Wednesday, July 25, 2012

Obama - tagah, Joe Biden - peemta: Murlen

Obama - tagah, Joe Biden - peemta:
 
US President te nih kipatna i et leh hih ciang a tung dingin uphuai hetlo kha ding hi. Ahi zongin US pen gam hoih, mun hoih ahihna hong musak semsem hi. I theihsa ciat bangin Barack Obama pen a pa Kenya pan laisim dinga Hawaii ah a pai hi a, scholars ahi hi. Laisiam ahih manin Kenya pan kumpi huhna ngah in a laisimna ding sum leh pai kisiksak a, Hawaii ah pilna behlap dingin a pai hi a, Obama nu Dunham tawh Russian pau sinna classroom sungah kimu uh hi. A kiten uh ciangin ta nei a, Obama hong piang a, a sawtlo in Obama pa Harvard ah pilna behlap dingin a pai leuleu ciangin a zi in zui nawnlo in a  kikhen uh ahi hi. Apa in Harvard ah pilna a behlap khit ciangin a professor sep zom dingin Kenya ah ciahkik a, a tapa khatvei bek veh kik hi, 1971 kumin. 1982 kum in apa in mawtaw tuahsia in sihsan hi. A nu in 1994 in numei lam tawh kisai cancer in sihsan hi. Obama a pi, a nunu kepna tawh a khangkhia ahi hi. 
 
Vice President Joe Biden zong Nothern Ireland pan peemta hi a, a pu khang pan US a tung khin, Pensylvania ah teng uh hi. A pu in Pensylvania State Senate hi ngei hi. 
 
General David Petraeus, Iraq kido sunga galsiampa leh zanni mah a President Obama in Afghanistan kidona ah makaipi Gen. McChrystal tawpsaka a zalaih dinga a koihkikpa pen zong a pianna pa Netherlands pan Japan gal sunga US ah pem ahi hi. Hih Gen. David pen a minthan mahmahna khat pen Iraq kido sunga galte a zo gawppa leh Saddam Hussein a zongkhia, a thalpuk a, tualgal a dai sakpa ahi hi. Gen. Petaeus pen US ah kizahtak lua mahmah ahih manin a pension ciang US President kidemna ah lut leh ngah ding hi ci uh hi. 2008 kuma SUPER BOWL acih uh kumsima US Football Final, US gambup kimawlna ah a thupi sim penpen 2 laka khat (a khatzaw pen NBA Final hi) ah zong Gen. Petraeus suangtang lawn dingin zang uh hi (to toss the coin). Tua pen US gammite kipahtawina sang penpen lakah khat ahi hi. 
 
John F. Kennedy, US President laklak pan khangno thazaang leh mitei, mipil leh kuhkal, dynamic, a sak penpen uh, US-Russia Nuclear gal hanga Bay of Pigs ah a kimaingat laitak vua kumpi sempa zong pemta mah ahi hi. Kennedy te innkuan pen Western Ireland pan ahi uh hi. Irish Roman Catholic sungpan US President a ngah amah bek om lai hi. Ama President sep sungin leitunga Nuclear galvan zatna nai penpen tuak kha hi (Bay of Pigs ah Russia tawh kimaingat in). 
 
US ah mi minthangte i et ciangin a tamzaw Irish na hi uh hi. Ka zinlai in lawmte khat zong mikangte in Asian ahih thei gegu napi simmawh nuam, engho nuam ahi tam maw, "Nang Asia pan na hiam?" ci den se uh hi. Amah zong cimtaak pianta hi ding hiven, "Kei Irish ka hi" acih leh tua zawh khatvei zong dong nawn lo uh hi. Asian pan pemta cih pen US te in thupi sim khollo ahi tam maw. Ahi zongin a kidal dan siam leng piang lel hih tuaks. 
 
Bill Clinton huna Vice President Al Gore pen Jews te hi a, Israel; Senator minthang Joe Liberman acihpa uh zong Jews te hi. California Governor Arnold Shwarzenegar zong Austria mi hi in, Obama zawh ciang US President hi dinga a lamet uh Bobby Jindal zong India mi ahi hi. 
 
Tua manin US pen pemta, tagah, a zawng, a hau, a lian a neu -- kuamah peuh milian milal suah theihna ahi hi. A haute bek kipimuh, a haute bek in hauhden na ding vaihawm, a zawngte sikcipna ding policy nei cih bang hilo in mi khempeuh suakta taka a "sunmang" (American Dream) uh a delh theihna gam uh ahi hi. Tua manin English, German, Scotch-Irish sisan kihel Microsoft Corporation neipa Bill Gates zong college degree neilopi a leitung mihaupen hong suahtheih. 
 
Zomi te zong tua gam a tung omta i hih manin tu zawh kum 50, kum 100 sungin leitung mi minthang bangzah hiam hong pian ding lamen ni. Martin Luther King Jr. cih bangin, "free at last, free at last, free at last..." I sunmang delh thei dingin hong khakcip om nawn hetlo gam a tung Zomi te ihita hi. I vekpi in tua bang gam i tun theihna dingin hanciam lai ni. Tua bang gam pen US bek ahih lohna dingin zong hanciam huai hi.  Tagah i hi a, pemta i hi a, a zang ah i teeng a, a phei ah i teeng a, sim mi ihi a, mal mi ihi zongin eima mihing lunglutna ciat kikhaktansak lo a i zop theihna dingin hanciam ni.  
 
 
Hau Za Cin
Phuitong Liim
www.hauzacin. blogspot. com
"He knows how you feel"

No comments: