ZOMI tawh kisai thu

Pu Vum Son in "Sihzangmi hi hang" a cih loh lamdang sa ing! Pu Captain A. Khup Za Thang in zong "Sihzangmi hi hang" na cilo a, ZO hi hang, ZO suan hi hang na ci zaw bilbel hi. Tunai laibu bawl hile uh a mi pawlkhat in mukpiksan nuam phial dingin ka um hi. "Hai ve uh e Sihzangpau pau a 'Sihzangmi hi hang' a cih loh uh, ZO suan i hi, ZOMI i hi a cih thapai uh...." ciin kiko lai ding hi. Ahi zongin a hailoh lam uh kitellua mahmah uh ahih manin ZOMI i hi, Pu ZO suante i hi na ci pah uh a, na khial hetlo takpi uh hi. ZOMI TIMES, Vol.1, Issue 2, pp.2 ah, "Tedim gam sung a om Khaikam, Mainuai, Zozang, Tanzang, Kimlai, Zonuamzang, Dimlai gamsung gawm acre 8,000 a zai leitangh leh Gulu mual (Gullu mual) pen march 27-April 4 kikal in Nay Pyi Daw pan thupiakna om bang in zum nasem pawlkhat makai in Zomi taagpi taangta i deihna leh phalna omlo lo-in leh, hausa upate theihsakna om lopi-in, gamgi mualsuangte susia gawp uh a, ih Pu ih pa te phuhsa gamgi ciaptehna teng phiat mang uh hi. GPS (Global Positioning System) technology zang in a mau ut bangin gam keek in Sagaing Division sungah lutsak dingin Nay Pyi Daw ah lai puak uh hi. Hih thu a tuak khua 7 pan Hausa teng in lungphona lai April 4 in Nay Pyi Daw ah khak uh hi. Tungsiah pan in khensatna kiza kik nailo a, Pu Chin Sian Thang in: "Hih thu kikipsak leh kikipsak lo, cih pen May 10 khitteh kithei pan ding hi," ci hi. [SRC: Zangkong Thuthang @ ZONET]" ciin ki at hi. Zomi te bek hilo nawnlo, minamdangte in zong Zogam pen sehsat ta uh hi mai hi. Zomi te in bel a gam bek hilo, a Zomi min mahmah zong a sehsat sa uh hi mai a, a lamdang bel hi mawk hi. Pu Vum Son in a laibu pen ZO HISTORY na ci lo in SIHZANG HISTORY ci henla eiteng khempeuh hong huamsak leh tuni a 'ZOMI hi hang' hong cih tengin i thukim takpi tam? Ngaihsun masalo a thukimpah pawlkhat om dingin ka um hi. A nungsang ah 'hi kei' a ci kik om ding hi. Ahi zongin tua banga hong lung-am sak sese lo in a dik pen, a maan pen, a hi takpi pen mah hong dinkhiatpih pah a, ZO hi hang ciin hong pulak in, a laibu thulu ah zong koih pah ngeu' a, ZOMI i hihna hong kipsak in, a thumuhna, a thutheihna leh a pilna kua muanlah vetloh dingin hong kilangsak siam hi. Ama nungsangah 'kei ka hi' ci a laisiam khangno a khang masasa in ZOMI hihna thu a kan uh ciangin Pu Vum Son thumuh kholhzia tel semsem uh a, a zahtakna uh lian semsem hi. Taptung meilum awi kawm a holim mawkmawk sangin ama thumuhna na lianzaw pekpek hi. Tua mah bangin Pu Khup Za Thang, Burma Army Captain pension in zong ZOMI te thu a kankan ciangin bangthu tawh kitel pen dinga, bangthu tawh kipelem lo pen ding hiam ciin a ngaihsut ciangin Khang Tangthu tawh kician pen ding hi ciin i khangguipi pan in hong suut dihdih hi. 'Pasal ka hi, ka pa tapa' a kici khempeuh in a maingap hetloh nasep khat pen khangthu kan ding ahi hi. A zi kua? A tanu kua? A mak kua? A sunghpa kua????? Kan ding tamlua...... ... Ahi zongin Pu Thang Khan Gin Ngaihte, Lamka kammal kawm leng' ZOGAM TANGVAL akici lakpan a duai hetlo Pu Capt. A. Khup Za Thang in tua te khempeuh hong suut, hong kankhia, hong ciamtehsuk diudeu in, a lunglutte in mitphia lo lianga zong i simkhit pak loh ding laibupi in i mai ah hong luikhia hi. Hizah a kuhkal Zomi sungah bangzah i om tam cih dot taak liang dingin ka um hi. ZO SUAN' KHANG CIAMTEHNA (The Geneology of ZO) cih laibu a gelhna sungah Pu Khup Za Thang in i vekpi in Pu ZO suante i hihna a banban in hong laksuk diudeu a, i vekpi in ZO suan, ZOMI i hihna hong lak hi. Sihzangpau zang ka hih manin 'Sihzangmi hi hang' ciin hong tangko dawkdawk sese lo a, pasal vai takin ahi penpen mah ZOMI i hihna hong lak zaw hi. Tua pen ZOMI te khangthu a kan leh a suut mi peuhmah in 'hi mah hi' ciin ama laibu pan ZO etteh ciatciat uh hi. Mipil leh thuthei taktak te in thu pen ahihna mah na gen lian lian uh hi. Politician te tawh a kibatlohna uh pen mipilte in thumaan gen uh a, thudik gum uh hi. Amau angsung bek khuallo a, a kip ding, a kho ding, a dik pen, thudik pen mah tangko den uh hi. Gandhi in, "Thudik (truth) i cih pen mualpite pianma pekin om zo hi" ci hi. ZOMI i hi takpi diam? Ahih kei leh koilai munkhat minpua minam peuh i hi mawkmawk zaw diam? Hau Za CinPhuitong Liim

