KUM 1991 LUNGDAMBAWL MURLEN KHUA AH

I KHUALZINNA LEITUNG

Posted by: "Hau Za Cin" suante2002@yahoo.com   suante2002

Tue May 25, 2010 8:14 pm (PDT)

I KHUALZINNA LEITUNG
 
- Hau Za Chin, Shillong 
 
 
Lai Siangtho sungah hih leitung pen I khantawn omna ding hilo in I khualzinna gam bek hi cih I mu hi. Tua mah bangin nisim in mihing ten I tawntung mun ding lam I zuan uh hi. Mi tampi’n tua mun zuan in tungzo uh a, tampi mah a tung ding i om lai hi. Paunak khat in, “Nisim in Ni a tumsuk simin na Hankuang ni khat in a naih zel n ahi hi,” ci hi. I hankuang ni bangzah a gamla lai hiam cih Topa’n hong theisak hileh nuntakna nuam zawlo ding hi maithei ahih manin Topa Pasian in hong theikholsak lo hi ding hi. Ka pianna nu Ciin Zam Cing Samte in July 14, 1994 Laizingni nitak nai 4:15 P.M. pawla hih leitung khualzinna a tawpsan ciangin anungsangah amah itna leh (kimangngilh ngei ding hilo napi) a han ciamtehna leh amah phawk tawntungna ding mualsuang January 10, 1995 ni a ka phuh uh tak ciangin, tua hun zang dinga Shillong pan Murlen ka ciahna lampi ah ka totkhak khuate, mite, gam leh gamsate tung pan ka theih ka muh leh ka sin khat leh nih tomcik in
kong gelh sawm hi. 
 
Ka laisimna Shillong pan ka khua Murlen tunna dingin Lamka, Enpai, Haiciin, Tuimui, Khuangphah, Hnahlan, te ka tawn kha hi. Lamka ah ni sagih ka taam sungin Zomi te minam ki it, kingai te ihi cih nakpi in ka phawk a, mi hong veh hong hawh hong tutkhawlpih nate pan in ka mit in mu in ka bil ah ka za a, ka lungsim ah a thaam tawntung hi. Khelam a paina saupi hi a, gim leh tawlna ah zong Zomi te pen akihuh akidawn zel minam ihi hi cih ka mu, ka tuak kha a, lungdamhuai kasa hi. Khua tunna ding te ah ni omlai tung zolo in khuazin khuamui gamdaih zawh khawng ciang ka tung uh zong hong zintun ding mi Topa’n hong pia hi. Hih bang hun ciangin Taang Pauno (Lengtong) in: “Na vawh bang na at ding,” cih pen Zomi te in a za bek hilo in a zui kihi veh emaw ciin tuma sangin tuhun ah mi kikhangto zawta hi cih ka phawk hi. Hihzah a la hoih khat in minam khat lungsim vutzo in kal khat hong suanto sak ahih manin Upate thugen ‘La icih thu hi a, thu i cih zong la
hi’ cih pen maan mahmah kasa hi. Tua ahih manin ‘Lasiam’ cihte pen thu saupi kammal tomcik tawh a gen siamte hi a, ‘Thusiam’ (Laigelh siam) icihte pen thugil khat kammal hoih tampi tawh zem a saupi kilawmtak, simnuam tak a gen behlap theite hi maw ka ci hi. 
 
Murlen khua ka tun uh sawtlo in a ni ciam Mualbawlni hong tung hi. Sep ding bawl ding teng tanute leh khuasung mipi lia leh taang ten hong sepsak in hun manpha tak in kizo hi. Hih ni zatna panin mite phatuamngaihdan te thupi in midang ading khualna lian hi cih ka mu hi. Mun leh mual gamlapipi pan in hong kidelh a, a pumpi bek uh zong hunsa lo in a neihsa sum leh pai bei in hong huh lailai uh hi. Zomi te bangzah in ki it in kikhual ihi hiam cih pen hih ni panin ka tel cian mahmah hi. Minam hampha khat hi hang ciin ka kipsak hi. 
 
