ZOLA TAWH PASIAN MIN PHATNUAMTE ICHTAWH KISAI.
Posted by: "Thang Siangh" zogampalpi@yahoo.com zogampalpi
Mon Sep 21, 2009 7:26 am (PDT)
Kum 2008 kum-a kibawl Zomi Khuado Pawi DVD Dr Cin Do Kham tungpan ngah kahihmanin, nikhat katute nihtawh kanupa un ka en uh hi. Programmes pen pauban omlo zahin hoih mahmah hi. Tua sunga Dr Thang Za Tuan hunhonna khawng kazak ciangin kilawm petmah kasa hi. Zo-numei nih in, Zopuan silhin ama nung hong zui uh a, a langtuakah hong ding hi. Dr Thang Za Tuan in, kammalval zanglo-in " Tu a kipanin Khodo Pawi kihong hi" hongcih ngiat pen thupisuah kasa mahmah hi. A banbanin hong kizomtoto a, " Tunsungkhat pan piang hingeingei hang" cihlah tawh kipan hi. Tua la mahtawh hun kikhak a, nuntak kha kai kasa hi. Tua inzong gam aading a veimahmah khat lungsim sukhalo-in omlo kha ding hi. Hun pen Pasian tungah ki-aap ngiat a, lungkimhuai mahmah hi.
Secratary-pa Sia Lianpi Khuado la, solfa aw leh Zo aw tawh khuangsaan keuh a hongsak pen, nungak lasiam melhoih nih ding a hongsak pen zong zaknop kasa hi. Ei Christian ten zu ih tanpen ahihmanin, a lasakna sungah," Ningzukhum leh aisa aw e," acih ciangin kisuangpian kawm a, anuih uh zong, kozong kana nuihpih uh hi. Taanglai ih Pu i Pate pen zu leh sa tawh na kizom den uh zong hong phawksak lailai hi.
Tua ciangin Zopuan Fashion lahna tawh hong kizom leuleu hi. Design suaite leh a khuite pahtawihuai dan pen ciangtan omlo zahin siam kasa hi. Nu Khual Man bang pen katheih ngeisa ahihmanin kazi tawh a letsongsan laitak khut kabeng uh hi. Leitung a khangto pente Fashion Show zong tuazah kan hilo hi. Tua ciangin Laam a tuamtuam leh Music a thak a bawlna khawng kamu hi. Sia Cin Sian Pau letsong leh Certificate kipiak ciangin zong nasiatakin khut bengin tha kanapia uh hi. Zolaamte mai-a Sia Neng Hau Thang leh Pa Mang hanla sa taitai a hong lam ciangin, ih Pu ih Pate hunlai pekin Ngeina pen gualnop cing mahmah ahihna kaphawk hi. Daklaampa khangno mahmah napi siam kasa mahmah hi. Hong kizomtoto a, " Hiphop" la hong kisa hi. Katuno kum li kumguk nihte in tua pen deih mahmah uh hi. Hong laam pah lianlian uh hi. Dak aw music hong thuah ciangin kilawm lianlian mahmah hi. Amai gual a tu, ulian tengin zong khutbengin thapia kamu uh hi.
Khangnote hanciamna tawh Gam Itna, Minam Itna leh thutuamtuam DVD ineih khempeuh pen picing kasa mahmah lel hi. Kawlte aa zong tuazah hituanlo hi. Freedom kici peuhmah leh Humanright kici neukhabeek ih gamah neilo ihihmanin, Arts lamtawh kisai pilna zang-a a sunglampan i luhluh keileh piang theilo hun hita hi. Ih Pasian phatphatin ih La i sasa ding hi. Ih Ngeina sungah sanggam teng tawh kimtakin ih gualnop photlohin Falam Haka, Matu sanggamte kihuzaap zolo ding hi. Itna late sakhawmin ih kaikailai ding hi. Ei dinmun kipsakin i lawhzawh mateng ngaihna ih lak ding hi.
