A kah toto America 13: A gelsiam Zomi makaite

Posted by: "Hau Za Cin" suante2002@yahoo.com suante2002
Wed Sep 10, 2008 7:26 pm (PDT)
A kah toto America 13: A gelsiam Zomi makaite"Hilhcian Kithuah Lai Siangtho" (First Print: 2006) bu ka muh ciil ni' a zing ciangin Florida Zomi Innkuan (FZI) te thusiamna leh gelsiamna tawh Zomi makaite in Miami Beach a Hollywood veng China Buffet ah, "Dr. Hau Za Cin, Zomi sung pan khangno Ph.D. (Chemistry) ngah khat in India panin hong veh in, hong pha vingveng ahih manin amah pahtawina leh kikhawlhpihna hun" ciin nitak ann limci tak hong nekpih uh a, thugenna hun tomno hong pia in - gilvah in, lung zong vah a, nuam kisa in, Zomi hih ka angtang semsem uh hi. Hih dinner ah Zomi Innkuan USA President Rev. Dr. Cin Do Kham te nupa zong Tulsa khuapi pek pan hong pai vingveng in, hong kihelthei uh ahih manin ka hampha tuam diak hi. 1,452 Miles (2337) Km a gamla pan moto tawh hong pai vengveng uh hi. Lungdam. Hih July 21, 2008 annekkhopna ah Zomi makaite a tamzaw hong kihelthei hi. A zahtak huai, a gelsiam Zomi makaite zahtakna i pia a, minam leh gam ading amau mah i muan i suanpi te uh hipah hi. FZI pan makai muan leh suante: 1. President : Pa Thang Do Hang2. Vice President : Pa Gin Za Mung 3. Secretary : Pa Kam Sian Lian4. Asst. Secretary : Pa Vum Za Khai5. Finance Secretary: Pa Ai Mung 6. Asst. Fin. Secy : Pa Mangpu7. Treasurer : Pa Zam Za Lian8. Music Secy : Pa Thang Suan Mang9. Games & Sports Secy: Pa En Lian Pau10. Cultural and Literature Secy: Tg. Tawng Cin Khai11. Religion Secy : Rev. Vung En Thang12. Asst. Religion Secy: Pa Vung Pian Sing13. Advisor : Pa Tuang Khan Thang14. Tg. Do Suan Mung15. Pa Khup Suan Thang16. Pa Pau Sian Lian, Ex-Secy, FZI. Makaipi Pa Hangpi in FZI makaite mel lahna hong nei in, gualnuam takin ann ka ne kawmkawm uh hi. Pa Ai Mung pen Zomi lak pan Sushi hual kisem thei hi cih a mukhia, a pan khia, a sem masa hi a cih ciangin mipi in pahtawina in khut kibeng damdam hi. A nop dan. Tg. Tawng Cin Khai nasepna hang tawh hong kihel manlo in khualzin a, tulaitak vanleng sungah tu in Miami lam hong zuan hi a cih ciangin kiphawk mahmah hi. Tg. Do Suan Mung pen Conference tawh Zomite US ah kipai thei hi cih a mukhiapa, conference tawh US a tung masapa hi cih hong pulak ciangin kipakta ciat a khut kibeng ziahziah hi. Ama nungzui tampi US ah hong tungzo ahih manin Zomite kihampha hi. Pa Khup Suan Thang pen Zomite muan leh suan hi a, minam a it a zuun nuam mi hanciam hi a cih ciangin zahtakna kipia hi. Pa Pau Sian Lian pen FZI kipatcil laia member khat hi a, laiatpi lui hi in, US kumpi zum ah Tedim kamphen zong sem hi. President Bush seppih Zomi khat in hong uap ahih manin kikhamuangtuam hi. Florida Zomi lak ah bual a nopna pen inn ah hawh kawikawi leng, "7th Anniversary of Florida Zomi Innkuan" cih kigelh niangtui hai (tea cup) tawh niangtui, theitui, avot, etc. kidawn kha den hi. Zindo, lenglado, kikholhkhawm siam uh a, lungsim picing in i om nuam mahmah hi. Lungzuan nangawn nuamtuam! Fried Sushi, Crab legs, steam dumpling, clam, miso soup, etc. ka nek khit uh ciang thugenna tomno hong neisak uh a, "i ngeina, i lai, i pau leh Zomi ciindan ngeina hoihte" i zuun tohtoh ding, khangsawnte in zong a ciin ding uh hoih kasak thu khawng ka kikum uh hi. Zomi Innkuan USA makaipipa Rev. Dr. Cin Do Kham in, "US ah Zomi Innkuan min in kong muak uh a, Lai Siangtho sinna lamah PhD ngah bangzah hiam om a, ahi zongin leitung pilna lamah khangno PhD ngah tampi ki om nailo ahih manin tuni a i kikholhkhawm theih pen thupi, manpha sa ung. Na mailam zong Topa in hong gualzawhpih zel hen...." ciin muakna, itna, deihsakna leh thupha tawh hong zindo ciangin a innteek pen hita ka hiam ka ciphial hi. Zomi hih mahmah nuam ngaungau. "Tulsa lam zong hong zin in. Nipini simin Zomi mi 20, 30 bang kibehlap den hi ung. Tu in zong a gualnuam thei ding khawm kiomta hi. Na mit mahmah tawh hong mu lecin hong deihsak ing...." ciin Zomite khantohna, mainawtna leh nuntak kikhek, upate in 'khang kilamdang, khang kikhek' a cih uh mu dingin hong zawn hi. [Topa in pha a sak leh muh loh dingin pammaih kasa hi]. Annek khit ciangin innpua ah maan kizaih in, 'group photo' ciin ka nui siusiau uh hi. Zing ciang vai tuamtuam, nasep tuamtuam, zinna ding tuamtuam nei ka hih man un holung cim manlo in MANGPHA ka kikhak phot uh hi. I kimuh kik mateng Topa in i omna ciat ah hong kem, hong makaih, hong cing denta hen. Topa aw, ka makaite uh thupha namkim hong piaksak in. America ah zong Zomi itna kiam tuanlo hi!! (zop lai ding) Hau Za CinPhuitong Liim