Hih hun zang khin a Shillong lam ka zuat kik uh ciangin Champhai, Aizawl, Ngopa, Mimbung, Kangkap, Enpai, Singngat leh Lamka te ka nawk leuleu uh hi. Hih hun in zong mite zindo siam mahmah a Jesu Christ itna mite mit muh dingin kilakkhia hi ciin ka ciamteh a, khua tuamtuam zindo siamna ka mu kawikawi hi. Sialkal dung phei teng zindo a siam ngiat hi ciin ka lawmpa khat in hong gen kik hi. Nupi leh naupangno tawh ka hih uh hangin Jesu it taktak uh hi cih ka thei a, mi enhuai leh mi hampha te hi ciin ka ciamteh hi. 
 
Hih khualzinna lampi ah ka pai laitak un khua nih ah sihna na tunga, tua lai ah LAMDANG ka sak te ka gen nuam hi. Khua khat ah pen sihna zan in hong tunga, zan in sidak kisat hi. Tua sidak kisatte pen mi ko ding ahih manin kinawh uh a, dak pen biak kikhop dak sat ngeina in sat uh hi. Ahi zongin khua hong vak ciangin si dak sat ngeina in hong pha leuleu uh hi. Mi khat adingin sidak nihvei kisat cihna hi. Ka tuak ngeiloh, ka zak ngeiloh, ka theih ngeiloh sidak satdan ahih manin lamdang kasa hi. Tua misi pen zan laitak a si hinapi nungak tangval nupi papi pawlkhat bangin zingsang an kham tan in zong delh pah hehu nailo uh hi. A nguina ah leh han tawhna ah bel hawh ngeingai ding um ing. Khuasungah mi in haksatna tuak a lia leh taang leh nu leh paten delhpah loh pen lamdang sa hi ing. 
 
Khua dang khat leuleu a sihna pen kamsiatna hang bek mah hi cih ding hi. Hih khua pen te si nguina ah ka hawh leh Pastor pa in hun siangtho a zat zawh ciangin mipi te innlam zuan dingin kidingto ciat hi. Tua laitak in tangvalte a hanvuk dingin hong diangkhia a, vuk kha kei ning cih lau hileh kilawm takin mipi muh lai tektek in hong vuk buatbuat uh hi. Lei leh suangte in hankuang tung kha in ging guapguap a, a innkuanpihte in zong tua pen za peuhmah ding hi. A zak a nuam ngaungau tam aw cih ka ngaihsun hi. Mundang ah tua banga mipi zaka hankhuk vuk ging gamgam ka za kei hi. Tua bang za ngeilo ka hih manin lamdang sa in mulkimhuai kasa a cimul bang tho zezen hi. A innkuanpih te ading ka ngaihsut ciang tua bang lo deuh a hankhuk vuh dan lo ding hiam aw, mipi pai khiat khit deuh beek ciang vuk leng kizalo deuh ding hi a, ciin ka ngaihsun dide hi. Khatveivei a hoihzaw a om tam aw ci a khuadak a pilvang zaw a gamtat dan a om leh tuate lak zel zong khantohna
khat mah hilo hiam ka ci hi. 
 
Gennop tampi omlai hi. Ahi zongin hong saulua kha leh cihna tawh Lamka buh lim kasak thu tawh hong khup sawm ning. Zogam khuapi khat ahi Lamka pen buh leh sa tawh ana kiningcing mahmah khua ahi hi. Huihdam nunglo in huih in tuam cip a huih nung haha kithei mello hi. Khintung a zu bel ki upcip a lim mahmah bangin huih in a upcip Lamka buh lim mahmah hi. A meh ding ngasa lah limsem a, namtui vauvau hi. Lamka buh ne leng man dakdak a, a valh nuam in, a nek nuam a, gilvah sak pah in gilkial sak hak hi. 
 
Tua hi a, Lamka ah teen a, “buhsih leh ngasa” cihcih mai ut huai hi. HZC Januray 12, 1995. //
 
**********
 
PS: Ka khut tawh ka gelh article khat hi. Ka gelh laia format dandan in kong suaksak hi.
 