Hih sungah makaite thanemna hilo, mipi thanemna tampi kimulai hi. Thanemna mawk hilo-in Kawl huzaap in hong phialzo pianpianta ahihman ahi hi. Tua pen makaite tawh khut kilen a hanciam lai ding pawlkhat om hi. Ih Zolaam leh Zola pen naupang ten sathei hetlo mawk uh hi. Tua pen a beisiangma-in laplai ihihmanin lungdam huai mahmah hi. Numeilamte awkaih siamzaw deuh uh hi. Tangvalpawl in sa ngam taklo banah, a sakciangin a pheikaih ding pen numeite aw zui-in tuaksuk sak hi. Kanuih uh za mahmah hi. Zongzo leeng laamnamkim a laamthei leh khuang tumsiam om mahmahlai-in ka um hi. Ngeina kepna zumpi pen ZYA ten neithuah henla Ngeina kepna zong neizo leeng hoih kasa hi. Lasiam khuang tumsiam pantah a, ih laam ngeina bang lian mah sinna khatpeuh omleh hoih in ka um hi.
Tua banah Laam ciangin Laamgui peuh kicimai hiam aw, a tawntunga kizang om hi. Tua pen amailam kalno khat suanin khelangkhat tuahto a, a taklam khe nungkik-in a kheveilam tuah suk hi. Tua pen lasakna munkhempeuh a kizang ahi hi. Tua ciangin kolamah Aaktai kici laam omleuleu hi. Lampai bangin pheipai paipai hi. Tua zong, nidang a, Ngeina kiciamteh DVD khat sungah sanggam Sihzanglaam lahna sungah lasakdan leh a laam kituaktakin om hi. Tua ciamteh ding ahi hi.
Sanggam Sihzangte pen eilakah advance mahmah ahihmanin etteh ding tampi om hi. Hih a sawmkhatpeuh sinkhol kigingkholin kipumkhatin ding pahlian uh hi. Amin dailoh nangin kikhualkhol thei uh hi. Nakhempeuh ah kiginkholhna thupi hi. Laam kituak diamdiam pen kithutuahnalim zong hipah hi. A dangte a laam khempeuh aaktai daatdat tawntung mawk uh hi. A kik ciangin aaktai bek a ih laamloh nangin hanciam ni.
Khuado Pawi, Programme khatpeuh ah, Zo, Thado, Sihzang khahsuahlo-in ih kim theihtheih nang hanciam huai kasa hi. Kihelkim tawntung huai kasa mahmah hi.
Zo Ngeina , Zolaam, Zola, gualnuamtakin zang thei leeng kiim leh pam nasiatakin kihuzaapzo bek ding hi. Israel te zong amaulaam mahtawh Pasian bia-in pahtawi uh hi. Biakpiakna hun, Nipihun in ih zang keizongin Pawihun tata bangah ih Ngeina pizat mahmah huai hi. Ei Tedim Zolaam sang a mipi huaizaw kuamah a nei omlo hi. Uliante hong pai ciangin Zonu suahin numei hoih khattawh lamsak leeng, hunlopipi-in a zunsuaksuak mai hi. Nuamsa lua ahihmanin hong lutkik vanvan hi. Tawpthei mahmahlo hi. Tua ahihmanin Zola tawh Pasian min phat theihun a omna dingin siamlopipi in, " ZOLA TAWH PASIAN PHATNUAMTE AADING" ci-in a taw hong pankhia kahi hi. Ih Culture ih domsang zawh mateng midangte kihuzaapzo lo ding hi. Kimleh pam huzaaplo-in minampi zong kisuakzo lo ding hi.
La dawngkhat
a. Miliam sinlai Satan banzal gamsiagul bang sia nalawmlawm e tui bang siang mawng e.
b. Kanialnial zong tui bang siangmawh, duangah hong luang Jesu sisan ngotui tawh, tui bang siang thei e, tui bang siang thei e.
Ahoihlo a omleh nalungsim sungah nakepsiamin hong maisak in.
Thang Siangh. zogampalpi@yahoo. com
No comments:
Post a Comment