Sat Mar 20, 2010 5:52 am (PDT)
Sailo Lal Saithuama Khua Murlen
PLATINUM JUBILEE
March 4-5, 2010
Dr. Hau Za Cin, Phuitong Liim
1934 kuma kisat Murlen Khua kum 75 cinna Platinum Jubilee March 4-5, 2010 sung Murlen khua ah nopci tak, thupi leh manpha takin kizang hi. Mizogam kumpi pan Minister Pu H. Rohlun leh MLA Pu TT Zothansanga te leh Officer sawm val in hih hun uap in hong zatpih uh hi. Mikhual khempeuh 382 pha a, Sial – 2, Bawng – 1, Vok – 5, Kel – 1 kigo hi. Ganpi sa nelo te ading Aksa leh Ngasa kibawlsak hi. Murlen khua tulaitakin inn 85 pha a, mihing 554 om hi. Murlen vanglai a cih uh kum 1950 kiim in Chuanchung (Zomi veng) inn 120 pha in, Chuanhnuai (Lusei veng) inn 50 pha a, a vekpi in inn 170 khawng pha uh hi.
Kum 100 tung lam dam mi thum bang pha a, tu laitakin kum 75 tungsiah damlai zong mi 17 pha hi. Pawi sim upa pen Upa Gin Za Kap kum 90 hi a, kum 75 tungsiah pawi sim mi 13 pha hi. Murlen khua pan Pastor 18 khangkhia a, Doctorate Degree nei mi 5, Medical Doctor mi 3, First Class Officer mi 7, Army Officer mi 12, B.A. tungsiah zosa mi 147 leh Biakna Pawlpi Upa Ordination ngahsa mi 47 pha hi.
Hihzahta a khua thupha ngah ahihna a gen uh ciang Hausapa in Pasian a phawk man hi ding cih hih Jubilee ah kilimgen pen a, pawi kikhop hun simin mipi in Pasian tungah Lungdamkoh Thungetkhopna kinei den hi. Tua pen a lamdang diakna leh a tuam mahmahna, mipi pawi himah leh pawi dang tawh akibat hetlohna leh khua mipi khempeuh a angtang diakna hi. A vaisaite zong siam sa a, Topa ompihna leh lamlahna zong hi dingin ki-ummawh ciat hi. A kigen theilo Kha Siangtho kithuahpihna kitang hi. Mizogam bup leh Murlen ah zong Kha Siangtho hong tun 1947-1948 pawla pen in tu hun in zong Murlen khua mite hong ompih lailai hiding ciin kiciamteh hi. A kicingzaw in genlai ni.
1947 kiim pan in Kha Siangtho hong tungin lamna, dianna leh Pasian thu ah khanlawhna lianpi a tun ciangin Pu Lal Zam, Pu Ngin Khaw Hau, Pu Thang Sian Ngin leh Pu Saihlei, Pu Thang Kung, Pu Dar Hnun, etc cihte in limna leh lawpna tawh Kha nasepna tang uh a, lungdam in lamlam uh hi. Thunget hahkat in Biakinn leh Pasian thu kin bawl in, kikhop pelh ngeilo uh hi kici hi. Amau tangthu tuamtuam nei a, Pasian leh Kha Siangtho nasepna (kei bang) ka theih ngeiloh tampi piang mawk hi. Pu Saihlei bang kum 90 a phak tan in zong kikhop pelh nawnlo hi kici hi. Tua bek hilo in Christian min khumna ah a min uh gelh ding in ut uh hi. Tua hun laiin Christian suah ding pen innkuanpihte leh meltheih u leh nau tawh kikhenna ahih manin mi tampi in haksa sa uh hihtuak hi.
Hih Kha Siangtho tanga lawpna nei mite Murlen Hlimsang kici a, Mizogam khua tuamtuam pan mite hong pai in amau kiang panin Kha Siangtho dawh, ahih kei leh Kha Siangtho puktaw ciin hong pai ziahziah uh a, mi tampi lungdamna leh Kha Siangtho tangin ciahkik uh hi, ci hi. Amau Hlimsang te zong khua dang ah zinkhia in Kha Siangtho kikholhpihna va tangko kawikawi uh a, apaina peuh vuah mite in na lawppih, na metpih, tha ngahpih mahmah uh hi ciin gen uh hi.