Hau Za Cin
Phuitong Liim
www.hauzacin. blogspot. com

Posted by: "Hau Za Cin" suante2002@yahoo.com   suante2002

Tue May 25, 2010 8:14 pm (PDT)

KUM 1991 LUNGDAMBAWL MURLEN KHUA AH
 
Chinpu, Shillong, March 18, 1992
 
 
Hun leh kum te’n nisim in hong kheng diaidiai a, mual leh guam ten ana kepcip tawntung uh Murlen khua zong tangbang dam in mel ka mu kik thei zel hi. Ahi zongin kumdang bangin lamet loh pipi zong thu ana piang sam hi. Khal hun leh tuk hunt e in mangpha na khak khin in phalbi in a nohsetna in bawhlung tualpi ah lailen nupa ana ta sak keu keu a, ni tumta ahih man in vot mahmah lai hi. Khua kiim ah mualpi li in umcih ahih manin huihpi leh guahpi lak panin na kemcing a, tua mualpi gammang lak ah Zolengthe leh Zolawkta te ana tau ngeungeu hi. Phalbi ciamtehna khat nitak ni a tum ciangin khua kim leh khua pam pan Buah vasa in ‘kawngkawi, kawngkawi, kawngkawi’ ciin ham ngeungeu a, sakhi gilna zong ‘hawk, hawk, hawk’ ciin na hawk baba hi. 
 
Tua bangin zan hun sun tawntung in tui vasa leh simbupi, musi leh mupi, vasa tuamtuam te in amau ham ciat in lasa in khuavak dong in ging lialua uh hi. Khuavak kuana “Cikcilili, Cikcilili, Cikcilili” hong ham buabua in luidunga luivagial (Lui lengbal) phawng in kawleklek kawm in hong lengkhia sawksawk a, vasa dangte phawng in Luivavom nangawn huandai gawl tungah tuangin hong ham daidai hi. Hih vasa ham sawksawkte amau a beng nuam naupangte phawng uh a, naupangte zong amau vanteng tawh kithawi in Saili leh thungkuah tawh daipam vasa hamna lam va gem phei pah kitkit uh hi. 
 
Suangzu pak zong pakta a, Zogam zepna Phuitong zong mual dung zuiin san ziaizuai a, vasate in ne in tuate pakzu ne uh ahih manin a pang dingin vasa beng naupangte zong zingsang annek zong don manlo vasa tampi a kap masiah uh inn lam kileh nuamlo uh hi. Lungdambawl hong tung ding pen kuapeuh in nuamsa uh a, lawp tak leh ngaklah takin na en ngiaungiau uha, kuamah a hoihna leh deihhuaina te donlo a mawk om maimai omlo hi. A hoih thei pen leh a limthei pen in vaidawn ciat dingin kisa khol uh a, pawlpi zong thalawp in hat mahmah a, thunget leh lasak nuam mahmah hi. 
 
Lungdambawl ni hong tun ma in Pawlpi upate in vaihawm in voksa a limci pen gawh ding ngaihsun in kumkhat tawntung I ngak pen nuamtaka zat ding mah lunggulh uh hi. Nupite singpuak ding zah khawng ciangtan khinin tualo a kisam ding teng vaihawm uh a, tangho suk leh nahtangteh (annekna ding leh tangho tunna ding) lak ding pen khangnote khut ah pia uh hi. Khangnote zong kilawp takin buhman tangsa khon in suk dingin diahpah uh a, a ni a tun ma nai 24 in a sap ciangin su in, nahla khangnote hong tun ciang tun pah uh hi. Nahla ding makai khangno upa lamte khatin makaih a, naupangteng in zui in, a dang khangno te tangho su in om uh hi. 
 
Zingsang ankham phet in nahla dingte kuankhia uh a buhman su dingte zong masi tun inn ah paikhawm in a kisam sum, suk, lawhpi, lawh, ciang leh nahteh teng kaikhawm in ansuk kipanpah uh hi. Kuamah peuh kithalawp ahih manin tawlkhat zong om khong hetlo in buhman tangsa kisu ziahziah hi. Nahla te zong hong tungin niangtui leh tangkhuai tawh kidawn in thangkhuai tang lianpipi tawi bembam uh hi. Nungakte buhsu bang etlawm lua kisa a taw khawng uh kihei letlet lel a, kising seuhseuh lel hi. Ansepte lah a lawhpi uh kilingsak leuhleuh in buhvui te liang ziaiziai a, a kidawhna kuangpi kaang phiupheu lel hi. Tangval ansu te zong kilawp mahmah in, “Nungak in ansu ansu, tangval in zawlhel zawlhel,” ciin kiciamnuih ziahziah uh a, a sawtloin kizo pah hi. 
 
Anvui te kuangpi sungah tui tawh kimek in kilomlom a, nahtangteh mei ah hai hulas tawh kitun in a pheel in belpi sungah kihuan a, a min ciang a tuamna phelkhia a nek mai ding hita hi. Zomi te anbawlna ah a advance penpen hilai ding hi. Tualo pen an a sial a nek, a hawng kheh, huan min cih ciang khawng hi a, a bawldan tam kizang nailo hi. Khangnote thuk bawl ah vanlengbel khap kua tawh kihuan a, nitak kikhop kikal in tangval leh Christmas tanute in na vil uh hi. Thuk tunga suantoh zawh cianga kisil ding, kikhawm dinga ciah khangnote zong biakinn hong tung kikta uh a, a zanhah puanlum uh tawh hong kithawi pah uh hi. Anvil te bel mei khul in manlah mahmah uh hi. 
 
Kikhop dak hong ging ciang lawmte tawh biakinn sungah lut in thugenpa in, “I Topa Jesu leitungah mihing banga hong piang a eite hong hon ding a bawngkuang sungah hong suak, a nu Mari in tawi in bawngkuang sung ah lumsak zel,” cih thuhilhpa in a gen ciangin pawlkhat in huankhang Bawngbuk sung va en uh a, ahi zongin bangmah mu lo uh hi. Dumde tang kiaukiau khawng a mu pawl om in dawi leh sikha sa in lau liang uh hi. Kikhop tawp ciang Jesu hong pian hun zan kim laitak ngak in lengkhom la kisa ngelhngelh a, zan kimhong tun ciang in hong piang naungek dawn in vekpi thunget lungdam kohna kinei hi. Tua zawh ciang inn kim ah vak kawikawi in thupha ngetsakna leh inn vehna kinei a, zingsang lam nai 2 ciang khawngin kizo hi. Tua pen Zanvak kici hi. Zanvak kipatna Biakinn hi a, a tawpna Christmas tunna inn hi. Zanvak tun ciangin zan ann kine a, zan ann nek khit ciangin a ut lum, a utte lasa, cih bangin kigim ahih manin kisuakta ta hi. Lasak nuam ahih manin a
tamzaw lasa in kikhuavak a, lasinna hun hoih mahmah khat a suak hi. 
 
Zingsang khua hong vak phet in vok go dingin khangno leh tanute kipaikhawm a, a khe pan man in a te ah tulzum tawh dawt in kisisak hi. Masi tun inn ah kipua a, sabawl ding tengin kibawl hi. Huan ding teng at, zinglam cianga nek dingteng a phei, a liang in koih. Thuk tungah kisuangto in ankham ciang tanute vil dingin kiciahsan hi. Zingsang kikhop ciangin “Nau etna Khuttawi” ciin sumpi kidong hi. Hong suak naungek Jesu dawnna hi. Biakinn sung biakna tau pulpit lamah kisungkhawm a, buh, vaimim, tangmai, bal, kawlkai, sekpi, etc cih bang a tuamtuam kitawi hi. Kikhop tawp ciang inn pua ah zuak ding ahi hi. Kikhop sung pen lusu kidem cih bang phial in zanhahna kigim hidinghiam kilusu ziahziah a, tutna tung pan a puksuk zong om thei hi. Hun thupi pen in kingaihsun ahih manin Topa pianna thu mah kilimgen pen hi. 
 
