Bribing God (Pasian Golhguk)

Posted by: "Hau Za Cin" suante2002@yahoo.com   suante2002

Sun Jun 20, 2010 4:52 am (PDT)

Bribing God (Pasian Golhguk):

Zomi te in Dawi pen a bia hilo in a thoih, a lungkimsak hi kici hi. Tua pen tulai misiam leh thutheizaw te muhdan, kandan leh ciamtehdan hi. Bia cih ciang kipumpiak, ki-ap, ki-tulut, etc cihna hi ding hi. I biakpa, i biaknu khutnuai ah ama thuthu a om dingin kipia cihna hi. Pasal pawlkhat zi leh sunghte kawkna lamlam a en duamduam te tawh kibang cihna hi, STB, sungte bel, ZZL, zi zolo. Ciamnuihna hisam e.

Thoih cih pen tulai mipil misiamte in kumpi vai ahih ciangin golhguk ci leuleu uh hi. Kumpi zum ah nasep ding khat deih in va ngen, a ngahna dinga a sungah a semte bang golhguk va pia, lungkimsak.. . ko India ah tuabanglo in kingah lo hi. Mawk bingfuut hangin gim leh tawl bek kingah a, kumpi nasep kingahlo hi. Exam leh interview khawng hoihtak kinei ahih kei buang leh!

Nipini biakinn ah sumpi i khiat pen Pasian itna taktak tawh i piak ahih leh biakna hi a, mi in pia tah ci a i piak leh khiatna neilo cihna hi. I piakna a hang theilo ihih leh.

Tulai ciang mun pawlkhat ah sum tuazah hong pia lecin thupha kong pia dinga, na upna gahsuah in na lawhcing ding hi ciin sum tha tawh a kicial thei 'thupha ngetna' khawng om hi. Tua pen i gennop pen ahi hi. Upna khaici hong tuh in ci uh hi. Upna khaici kong tuh nuam hi ciin a ngenzaw zong om hi. Ka lawhcinna ding thupha hong pia inla, sum hizah tawh hong cial ing ci hi.

Guai, tua pen biakna hilai ding hiam? Pasian golhguk hizaw lo ding hiam. Keima om muan in ka ngaihsunsun kha hi. Thupha deihman bek, lawhcin ding deihman bek, tuahphat ding deihman beka sumpi tampipi pia a, Pasian lah phawk tuanlo, Pasian mite gamtat banga lah gamta tuanlo si in i om leh tua bang gamtatna pen biakna hilo in Pasian golhguk piakna hizaw lo ding hiam. Mi khat in hong gen in ah, gamdang ka om lai in, "Inn lam pan siate hong zin ciang "Love Gift" ciin sum ka na pia zel hi. Tua pen aman lamen hi, pia kei leng khasia hi. A sawtna ciang, hong tamvei luat ciang ka pia zo nawnkei hi. Ka piakzawh nawnloh a kipan hong phawk nawnlo pah hi. Tua siapa a golhguk ka hi tam, Pasian a golhguk ka hitam, kei leh kei a kikhem ka hizaw tam, ahih kei leh tua siapa in kei hong khemzaw ahi tam... tam..tam..tam? "

Ka dawnna ding ka thei tuan kei hi. 

Ahih hang ka lungsim ah tua bang piakkhiatna pen a pia pen in zong lamet khat nei ahih manin tua a lamet a ngahna ding a cih zong hikha thei ding hi. A piak pen in zong nopmawh sa tuanlo leh kisuanglah tuanlo hi lel dinga, ahi ding mah sa hilel ding hi. Ahi zongin a kipiakna hang uh PASIAN min paulap ahih manin Pasian golhguk cihna tawh kibang kasa hi. Pasian golhguk cih bang lah om thei samlo ding ahih teh, Pasian thoih hizaw lo ding maw.


Hau Za Cin
Phuitong Liim
www.hauzacin. blogspot. com
"He knows how you feel"
Piantit Pai Zomi te Maan (Photo):


Ka khualzinna khua khat ah Zomi thu a kan, a kem, a ciamteh mi muanhuai mahmah khat in a innsungah Piantit Pai Zomi Maan na suang liat luat a, ka muh ciang "Aw, i pupa tuipi gal kaan masate maan hizen maw" ciin maan zaih ding ka nget leh hong phal lua kisa in, "Na muhmuh, na kepkep dingin hoih hi, mi zong na lah nop om ding hi" hong ci a, hampha ka kisa mahmah hi. Tu in a ennuam i omkhak leh ciin kong suaksak hi.

Kei zong ka pute khat pai hinapi, amah koi pen hi ding hiam cih ka thei kei hi. 

Zomi khangthu, tangthu, history ah a kipelh theilo kalsuannaleh thupiang khat ahih manin Piantit Pai (France Gam Pai) pen mikim lunglutna ahi hi. Zomi bek hilo minam dangte'n zong 1917 Galpi vai pen na kan tek uh hi.

Nidang ciang tulaitak a gamdang peem, lal, immigrate te tangthu zong kikan kik hamtang dinga, gamdang teeng masa, gamdang pusuak masa, gamdang mi suak masa cih bangin kikan kik ding hi. I khantohna khat ahih manin ciamteh dinga hoih ahi hi.

Leitung mi khempeuh Zomi te mah bangin hun khat lai in amau gam bek ah na om uh, amau kim leh paam bek na puah uh, tua pan a diangkhia, a lal khia, a pemkhia vive na hilel uh hi.

Zogam ah missionary hong pai masa te zong Europe pan USA pem masate na hi uh a, Titanic tuahsiatna ah a si pawlkhat zong Europe pan USA ah pem sawm te na hi veve uh hi. Zomi bek gamdang pem i sak leh Zomi te gamsungah Vompi Sahang tawh i kidelhdelh lai, Saluhawm suang nuama i kidemdem lai pek in mite in gam nuamzaw leh gam hauzaw, a khangto zaw gam na zuanzuanta uh hi. Tua manin "Ziakai dektak hang, ahi zongin lap lai hang ei, hong gaihsan nai kei uh, ei nek ding taak ding omlai sam" ciin ei zong a khangto minam lak ah amau khantohna etteh in khangto ni. Gual tawh kim dinga Sian siam lah i hi si a.


Hau Za Cin
Phuitong Liim
www.hauzacin. blogspot. com
"He knows how you feel"