LENGTONG te thupina dingin:

LENGTONG te "ZOMUS LIVE SHOW, Singapore 2008" i et leh 'thupina dingin bang kisam hiam' cih i lungsim ah hong kilang hi. Ei leh ei kithupi bawlna kisam masa lo hi, cih kimupah hi. Ei leh ei kiphatphatna tawh mihing kithupi masa lo hi, cih zong kitheipah hi. I pianna tun leh zua hangin mihing kithupi veva pah lo hi cih zong kimu hi. I beh i phung hang bek tawh mihing kithupi masa tuanlo hi cih zong kimu pah hi. Mihing khat thupina dingin ama lungsim leh a mihinzia a hoih mahmah kisam masa hi cih i mu thei hi. Sia Job Thawngno in (ka pute hong gensiatsak hi ci tuan kei ing), "Hatzaw te pen Hatzaw tawntung tuan lo a, guallel thei veve hi... ci hi (Lamka ah a thugenna khat ah).... a pil, a hau, a siam leh a hanciam zozo 'hatzaw' tawntung ding hi," ci hi. Tuabang leitungah a teng Zomi te zong i hatzawk tawntungna dingin a kisam om hi....LENGTONG Pauno pen Zomi sungah lasiampen hi ci leeng kikhiallua in ka um kei hi. Zong ahi mah hi. A lasak siam bek hilo in Zomi te adingin THU leh LA hong nusiat, hong gelhsak, hong sak sak, ahih kei leh hong sepsak (contribution) pen tawmvetlo ahih manin Zomi ading nasem (minam ading contribution hoih nei) mi 10 kiteel hileh amah kipaai theilo ding hi akicihna tua hang hi. A tuate bek i sak leh na hi nai dek lo in, amah taktak i muh ciang - a kiniamkhiatna, a nunnemna, a migitna, a thukhualna leh amah leh amah a kithupibawltawm lohna, amah leh amah a kiphatphat se lohna, amah leh amah a vallua in a ki promote teitei se lohna te hangin a thupina lian deuhdeuh a, zahtakhuai deuhdeuh hi. Tua in mi thupi ahihna i lungsim ah hong kipsak semsem hi. Tuate hang mah hilo dia Zolia tampi in na mit-heem kha in (ahi ngeingei ding cih ka um hi) ..... zawlla hoih nono tampi i neihna! ha ha ha..... ei zong amah bangin Zolia te mit-heem khawng ngahzo in, migi zo in, siam zo in, kiniamkhiat zo leeng (i Topa Zeisu hong gen bangin)... e'hem..... love songs acihte pawl uh i phuak ziahziah veve na meel........ . (on a lighter vein)... ;-) A LIVE SHOW i et ciang ama lungsim tawh a kinai mahmah diak la pawlkhat om hi cih i thei hi. Ahang - a lasak khat ah, 'tua aa pen ka tangval lai, ka zi neih ma aa ka sak hi ei...' a cih om a, a dang khat ah bangmah genlo in a lasak khit ciang a microphone koih in, a tutna lam a zuatpahna om hi. Ciamnuih zong genlo, lungdam zong genlo, kam khat zong pau loin 'Pauno' in a tutna lam zuankik hi. A heh lah hi kenteh, a lungdam zong hi tuan ken teh, a gen ding theilo zong ahih ding um keng.... a LA ah a gennop teng kim khin ahih manin (too close to his heart) 'behlap kul sa lo' hi zaw ding hi. Tua pen (ka upmawhna ah), ama la deih mahmah khat hi ding hi. Sia Khup Mung in LENGTONG Kam Khen thu a genna ah (youtube pan ka muh), 'kei theihna ciang maan lel inteh' a cih bangin, ka upmawh pen a maan ding um ing. Tua LA a sak laitak a ngai mipite lam ah i mit kiheek ngam lo hi. A lasapa zah a amau lungsim ah a sakpih om ahih manin! Mihing pen Upate in, 'i muh phet in i ngaih mahmah om a, i muh tam semsem leh i cimtaak mahmah pawl om in, i muh ciil a i thupisim kholloh i kikholh tam semsem leh i nusiat ut nawnloh zong om hi. Biakinn ah hi in, society ah hi in, lawm leh gual lak ah hita leh tua bang om hih tuak hi. LENGTONG te pen i muh tam semsem leh i it semsem dingte na hi uh hi.Tua ahih manin THUPINA pen i kipatna ah kinga lo a, i khanna ah zong kinga lo a, i innsung bangkua leh i ci i sa ah kinga lo in eima hihtheihna, eima nuntakzia, nuntakna, omdan, gamtat luheek cihte khempeuh ah kinga hizaw hi. Moses pen a pau-awk manin a thupina ding kidal tuanlo a, Abraham Lincoln a pianna a tualniam hangin US President lak pan a kizahtak pen suak in, MK Gandhi a kiniamkhiat penpen a gualzo penpen pa hi tawntung hi. Mi thupi hih ding na ut hiam??Hau Za CinPhuitong Liim

