuih uh ciang goal a khum ding kilamen in kitah uh hi, ahi zongin tutan in khum nailo ahih manin Messi liau a, Maradona in ngah hi. A zom ah zong sum kitah kik uh a, WC sungin Messi in goal nih khum teitei ding hi cih hi. A sum kitah zah uh bel kigenlo hi. Khatveivei Maradona zong naupang bang dekdek hi. Nuam asa lua hiam, ahih kei leh a om dan ding a theilo hizaw hiam, ahih kei leh zo in zo ta kei leh Bawhlung pawi WC pen nuam a sa ngiat hiam... kitheizolo hi. Bangbang ahi zongin WC bel ama adingin a birth-day ni tawh kibang den mai hi. Amah bangin i nisim nuntakna zang thei leng mi hampha mawhloh khat kihi ding hi. Ahi zongin ZONET sungah Maradona "guaktanga tai ding" a um tam pianpian sa ing (Argentina champion ding a um)... bang hong ci toto diam maw?? Kei bel, kua hiam te cih dan tak leh UMVEIH... 
 
Banghang Brazil te in zo leh ci ka hiam cih leh Brazil te a tamzaw in "Sawm-ah-khat" or Sumpi or(Tithe) maanmaan in pia hi kici hi. Tua pen a zuau hilo in, a takpi hihtuak hi. Ka theihna khat om, 1994 kuma a Champion vua a goal ngakpa uh Taffarel in Roberto Baggio, sakol mei sam neipa, in goal tungah bawhlung a suihtoh valval ciang lungdam in Pasian kiangah ko pah hi. Ama genna ah, "Italian Baggio pen Buddhist hi a, kei pen Christian ka hi. Pasian aw, tuni in ka Pasian leh Ama pasian kua hatzaw hiam cih hong kilangsak in ciin thu ka ngen hi. Tua ciang Roberto Baggio in sui a, kung tungah lengin vantungah kikhawhto hi. Brazil in champion a ngah kik hi, " ci hi. Tuapa biakinn ah pastor a sem Baptist World Alliance President lui Dr. Rev. Fanini in Shillong hong zinlai in gen hi. 
 
Tua zawh Champions league final ah Leuverkusen leh Real Madrid final a kimawl lai in tuni a Brazil captain in a puansungsilh ah, "I Love Jesus" cih na at a, goal khat a khum khit ciangin a puan suah a, a puansungsilh tunga lai ki at pen hong kidawksak hi. Leitung in tua "I Love Jesus" pen mu uh hi. ...... tua zawh FIFA leh UEFA in goal khum ciang puansuah phalnawnlo a, a suah a om leh "Kidawmin" cihna Yellow Card lak a, puan sungsilh ah zong laigelh ding kikham ta hi. 
 
Zomi te in bel puan tung bek ah hilo in puan nuailam pek, i lungsim sungah "I LOVE JESUS" cih i gelh hi. Tua mah i pulaklak pen ahi pah hi. Tua manin Pasian in Zomi te hih ciang hong lamsang a, hong domsang hi. Pasian thu tawh na khangkhialo, na kipattah nailo hile hang, tu ni in Brazil gammang lak, Amazon Forest sunga puansilh nailo guaktanga vakvak laite tawh iki bang dinga, Khitui Gospel Team ei sung pan pianglo in, Khitui Gospel Team koiteng hiam pan mission sem in hong paipai lai ding u hi. Tu ni in ei Gospel puakte hita in, i ngah Gospel a piasawn, a hawm sawn, mite khuavak a puaksawn ihi hi. Hih Lungdamna Thu ei bek in tutcippihih, a mangthang ding kha te donlo in ommawk le hang, vantungah amau te sisan a kiko ciang Zomi  te mawh hi hong kici dinga, i peng thei kei ding hi. Tua manin tuni in Gospel a tangko minam Zomi te ihita hi. 
 
WC ah ikihel loh hangin Zomi te zong i lungsim tawngah mikim muh theih dingin I LOVE YOU JESUS cih a kigelh ahi hi. Goal na khum kei zong tua lai kigelh pen mite musak teitei in aw, Zomi. 
 