Kikhop tawp zawh a sawtlo in annek dak hong ging dengdengin nupite zong amau ankuang ding leh sikkeu, kuang, a kisam ding teng pua in masi tunna inn lam zuan in hong diangkhia ziahziah uh hi. Ankuang tung lungdamkohna khit ciangin sa huante in sa hong thuk in mipi in ki um zihziah a, lawhpi sungah nahtangteh phah a ankuang umkhop pen a nuam mah himawk ei. Miksi saipi man mah kibang hi. Ankham ciang khangnote in um leh bel sil kul teng sil in hahsiang kulte hahsiang, pai kulte pai in kep kulte kem uh hi. Nupi papite inn sungah lut in masi la sa in khuangpi leh khuangneu tawh kithuah in la nasa letlet uh hi. Leitungah mi bang I pian se zong I hamphat na mahmah khat hi. “Eima lu lam, mahni lu lam” ciin ciamnui in gualnuam ziahziah hi ung. Nupi te zong a vanglai hunnuamte uh ngai hi ding hiven muvanlai bangin hong lam diaidiai uh a, a lungzuan khuangaihna teng uh a ngilh tuam ding uh tawh kibang hi. 
 
Tua banga nitak lengkhawm laitak nitak kikhop hong hun in biakinn ah kilut suak pah a, kikhop kipan in thuhilhte in naupang gawtna thu leh Jesu a kitaipihna thu khawng hong tangkopih, sermon uh hi. Kikhop tawp ciang lengkhopna inn ah lasa khawm leuleu in nuamtak in kigualnuam leuleu a, zan khua hong vak dong mah kilengkhawm hi. A zingciangin zong a masa ni mah bangin sabawl, kikhawm, lengkhawm, anne, kikhawm cihte mah kizui kik diamdiam hi. 
 
Tua banga nithum a kizat zawh ciangin masi khakna hun kizanga, lungdam thu, lungleng thu, nuamsak thu, lungzuan thu, Jesu hong pianna thu, etc tuamtuam kigen hi. A ni thum ni pen a lungzuan huai penpen ni ahi hi. Masi tun inn te ading diak in lungzuan huai, khuangaihhuai hi. Misi nung bang ding hi. Ahang pen nithum sung pawlpi mi khempeuh, lawm leh gual, khangnote, nupi papi in akisam teng semkhawm, ne khawm, kikhawl khawm, lasa khawm, gualnuam a kiom hi a, a nithum zana upate khat in lungdamkohna a neih khit cianga lungdambawl hun a bei mai ding leh kumkhat tawntung a kingak hi napi khoh theih hilo a mualliam mai ding pammaih, kumkhat vingveng ngak kik kul ding cih te akingaihsut ciangin micih lungsim ah lunglenna hong om in kap ziahziah na ding mah ahi hi. Inntekte bang a zing a thai ah kuamah khuadak nawnlo kha thei ahih manin hawm kisa, gamdai kisa, khuangai kisa ding hi. 
 
Hih bang hun nuam kumthak ni pan a kingak den lungdambawl hun a nuam thei bang pena nithum sung bang a kizang pen a kumkik mah ngak kik hong kul a, 
 
“Nunlui ngai mualliamsa, 
Tanglai kicici hi,” 
 
ciin kikhak ziau a, kum bei tawh kituak lailai ahih manin hamsa hi. 
 
Theisiam thei hileh lungdambawl hun in tawmvei beek amah a it, a ngaite tawh khawlkhawm nuam lai mah ding hiven maw. Mihingbanga theisiam lah hilo HUN himawk ahih manin ahi theilo hazel. Amah zong ama thu hilo a khawllo a paipai a a hun kik tungsak kik pah dinga a kaikai HUN in tonpih hiven. Sapsap hang kum 1991 Christmas lah kisam kikzo nawnlo dinga, hong phawk kha nawnlo in mual hong khupsan ta hi. Sulhei kik kei vak. 
 