Hih pen a lamdang ka theih ngeiloh thu hi. Murlen pan Kha Siangtho tang om cih a kigen ka zak ngei hangin hih Murlen Platinum Jubilee ah a kicingzaw a Upa kum 80 tunglamte gen ka bil mahmah tawh ka zak khatveina hi. Amaute hih thupiang a taktaka mit tawh a mute hi a, amau genna kician mahmah hi. Topa nasep lamdang hi.
Hausa Pu Saithuam pen Jan 15, 1894 kumin Kawihthuanghmun ah pianga, October 2, 1956 kumin Champhai ah si a, Murlen ah kivui hi. A zi Pi Ngai Kang pen Thawmte beh hi kici a, Zokam (Tedim pau) a zang ahih manin a khuapihte uh Lusei pau theilo te kiangah Gospel puak dingin amah kizang hi. Lai Siangtho sunga Esther bang hong phawksak hi. Amau deihsak takin Christian a suak nailo a khuapihte uh Pasian thu hilh in Cope Topa hong teisak Lai Siangtho pen tawi in Pasian thu va hilh zel a, Tapidaw suah ding hi cih va gen zel hi. Christian suak masate a kikhop ding uh ciang a kikhop ding dan uh theilo uh ahih manin Leisenzo pan hong pai Pu Son Lang, Evangelist in kikhopdan sinpih in makaih thei zel hi kici hi. A lamdang takin Pasian thu hong theih uh ciangin khantohna tampi hong piang hi kici hi.
Hih Jubilee ah Hausapa Christian ahih mana a khua mite in Thupha a ngahte leh a khua mipite Topa in a lapsangzelna thute kilim gen pen a, nek leh dawn leh neih leh lama khantohnate kitam genlo zaw hi. Thungetna leh Pasian thu tamzaw tawh hun khempeuh kizanga, a thupi veva lua ahih loh hangin lungnop, lungkimna leh lungdamna lianpi ciat tawh hih hun kizo thei hi.
A kigen a lamdang kasak pawlkhat:
1. Murlen ah mi cidama, kum 100 tungsiah dam zong om den hi kici hi.
2. Murlen mite a ci a sa uh hoih in, Hnahlan Doctor pa bangin, “Murlen tangval leh Hnahlan tangval pen a ban uh lawng bek leng zong kikhenthei” ci hi.
3. Murlen khua pen numei pasal thu ah siangtho in khuadangte zahtak khua hi ciin kiciamteh hi.
4. Murlen khua in a gam uh meikangsak ngeilo, gam hoihtak kem a, a sunga singgah theipuam leh mehding omte limtaka kem, singkung mawkphuklote hi kici hi. [Tua man hi diam, tun Murlen National Park cih min puasak in India kumpi in limtak kemcing hi].
5. Hausapa leh a zi Pi Ngai Kang in a khua mite Christian a suahna dinga a panlakna uh kilim penpen hi.
6. Mizogam ah Hausa kibeisak a Democratic System zanga kitelna a om ciangin zong Murlen hausapa pen a khua mipite in it in, kuamah in bangmah cihlo in amah zong khua ah teeng suak a, a teek sih ciangin zong khua mipi in it tak deihsak takin vui hi, kici hi. [Khua dang pawlkhat Hausate pen hausa a kibeisak ciangin amau khua ah om ngam nawnlo in taimang, pemmang uh hi].
7. Tangvalte cidam thahat uh ahih manin khuadang tawh misi kisuh ciangin khuadangte in kihta in sawtpi kisuhpih ngeilo kici hi.
Nidanga pupa huna kikhawl ngeilo minam tuamtuam kithutuak taka tenkhopna Murlen pen kua theihkhak ahihloh hangin Pasian Thupha saang, khua nuamsa khat ahi hi. Pasian min suanga kisat khua ahih manin mailam ah zong Thupha tamzaw sem hong luanglai ding hi cih upna lianpi kinei hi. Because it’s like: “In God We Trust”. //
Murlen Platinum Jubilee: Pastor kip te tangthu tom – 7
Posted by: "Hau Za Cin" suante2002@yahoo.com suante2002
Tue Mar 30, 2010 3:35 am (PDT)
Murlen Platinum Jubilee: Pastor kip te tangthu tom – 7
Pastor 18 lak ah a pianna pi Murlen khuami ahi Sia Khoi Lam Thang, GS, Bible Society of Myanmar a kihel mangngilh hi cih amasa lamin kigen khin a, thu kaikhawmte a mangngilh dang zong honkhat om cih zong i genkhin zo hi. Pastor kip ah kisangkhailo zong Pasian nasem honkhat om a, tua ciangin Pasian nasem dinga Lai Siangtho sangkah zong honkhat omlai hi.