World cup et nuam. Spain hat ding maw Portugal?? zingciang kimu kik ni...
 
 
 
Hau Za Cin
Phuitong Liim
www.hauzacin. blogspot. com
 
He Knows How You Feel 
Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.
 
He is able to run to the cry of those who are being tempted and tested and tried. 
Hebrews 2:18 (AMP)
 
Whatever you are facing, He knows how you feel.

Cope Topa sungluut - Kum 100 pawi ong simding - 2

Posted by: "Hang Khan Lian" hangkl@zomi.net

Wed Jun 30, 2010 3:41 am (PDT)

Zomi ulehnau,

Cope Topa tawhkimuh ding lawptak zo nawnlo kawmkal ah, kei pat masak ahihman
in, kimuhloh phamawh, pailoh phamawh, hun ong tungta hi. Kimu ding kapaihi.

Ka pai kawmkawm in mipilte thugen zia, ei gennop thulu nuai aa kai aa thugen
ziading cihkhawng lungngai kawmkawm in, “Cope Topa gen masa saklo ding, ke’n
kagen nop, kakohnop teng gen masa ding, tua hipeuh leh kei thulu nuai ah
amah koihzo peuhleng lau nading omlo” ci-in kei leh kei tha ka kipia hi.

Ka kimuh tak uhteh, “Zan in na laizial lom nusia kha hiteh” ci-in kalai ong
pia kik aa, “Na lai sung aa nagelh thu le la zong nong gensa ahihman in na
laizong ka na simkhinhi” ong cihi. Phadawm lai ei, kei thulu nuai aa ong
lutding theihsa kacihi.

“Zan aa natate khang vet kei leh apha zaw hi, kongcih pen na heh kei in,
Zomi, Zolai theilo, Zolai ading kagim katawlna teng hang hizaw hi” ong ci
aa, “Na lungtom, tengmah hilo ding ahia, Pu Dam Khup kiang, :Damm fool”
nacihteh, 'Na phulh nop na peuh ah phul in' ci aa ong nusiat hive cin” ci-in
ka nui kha dektak kik bilbelhi.

“Tua bek zong hikei, mual tung aa naupang awngawngte tangthu limtak kemcing
un, ni khatni teh na tangthu kipatna uh ong hidinghi” ongcihteh, “Tu mahmah
aa kum 100 tangthu kibawl ding kimlai, na tangthu kipatna uh kicihsansan
ding” kacihtha ong suak aa, “Aw, tuni tuhun aa kibawl kum 100 cin pawi,
tangthu kiplo ding acihna ahimawk ve” ci-in, ka khasiat tha ong suak kawm
leh ka hehtha ong suak aa deihtak awng kawm in, “Bang ee, na thu hai gen”
kacih leh aw nemtawh, “Na tangthu uh ong hidinghi, lim kep un, banghanghiam
cihleh, kei patsa tangthu na zom kei uhhi” ongcihi. Ka thangpaih man in,
“hihbang aa na hai paupau man aa Pu Ngul Langh in “mang hai” ongci hiloding
ahia” ka cihhang, ahaipau hihetlo in Zomite mailam ding amukhin lua ahihlam
katheihi.

Ka heh, kakhasiat luatlam ong theihteh, athukawng ong hei ziau in, Zogam bup
Tapidaw suak khin dekta hi, ci-in nalai sung ah nagelhhi”ongcihteh katha ong
lawp in kamai ong tai zawdeuhhi.

Topa aw, nang ong paicil lai in Tapidaw kici, Chistian tawm mahmah kawmkal
ah tuni tuhun in Zomi bup phial Tapidaw kahikhinta uh hi kacih leh thei ing,
tuading mah ahihi ong ci in lamdang saktuak khollohi.

