WC Mangpha! (a lunglutte bek ading)

Posted by: "Hau Za Cin" suante2002@yahoo.com   suante2002

Wed Jul 14, 2010 9:06 am (PDT)

WC Mangpha! (a lunglutte bek ading)

 
Champions Trophy tawh Spain khuapi Madrid vanlengtual Baraja International Airport a tun uh ciang a gualzawh lai vua khitui kai lianga kap Captain Casillas zong kidek zolo kik in mittui mualtuang sa in mipi mai tungphei a, akhut veilama WC Trophy lamto in 'Campeones' ci hi. 
 
 
A tuanna vanleng uh a pua lamah 'Campeones' (Champions, Gualzote) cih leh 'Orgullosos de nuestra seleccion' (Proud of our squad, Pahtakhuai Gualzote) cih kigelh hi.
 
 
Kumpipa King Juan Carlos leh a zi Queen Sofia, a tanu Princess Elena leh a tapa te nupa Prince Felipe leh Letizia in Kumpi Inn ah gualzote vaidawn a, "Gualzote aw, Spain gam leh Spain mi khempeuh taangin lungdam hong ko ing," ci hi. "A zo dinga kilawm penpen te zo a, a en khempeuh in muhnopsa in a lungsim vuah mangngilh thei nawnlo ding uh hi. Spain mi khempeuh na thalawpsak vua, Spain mi khempeuh pumkhat suaksak in i lunggulh leh i deih pen Champion ngahna hangin Spain cih leitungbup in thei khin ta hi," ci hi. Tua banga Kumpipa tawh hun a zat khit uh ciangin Prime Minister Zapatero inn ah kivaidawn leuleu a, amah in pahtawina thu a gen khit ciang a tuam vilvel in goal khum Iniesta pahtakna thu gen hi. "Dani Jarque: always with us" cih a puan sungsilh ah a gelhna hangin, "Iniesta in bawhlung siam bek hilo in midang itna leh khualna nei hi. Amah banga ettehtaak i neih i khangno leh naupangte adingin manpha hi. Dani i khahsuah laia Spain mipite
dahna tuni in a lungsim uh na damsakta hi," ci hi.  
 
 
Spain te in lungdamna pawi bawl in a lam ziahziah laitak un Dutch team te bel uipi vaitung mahmah bangin na gel sim khiankhian uh a, galvanleng nih in bel a tuanna vanleng uh na uap sam hi. Kumpinu Queen Beatrix in a inn ah vaidawn in, gunkuang tawh Amsterdam tuizawn ah vakpih a, Museum Square ah vaidawnna pawi neihpih hi. "Hih banga hong thupi dawn uh kiguih liang ung, ka lungkiat luat uh sawt nailo hi a," ciin a siapa un gen hi. 
 
 
Spain thukizaknapi khat El Mundo in, "A champion hi leltak ve hang e, i mang lah hi samlo a" ci hi. "Mite bawhlung tawh buai keei uh a, zan thapai khuavak dong ka lam uh hi. Ka tuah khak peuh ka ngawngkawi khin hi" ciin fans te khat in gen hi. Zing khuavak zawh ciang zong mite in lasa, lam, diang in Hero te hong tung ding na dawn ngengngang lai uh hi. Spain te adingin khangkhat nuntakah a nuam mahmah hun khat a tuak uh hizen hi. 
 
 
Dutch te bawhlung siampa Johan Cruyff in amau gamte final suih dan gensia a, "bawhlung hilo" bangin sui uh hi ci hi. Dutch te in Yellow Card 9 ngah in, Red Card 1 ngah a, 1-0 in guallel uh hi. "Hehhuai takin a bawhlung suih dan uh kihhuai mahmah hi. Hih banga muhthadah, kihhuai, khauhpai, mitkhamsak, lunggimsaka bawhlung suih pen maizumhuai mahmah hi. Hih banga kimawl a lungkim uh leh amau thu hi, ahi zongin lel lai uh hi," ciin media te kiangah gen hi. Cruyff pen 'Total Football' a pankhiapa hi a, Zomi te cih dan leh a Founder hi gemgam sam a, tua tawh Dutch te in 1974 leh 1978 kumin final na kah ngei uh hi. "Hih banga muhthadah kimawldan tawh gualzawh a sawm uh naa kasa mahmah hi," ci hi.  
 