1. Rev. Awn Khan Pau: 1932 kumin Vapar ah pianga, tua pan Murlen ah kigawm ahih manin tua ah pemto in, 1966 kumin Burma Army pan santhum tawh pension a, 1982 kumin Pastor dingin kikipsak a, mi 859 tuiphum in, nupa 67 gawm in, naungek 575 ap hi. Kumthak 1996 ni bekbek in mi 130 tuiphum tazen hi. 1998 kumin kum 40 a sep zawh ciang pension la a, Feb 13, 2010 in hong nusia hi.
2. Rev. Lang Gin: 1934 in pianga, 1964 kumin CBCNEI GS Rev. Edward Singha in ordination pia hi. 1990 in pension a, mi 327 tuiphum in, nupa 72 gawm a, 2006 July kha in hong nusia hi.
3. Rev. C. Lalchungnunga: 1942 feb in pianga, 1960 kumin kha siangtho van pan kia in dengkha in, 1978 kum pan Kha Siangtho ompihna tang hi. De-addiction center hong in guihtheih khamtheih kepna lianpi khat bawl a, Methodist leh Presbyterian pawlpi in zangin ordination zong pia uh a, tu in pension la in Aizawl ah om hi.
4. Rev. Khup Za Go: 1937 kumin pianga, 1954 kumin laisiam pahtawina merit ngah hi. 1968 in BA zo in, 1970 kumin MA Guwahati University pan zo leuleu hi. 1981 kumin BD Culcatta pan zo a, 1998 kumin MTh Bangalore pan zo leuleu hi. Laigelh lunglut ahih manin a zinna peuhmah ah Library hawhlo in ciah ngeilo hi. USA, UK, Germany, Thailand, Indonesia, Myanmar cihte ah lai leh biakna vai tawh zin kawikawi a, laibu bangzah hiam gelh in, a nunung pen ZO CHRONICLES cih ahi hi. Delhi Zomi Christian Fellowship Pastor a sep laitak 2005 April in hong nusia hi.
5. Rev. Sian Za Khual: 1937 kum inpianga a, kawl galkap sem in pension a, 1987 in Christian Baptist Church phuan in, 1993 kumin pastor kip ngah a, 1996 kumin hong nusia hi.
6. Rev. Lal Than Zuala: 1945 kum in pianga, 1972 kum in pastor sem a, mi 1670 tuiphum a, nupa 146 gawm in, 862 nau ap hi. Tu in UPC pawlpi ah laiat lianpi khat in Aizawl ah om hi.
7. Rev. Dr. G.K. Nang: Christian suak masa Upa Go Kho Nang naupa hi in, 1946 kumin pianga a, 1963-67 sung sangsia sem in, 1975 in BTh zo a, 1980 in pastor kip in kisangkhai a, 1983 kumin BD Bangalore pan ngah in, 1990 kumin Switzerland pan MTh ngah leuleu a, tu in PhD USA pan a ngah ding hita hi (June kha ciang). Rev. Khup Za Go tawh Tedim Lai Siangtho editing sem ngei uh a, a seppihpa mah bangin laibu bangzah hiam gelh zo in, ZONET laiat siam pen ciin 2009 in kitel hi. Chin Baptist Association leh Zomi Baptist Churches ah a lianpen Executive Secretary leh tuate thukizakna laite ah Editor sem ngei a, USA, Switzerland, Italy, Vatican, leh Singapore teah Pasian thu sinin zin khinta hi.
8. Rev. Chhunhranga: 1947 kumin pianga, 1981 kumin Apostolic Church of God phuan a, 1992 kumin pastor kip in kisangkhai a, tu in a innkuan un tagah kepna bawl in sem uh hi.
9. Rev. C. Zathanga: 1948 in pianga, health worker trained zo a, khangno makai hihna pan Mizo galkap lut in tua pana tawp kik zawh ciang UPC pastor Kolasib, Kawthah, Sairang, Aibawk, leh Thingsai khuate ah sem in, April 2009 a sih ni tannin UPC pastor leh secretary a sem hi.
10. Rev. Chhunglawma: 1949 a piang, UPC Pastor Champhai, Aizawl, Sairang khawng ah sem in tu in Headquarters ah secretary mah in sem a, tulaitak General Superintendent semin, Aizawl ah om uh hi.
