Lawm Zon Zia Ding Theih Huaithu ( ki kum ni)

Lawm Zon Zia Ding Theih Huaithu ( ki kum ni)
Posted by: "Hau Za Cin" suante2002@yahoo.com suante2002
Mon Dec 7, 2009 3:01 am (PST)



Dear Nang Khai,

Na lunglut "lawm zon zia ding" pen thupi sa ing. Thu picing, thu limci mahmah khat leh mipil thusuut (critical analysis) mahmah in nong pholak manin thu ngaihsun siam mi na hihna kitel sa ing. ZONET ah thu pheng gen hilo, hih bang thu limci ka sim khak manin hampha kisa ing.

Ka sanzia pawlkhat hong gen ning (nang dotna pan):

1. Nam dang tawh kiten pen a sia lua bangin ngaihsut huai kei. Ahi zongin tu tadih in ei Zomi dinmun limtak en leng nam dang sangin ei Zomi sung mah pan kiteng leng hoihpen zaw leh kilawm. Ahang pen i nekzonna leh pilna siamna te namdang zahin khangto nailo ahih manin.

2. Siangtho kitenma a kizop loh pen ei hoihsak leh sakloh hilo zaw in, Christian i hih manin i Lai Siangtho sungah a kigensa - phalloh, zatloh ding, hihloh ding ahi hi.

3. Ka nu leh pa kitenma in ka nu a gai hileh ken tua ka pianna ding vai ah khentatna nei thei nawnlo ka hih manin ahi bangbang ka san (accept the reality) a, ka mailam ka khual ding thupi pen ding hi.

4. Ta neih zah ding pen ei thu hilo a, ei hong bawlpa Pasian khut ah om hizaw hi. Topa in hong piak zahzah a kemzo dingin hong muang cihna hi a, ei khentat theih hi in ka ngaihsun kei hi. Cidamna tawh kisai, kumpi ciangtansa om ahih leh tua pen thu tuam ci ni. Mi gina suah zawhloh ding zah ta neih eu au zong Pasian deihna hi tuanlo maithei hi. Zomi laphuak siam Pa MV Pauno cih bangin, "Topa khut ah nga ni".

5. Zi leh pasal neih hun ding pen Lai Siangtho in nek ding a kicin ciang, inn leh lo kip neih ciang ci hi. Tua bang a picin baih leh nei baih, a picin hak leh nei hak. Ahi zongin a ziakai lua ding hoihlo ahih manin kum 50 ma lam peuhmah hi leh maw. Neih theih hun masa pen kumpi leh cidamna lam sinte in ciangtansa khat nei uh hi.

6. Zi leh pasal neilo a omna hang pen a tuamtuam hikha inteh. Pawlkhat pen muhzawhloh man hi tuanlo napi nei pak utlo, a deih bang hong pai nailo cih bang hi maithei. Pawlkhat pen a deihlo ngiat zong om ding hi - cidamna lam tawh kisai hang, nek leh dawn neihlah man, etc.

7. Zi leh pasal neih manin haksatna tawm tuanlo a, neihloh manin haksatna tam tuanlo kha ding hi. Mihing i hih sungteng nek leh dawn zonga kibuai tek, lawm leh gual tawh kikholhna ah sep ding kinei ciat, tavuan kinei ciat hi. Mihing khat kibehlap manin nop tuam, ahih kei leh haksa tuam cih om tuanlo a, a kibang ahi hi.

Lai Siangtho ah zi hoih, pasal hoih pen zon zawh thu tawh a kingah hi na cilo a, 'Pasian piak hi' na ci hi.

Hih bangin thuhoih leh thu limci tuamtuam hong khahkhia zel in. Lungdam.


Hau Za Cin
Phuitong Liim