Laibu Etkikna

Laibu etkikna: "NA PASAL THEISAK KEN" by Ruth Vum Ngaih Cing
Posted by: "Hau Za Cin" suante2002@yahoo.com suante2002
Mon Mar 17, 2008 3:52 am (PDT)
Laibu etkikna: Laibu min : "NA PASAL THEISAK KEN" by Ruth Vum Ngaih Cing Published by : Lawm it mahmah,Kum : June, 2006Bu phazah : 500Award kipia ding hi leh a kipia masa ding, piak masak dingin zong a kilawm; Zomi sung pan Laibu tam bawl pen in a kiciamteh Sia Rev. Job Nang Khaw Thawng zi Sianu Ruth Vum Ngaih Cing in a bawl "Na Pasal Theisak Ken" cih sungah nupa nuntakna ah zi in pasal a kep dan ding, hopih dan ding, kholhpih dan ding pan kipan a kisam namkim - mimal pan, innkuan, inn sung, innpua... a gelhna pen, "Book of the Year 2006" dingin a kitel hiam thei ke'ng, a hoihzaw dang a om kei leh kilawm mawk hi. "Kum 2006 Sunga Laibu Hoih Pen" hilo hiam!A laibu kawm i muh pan pasalte in i sim ding kisuanlah huai pah phial hi. Ahi zongin numei pasal in sim khop ding a hoih mahmah laibu hi ciin ka mu hi. A hang pen numei gamtat dan ding hoih tampi kigelh a tua banga hong cih uh ciang pasalte in zong a dawn dan ciang (response) i theih kei leh numeite lungkia (down) thei ding hi. Cih nopna ah numeite in naa khat peuh i sepsak simin LUNGDAM hong ci den leh a Zomi lungsim mahmah lai pasal pawlkhat in 'ka zi pen ki mikang gamtatsak se si e' ciin tel khial thei ding hi. A taktak in Zomi sungah (minam dang sung zong hi ve ve) tu ciangciang numei te kalsangzaw (advance) zawh uh hi. Kalsangzaw ka cih ciang thu thak, gamtat hoih thak zuih ahi zongin numei in khantohna khat peuhpeuh zuih manlangzaw uh hi. "Tulai nuntak" i cih lel, "modernization" ah Zotaang sangin Zolia in kalsang suan baihzaw uh hi. Kizepna (fashion) ah zong Zolia te in pasalte hong makhelh uh hi. Tua banga kalsang a suan zawk pahpah man un amau delhpha dingin pasalte kisin kei leng i numeite in Zomi sanga minam khangto zaw, kalsangsuanzaw, advance zaw te nung zui nuam zaw thei hi. Pasal, tangval hi napi nungak hopih dan kilawm thei mello a akipasal sak gemgam pong leh numei zahtaklo a neumuh pian, simmawh bawl pian a hopih cih khawng 'mark score' khollo hih tuak hi. Thei khin sam keng. Ahi zongin numeite in tua bangin hong gen om hi. Khanglui ngaihsutna nei a sum nei peuh leng, moto nei peuh leng, ka mel hoih peuh leh cih tawh tulai nungakte buaisak mengmeng nawnlo hih tuak hi. Leitung lah globalization manlang mahmah ta lel ahih manin minam dang tangval Zomi sanga polite zaw, zei zaw, siamzaw leh kam neem zaw, gamtat hoihzaw, ngaih huai zaw........ na tam lua ta hi. Tua manin nungak lungsim a kiluaizawhna dingin "Na Pasal Theisak Ken" cih laibu sunga kigelh thu tampite kisam hi. Zi neisa pasal bek hilo, zi zong lai pasal ading zong kisam cihna hi. Zing cianga zi neihsawmpa adingin zong sim kisam cihna hi. "Kua mah hilh ken" ci in a lawmte khempeuh kiang a gen uh ciang a gen lah omlo, a theilo lah omlo cih pen numeite 'thuguk' kep dan hi. Tua mah bangin "Na Pasal Theisak Ken" cih zong pasal khempeuh sim theih dingin hong "imkhia" uh ahih manin a lungdamhuai kik bil bel thu khat hi. Tua ahih manin kuamah kiangah theisak lo a i theihciat dingin hih laibu i deih hi! Tua ahih manin (kua mah theihsak loh ding ahih manin), a sunga kigelh thute genlo in hih ciangah kong khawl mai ding hi. Ahi zongin hih laibu hanga ka lungdamna leh ka muhdan te bel laibu bawlnu kiangah ka zaksak nop pawlkhat om tuak..... hih lai ah bel hong gen kei ning (Theisak nuam mahmah di, hilh lo dii)!! Hau Za CinPhuitong Liim
Laibu etkikna: "Rev. Dr. JM PAUPU & LUCY DIMNU CRUSADE & SEMINAR" by
Posted by: "Hau Za Cin" suante2002@yahoo.com suante2002
Sun Mar 16, 2008 10:42 pm (PDT)
