ZOMI LEH KIPAWLNA

- Rev. Suan Khan Thang, Mizoram
Posted by: "Suan Khan Thang" suankt@gmail.com suankhanthang
Fri Oct 30, 2009 9:40 pm (PDT)


Pasian in Adam a bawl lai-in a koppih dingin Evuah na bawl a, suan le
khak nei-in na bawl hi. Hih in mihingte Ngalkhaat banga tangtat loin, a
kikhawl ding, a kihuh ding leh a kipawlkhawm ding i hihzia hong lak hi.

Tulai leitunga vangliatna a nei gam khangto USA khawng zong state
khat bek a tuamin hat veva lo a, state tuamtuamte kiho thei a, ma a bunkhop
uh ciangin *“Super Power Gam”* a suak thei ahi hi.

Zomite zong America, Asia leh Europe ah kikhenthang tase lahang zong,
thu kizatuahin, ahi thei zahzahin i minam khan nadingin ma bungkhawm lehang
i pau, i lai, leh i ngeina mang tuan lo ding hi. Zomite kipawlkhopna dinga
hoih ka sak pawlkhat hong at ing.

1. *Lai Lama Kipawlna *: Lai nesepna tuamtuam a om hangin, Zomi Christian
Literature Society (ZCLS) sangin a tangzaizawin lai nasepna a nei om nai lo
hi lehang kilawm hi. ZCLS in minam buppi zat theih ding - Lai Siangtho,
biakna Labu, Dictionary, Bible Commentary leh Bible Encyclopedia bawl a,
thupi mahmah h i. Hi thei hi leh, ZCLS ah hunbit nasem kikoih behlap hen la,
*“Zolai Zunna” *banah tulai siamsinte sim nop ding leitung thu leng tuamtuam
a tuanna *“Zo Palno Magazine”* kisuaksak thei lai leh, i khangnote in eipau
simin, ei lai siamzaw lai ding uh hi.

ZCLS makaihna tawh tua banga Magazine khuapi khatpeuh panin
kibawlkhia peuh leh, mun tuamtuama Zomi Christian Fellowship (ZCF) omna
tengah khetkhiat ziau theih ding hi. 1992 in USA ah ka om a, ‘*Times of
India’* kici thukizakna India khuapi khat Mumbai panin a kikhen hi napi,
Mumbai ah a kihawm hun lian-in, Washington D.C kimah hong kihawm ziahziah
lel hi. Tua banga sepkhopna om hi leh, Manipur gam, Meghalaya gam, Mizoram
leh India khuapite leh gamdanga Zomi siamsinte sim theih dingin *‘Zo
Palno’*kihawmkhia thei ding a, i khangnote in phattuampih ding uh hi.

Zomi Baptist Church in *‘Laitai’* magazine kha simin suaksak a, a sim
nuamte in www.zomibaptist. com ah kikhakkhia zelzel hi.

2. *Biakna Lama Kipawlna *: Thu kizatuah a vaihawmkhawm hi het lo napi,
leitung khuapi lian diak mun tuamtuamah Zomi Christian Fellowship (ZCF) om
ta hi. India gamah zong Kolkata, Bangalore, New Delhi, Chennai, Mumbai,
Guwahati leh Pune ah ZCF om hi. India gam pua ah Australia, Tokyo, USA,
Singapore, Malaysia, Thailand, Norway khawngah zong ZCF min tawh Zomite in
Pasian biakkhopna hun nei tek hih tuak hi.

Hi thei leh, tua ZCF tuamtuamte a en, a kem Pawlpi lian om hen la,
ZCF teng in Labu kibang nei khawmin, thu kizatuah deuh le uh i khangthakte i
lai leh i pau ah a khantohna nam khat a suak thei tam ka ci hi.

Mizoram pua lama *‘Mizo Christian Fellowship’* leh *‘Zoram pawn Mizo
Kohhran’* kicite Mizorama Mizo Synod in lim takin enin, amau Pawlpi nasepna
hiang khat-in nei uh a, a kul leh a Pastor-te uh semsakin, tha pia uh hi.
Hih in India gam khuapi a om a misiamte uh a gammanloh nadingin a kepna nam
khat uh ahi hi.

ZCF hoih takin a sai om hi leh, India ZCF teng bangin hunbit nasem
kician tak nih beek nei thei ding hi.

3. *Music Lama Kipawlna* : Kawlgam leh Malaysia gama ‘*Zomi Music Uplift
Society (ZOMUS)* a kiphuhkhiat bek zong, minam kisimmawhna gama omte in
ki-angtanpih mahmah a, phatuam lua khin hi.