Tua ka hun nuamte samkik thei in khatvei kivei sak kik thei hileng, ka lawm leh gual, lia leh taang naupangte adingin lungnopna ni vanglian hong taang kik mah bangin lungdam kipak ding hiven. Ahi zongin hun in lencip a, ei sap kik theih hilo hi. Dam in pai inla, mi zatam lungsung hong taankik in na vangtaang tawh. Na siangah vabang hong leng nuam ing na pallo ding, lungmawl ka cing na’m maw. Mangpha. //
 
************ *******
 
PS: Khut tawh ka gelh thului khat hi a, a ngeina bangin kong suaksak hi. 
 
Hau Za Cin
Phuitong Liim
www.hauzacin. blogspot. com
 

1992 MANGPHA

Posted by: "Hau Za Cin" suante2002@yahoo.com   suante2002

Tue May 25, 2010 8:14 pm (PDT)

1992 MANGPHA
 
Cinpu, Shillong 19.1.1993
 
“Christmas ni hong tun sim in Bethlehem ka ngai” la phuakpa khat in a na cih bangin kum 1992 Christmas zong hong nai deuhdeuh a, December kha hong bei tohtoh ciangin inn lam zuana ciahloh ding mundane om, innkuanpihte tawh kikhen a laisim a om, galkap sunga om leh sepna tuamtuam a semte adingin ngaihsut hamsapi khat hi den hi. 
 
Kei zong kum 1992 lungdambawl pawi pen ka laisimna Shillong ah zang dingin ka gel hi napi in lawm leh gualten nu leh pa leh sanggam laizom lawm leh gual te mu dinga hong paisan san uh ciangin kidekzo peuhmah lo in Lamka zang dingin ka khensat kik a, hong deihsakte thusiamna tawh Lamka khuapi ka tung thei hi. Lamka khuasung Christmas ding tawh kisai a mipi vak zuaizuai tawh na kidim a, nuamsa mahmah mi vak diamdiam te ka muh ciangin, ‘hih lai ah Christmas nuam ngel ding hi’ ciin ka ngaihsun pah hi. 
 
Murlen ah ka zat uh ciang ka sep ka bawlte uh hih lai ah sep ding omlo a, tangho suk, vok go, sa bawl, nah la, biakinn zem cihte omlo ahih manin Tua Nithupi zang ding pen a kual taitai tawh kibang kasa hi. Murlen ah om hileng Papite leh Tangval te gamsa bengin gamsungah giak kuan dinga, nupi tengin  nungakte tawh a lawmpa te un hong puak uh sa huanna ding singkeu tom in daikim daipam na vak ziahziah ding uh hiven! Hih lai ah lah nupi papi nungak tangval sumbuk ah neih khempeuh bua sak liangin a pai zuaizuai uh ka muh ciangin inn lam ngai in ka lung hong lengzaw mawk hi. 
 
Tua banga thu ngaihsun kawma ka vak tohtoh laitak in ni hong tum a, inn lam zuan in ka ciah a, kikhopna lam zuan dingin ka pai khia pah hi. Kikhopna hong kipan in thuhilhpa in “Immanuel” khiatna in “Eite tawh Pasian hong om khawm hi” cih zaknop takin hong gen zawh ciangin cimman hetlo in kikhop hong bei pah hi. Kikhop tawp ciang lengkhawm ding ka pai sawm leh hong paipih ding omlo in kei zong khattang a pai lah nuamsalo in inn lam zuanin ka ciah kik leuleu hi. 
 
