PAWLPI LEH MINAM KHAN NADING

Rev. Suan Khan Thang
Champhai, Mizoram

PAWLPI LEH MINAM KHAN NADING
- Rev. Suan Khan Thang, Mizoram

Kum zalom 19 bei kuanin Tuipi (Ocean) galkhat panin Mikangte in Chin Hills leh Lushai Hills ah Lungdamna Thu hong puak uh a, amaute nasepna hangin nidanga Dawi le Kau a kihtate in a nungta Pasian i bia uh hi. Leitung thu ah zong missionary masate hong pattahna hangin minam liante sin pilnate i sin thei ta uh hi.

1. Pawlpi leh Minam a khan nadingin lai nasepna lam hahkat kisam hi : ‘Pau’ kici pen laibu sungah a kigelh kei leh, bei tawmtawm lel hi. Ka neu laiin ‘Ralte pau’ om a, tua pen laiah kigelh lo ahih manin, tuin Ralte pau beimang ta hi.

1950 - 1960 pawlin Lamka (Manipur) gam, Chin Hills sunga Tonzang leh Tedim gam, Lushai Hills sunga Murlen, Vapar, Hnahlan, Ngur, Leisen, Zotlang, Kawlbem leh Teikhang khawngah Tedim La leh Tedim Lai Siangtho kizang ngei hi. Ahi zongin, Kawlgam sung panin tua biakna laibute hong pai nawn loh ciangin, Mizoram sunga eimi tampi takin Lusei pau kisin tawmin sim uh a, tuin Lusei pau bekin a pau nuam, amau pianpih pau a zumpih tampi tak om ta hi. Mizoram sunga i mite midang a suahna uh pen, tua hun laiin biakna laibute a kicingin Chin Hills panin a kihawmkhiat zawh loh man ahi kha kei nam, cih hong ngaihsunsak hi. Leitungah laibu a nei zolote’ pau leh a minam uh beibei a, laibu a bawl ziahziahte’ pau leh a minam uh kibehlap toto hi.

Lushai Hills (tuin Mizoram kici) leh Chin Hills (tuin Chin State kici) ah Lungdamna Thu hong tun hun kibang phial hi napiin, Mizorama Pawlpi leh minam hih banga a khan tuamna ahang hi dinga ka upmawh thu pawlkhat ka hong gelh hi.

2. Mizoram Pawlpite in phualpi zumpi nei khawmin, tua panin sum zeekin vai sai uh hi : Khua Pawlpite in Phualpi zumah a sawma khat sumpite uh sungkhawm khinin, tua mun panin zeek uh hi.Pawlpi sunga nasem dingte zong, a gambup vaihawmna sangpen in lain, a sep nading mun sehsak uh hi. Phualpi zuma Secretary leh khua Pawlpi akem pastorte, a nasep hun ding ciangtansa (term) nei uh a, tua hun a cin ciangin, tungsiahte koihna munah sem uh hi. A gambup a Pawlpi’ sum neih teng mun khatah kisungkhawm ahih manin, hunbit nasem ding seekkhiatna (training) tawh kisaiin sum a kicingin nei lel uh a, tuate tawh pilna siamna a nei mi tampi seekkhia-in, Pawlpi leh minam ading na lian pipi semkhia thei uh hi.

3. Mizoram Pawlpi liandiakte, biakna laibu bawlna-ah pangkhawm thei uh hi : Baptist Church of Mizoram leh Presbyteriante in a biakna labu uh “Khristian Hlabu” bawlkhawm uh a, Labu kidangsam cih bang om lo hi. Hih Pawlpi lian nihte’ bawlkhiat labu pen Mizoram leh gamdangah kilimzat mahmah hi. Minam kipumkhat nadinga kisam Lai Siangtho bawlna ah Presbyterian, Baptist, Salvation Army leh UPC te pangkawmin na semkhawm thei uh a, hampha mahmah uh hi. Zomite in zong, a zattak Lai Siangtho leh Labu i neih theih nadingin Pawlpi bangzah hiamte pangkhawmin nasepna tangzai leh akip i neih ding thupi hi.

4. Mizoram Pawlpite in Bible ah min kibang zangkhawm thei hi : Mizo Bible bangzahvei hiam kizuun kik ta a, a thak a ateikhiat (new translation) zong om ta hi. Hi tase leh, a Bible min leh a sunga minte kikhelsak tuan lo uh hi.

Ei Zomite in zong i minam kipumkhat ding i ut takpi leh, Bible sunga minte i minambup in i zatsuak theih ding om pianpian ta hi. Hih anuaiate en dih ni :
Zomi Bible sunga minte (proper names) :
(a) (b) (c)
India Zomite Tedim Bible 1977 Ed. & Tedim Bible dangte (Paite, Zou, Vaiphei, Kuki) Hilhcian Kithuah Bible
Babilon Babilon Babylon
Aigupta Izipt Egypt, Izip
Khris, Kris Khris Khrih, Khazih
Jakob Jeim James, Zakoh
Jesu Jesu Jesuh, Zeisu
Judah Judah Jew, Zudah
Kalvari Kalvari Kalvary, Kalani
Mari Mari Mary, Mazih
Paul Paul Pawl, Pawlu
Hih a tunga (a) khawk leh (b)khawk in Zolai a sim thei ciamciam Zomite khualna in English laimal q, x, y, w, te Bible sungah zang lo uh hi. Mizoram pen India gam state lakah laisim thei percent a tamna gam hi napi, a Bible sung uhah Mizo laiah a om lo q, x, y, w, zang nai tuan lo uh ahih manin, Tedim laiah tua laimalte i zat guapguap se ding a hoih pen tam cih ngaihsuthuai mahmah hi.

