Zeisu kiangah Tawntung nuntaakna ngah nuam khat Dotna
Posted by: "Vontawi Sangpi" vtcsangpi@yahoo.com vtcsangpi
Tue Sep 15, 2009 1:26 am (PDT)
Khat vei Zeisu in naupangnote' lutungah akhut nga-in thupha apiak khit ciangin, tua mun pan Zeisu apai khiat leh NUNTAAK TAWNTUNGNA angah nuam tangval khat tawh ong kituak-in Zeisu kiangah thudot ong kipan hi:
Matthew 19:16-24
Tangvalpa : Sya aw, nuntaak tawntungna ka ngah nadingin, apha bang ka bawl ding hiam? vs. 16
Note : Leitung i nuntaakna sungah, Nuntaak tawntungna ngah nopna lungsim i neih himhim ding thupi masa-a, i ngah theih nading lampi zong in, kanin leh i dot ding zong thupi lai hi.
Zeisu : Zeisu in, "Bang hangin Kei kiangah phatna thu hong dong na hiam? Leitungah Mipha khat bek aom hi. ahi hangin, nuntaakna sungah na tum nop leh thukhaamte na zui/tang in, ci hi. vs. 17
Leitungah Zeisu simloh mipha khat beek omlo hi cih zong Amaa kammal tungtawn in i kipsak zawh ding thupi hi. Nuntaak tawntungna sungah i tum nop leh thukhaam zuih/tan kul ahih na zong Tangvalpa dotna Zeisu' dawnna tungtawn in, i up-a i zuihpah ding thupi hi. Nang leh kei-in zong kisam sa kei kha mah ni ahi zongin, Nuntaak tawntungna ong pia Zeisu in kisamsa ahih manin nial sawm zuih loh sawm kei ni. Thukhaam bei hi, Thukhaam kisam non kei Upna bek hi ci-in, mawk otot kei ni, Eite' deihna, ei ut, ei hoihsak, leh ei kilawmsak cih te Zeisu in ong mang ding hilo zaw in en Amaa thukhaam zuih ding, man ding hi zaw hi. Nang leh kei ong tanpa Zeisu ngiat-in kisamsa ahih manin Nial sawm kei zaw ni. Gupna pen hehpihna ahi ta teu zongin, thukhaam zuih kul ahih lam Um-in, Upna tawh sang inla, zui-in. Nang theihna suang kei in.
Tangvalpa : "Bang thukhaamte zui/tang ding ka hi hiam? aci kik hi. vs. 18
Tangvalpa in thukhaam tampi aom sa hi kha ding hi. I zuih ding thukhaam tampi omlo hi. Pasian thukhaam sawm bek om ahih lam phawk in. Atheilo kineih kei in, Na lungsim khauhsak kei inla, Zui suk pah peuh in. Paulap zong kei in, Ong kimaap tuanlo ding hi. Pasian in athukhaam sawmte khel sawm vetlo in zongh phiatsawm lo hi cih phawk in. Matthew 5:17.
Zeisu : 1. "Mi na that kei-in." 2. "Nulepa mawhna bawl kei-in" 3. "Mi sum na gu kei-in" 4. Amanlo teci na pang kei-in." 5. "Na Nu na Pa zahtaak in." 6. Na Pumpi na it bangin, Midangte' na it in" ci-in thukhaam sawm alangkhat lam-a om Guk teng na ban gen hi. vs. 18-19
Nuntaak tawntungna ngah nadingin, apha bawl ding kisam kei na cih khak leh Zeisu in kisam ahih lam ong gen hi. Mihingte mawk gen hilo hi. Zeisu in Tangvalpa dotna tungtawn in agen ngiat hi. Thukhaam bei ding cih sangin akipsak semsem na hi zaw hi. Na mihing lungsim tawh hih Zeisu gen thukhaam guk bek pha hilo maw? ci kha thei ding hi teh Mihing leh Mihing tunga kibawl ding thukhaam kipsak lai ahih leh Mihing leh Amaa kikaal-a i zuih ding thukhaam Lite : Kei mah loh ngal pasian dang nei kei-in; Milim bawl in bia kei-in, Pasian min zaangkhai ngaihsut kei-in; Sabbath ni siantho-a zat ding phawk in. Ni khat pepeuh (Sunday ni, Wednesday ni) peuh ci zenzen lo hi. Hi te kipsak zaw kan lai dinga Vanthak leh leithak ah zang suak lai ding hi hang.... (Pasian aom laisiah thukhaam sawmte bei ngeilo ding hi - bang hang Amah khial theilo, kikhel theilo Pasian hi.) Isaiah 66:22-23. Mihing khempeuh ading ci hi. Mark 2:27. Nang leh kei zong mihing hi samlo i hiam?