Tuabek zong hilo, ko Tapidaw Pawlpi sung mahmah pan zong Laisiangtho sang
tampi ka hong uh aa, tuni tuhun in sang zaval bang omta dinghi kaci
leuleuhi. Cope Topa in zaval nacih ciang zakhat val nacihna hiam ong ci aa,
za khat val kacihna hi kacihi. Zaval cihtawh bangmah kakhen theikeihi, HKL
aw ong cihi. Zopau asiamlo na hihi, ongcihsan aa, “mangkang khat sang siam
zawbuang sam loding kahia” kei leh kei kakicih laitak, ka lungsim athei bang
khat in, HKL aw, na Zolai uh keima bawl ahihi, za val cihbang omlohi, za
khat val, zanih val cihbangbek omhi ong cihi. “Za kua val ciang ommah” ci-in
apau kakhian leh, “Za kua val ciang bek hilohi, za tampi omlaihi, za tul
zong omthei laihi, ongcihteh “tul za icih zong za-tul himah tah aa cih tawh
nang cih hoh hileh kilawm mah ee kaci simsimhi.

Kei khit aa ong pai F.O Nelson inzong sang khat ong hong hilo hiam ong ci
aa, ong hong mahhi kacihi. Tu’n tuasang koi ah omhiam ong cihi. Falam khuapi
ah omhi kacihi. Bangmah kisailopi in, “ A om nawnlote hang in lamdang kasa
hi” ong ci aa, “Topa bang nacih nopna hiam?” ci-in kadong kikhi.

Cope Topa in, “En in hkl aw, nidangin khua hun, guahtui aman nadingin
mualtungteng ah singkung hawi ding, singhalh koihding kahanciam aa singkung
tampi omhi. Khua hun man hi. Tu in singkung tampi te om nawnlo hi, lamdang
mahmahhi. Tapidaw keibek kahihlai in singkung tampi om aa, Tapidaw tampi a
omteh singkung om nawnlo ahihman in Tapidaw te singkung ne hidinghi. Lamdang
kasa mahmahhi” ong cihsan mawkhi.

“Hua mualbawk aa Biakinn dawn zum nih adawk pen kua Pawlpi te aa hiam?” ong
ci aa kipaak kawm in, “Tuiphumte aa hi kacihi. Pawlpi khang mahmah ahihman
in, Biakinn alui ah kita nawnlo hi kacihi. Tua ahihleh na Tonu uhtawh kalam
pen uh koi ah omhiam ong ci aa, “Tua sung ah kita nawnlo ahihman in athak
kilam kikkhin aa alui pen kiphel zohi” kacihi. “Om nawnlo ahihman in a omlo
teng lamdang kasa hi. Kei ong it nahi kei uh aa no leh no aki-it nahi uhhi”
ong cihsan hi. “Na tangthu uh na phel siang mangta uhhi”, ong cihbeh laihi.

Himawk mah tah aa, tanglai Thu-um masate hanciamna, kipiak khiatna te
kicamteh hetlo, kithupi sim kha hetlo hitah kacihi. “Vial Nang in ciamteh
hi, na mukha ngeihiam?” ongci aa, mukha ngei mah ing, tu in Rev. Gin Khan
Khual in tua Sia Vial Nang ciaptehna nacih alaibu kem khadingin ka umhi
kacihi. “Biakinn lam nading Pau Za Kam in Rs 500 apiaklam ka mukha hi” kacih
leh, “Tua Rs500 in tuhun in bangzah man ding na ngaihsun theidinghi, hunbit
Sia khat ii kum nih khasum tawh akikim ahihi” ong cihi.

“Sangmangpa aw, tonu tawh nalam uh tua Biakinn kaphel uhhang, tu in nang mah
phawk nading ka lam ding uh aa, sum leh paai zong tulza gawm tul nga leh
zanga (Ks.100000X5500) beiding ka sawm uhhi”, ci-in kipaak takin kagen leh,
alu ong peisan aa, kei khut-ma akeem nuamlo te’n no khutma kimuhding bek
adeih nahi uh aa, tua zong na keem nuam tuan kei ding uhhi, ong cihsanhi.
Kei lamsa aphel ngam te’n no lamsa naphel dinguh kamu kholhi ong cihteh,

Cope Topa aw, nang tawh kimuh pen kalungsim thei khol leteh kilawm ong sa
ing, asungluut hikei nicin, vantung pan aa ong kumkik hoh nahizaw tam ong
ci-ingh kacih leh, nang’ lungsim genloh, naPu,naPate uh lungsim leh na
tu,nata te uh lungsim ding katheih man aa hihciang atung nahi uhhi, na
mailam dinguh saupi kamukholhi ong cihsanhi.

