Posted by: "Thang Sian Kham" khamyc@gmail.com
Fri Dec 18, 2009 5:46 pm (PST)
NAKPI NUAMNA THUPHA*
November kha bei kuan akipan Sweet December muak dingin mi khempeuh i
kigingkhol ngeingai hi. Kum khatin khasawm le khanih a omna sungah "Sweet" a
kici kha khat bek om a tua pen December kha ahi hi. December kha hong tun
simin i lungsim hong kilamdang in i genkhiat pak theih loh lawpna khat om
pah lian hi.
December khabul akipan mun khempeuh ah vanman nangawn kiniam
sakin, nikhat ni akipan Christmas Letsong kipia pah ziahziah ahih manin
Letsong kipiak kha zong kici hi. Sing tung suang tung mun khempeuh phialah
Sweet December laimal kigelh zihziah in i lungsim hong kilamdang sak zo hi.
December nikhat ni akipan Christmas late kisa in, biakinnte leh innte ahoih
thei penpen in kizeem hi.
Christmas pen Latin pan hong pai hi in, Christ - Khrist/Jesu cihna hi a,
Mass - Mihon/mipi cihna ahi hi. Tua manin Khazih leh mipite kimuhna/kilem
kikna kici thei hi. Eden huanpan Dawi mangpa hangin Pasian tawh a kigalneih
mihingte pen Pasian in a tapa Jesu Khrist tawh Sing lamteh ah hong mu khia
hi. Leitung ah biakna tampi a om hangin Khristian biakna pen a tuam pian
mahmah biakna ahi hi.
Biakna dangte in a biak ding uh Pasian bawl tawm/zong
tawm uh a, Khristian te ahih leh i biak Pasian in amah abia ding mi bawlin
hong zong a Sing lamteh ah hong gum khia hi. Tua manin Khristian biakna pen
zontuah biakna or Sing lamteh biakna kici hi. Khristiante biak Pasian pen
si, kivui in hansung pan a thokik Pasian ahi hi.
"Sweet" kammal pen Zokam in, akhum (or) anuam kici thei a, a khum December
cih sangin A NUAM DECEMBER ci leng ngaih zaw/ kilawm zaw hi. Leitung mawhna
pua khia(gum khia) dingin Jesu Khrist hong suah kha ahih manin, kamdang
khatin gen leng leitung ah nopna le daihna(Peace on Earth) hong kipat kha a
nuam December* *(Sweet December) kici hi. Hih mikang lai (Peace) cih pen
kammal ngaih mahmah khat hi in biakna tuamtuam le minam tuamtuamte in zong
adeih mahmah khat ahi hi.
Tua mah bangin Leitung ah gal kilemna abawl zote
bek (Nobel Peace Prize) kipia hi. Pasian pen kilemna Pasian ahih manin amah
tawh i kigalneihna/ i kilangpanna pan i kilemkik theihna dingin a tapa Jesu
Khrist tawh kilemna( Peace with God- Rom.5:1) hong bawl sak hi. Tua manin
Christmas pen eite ading sung lam lungdamna,kipahna lianpi tawh i zat ding
hi lo hiam ka ci hi.
A ngaihsut huai khat ah December kha sungin Jesu Khrist hong suak ci in LST
sungah kician in kigelh tuan lo hi. Phalbi khuadam vuuksan laitak Betlehem
Bawng kuang sungah suak cih hi in ani , ahun akhate sangin leitung mawhna
gum khia pa Jesuh i tel(neih) ding thupi zaw tham hi. Sweet December kammal
lel in nopna le daihna hong pia thei hi loin, nopna le daihna hong puak Jesu
Khrist i neihna hang bekin nopna le daihna kician taktak kingah ding hizaw
hi.
Lungdam bawl la khatah *" Leitung lungdam Topa hong pai Kumpi zaa ngah
ding hi" *cih ahi hi. Kamdang khatin gen leng Leitung mi khempeuh aw,,Nuam
un...lungdam un !!!Note ading NAKPI NUAMNA THU kong tangko uh hi" ci in
vantung mite in tuu cingte kiangah atangko thu pen Christmas taktak ahi hi.
Jesu in mihingte bek hong gum hi loin, leitung a om nuntakna nei/nei lo
akipiangsak khempeuh (All Creatures) gum khia hi zen hi.
Tua ahih manin Jesu pen leitung khuamial na sung pan khuavaak a puak khia pa
leh kilemna a piang sak pa ahi hi. Isaiah LST sungah ama min pen " *Lamdang
thulakpa, Vanglian Pasian, Tawntung pa, Nopsakna kumpi *kici ding hi. Mate
LST sungah leh* Jesu *min kimu thei hi. kigen a Jesu akhiatna in a mi pawlte
mawhna sung pan *honkhia pa* ahi hi. Leitungah a niamna penpen Betlehem khua
Bawng annekna kuang sungah hong suak hi. Leitung mi khempeuh mawhna pua khia
dingin Sing lamteh tungah sih ding nangawn teel hi. Hih thu hangin Jesu pen
min khempeuh sangin MIN lian pen Pasian in pia hi.
A niam penpen hankhuk sung pan Han suangpi in dalzo loin tho kik a, a sang penpen Vantung dongah kahto in Pasian ziat lamah tu in eite ading Palai hong sepsak hi. Jesu min in gupna hong pia thei, cinate damna, mittawte khuamuhna, Khebaite lapai
theihna leh misite thawhkikna ahi hi. Guallelhna tawh gualzawhna la in ama
Kumpi gam phut a, akumpi gam kisia ngei loin kip tawntung ding hi lai hi.
Tedim labu sungah " Jesu min manpha na la in, dahna gimna tate aw" a cih
bangin Jesu min tawh gualzawhna leh matutna i nei thei hi. Jesu min dang
khat pen *Emmanuel *kici a, akhiatna pen* eite tawh Pasian om khawm* cih
ahi hi. Emmanuel Pasian in na haksatna, na guallehna leh cihmawhna pan
gualzo nuntakna hong pia ding min ahi hi.
Tua ahih manin tukum Sweet December na muakna leh Christmas hun nuam na zatna hangin Jesu Khrist hong puak damna thupha, ki-it kilemna thupha, gualzawh daupaina thupha leh mihingte telzawhloh NAKPI NUAMNA THUPHA namkimte nang leh na innkuante
tungah hong tung ta hen ci in Tongsan pan i kihanthawn hi. Laisim mimal kim
Emmanuel Pasian in hong ompih ciat ta hen.
Khrist leh Minam sungah,
Sia Khampeek (Tongsan Pu)
Norway
No comments:
Post a Comment