5. Mizoram Pawlpite in lai-mal zatdanah zuih kician khat nei uh hi : India gam sunga Hmar, Mizo leh Paite-te, amau lai B.A dongah a sin ding India Kumpi in phalsak ta ahih manin, laigelhdan kician tak nei ta uh hi. Amaute in laimal ‘aw’ zatna kician takin nei uh a, Tedim laimal tawh maan takin a kigelh thei kikeuh lo kammal - ‘Tawlawk’, ‘tawsawn’, ‘tawbo’ leh ‘Kawsah’ te Hmar, Mizo, Kuki leh Paite laiah simkhialh theih het loh dingin kigelh thei hi : Hih bangin :

Tedim Mizo & Hmar Paite & Kuki
Tolawk / tawlawk Tawlâwk Tolawk (‘o’ pen ‘aw’ lawhtom bekin zang den)
Tosawn / tawsawn Tawsâwn Tosawn (‘o’ pen ‘aw’ lawhtom bekin zang den)
Tobo / Tawbo Tawbo Tobou (‘ou’ pen Mizote ‘o’ zat bangin zang)
Kosah / Kawsah Kawsah Kosah (‘o’ pen ‘aw’ lawhtom bekin zang)

A tunga Tedim kammalte (Tawlawk, tawsawn, tawbo, Kawsah) i Zomipihte mah bangin, i laiah maan takin a kigelh theih nadingin, ‘aw’ lawhtom pen a ciamtehna khat i bawl kisam hi. Tua hi leh, ‘aw’ lawhsau leh ‘aw’ lawhtom zong kitel khial nawn lo ding hi. Gentehna in :
‘aw’ lawhtom ciamtehna tawh Tedim pau Zolaiah maan takin kigelh thei hi
aw Tawlawk, tawsawn, tawbo Kawsah

Hih atunga ‘aw’ lawhtom ciamtehna i Zolaiah zang thei hi le hang, i Zopau teng khempeuh i Zolai mal tawh kician takin gelh thei ding hang a, i Zomipih Kuki, Paite, Hmar leh Mizote mah bangin i Zolai B.A dongah sim taak ding hi. I Zomipihte in ei Tedim pau pen amau laimal tawh simkhialh theih het loh dingin a gelh theih uh leh, bang hangin ei a pau neite in i laiah i pau bangin a gin theih nadingin bawl thei lo ding i hi hiam? ‘Aw’ lawhtom ciamtehna bawl lehang, a kicing hi lel hi. Tua hi leh i vowelte hih bang hong hi ding hi :
Zolai lawhtom vowelte : a aw e i o u
Zolai lawhsau vowete : aa aw ee i i o uu
I Zolai zatnasa ah vowel ‘aw’ pen a lawhsau leh a lawhtomah a mel kibang mawk hi. Hih bangin :
Zolai lawhtom vowelte : a aw e i o u
Zolai lawhsau vowelte : aa aw ee i i o uu
A kizatzia : Awn Khaw Niang in a nu’ Kawsah ding Bawng khawi hi.

Vowel ‘aw’ pen lawhtom leh lawhsauah a kizatkhop sung teng i Zopau ahi Tawbo, Tawsawn, tawdap, Tawlawk cihte a aw maan takin gingkhia thei ngei lo ding hi.

I Zolai zatna-ah i kammal bulte a thu luanzia tawh kizuiin a laimal i kikhelsak(modify) hi. Hih bangin :
(a) (b) (c)
Kammal bul A kikhel kammalte A kikhel kammal zatzia ding
(root words) (modified words) (uses of modified words)
1. Kia (fall down) ke, kiat 1. Thangpu sing tung pan kesuk hi.
A kiat main lusu kha hi.
2. Lua (too, much) law, luat 2. Hong it law veng aw
It luat ngaihno aw
3. Lua (vomit) law, luak 3. Na gu nek lawkhia in
Na luak leh dam ding hi teh.
4. Khua (village) khaw 4. Gawsing khawtawah Tawlawk om hi.
5. Vua (beat) vaw, vuak 5. Na nu vaw kei in
Na vuak leh na Tawbo kizep ding hi.

Hih atunga nambat (c) column-ah a kikheel kammalte (modified words) zang loin, a kammal bul (root words) zang hi le hang, a kigelh bangin i sim ciang Zopau siam lote bangin pheitai hawihawi a, kilawm het lo hi. Hih bangin :
1. Thangpu sing tungpan kiasuk hi. A kia main lusu kha hi.
2. Hong it lua veng aw, it lua ngaihno aw.
3. Na gu ne luakhia in. Na lua leh dam ding hi.
4. Guasing khuataw-ah Tawlawk om hi.
5. Na nu vua kei in. Na vua leh na Tawbo kizep ding hi.

Leitunga minam lian English leh Greekte in zong eimah bangin kammal kikhel na nei tek uh a, a thu luanzia tawh kizuiin a kammalte (verbs) kikhelsak toto uh hi. Ei zong khangto nuamta i hih ciangin, minam liante mah bangin i Zolai-ah i Zo kammal khempeuh i aw suah bang lianin a ginkhiat theih nadingin kammal kikhelte, a kikhelna bang lianin I gelh khiat theih nadingin ‘aw’ lawhtom ciamtehna khatpeuh zang ta ni. Tua hi leh i pau kammal teng maan takin kigelh thei ta ding a, I Zomipihte gelh theih teng maan takin I gelh thei ta ding hi.