Ka lungsim sung ah ama patsa tangthu zom nuamlo, ama khutma, sepsa sem
nuamlo, kem nuamlo cihpen itna mantak himah dinghiam ka kicihi.

Ka pau kagen dingmel thjei pak nawnlo kahihman in, Cope Topa aw, ong telsiam
in, kei tuni manlah kahihman in hihzah tawh ciphotni” kacih leh ong nuihsan
kawm in, “Zing ciang zong manlah nading nei leteh kilawmhi” ongci aa,
manlahlo kahihlam ong thei, nuam salo kahihlam ongthei ahihman in, “Manlah
kei-ing, nang na man leh tuhun mahin kong paikik dinghi” ci-in ka kikhen
uhhi.

Utlo sasa aa paikik dingcih kangaihsut ciang, kuama sawl hihetlo, kei sasii
zon tawm ahihna phawk kawm in, Pau Khan Ente Ngul Khan Pau te’Pasian nasem
aa kinei nahih uhleh hibangte tawh kimuh sawm bek le uhteh aive ci-in kamuan
kasuan teng min lokawm , leiituan kawm, dak-khawng kawm in innlam kazuanhi.
Kuama sawl hipeuhmahlo, cihmawh man ahihi.

Zingciang ong tunding kangaklah hetloh bangin ihtu ihta te zingciang ding
zong ngaklah huai kasa hetkeihi.

Hang Khan Lian

Cope Topa - sungluut, Kum 100 cin pawi ong siimding - 1

Posted by: "Hang Khan Lian" hangkl@zomi.net

Wed Jun 30, 2010 3:48 am (PDT)

Zomi ulehnau,

Tutak Zogam bup, gamsung gampua, Zomi kici khempeuh in Cope Topa Tedim khua
ah phualsat aa Zomite ading sep leh bawl ong kipatzawh kum 100 acin kum
pawipi khaam dingin ih kiginsaan laitak hi aa, neulai khuado ding ngaaklah
bangin ihmu sip theilo liang in ih om aa, akimu peuhpeuh, “Cope Topa Kum 100
pawipi na siim sawm uhhiam” ci-in ihki dot kiho ngeingai laitak ahihi.

Hih pawipi simding lak ah USA aa Cope Topa’ Pawlpite, Tedim sangmang ong sem
ngei Nelson Topa innkuanpihte, Pawlpi mite zong pawisim ong kuan kha ngel
ding uh aa, tukum sungin zong pawlkhat ong zin khin uh itheihsa ahihi.

Cope Topa Pawlpi pan aa te ongzin lai in, kikhopna, kimuhkhopna khawng ah
kua mah pau mello, kua mah tawh zong kiholim mello in mupi tu bangin om
ngelhngalh lel uh hihtuak aa, bangmah zong kin neih tuak mello uh kici
ahihman in, galkap kumpi akihta uh ahiphial zongin, lamdang mahmah kasahi.

Tua kawmkal laitak in, “Cope Topa’ Pawlpi mite lak ah Cope Topa mahmah ong
kihel hileh Zomite ong it mahmah ahihman in, hici buangsam loding aa,
lawpna, pahtaakna, lungdamna khatpeuh onglak, ong genkhia sam ding hitah”
ci-in Cope Topa ong nusiat kakhasiat tha ong suaksaan peuhmahhi.

Tuabang khasia aa ka omlaitak in kathuzaak khat in, “Cope Topa Pawlpi pan aa
ong paite lak ah Cope Topa mahmah, asunglut kik khat zong ong kihelhi” ong
kicih ciang lamdangsa in ka dipbang ong kua liang aa, “Tua ahihleh bel tuma
kum 100 lai leh tuhun lai amukhawm mikhat om ahihman in, lamdang sakna tawh
apau aham lohding mah uhhi kacihi.