Laibu etkikna: "Rev. Dr. JM PAUPU & LUCY DIMNU CRUSADE & SEMINAR" by Rev. Job Nang Khaw ThawngZomi sung pan Laibu tam bawl pen in a kiciamteh Sia Rev. Job Nang Khaw Thawng (Sia Thawngno ciin a kitheizaw) in a kaihkhop, a bu in hong hawmkhiat hih laibu thak sungah Innkuan thu pan kipan minam thu, khangno tawh kisai, Pasian gam zaina ding nasepna (missions) leh sepkhawm diamdiam ding a kisapna thu dongin a tuamtuam kihel hi. Kum 2007 sunga laibu kibawl khempeuh pan kammal khat nangawn paih ding a omlo, sim teitei dinga hoih, a tom in, mikangpau kawm bualbual leeng - "Book of the Year 2007" dingin ka thukimpih hi; "Kum 2007 Sunga Laibu Hoih Pen"!I theihsa mah bangin Sia JM Paupu ciin zong a kitheizaw Sia Rev. Dr. JM Ngul Khan Pau pen India gama Tuiphum kipawlna lianpen ah a lianpen ahih ban ah, India gam om Zomi sung pan Pasian mizat pen hi cileng kikhiallo ding hi (kuamah tawh kidem sakna hilo in). Tua hi a Zomi sung pan laibu bawl tampen pa in a lungkimzah a bawl laibu pen sim taak mahmah ding cih theihsa hi, laibu sim ut taktakte adingin. Siapa pen India gama khuata, inn 100 zong a pha nailo, ahi zonga Pasian nasem mimal 30 val leh Doctor, Teacher, etc a khanna khua Murlen, Mizogam pan a piang, Lamka Pangzawl pan khangkhia ahi hi. A pian ni in a pa in, "Topa aw, a nuntakna nong hawisak leh nangma nasem dingin kong ap hi" ciin a ap hi. A pa, Upa Thuam Za Gin pen Murlen khua Christian sung pan Upa a kipia masa pen hi. Siapa in Lamka pan BA distinction tawh a zawh ciang UBS, Pune, India pan Bachelor of Divinity (B.D.) zo a, St. George College, Isreal pan Zeisu suahna, khanna leh a nasepna te sin in summer course kah a Jordan tui, Si tuipi tui, Galile tui cihte hong pua in...... , tua zawh ciangin Portland, USA pan gammial nasepna lam (missions) tawh kisai sin in, D.Miss. hong zo in, tu in Council of Baptist Churches in North East India (CBCNEI) ah General Secretary term 2 (4 x 2 = 8 years) a sepna hita hi. A zi, Sianu Lucy Dimnu pen Priscilla Centre kici numeite laptohna ding nasepna a phuankhia nu hi a, tua lai ah Director a sep laitak hi. A nungak tung pan Pasian ading kipia ahih mah bangin khasum tampi san theihna ding nasep zong ngah hi napi tuate nusia in Pasian in a muhkholhsak numeite laptoh nasep hong kipan a, numei 10 tawh a kipat tuni in office neiin, nasem zong nei a, gamsung leh gampua ah hih mizawng numeite khutsuak zuak khia theita uh hi. A kicingtakin hih laibu ah a nasep dan uh leh Pasian in a makaih dan uh kimu thei hi. A laibu pan na sim lecin. Laibu bawlpa Sia Thawngno in laisim te etnop dingin thulu guan in gualsuk diudeu a, Topa in A lam inn, Tangban kikhung inn, Minam taimang, ..... cih bangin. Tua sungah Zomi bup in i sim dinga hoih kasak khat om a 'MINAM LIAN LUNGTANG' a cih thulu pen hi. Laimai 214-229 kikal ah hih Minam Lian Lungtang cih kikoih a, Zomi te in minam lian lungtang i pua hiam cih i ki etna ding in sim ciat dingin hoih kasa mahmah hi. Laibu bawlpa in, "Zomi te gamh luah ding lak ah a luah taaklo tam peuhmah veh aw.." ci hi. Ahi zongin hih laibu pen Zomi te adingin 'gamh' cing a, innkuan kikhopna khawngah sim a nuntakpih pah dingin hoih hi. Mimal gamh, innkuan gamh, minam gamh a cing laibu khat hilo hiam ciin ka ngaihsun hi. Nang tua bangin na mu diam a bul pan a tawp tan na sim suak phot peuhmah dih ve le! [End Note: Kei zong hih laibu bu khat laibu bawlpa in Champhai ZBC Silver Jubilee ah hong pia a, Kawl pan copy 5 bekbek hong puahtoh lak pan khat ka tankhak ahih manin ka it mahmah a, hampha zong ka kisa hi. Singapore ka zin ciangin Pu Hang Khan Lian kiangah ka etsak leh amah tawh a sim masa ding ka kituh phial uh hi. Ahi zongin aman laibu sim dang khat neilai ahih manin kei hong nolh kik a, ken ka sim masa hi. Kawlgam, India gam leh gamdang zong a tung khin dingin lamen ing.] Lei, Sim, Nuntakpih. "Reader makes leader" (Laisimsim te makai suak ding hi).Hau Za CinPhuitong Liim