LENGTONG te in hong leensan ta: Singapore ah LIVE SHOW a neih khit uh, LENGTONG te zintunna ah zanhak lianga LENGTONG HOIH tangthu pan kipan suut to a, a la bulte uh leh a la thu te uh, a la phuakna a hangte khawng uh ka kikup khit uh a zing ciangin LENGTONG te in a khuankhuan na gam uh ZOGAM, nun-a nuam lunta vangkhua a ngaih tuanlohna khua uh Zokhua leh Zotui siangte a luan kelkel na lam zuan in March 3, 2008 Pizing niin hong leensan ta uh hi. Lungleeng teei hi veii, ngeungau song! Ei zong Zotuisiang, Zohuihkhi siang, Zoann leh Zongeina a lunggulh lo lah hilo aa......... Bangbang ahi zongin i ki lunglen sak hang nungak lah hikei un, tangval zong hi kei un, i ngaih hang, a lasak uh i zaknop hang, i khualzinna leitungah a tamsuak dingte hilo i hih manin i maban ciat mah i zop kik phot zel kisam a, hun khat ciangin kisutuah zel ding hi hang, mate? Tua ni zan aw. Tua kha thak zan aw. Theih kholh hilo, geel kholh hilo. Lawmte in "LENGTONG Kam Khen leh LENGTONG Pauno te kiangah va hawh ni" ciin hong zawt uh ciang kei zong ka zui pah a, a mun ka tun uh ciangin amau zong pialkhang ah na tu liliai in, ciamnuih gualnuam gen in na puak zaizai uh a, ko zong ka bengngawng nuih phei pah malam uh hi. Inntek te in ann hong nesak in, voksa ka gilvah tak un ka nek khit uh ciangin lawmte khat in LENGTONG te annekpihna ciin Voksa ana lei hi zen a, ama inn ah nekpih taang in a zintunna vuah a nekpih ken a siim kha ka himawk hi. "Sing omlohna ah gua kizang" Upa te in a cih bangin a hun leh amun kilemzaw dingin Zomi te ngeina zong ki hei lamdang hi maw (ka lungsim in) ka ci hi. Mi gam ah innsaap in i om ciang eima inn teekteek ah mi i deihsakte annekpih ding cih hi khin theilo mah hi. Tua nitak pen a zingciang nasep khawl ni ahih manin a sak a khang pan LENGTONG te a it leh a holimpih nuam tampi hong lengla a, ka gualnuam mahmah uh hi. Innteknu in, "Hun kipatna dingin Sia Cin in la khat hong sa hen o," ciin Sialtal phei cia mahmah a pha ding Guitar khat ka liangah hong baat liamluam ahih manin, kei zong Taiwan ka omlai a Taiwanese Song khat ka siam bangin ku vengvang in ka awi deda sam a, gual 16 lak pan ka theihtel gual 4 bek kasa lel hi. Tuazawh ciang...... LENGTONG Kam Khen in, Ama min in LENGTONG HOIH! (LENGTONG HOIH) Duangheksiam a LENGTONG HOIH. Make up a cih zong kinuh se loAma min in LENGTONG HOIHNgaihsun dih ve LENGTONG HOIH tangthuNa za ngei maw hihzah-ta a minthanna? Ama min in LENGTONG HOIH. Ama min in LENGTONG HOIH! (LENGTONG HOIH) Tongluan siam ah LENGTONG HOIH. Eye shadow zong zang se loAma min in LENGTONG HOIHNa za ngei maw LENGTONG te lasakNgaihsun siam ve hihzah-ta a lunggelna? Ama min in LENGTONG HOIH. cih la hong sa a, lasiam JK Kam in second voice zuiin, mipi in khut beng ziahziah in kigamlum mahmah hi. Tua zawh ciangin, Theibang sen a zu bang ka momlai in, Ka tun luai sung hong vei diaidiai na tual, Ka vangkhua tual hong zuan kik ing, Mimbang pianna Dimtui vangkhua,Kilbang khanna siingta gam lei, Ka vangkhua tual hong zuan kik ing.... (Tune: Cotton Fields)cih la hong sa kik a, tua zawh ciang, Unapaloma Blanca..... cih la sa kik in, a banban in ZAIDEIH zong..... Zan lah sawt deuhdeuh, zingsang nai deuhdeuh, ko lah nuamsa deuhdeuh!! Nuam teei ei....... Lasa lah sa kawm, holim lah hi kawm, ZAIDEIH bang na cihnopna hiam? ka cih leh, "Ka khualzinna ah nungak pawlkhat in 'zi na neita hiam' hong ci kiaukiau thei ahih manin tua ka phuahna hi. A dawng tawpna ah ka zi ka nepna khat om. Ka zi pen DEIH ciin ka sam a, tua manin, 'DEIH aw lung hihmawhna in na nei ken' ciin ka phuah hi, ci hi. Laphuak siam i cihte in deihna hoih pipi, kilawm takin na gen ziauziau thei uh hi. Unapaloma Blanca..... cih bel a English pan a tei tawm hi a, siam mahmah hi. Ama genna ah, mikang pau bel siam keng, ahih hang London hawhna ding khat nei ing, ci hi. "London pan mikangte khat PhD sim khat in ZOLIA hilo, ZOLAI