Cope Topa ong tunlai Zomite lak ah amu, athei, akihel kha khatzong ki
omnawnlo kawmkal ah, Cope Topa mahmah sunglut kik, ei lak ah ong kihelkik
cih pen ih taangthu aa kipan amu, athei, ateel mahmah khat om cihna ahihman
in lungdam huai diak kasa aa ka kipaak peuhmahhi. Ka khasiatna, kalungzinna
teng ong mangthang, ong veng pahhi.

Kei zong tuapa tawh kimuh ding kahanciam aa, abeisa hunkhat lai, nitaak, zan
lam hunkhat hun kangah khawm thei uhhi. Kimuhding hamsa sak mahmah uh,
manlah mahmah uh ahihman in, kimu thei ding cih ong zaaksak uhciang keizong
thoto pah in, kimuh ciang aa kagen ding, kadot ding khempeuh kageel pah aa,
Zomi sung pan akimu masa pen zong hikha maiding kahihman in, Zomite tawh
kisai vai khempeuh kakaikhawm pahhi. Kei thutheih keibek mah athei ka ut aa,
kazi kata te zong kahilh keihi. Zomite dan, lungtang puakzia mah hi-in Zomi
kician mahmah cihding kahihi.

Kimuh niding ong tun petmahteh dotding, gending aa kakaihkhopteng
kamangngilhloh nading aa kaciaptehna lai zial lompi khat kakhut sung ah tawi
kawm sa in ka om laitak, “Azenzen in a sunglutlo pi khat, ong kikhem hikha
leh zum huai ngelding hitah” cih phawk kahihman in, kimuh masakleh Copa Topa
taktak nahiam cih dot masak ding kalai lom tawi na tungnung pen ah laitui
san tawh kaciamteh pahhi.

Kimuh phet mah in, Cope Topa taktak ahihleh ahihloh taangthu kazaak ngei
sunsun tawh thudong kineih kawmkawm in kasit tel pah aa, Tui kiphum masa,
Tapidaw suak masa te, Pawlpi Sia masa Sia Vial Nangte, tua laitak aa Tonzang
Ukpi Pu Hau Cin Khup thute, ka dot bawl ciang, kei dot bek hilo, ei theih
khakloh, ei phawk khaakloh, ei thupi sim khakloh honpi khat zong ong genpih
ban ah, Zolai aa kipan, laimal gawm zia zong ei zah mah aa siam ahihman in
ahitakpi ahihlam kathei pahhi.

Kei zong ka laizialpi phelkhia in gending dotding teng akipan pah
buatbuathi. Cope Topa in, “Nakhut sung aa natawi banghiam?” ong ci aa, “Nang
dot ding aa kakiginna tenghi” kacih leh, “Hun tampi ngahlo hi’ng, dot ding
leh gending tampi zong om in ka um keihi, minute 15 acin teh naciah theihi”
ong cihsan malam mawkhi. “E’n ,anuam keiding sa aa abangci mi himawk hiam?
kakicih kawmkawm in mangdan aa amah phat dinghoh kisam hikha leh ci-in Cope
Topa kiang ah, “Topa aw USA gam pan, ko Zomite khuamuh nading aa nong pai
kalung uh dam mahmahhi, nang om kei leteh ko Zomite minam mangthang asuak
khin ding kahi uhhi. Tua hangin Zomi bup aitaang in lungdamna ong ko kahihi”
kaci masahi.

Cope Topa in, “Lo kho ding aa kuan khia khat in lo akhawh pen alamdang
hilohi. Lo kho lo aa gam avaak leh alamdang ahihi. Lo akhawh hang lungdam
nading zong omlo hi, asep ding asem ahihi” ong cipah malam aa, “Kilem tuak
kei si” ka kicihi.

"Cope Topa" ci aa kasap hoh deihlo, lokhial hikha ngel ding kahihman in
ci-in ihzaak ngei “Sang mangpa” cih tawh kasapzia kalaih sawm hi.