11. Rev. Dr. Khen Za Sian: Murlen Lawpna Kha tang Pu Vai Za Dal tapa hi in, 1957 kumin pianga, MDiv Philipines pan zo in, DMin USA pan zo leuleu a, 1985 kumin ordination ngah hi. Kalley valley District chairman a sep laitak in Lai Siangtho tei na ah zong member khat in pang hi. Tuni tan sermon 9800 genta a, mi 2350 tuiphum zo in, nupa 37 gawm a, laibu 11 gelhzo a, bu 9 bang pau dang panin teikhia zo hi.
12. Rev. Dr. JM Ngul Khan Pau: Murlen khua pan pawlpi Upa kip masa pen tapa hi in, 1956 kumin pianga, 1980 kumin BA (Distinction) tawh zo in, 1985 kumin BD Pune, India pan ngah a, 1990 kumin Lai Siangtho gam Gamsiangtho hawh in Jesu khanna gam thu va sin a, 1995 kum in USA pan DMiss hong zo in India gam nisuahna lam tuiphum kipawlna ah General Secretary hong sem in, tu laitak USA ah ZOMI DIASPORA tawh kisai research hih in om hi. 1990 kum pan pastor kip in kisangkhai to a, leitung kimvial in Pasian min tawh kalsuan kawikawi hi.
13. Rev. Dr. Enn Za Sian: Murlen khuapawi ah a kihel lakpan upa pen Pu Gin Za Kap tapa hi a, PhD Shillong pan a zawh khit ciangin CBA ah Executive Secretary in a sep laitak hi. College lecturer kum tampi a sep zawh ciangin Topa gam adinga kipia ahi hi. 1956 kumin pianga, 1980 kumin BA zo in, 1983 in MA, leh PhD 1996 kum in zo a, DMin Bangalore pan 2009 kumin zo hi. Khuasung khangno makai leh biakna makai a hahkat mi hi a, Lungdamna Aw editor zong a sem hi.
14. Rev. S. Neng Za Khup: Murlen Sunday School siapa tapa 1950 kumin piang in, kum 8 sung mission sangsia sem a, MDiv philipines pan zo in, missionary in kuankhia in, tua pan hong ciahkik ciangin India gambup mission nasepna Indian Evangelical Mission ah State Secretary sem in, tua pan tawp in tu in Missionary Training piakna NECTAR kici kipan a, Executive Director a sem hi.
15. Rev. Suan Khan Thang: Murlen khua lawpna Kha Siangtho tang leh “Kha Siangtho General ka hi” a kici Pu Gin Khaw Hau tapa hi a, 1951 kum in pianga, 1976 kum in BA zo in, 1980 in BD Pune pan zo leuleu a, MTS 1992 kum in USA pan zo kik hi. Missionary in kum bangzah hiam sem a, tua pan hong ciah ciangin Evangelist in sem a, Pastor kip in a kisangkhai ciangin Lungdamna Aw leh Laitai ah Editor khawng len in, ZBC leh CBA ah zong Executive Secretary len in, tua pawlpite Constitution zong gel pih hi. Thu ciik mi ahih manin Pawlpi kalsuanzia ding leh By Laws, Constitution bawlna cihte ah a kizang mahmah ahi hi. Indian Evangelical Missions ah a sep sungin State Secretary tavuan len hi.
16. Rev. PB Lalmalsawma: 1960 kumin pianga a, Murlen sangsiapa tapa hi. 1990 kumin BD zo a, 1994 kumin pastor kip dingin kisangkhai hi. Mizogam Presbyterian pawlpi ah sem a, tu in Lungdai Pastor sem hi. Amau pawlpi ah committee lianpipite tah member hi.
17. Rev. Thang Ngaih Mung: 1960 kum a piang in BCom leh MDiv zo a, mission school teacher leh Evangelist kum bangzah hiam a sep khit ciangin Pastor kip dingin kisangkhai a, tuni in gamthak phual ah semin Pasian thu theilote Gospel Lungdamna Thu hilh in om hi.
18. Rev. B.Chin Lam Thang: 1966 kum a piang hi in 1994 kumin BA zo in, MDiv Lamka pan a zawh ciangin Indian Evangelism Mission ah missionary sem in kuan a, kum 10 a sep khit ciangin tu in Associate Secretary len in Guwahati ah om a, khuapi sung ah Pasian thu tangkona leh gammial nasepna thupha pulak in om hi. Mission sngsia leh sangsia ngeina zong kum tampi na sem ngei hi.
Topa sathau nilh khempeuh zahtakna ka pia a, Ama gam zaina dingin hong zatsak zel laita hen.
Hau Za Cin
Phuitong Liim
No comments:
Post a Comment