TONGSAN pan ka tong san
Posted by: "Hau Za Cin" http://in.mc391.mail.yahoo.com/mc/compose?to=suante2002@yahoo.com&Subject=suante2002
Thu May 22, 2008 11:44 am (PDT)
TONGSAN pan ka tong san: TONGSAN thukizakna laihawm pan in ka thuzak lak ah, "ZOMI TUALPI kibawl dinga, tua dingin sum leh pai a piate tungah ZOFA (Zomi Football Association) lungdam mahmah hi," cih pen thupi kasak mahmah khat hi. A lian, a thupi, a huamkim thu a ngaihsun te zahtakhuai a; a kip a kho ding a geelte pahtawi huai a; a semkhia, a tangtungsakte pahtakhuai sem hi. Zomi khempeuh lungsim ah a thupi mahmah khat pen kimawlna, ciammuihna, sports ahi hi. Tangpi tangta kidemin khuazangbup khawngin kiciammui zaizai hi. Bawhlung (football) hong tun ma in suangpumlot, kanteh kan, leilam kan, khau kisut, lingkap or ling kineih, etc. cih bangin gualnopna tuamtuam kinei hi. Leitung khantoh tawh kituak in kidemna leh kimawlna, ciammuih dan kikhel toto in tu in buangnai mutpuak Football a kici khe tawh sui in kidem zuazua ta hi hang. Tua pen Zomi bek hilo in gam khangto masa te in zong na uang bawl sem uh a, Zomi te sangin zong hahkat sawmzaw lai uh hi leh kilawm hi. Tua banga leitung mun khempeuh ah a ki thupi bawl mahmah kimawlna TUKPENG SUIH a kici den pen tuin a suihna ding Tualpi hoih neih ahih zo khempeuh in kidemta uh hi. Tua kidemna leitungah Zomi te zong ziakai nuamlo in hanciam a ZOMI TUALPI bawlna ding a kipat uh pen i khantohna khat hi a; tua thu TONGSAN pan tong ka san pen ka lung hong kimsak giugiau khat ahi hi (kei zong tukpeng suih a uk mahmah khat ka hih manin). ZOMI TUALPI, Kawlpi ah ka kimawl khak mateng, Hau Za CinPhuitong Liim

Re: zomi vai leng ih lung kham
Posted by: "Thang Siangh" zogampalpi@yahoo.com zogampalpi
Sat May 31, 2008 8:38 am (PDT)
Zomite pen leitung midangte mah bangin paubaanglo-in kipiang hi. Leitung pen a kisia, mawhna hoihlohna namkim tawh kidim a, ih khankhiatna mun pen, ahoihnamun hihding kisam mahmah hi. Khaici kiatna leitang hoih maw, nitaang guahtui hoihtak kingah maw, bang khangkhia ding cih kisam hi.Kawlte pen namlian ahih hangin, khansia penpen minamte ahi hi. Kumpi a utmanin a pa thatin kumpizaa a suanto te ahi hi. Guktakna pen amau pianpih ngeina hi-a, veengleh paamte tungah cihtakna khualna cih anei ngeivet lote ahi uh hi. Thadah in a olno aa ngahna ding bek ngaihsun uh a, a nuntakpih uh kammal Naalee muh acihpen upadi omlo ki-ukna kammal ahi hi. Zuau leh sumgolh tawh nungta uh hi. Amau uksungaa piang minam khempeuh tua ngeina tawh hong khankhiat pih hi.Ei Zomite pen, ih khanna ding leihoih nitaangpha ih kisaplaitakin, khaici bangin ih pokhiat phetin, mikaangte khutsung kitungaa, thumanna hong hilh uh nhangin kamneunono-in hong khenthaang in hong uk hi. Cikmah hun aa kigawmzo nawnlo ding aa hong bawl ahi hi.Tua banah Kawlte khutsung kitung aa minam itna, thumanna, cihte sisan sungaa ihguan hun ding omlo hi. Zomite thu ngaihsunsun leeng ih awmbing ih lungtangna mahmah hi. Ih gamtat theihna Biakna leh khalam kipattahna longal lampi omlo hi. Tua nangawn hong huzaapzo lua ahih ciangin Biakna makaite nangawn a pawlpi ukzia a ma phattuamna ding tamzaw a, ahoihlam khantoh ding lam et tawm mahmah mawk ei, Namah ei.