“Sangmangpa aw, nang ong pai laitak nang ma ong phuat saksa sang khat leh
nih bek om aa, tu in ahihleh khua khempeuh ah sang om tahi” kaci leuleuhi.
“Tuni tuhun in ka minam suang vuah mipil misaim tampi tak zong kanei uh aa,
Ph.D ngah taktak zong tampi ka om uhhi, tuate nang ma ong pattahsa ahihi”
kacihi.

Sangmangpa’n zaaktuak mello in, “Tu aa naupangte awt ngeingai bang pau
hiam?” ong ci aa Kawl lai sim ahi uhhi” kacih leh “Thei mah ing, kei zong
Sia Po Kuhte Sia Swe Zan te kahilhsak ngeihi” ong cihi. “Athei in bangcia
ong dong” ka kici simsimhi.

"Zo lai kisin nawnlo hiam?" ongcihteh, mi gensiat ding pongpong ahihleh
lawpna leh mai muh nopna tawh, “Ka Kumpite un sinding ong phallo hi” kacihi.

“Zi nanei hiam?” ong ci aa kalungsim sung ah, "Bang kisai” ci kawmkawm in,
“Nei mah ing” kacihi. “Ta nanei hiam?” ong ci leuleu aa, ta khaam ding sawm
vetkeng ci nuam sialua in, “Ta nga nei ing” kacihi. “Zinei, ta nga nei, nazi
nata an navaak hiam?” ong ci aa vaak mah ing kaci hi.

Zinei, ta nei, anvaak, na tate akhang hiam? “ ong ci leuleu aa, “Khangmah
agol teng nungak tangvalta hi” kaci hi. Cope Topa in, “Khang kei leh
ahoihzaw ding ahihi” ong cihteh, kaphawk pah lian aa, ka zangsiip keek khak
mahmah kabanghi. “Ka-it Zomite Zolai hilh ding kua ma kumpi ongsawl ahi
keihi, no, natate uh ahilh nawnlo ding saleng Zolai kong bawlsak keidinghi”
ong cihsanhi. Ong cimah niteh ka ki cisimhi.

“Tua ahihleh Zolai tan bangzah ciang sin theihna om hiam?” ong cih leuleu
teh,”Hihpa tawh kiho kidop kulding ci kawmsa in, “Tu in ahihleh ZCLS in tan
5 lai simbu ding abawlsan laitak uh hihtuakhi” ci-in ama dotna kapelhbawlhi.

Cope Topa in, “Ke’n tan 4 ciang sinding kabawl lam katheihi, kum 100 khitteh
tan 5 laibu kibawl san ahihleh tan 10 ciang tun nading kum 500 sawt
laidinghi, tua hunciang Zolai asinding om nawnlo dinghi. Sangmang bangzah na
kisam lai uhhiam?” ong ci aa, “Saangmangpa aw” kacih khitteh, ka aw kadang
tawng pan ong kahto nawn keihi. Ka mipil, ka misaim, ka Ph.D cih luapluap
khakte’n kadang tawng ong khak hi.

Tua kawmkawm leh akhut aa nai ong en aa minute sawm cingta hi. Ei gel kimuh
bel tuahpha kisa khol keng kakici simsimhi.

“Nang nong dotma in ke’n khat ong dong lai vet ning” ong ci aa, “Tedim
khuapi sung ah sang bangzah omhiam?” ongcihteh, kei hun tung sapian leh
kipaak takin “Tawm lo ee Sangmangpa, kumpi sang, Laisiangtho sang, naukepna
sang, Biakna sang avek aa kigawm 20 peuhmah pha hamtang dinghi” kacihi.

“Hua mualtung aa pen bang sang hiam?” Ongcihteh, kaphawkpah lian aa, kei leh
kei kilep kawm nuam in, “Kumpite thapiak Kawl biakna sang ahihi” kacihi.
“Kumpite thapiak” cih kammal alunglut ding kasak leh, “Sangnaupang bangzah
omhiam?” ong ci teh “30,40 bang omdinghi” kacihi.