 
Johan Cruyff in English football siampi te mah bangin phitmutpa Howard Webb zong nakpi in mawhsak a, "WC final ah hihsanga siamzaw a phitmut huai hi," ci hi. "Tua sangin zong 'a kisap hun cianga thu khentat ngam phitmut kisam hi" ci hi. Phitmutpa in deihbangin thukhentat ngamlo sa hi dingin lamen ing. "Mut khialh theih hi, muhloh zong om thei hi. Ahi zongin nang hoihsak banga khentatziauna leh rules ei hoihsak banga hei ziauziau cih pen kizangtheilo hi," ci hi. "Dutch player 2 a hawlkhiat loh ban ah, thulai gen dinga hangsan taka a din ding hun ciang a mitsi in a langlam heksan hi. WC Final in phitmut thudik thuman a dinpih ngam kisam hi," ci hi. FIFA te in a za tam aw... (hih phitmut ding pa a kiteel lai in i gensa EPL ah a phitmutzia leh CL hun ah a phitmutzia, Italy v Serbia ah a phitmutzia i gen khin hi...). Johan Cruyff in, "Gualzawh dan zong kisin kul a, guallelh dan zong kisin kul hi. Tuate sanga thupizaw pek om a, tuate in 'zahtakna' leh
'kiukzawhna' hi. Webb phitmutzia pen mulkimhuai bek hilo in khasiathuai hi," ci hi. Tulaitaka 'total football' kimawl pen Barcelona club leh Spain gamte bek hi. 
 
 
England sia lui Graham Taylor in zong Dutch te kimawlzia kamkhat na siakhia a, "Laws of the game zui a suih ding hi. Mun khat leh nih ah laws of the game khengval in sui uh hi," ci hi. Kungfu Football cihte pawl, mikhe suihsak cihte pawl omlo ding a cihna ahitam maw. De Jong in Alonso a tuatphei bangin bawhlung kisui ngeilo a, phitmutpa in mucianlo hiam, bang hiam, ahi zongin tua bangin bawhlung kisui ngeilo hi, ci hi. 
 
 

FIFA President Sepp Blatter in bel, "Bawhlung suihna ah bawhlung suite in zo a, bawhlung a suilo te in lel hi," ci ziau hi. Tua pen football fans ahihna tawh a gen hi a, FIFA President ahihna tawh a gen hilo hi. 
 
 
WC final enzah: million 700 (lakh/teng 7000) pha hi. 
 
 
Torres in WC champion pawi bawlna ah Liverpool club puanak silh a, Liverpool ah tukum suilai ding hiding ciin ama club mipite lungdam mahmah hi. Tuma sungteng Chelsea leh Real Madrid in zong deih kici hi. Torres in khatvei zong khumlo a, a tawpni in zong thagui kidok, thagui ton, thagui tai in puk hi. 
 
 

Germany te zong kuamah phawkloh in na ciahsim uh a, Spain v Netherlands te final suih laitak in vanleng sung, vantungah omlai uh a, vanlenghawlpa in a kung khum leh khumloh pulak zel hi. 
 
 
INDIA te bawhlung siam a om ngeilohna, WC ah a kihel ngeilohna pen gamdang tawh a kisuih ciang 7-0 khawng in a lelhzel man uh hilo a, laisimsim ding in a kisinsak man uh hi ciin WC final ni in mi khat in gen hi. I um diam? Midang khat in bel a khepi uh saulua ci a...
 
 
Siapi a sem Vicente del Bosque in ama deihna bek a paipih loh manin (a bu lungsim pai, khia, koih khia) gualzawhna ngahpih a, ki ukzawhna leh pankhawm siamna hangin kigualzo thei hi cih a lak khia Oscar Tabarez ahi hi. 
 
 
"President Nelson Mandela zaha hanciam hih WC lawhcinna dinga sem ki omlo hi. Hih WC pen a thupi diakna khat om hi. Mihing suahtakna leh mihing khat nuntakna (Nelson Mandela acihna) tawh kizom hi," ciin FIFA President in gen hi. Mandela in WC Final suih ma in tualpi laizang ah a zi tawh hong vakkhia a mipi in dingto in zahtakna na pia uh hi. 
 
 
"Gamneu cih om a, team neu cih om nawnlo hi," ciin FIFA President Sepp Blatter in gen hi. 
 
 
"Octopus thu Spain ah kithang mahmah ding hi" ciin goal khum Iniesta in nui kawm in gen hi. 
 
 
WC kik na ding Brazil, a kum 2014. Tua hun ciang bawhlung suih kilawm tak kimu ta ding hi. 
 

Tu kum champion : Spain
 
A puansilh uh - "Espana, Campeones del Mundo"
 
A lasak uh - Campeones, campeones, Ole, Ole, Ole...
 

FIFA President: Sepp Blatter
 
FIFA Secretary: Jerome Valcke
 
 
Bye for now!
 
 
 
 
Hau Za Cin
Phuitong Liim
www.hauzacin. blogspot. com