sin nuam a, Zomi sung pan ZOLAI siam ding a kikan kan ciang ZOLAI tan 4 pass, Top Ten tawh a zo amah om ahih manin tua PhD sangnaupangpa adingin sangsia a sem hi," ci hi. "Ka sangnaupang te pen PhD te khawng bek hi lel uh hi, ZOLAI tan 4 Top Ten tawh ka zawh pen vaallo hi,..." ci hi. Lungdampih hang. ZOLAI sin nuam mikangte bang na om a, a hilh ding-a qualified teacher zong i neih pah manin. Zan hong sawt hiaihiai in, aksi zong hong kilehbut dekdek ta a, Siguk nangawn a kilehkhup peetpeet ciangin LENGTONG Pauno in pau vetlo in, "Ka gawl na pian veh aw" ciin lasa dinga kicialna hong nolh pian a, ahi zongin amah zong nolh zo tuan samlo in, a tutna pan kikaikhia in tutphahsau tungah kitusak a, KA ZUA NGAIH cih CD sungpan a masa pen, "Niim na diildial e" cih hong sa masa hi. "Niim na dildial e" cih la pen Malaysia ah nasem a a omlai in, pianna Zogam a ngailo lah kihilo a, zi leh ta te a kingailo lah hilo a, pianna tun leh zua a ngailo lah hilo a, hih banga gamdangah sila banga thatang tawh sum leh pai kizong cih a ngaihsut ciang a phuah hi, ci'in hong gen hi. A kiangah tu tangval honuam te in "Construction La" na cihsak uh hi. Construction la tampi phuak a: Sun khua sawt in naubang ka tawi,Tong kuppih theihloh Siksem, Ngaih aw nang hi zaw lecin maw, Sim leitung guabang ka hin sunginHong tawi cim kei ning e, ngaih aw.... cih khawng zong na phuak hi. Siksem La ka ci mai a. Construction la mah bel hi mawk ei.... Kamkup holimna zong kinei toto a, aman Rih Khua ah a pano sangsia in a om lai in amah zong om a, tua sungah lusei nungak khat hoihsa in ngai a, a nungak in zong ngai hi. Ahi zongin pau kitheilo uh ahih manin kiho thei lo uh hih tuak hi. Tua manin, Zing ka zinna siing vangkhua, Amel muh ciil vangngaih no, Sinlai ling bang nong do na lua e,Hi zong tongdam kisang siamlo a maw ngaih awNihgel holung kumkhawm lo, Lo bang tul mai ding maw... Sakkik:Vang ngaihno tawh khawlkhawm lo a, Simlei gua bang hing ding aw, Lai ah na, ken hong sial den mai veng, Hih bang lianga zuanna ding, Bang ding mel kong muh se hiam, Tongdam kisanglo ngaihno, Na lua e, na lua e......cih na phuak hi. Holung kumkhawm lo a Lo bang tul ding mawk bel lungleng tei mah lo dia maw!!Tua banga ka gualnop liailiai lai tak un zingsang khuavak dingin hong kithawi a, a utte lum, a utte lasa, a utte anne kik, cih bangin ka suahta mahmah uh a, LENGTONG Kam Khen in ihmut suak si, ahih hang a ngaihsut ciang amau a it, a ngai a hong hawhte lupsan ding lah kisungsia si in, "Ei lum mawk leng, hih lai ah mi hizah ei ngai a hong hawh a, kilawm sam kei e" ciin khuavak dong mah tu tentan a, khua hong vaak peetpeet ciangin amah zong a kiu khat ah a lu nga in phiit tum lit lit a, kei zong a langkhat ah ka holimna te uh lungngai kawmkawm in ka tawlnga a, "LENGTONG te tawh a lengkhawm hi zen veng e" ka cihcih sungin ka manglam hiam ka cih leh zing anne dinga hong kiphong hita a, thakhat a kilumlet to in, ka maiphiat in, gilvah takin ka ne kik phit phet hi. Tua pen LENGTONG te tawh ka lengkhawm hun uh a nunung hi phot a, a zing ciang amau Zangkong Khua Hun (Zangkong Times) lamte hong zop kik dingin tua lam zuanin hong leensanta uh hi. Zotaang bang dam in it leh ngaih kiang na tung uh hen. I kimuh kik mateng Sian in hong kem hen, Hau Za CinPhuitong Liim

*Lengtong Kam Khen* in " Singapore ah meileng kangak kawmvua alampi ageipanka va et uh leh Loud Speaker tawh hong kitaai mawk: Pasian in hongmu taktakding mah hi " ci hi.*Lengtong Pauno* in " Kapai ma un lawmte mikang pau siamtuak thei ngeel mahuh hiven Malay gamgi ah kabuai taktak uh teh mikang pau apauthei hong omhetkei ve uh aw " ci hi.*Mungtawng* in " Amau Hindi pau natheilo mawk uh aihciang vua " ci hi.Bangbang ahizong Dr. Cinpute cidam tak aa kimukik uh ahih leh ih lung nuamei. Singapore kumpi in Tsunami a omkik khawng asak khak lohding thupi dingaive maw !