Sangmangpa’n, “Khuasak leh Tonzang aa kasang hon lai in sangnaupang 30, 40
pha leh kalungdam mahmah dinghi” ong cihteh, “30, 40 aphalo tawh kum 100 teh
Zomi bup Tapidaw suak mangkhin cileng tuzawh kum 100 teh…” cih kangaihsun
kha aa tawm veisung kadai cip hi. Sangmangpa’n “Bang ngahihsun nahiam?” ong
cih kawm in, Singapore mangpau kawmpak hiding hiven, “What to do?” ong
cihsan aa, kei ong cihna ahihlam theilua, “ No nazop lohpi uh ke’n bang
lawhding” ongci ahihlam theilua kahihman in kakuncipta hi.

Sangmangpa’n, “Ih huncingta in, nang tawh kiho nuam ahihman in zingteh
tubang hun mah in kimu kikni” ong ci aa, kalawptak nawn keihi.

Inn katunkik teh kakhut aa laizial katawi koi ah nusia kha cih nangawn
kathei nawn keihi.

Ka pailam banglo in, “Na sungluut dah leteh ka om nuam mawhlo lel mah hiven”
kacihtha ong suak peuhmahhi.

Zingteh bangteng ka tuak lai zentam ci-in ka mipihte ka ngai peuhmahhi.
“Puak khop anuam” icih hang hi-in ka umhi.

“Nang tawh kiho bel ka panmun lemtak sakeng” ka kicihi.

Kimuhding alawpnawn taklo,

Hang Khan Lian

Hua 'Octopus Paul' Zel Aw

Posted by: "Hau Za Cin" suante2002@yahoo.com   suante2002

Wed Jun 30, 2010 6:01 am (PDT)

Hua 'Octopus Paul' Zel Aw:
 
 
Octopus Paul in Germany v Argentina kidemna ah kuan zo ding cih a dotna vuah a dawnna ding theipah loin nai khat val a kiziazia zawh ciangin lawp mello in Germany in zo ding ci nuangnuang hi. Tukum FIFA WC sung khempeuh ah a kidot simin a gente 100% maan, dik lai a, 2008 European Championship laiin (EURO 2008) Germany suih ciang a zawh a lelh ding a genna 80% bang dik, maan hi ciin a neipa Tanja Munzig in gen hi. Hih ganhing khut tampi nei a a ka biambuam in Eng v Ger zong gendik zo hi. Sea Life Aquarium sungah kikhawi hih ganhing lipkhaphuai pen Hitler in a khanlai in ama symbol dingin na zanga, leitungbup lim (globe) pen na lencipsak ngei hi. Octopus NAZI kici hi. 
 
 
England ah piang Germany ah kikhawi hih octopus in a genna tukum 100% a hihlai zenzen hang, 2008 kum a a genna ah 80% bek himawk ahih manin Argentina a deihte adingin zong lungkiatpahna ding omlo hi. Octopus Paul in zong Arg v Ger ah a tel masak ding theilo a, sawtpi kivei ahih ciang, kisikim ding, penalty nangawn a suih khit uh ciang zong kisikim toto lai ding hikha inteh ci uh hi. Tua ahih manin Ninoni kimawl dingte muhnop mahmah ding hi. 

Guus Hiddink in Sepp Blatter in, "Video technology kizang ding hi a cih kei leh zingciang FIFA President ahihna pan tawp hen," ci hi. 

 
 
Fernando Torress, a kigen zah sanga a siamlo zawpa leh Liverpool pek pan bawhlung siam leh goal khum siama ki uanggen, a kigenzah sanga khum ngeilo, model tawh a kibangzawpa tuni ciangdong goal khat zong khum nailo leuleu hi. Cristiano Ronaldo in Spain te a lelh uh pawisa a, Torres in tu tan kung khatzong a khum  nailoh pawisa hi. Themkhat pen phadawm lai maw. 
 
 
Hih ka gelh laitak  U Suanpi "Cinpu in bawhlung pan gospel hong lutpih mawk" a cih pen, Brazil te bawhlung pen Gospel tawh kibulphuh ahih manin gualzo zel uh a, tua manin ka deih hi, tua manin tu tung zong amau zo dingin ka um hi, ka cihna hi. 
 