Tangvalpa : "Tua thukhaam khempeuh ka zui/tang zo hi, Bang kisam lai ka hiam?" aci kik hi. vs. 20
Tangvalpa in Thukhaam khempeuh zui-zo kisa lua hi.
Zeisu : "Nang asiangtho nuam na hih leh pai inla, na neihsa khempeuh zuak in, mi zawngte na pia in. Tua hi leh, Vantunggam sungah sum na nei ding hi. Tua khit ciangin, Ka nung ong zui-in. vs. 21
Tangvalpa in Thukhaam khempeuh zui-zo akisak hangin azuih loh khat na om hi tua in Nang pumpi na it bangin midangte pumpi na it in cih ahi hi. Zeisu in thukhaam dang agen beh hi zenzen lo hi. Tangvalpa pen amah leh amah bek aki-it akikhual na hi gige hi, bang hang sum hau in zeek nuamlo hi. tua in amah bek ki-itna ahi hi. Midangte it in cih thukhaam pen thei-in zui nuamlo ahih manin, ahehsuak hi. Bang hang ken sum tha lawh lawh in amau mawk piak ding peuh ci kha zong hi ding hi.
Tangvalpa : Tua thu azaak ciangin, lungkim lo-in paikhia hi. Bang hang hiam cih leh aman sum tampi nei hi. vs. 22.
Na neihsa teng mizawngte hawm in pia in acih ciangin Tangvalpa Lungkimlo hi. Bang hang Angsungkhual mi hehpihlo amah bek hau nuam cih na hi. Zeisu in tua bang deihlo hi. Tua ahih manin Thukhaam sungah na hel hi. Thukhaam sungah om thute na zuih nop loh manin Tangvalpa bangin heh kei zaw inla, zuih sawm zaw in. Nang ut leh na deih tawh Thukhaam sawm te kituak kim khalo ding hi bangbang ahi zongin, nuntaak tawntungna ngah nuam na hih leh na zuih ding hi-a, tua lo lampi dang omlo hi.
Zeisu : Ken amaantakpi kong cih inah, "Sum haute in Vantunggam sung lut nading ahaksa mahmah hi. khat vei kong cih kik inah, Sai khat in phimbil vangah akhumhak sangin, sum hau mite in Pasian' Gam sungah lut nading ahaksa zaw hi. aci hi.
Sum haute khempeuh vantunggam sung lut ding ahaksa acihna hi zenzen lo in Sum hau mahmah ta leh mizawngte hawm nuamlo pia nuamlo cih na hi zaw hi. Siang gen mah mah leng hih thei ding hih zo ding dinmun ah om na pi asawmlo aut lo te ahi hi. Nang leh kei in zong, Thukhaam sawm zui thei ding zui-zo ding kim lai sawm ngiatlo i hih manin, apiang thei vetlo Saipi Phim bilvang sungah alut ding mah tawh kibang ahi hi. Ei thatawh zui-zo kei mah ni Pasian in zong thei hi ahi zongin, zuih sawn himhim lehang lampi om hi. Tua in Huhpa Kha Siangtho ong kamciam ahi hi. Asawm ngiat lo te pen zong kihuh theilo hi, sawn ding sem ding kipan ding na hih zawh kei leh Huhpa Kha Siangtho in anasep ding ong om pan ding hi. En bel Zui-zo lo ding ka hih teh ci-in zuih sawm ngaitlo himhim i hih manin, zong i zui kei takpi-a Huhpa Kha Siangtho in zong ong huh nop khangin, ong huh ding omlo hi.
Nang theihna suang kei inla, Zeisu i deihna zuih sawm zaw in tua hi leh lampi om hi. Nuntaak tawntungna ngah nadingin Tangvalpa in Zeisu kiangah va dong-a Thukhaam zuih ding thu agente mangngilh kei ni. Zeisu tektek om lai henla, dong leng Thukhaamte na zui-in mah ong ci kha ding hi ahi zongin, Tangvalpa bangin i kisapna kibanglo dingin ka um hi... Pawl khat te kiangah, Kei mahlo ngal pasian dang bia kei, Pawlkhat kiangah, Na Nulepa zahtaak in, Pawlkhat kiangah Ka Sabbath ni siangtho sak in peuh ong ci kha dingin ka um hi.
Na ngaihsutna tawh akituak kei leh Zeisu Kammal hi ci-in na sang siam ciat un.
Atel kim ciat dingin Kammal anei anungta Pasian in thupha ong pia kim ciat hen.....
No comments:
Post a Comment