Paunak: "Langbawm a ek ah awk"

By Tual Khan Suan (Suanpi)

A zatna : : Thu nung thu ma khual/en lo a, a mawk gamtat mite a mau gamtatna sa te hangin buaina tuak kik thei hi.

Hih paunak pen ganhing ( vasa) nuntakna tung pan in mihing te nuntakna ah a kidop huai thu te leh gamtatna ah thu hilhna / lamlahna ding a kizang paunak hoih khat a hihi. Langbawm (vasa nam khat) pen van a leng vasa te sung pan a neu nam khat hi na pi’n a mah gamtatna ah a kikem zolo vasa khat a hihi. A gil kial ciangin langbawm ( singkung/gah nam khat) ne in a kham khit pikpek teh a tuahna mun peuh ah ek tha kawikawi hi. Langbawm ( vasa) in a nek singgah pen kaw (glue) bang hi a, a ek thakna munte ah a vapai kik ciangin a thak sa ek tungah awk kik thei hi.

I gamtatna sa te hangin sum leh pai, tha leh ngal leh hun leh nit te a kisam lo pi in i sup lawh thei uh hi. Thu khuallo in i mawk gamtat, kampau manin a kisam lo pi buaina kituak thei hi. “ Mihai te’n a hai man liau zolo” a kicih bangin thu nung leh thu ma en lo in, a gamta kampau mite in a mawkna in supna tuak thei hi. Mailam thu piang ding mi khempeuh in theilo i hih manin thu khualna tawh kidawm a gamta kampau mite in a hong piang lai ding thute ah nuam tak in nawk paisuak zo uh hi. A hoih piang ding maw, a sia piang ding cih kuamah a gen khol thei ki om lo a hih manin a kidawm siamte in haksatna tawh kipelh hi. “ Mipil te’n a pilna gai zolo” a kicih bangin nung leh ma en a ngaihsut siam a gamta kampau mite cimawh lo hi.

“Thal lup sa a cil siat” cih thugen a om bangin i gamtatna khat peuh ah ngaihsun masa lo a mawt tatna pen a gamta mite mah in thuak kik thei hi. A hoih ding a sia ding thu khat peuh zong gel khol masa a gamtatna pen eitung ah hong tun ciangin hamsatna tawm ding hi. A kidawmlo a, a mawt gamtat mite in a mau gamtatna gah a loh uh teh lungkimna ngahlo uh hi. Thusia thupha pen a beisa a i gamtatna te tungtawn in hong tung kik ding a hihi. A beisa i nuntakna pen tu ni/hun a ding in kipatna/lamlahna ( guideline) hi pah a, tu ni/hun a i gamtatna pen mai lam a dingin kipatna/lamlahna ( guideline) hong hi to pah hi. Abeisa a kipatna hoih tawh a pai te pen tu ni/hun ah buai nawnlo ding a, tu ni/hun a kipatna / lamlahna hoih tawh a pai mite pen mailam ah buai lo ding hi.

Laisiangtho sungah “ mi khempeuh in a mau vawhsa khaici mah a at kik tek ding hi” cih a kigelh bangin ei ma gamtatna leh kampau te teng mah i nuntakna ah i ngah kik ding hi. Thu nung thu ma en/khual a gamta mite pen buaina neilo zaw ding a, a mawt gamtat mite in buaina leh hamsatna thuak zaw ding hi. Khat veivei a hoih lo leh hatsatna i thuak ciangin genthei kisa in i thuum leh tau in i kap thei hi.Tua bang hun ciangin i vawh khaici bang hiam cih i thei kei a, a beisa hun a i mawt gamtatna te i phawk nawn kei hi. I lungkham ding leh i gentheih ding Pasian in hong deih lo a hih manin Pasian deihna hi i cih ding hi masa lo hi. Eima gamtatna sa te tung pan a gah a at kik i hihna i phawk kei leh Pasian mawhsak i suak kha ding hi.

Tua a hih manin i pu leh pa te in i gamtatna hangin kibuai thei a hih manin kidop huai thu a gen uh ciangin “ langbawm a ek ah awk” ci’n na gen uh a gamtat kampau kidop huai a hihna thu kihilhna na nei uh hi.
{Pawl khat ten Langbawm taangin Mangbawm zang uh hi}
June 15,2007
-------
Extreme, cih kammal nong pulakhiat thupi sa ingh. Zomi leh Zogam itna banah, Pasian thu ah zong a "Extreme" ding mi pawlkhat ih kisam ta diam? cihzong ong behlap nuam ingh. Biakna lam ah, Pasian nasem te leh thu-um mite ong kihawmthawh (zong ki thanem takpi) ahih man in, Pasian thu ah zong, "In God we trust; Stand up for Jesus; His truth is Marching on; We all need Jesus; Thy Word is the lamp to my feet and a light for my path; Lord Heal Our Land; Give Me Jesus" He Is Lord of all Nations; cihdan pian Pasian min tawh Extremists pawlkhat ih mi sungah kisam ta hihang, a cinuam hita ingh. Kum 2002 in Broken Arrow-Tulsa county, Oklahoma (Mr. Thet Loo te inn) ah Kawlgam mittaw pawl khat ong zin in, tua mittaw te' Pastor (amah zong mittaw mahhi) U Thein Lwin in ei Zomi te ong cigiap hi. No Zomi (Chin) te zong kidawm un, Pasian nungnat san ta hi uhteh, cihi. Genteh na in,"Ground Zero vai=911=New York World Trade center vai; Kawl gam Karen te leh Ka Chin te vai cih khawng tawh
genteh na ongpia in, ong cigiap hi. Nidang aa ei Zomi te ong ki zahtak dan, mipil leh ulian Kawlgam vaigam ah a omdan a theih teng zong onggen beh lai in, ong gen teh, mittaw khat in hih zah in ei Zomi tethu thei ahih leh Pasian in ong naktheih si-in cia cibek ingh. Keibang in bel, sangthei (admit, confess) mahmah ingh. Hi kasak mahmah khat pen, nidang in Zogam pen Kawl kum pi'n Peaceful land khat aa a ciapteh uh hina pi-in, tu hun ciang in ei leh ei mah ki kihta in, mi khatbek khetawh khual kizin ngam nawnlo, cih bang himawk hi. Ih zak ngeiloh, mite nuntak dan, siatna (natna tuamtuam, abortion, rape, murder, violence, immorality, drug etc..) tuamtuam ih minam lakah tam mahmah ta hi. 1999 Kum Kawlgam ka ciah khat in, ka mawtaw hawl pa un,"Sia aw, Ciau bangah siatna a kici teng bang kimphial in um ingh, "ZEISU" cihloh om inteh, ong ciliang hi. Christian gam hi hang, Christian minam hihang ih kicih zah in, Zomi, Zogam ih pulak ngam zah in, a nungta ih Pasian min bangzah in
ih pulak ngam, ih dinpih ngam hiam? cihthu ong kamkum beh nuam ingh. Ong telsiam dingin ong lamen ingh. Topa' thupha. Shalom!

Ih minam aa ding deihsak na leh thunget na tawh,


Kham No
USA