 
England coah Capello dotna 12 million pound dotna khat dong uh a, tua pen "Na tawp diam, na sem zom diam?" cih hi. A dawnna ah "Ka semzom nuam lai hi" ci hi. 
 
 
WC Trophy tawh a kibang (i gensa Replica, a lim, a tuh) 7 hilhial FIFA office, South Africa pan kigu khia a, palikte in a zon saan laitak uh ahi hi. Tuate pen Final zawh ciang a kipia khia ding hi a, amuh man kei uh leh a thak zong bawlman sam lo ding uh hi. Internet pan attached khawngin zong kikhak thei ding uh hiven (a tua bel ka ciamnuihna hi sam). 
 
 
WC sunga press mi tam a tonpih pen Brazil te hi a, mihing 700 tak pai liang uh hi. Ahi zongin tutan khatvei bek Coah Dunga tawh Holimna (interview) nei pan uh a, press mite bel lungkim tuak mello u hi. WC 2006 Germany lai in nisim in press te in Brazil players te nih ta Holimpih zel uh a, tua hangin a bawhlung vuah lunglutzolo, semi final ah kia, ...ciin tu tungin Dunga in a naupangte khatvei beek zong press te tawh a holim ding phal deksuai lo hi. Mite bek hilo in, FIFA in zong tua liang bel uanglua sa hih tuak hi. 
 
 
A sia a pha a genkhia pawl (football critics) te in Rooney leh C. Ronaldo in tutung WC ah a siamzah uh kidawklo, a suih khempeuh vuah a siamloh tuak dan uh gen a, "bang thukimna sa nei uh hipeuhmah ding hiam?" ci uh hi. Mite lametna tunglo ahih manin a kigen ding theiluapi in C.Ronaldo in Spain te a lelh uh ciang Media te dotna zog dawnglo in paisan a, TV Camera mai ah a CILSIA hi. Tua pen mi pawlkhat in CILPHIH hi ci a, pawlkhat in hilo ciin kinial uh hi. Hua lai ah zong "mi mawhna zong pawl" na om veve ahi tam maw?
 
 
G20 Khoppi Canada khuapi Toronto ah kizo ta a, Germany Chancellor Merkel zong ciahta dingin hi. Ahi zongin a gam vuah kitelna om dekta ding ahih manin a cinkik ding kilamen mello a, bawhlung zong lunglut takin en thei nawnlo hih tuak hi. FIFA te in politics leh Bawhlung kizom theilo ding a cih uh hang, a kipelh theilo khat zong himawk veve veh aw, mate. 
 
 
Na ngaihsun kha uh hiam? Japan te kisuih laitak, Paraguay tawh a kidelh ziahziah ma un amau Nam La tuak sa uh hi. Japan te Nam La a kisak ciang a mel uh khat khat in hong dawk a, a MUKMUL uh India vaite bangin hawi se uh hi. A hawi mah uh hiam, a Thokolong mukmul po laitak hiam, khatvei zong mukmul kiat nailo te hizaw uh hiam. A kiatna ding neilo bel hi khollo ding ci leng. Limtak na et vua leh Japan Gal laia japan galkapte mel mah suun lai uh hi. Zogam khawng hi leh khuata pan Kawlpi hong zin, kisil mello, sakol nungzui kawma hogn nitaak tun khawng tawh kibang uh hi. 
 
 
Sai Kang i cih pen laidal bangin kang taktak lo a, au-san (pink) pian hi. Nizung in kap leh a san tawh kibanga, a dangte bangin vom lo cih man bek hi. Lamdang limlim. 
 
 
NAZI ci a i theih pen amau a gelh ciang NASI cih bangin zong gelh uh hi. Brazil zong amau a gelh uh ciang Brasil ci uh a, en Zomi i cih mite in Chin ci a hong theih mah tawh a kibang ahi tam. Holland zong amau leh amau Nederlander kici hilo hia? Zolai bek hilo midang te zong na buai tek e mate?
  
Guai, England te guallelh la khat om aive, na thei kha uh hia? 
  
Hau Za Cin