Aw, Murlen hizen leh maw! Pawlpi mite tawh Topa hong piang ding kilawp tak in vantungmite phat bangin lawp takin lasa in kilengkhawm ziaiziai ding hi a maw. Zan hong sawt to deuhdeuh leh zan ann ne in Topa pian hun Zanlai Hun bang kizang dinga maw. A hatlo leh tut ngap nawnlo te innlam zuana a pai hun dingte kibawlsak dinga, lia leh taang te ahih leh phatna zaila sa in kihuang deudeu in cim man hetlo in akgil sunga bu-alpa in hong khuan nelh dongin zong kham hetlo in zan hong bei ding hi a cihte ka ngaihsut ciangin khua bang ka ngai vungvung hi. Tua laitak in Radio hong ging Lamka khuapi sungah a minthang penpen leh Christmas sanga mite in a thupi ngaihsutzawk hi kha ding hi cih theihphial dinga mite bil dawh leh theihnop, I Topa Jesu Christ hong pian ding vantungmi Gabriel gen sanga a zaknop zawk uh tawh a kibang phial BHUTAN CHEETAK LOTTERRY result hong gen a, tua tak ciangin mite in Jesu koi ah pianga, bangtawh Amah bia ding ka hiam, a pianna mun leh
mual hong hilh un cih sangin, “tuni cheetak number kua in man hiam, kua mumang tangtung hiam?” ciin kidong ngeingai uh a, a kingaklah thu theihnop khat tua zanlai in Radio in hong puak himawk hi. 
 
Bang dinga mi tampi in Jesu sanga hih Cheetak Lotterry theinuamzaw, lunglut zaw uh hiam cih hong ngaihsun sak hi. 
 
Ka khua Murlen ah pawlpi te in bangcin hun a zang uh tam aw ciin ka lungsim ka lengsak a, ka lungsim tawh amaute kiangah ka lengkhawm zaw hi. Nuamsa lua ka hih manin ihmut in hong makhelh a, lengkhawm tawpma in zingkhua vak in hong dawn leuleu hi. Jesu pianni dawn ding tung sunni zong tuikhu leh meikai kawm ah hong suak to veva hi. 
 
Ne zel, pai zel in sa leh buh ka meh den a, kumlui 1992 in mual hong khupsan ding hita hi. Mualkhum ding kithawi zan hun hong tung a, tawmvei nunnop 92 kum ‘mangpha ci ni ikimuh kik mateng’ ciin muh kik ngei hetloh ding lamet kipia tawm in ‘muh kik mateng’ ciin ka kha diaidiai uh hi. “Leitung aw mangpha Jesu hong nai zo” cih la bangin kum 1993 aw mangpha 1993 kum hong naizo ka ci ziahziah uh hi. Khoh theih hinawnlo in nai khit nai khat, second khat khit second khat in pai ziahziah a, zong dinkhawl man nawnlo in second khat nangawn khawl thei nawnlo in 1992 kum in hong paisan ziau a, 1993 in ngaklah takin hong ngak in ka khut nangawn lik khia manlo liang dektak in hong nohset manlang hi. 
 
Kumlui hun nuam ngai a kap lah bei lo, kumthak lungdam huai hang lungdam mana khituinul lah tawm lo, eima lungdamna lam ciat kahpih in tawlkhat ka so vengvung uh hi. Mipi hong daih deuh ciangin Pasian kiangah kumlui hong zo sak a kumthak mel hong musak lungdam ko in ka luum ngeingai leuleu uh hi. Hih hun kikhek laitak a mu khalo lupna tunga ihmu te in zingsang khuavak mateng hih hun lungdam huai mu nailo ding uh hi. A vaidawn pahte in bel zingsang khuavak ciangin kumthak tawh na kimeltheih gawpta ding uh hi. 
 
Dak hong ging a, mi tampi in pawlpi kikhopna hun ah kihel in 1993 kumthak dawnna leh 1992 kumlui mangpha khakna nei uh hi. “1992 mangpha mangpha aw, 1992 mangpha mangpha aw. Kumlui, mangpha mangpha aw; Kumlui, mangpha mangpha aw…” “1993 kumthak, kumthak lungdam hang; 1993 kumthak, kumthak lungdam hang; …”
 
Kumlui bei a, kumthak hong tungkik zo hi. Lungdam hang. 
 
Topan hong ompih zel ta hen! Amen. //
 
[Dedicated to U NLC]
 
************ *******
 
PS: Ka khut tawh ka gelh thului te hi. A format omsa bangin kong suaksak hi. 
 
 
Hau Za Cin
Phuitong Liim
www.hauzacin. blogspot. com