USA, Norway leh Australia gama Zomite in zong tua banga ZOMUS
kiphuanin i Zo late mah sa in, C.D. in hong hawmkhia le uh Mizoram a Zomi
mangthangte khawngin khuamuhna in a neihlawh kei nam ka ci hi. Gamdanga i
Zomipihte tawh kithuzakna om lo ahih manin, Champhai kiima Zomi pawlkhat-in
Zomi ahih khawng kineu muhin, mi a baan zo ngei lo ding khawngin kingaihsun
lai uh hi.

Zomi Baptist Church in Zomite phuaksa la hoih nonote kaikhawmin Tonic
Solfa tawh a kithuah biakna Labu *‘Siansan Labu’ *kibawl a,* *hih sungah
Late a kisak ciangin nuam kisa mahmah hi. Hih Siansan Labu
www.zomibaptist. com ah et theih dingin kikoih hi.

English-te la phuaksa, ei pau tawh i lehkhiatte i sak ciangin, Pawlpi
khat le khat i la theih kibang thei nawn lo hi. Ahi zongin Siansan Labu
sunga Zomite phuaksa late i sak ciangin Fundamentalte, Pentecostalte,
Liberalte, Evangelicalte in lathu kibang kisa khawm diamdiam a, hoih bilbel
hi. A utte in a hot deuh in sa a, a utte in ol deuh in sa hiathiat hi.

4. *Minam Kipawlna* : Zomite teenna gam tuamtuamah *‘Zomi Innkuan’ * kiphut
kawikawi hi. Hih kipawlna tungtawnin Zomi Nam Ni, Khuado Pawi, leh Sialsawm
Pawi kizang zel hi.

Hi thei hi leh, *‘Zomi Innkuan International’ * cih bang pian kipawlna
om hen la, tuate in i Zo ngeinate kembit-in, i Zo puante tulai huna
khangthakte silh theih dingin hong bawlin, leitung gam tuamtuama Zomite silh
dingin hong zuak le uh hoih ding hi.

A hun dangah Zo puante i silh zo kei zongin, Zomi Nam Ni, Khuado Pawi
leh Sialsawm Pawi ni khawng beekin numei pasal in i Zo puan silh khengkhang
lehang i khangnote in Ngeina kip nei minam i hihzia hong phawk zaw kei nam.

Ka neu lai-in Murlen khuaah misi a om ciangin Zomi nupite in a
Puandum uh silhin, si gal uh hi. Manipur gam Lamka khua a numeite in misi a
gal uh ciangin, Khephiau teeng uh hi. Mao leh Tangkhul Nagate in biakna
Khawmpi ah amau minam puan silh in, san ziaizuai uh hi. Khasi numeite in
zong biakinn ah amau Khasi kizepna mah zumpih loin, Pasian biakna ah silh uh
hi. Mite in amau hihna tek tawh Pasian bia thei ta uh hi.

April 2009 in Tedim, Tahan, Kalaymyo tawnin Sawbuazisin ah ka hawh
leh, Zo khua leh Kawl khua khentel theih loh zah dongin khua teng phialah
Kawl lai kizangin, Kawl puan kisilh hi. Kumpi phal loh ahih leh bel gen ding
a om kei hi. Nagaland leh Mizoram khawng zong India gam sunga om ahih
hangin, amau omna state sung ciang lawmlawmah Hindi laimal zang loin, amau
state lai (Roman Script) zang uh a, Naga min leh Kala (Vai) min kisim thei
lianlian hi. Moreh leh Tamu kikal khawng zong Kawl khua leh Zo khua kikhen
tuam thei lo hi. Bang hang hiam cih leh, lai (sign board) teng Kawl lai tawh
kigelh a, Zo puan leh Zo nik asilh a teng om lo phial hi.

Hi thei hi leh Zomi Innkuan tengin anuaia thute zuih sawm tek lehang
:

1. Inn sungah Zopau zat tek ding hi.

2. Zolai sim theih tek ding hi.

3. Zomi min tawh kipawlna ah kihel ding hi.

4. Zomi i hihna banga nuntak ngam ding hi.

5. Zolai tawh a kigelh Lai Siangtho leh Labu zat tek ding hi.

Zomi innsungah pianpih pau lawmlawm zang lo a, minam dangte pau
bek zat pen, khantohna hi nawn loin, minam manthanna lampi totna ahi hi.