Posted by: "D. K. Khup" dokkhup@yahoo.com dokkhup
Wed Aug 27, 2008 5:40 am (PDT)
Lai i khah teh i lai khah thute hong ki thukimpih leh thukimpih loh thukhat hi a, cingtak in hong ki dawng kik sak teh ki thusim sak na khat hi a, a lungdam huai in ngaihsun ingh. Ki thukimpih loh na te tung pan in kei leh kei ka thu at te ka ngaihsun pha kik a, theih behna in ka neih lawhna tampi om hi. Kisel kinial in ki thu zawh ding sangin, hong ki sim sak in ka muhzia hong ki theih sak leh ka lai khah manpha kasa a, kalung a kim hi pah hi. San zawh leh san zawh loh pen hong simsak te thu hi. Groups sung thu kikup na ah i lamet zah in i muan i suan i makai, i mipilte tampi hong kihel khol nai lo kawmkal ah hih bangin manlang tak in kuppihna i ngah theih zel pen lungdam huai sa ingh.Ka lai khah pen Sia Khawmpau hong khah ZOMI vs CHIN leh hih tawh ka lai khah ma a kikup na a om khin sa te tung tawn in kei muh zia kakup nahi. Hih i thulu zong original thulu hi lo lai hi. Ka lai khah hangin nawngkaina, lungkatna, kitukalhna in a nei na om uh leh dah mahmah ingh (sorry). Ka laikhah a ki siik kik cih bang hi lo in, kong lungnop loh pih na hi. Ka muhna ah, abeisa hun in ei ZOMI ten i hih theih na ciangciang, i thu neih zawh na ciangciang ah kipawlna min, minam min, pawi bawl na tuamtuam, lai at, la sak na cih te ah a tawntung phial in ZOMI mah ki deih in ki zang tangtang in a ngaihsun hi ingh. I hih theih na ciangciang, i thuneih na ciangciang, i deih leh deih loh, man sa leh man sa lo tawh ki sai lel te a hih leh ZOMI mah a tam zaw in ki zang zaw a, buai ding leh kikup tak ding in zong ngaihsun kei ingh. Kum (2000) pan kipan group sungah ZOMI leh CHIN vai kikupna kum khat in nih vei thum vei peuhmah ki nei zel hi.Tu hun kum (2008) in ahih leh ZOMI te i nuntak zia ki laih in, leitung muntuamtuam, gam tuamtuam ah ki om kawikawi ta in, leitungbup kipawl na tuamtuam, gamuk kumpi zum tuamtuam tawh ki zop na hong om tektek tawh ki tuak in ZOMI leh CHIN vai kikupna hong om thei, kikup ding hong ki sam thei in a mu hi ingh. Zomi tampi tak te i nisim nuntak na ah i buaipih, i phukkhak thu hi ta hi ( Refugee,asylum, kipawlna vai diakdiak te ah). Kum (2000) hi nawn lo in kum (2008) hi ta ahih man in Zomite i nuntak zia kilaih tawh ki tuak in kikup ding ahihi. Mailam ah Zomite i nuntak zia kilaih leh hih vai i kikup zia zong kilaih leuleu kha dinghi.Halkha te tawh ki etteh na pen a sia lam a haza hi lo in a hoih lam in engna hi zaw hi. Gentehna in Norway ah Chin (500) val om a, Zomi bangzah i om hiam? Gamkhangtosa gamte tunna pen hamphat na in ngaihsun ingh. I gensiatsiat hang a ciah suak gam ki om lo phial hi. Hamphatna ngah na dingah i ZOMI pihte i deih sak na hang tawh ZOMI leh CHIN vai tawh a kisai khak na te kikupna a ki nei in a mu hi ingh. Etteh huai a om leh etteh ding hamsa sa kei ni. Bangbang i ci zong tu ta dih in biakna vaithu tuamtuam, kiukna vai thu tuamtuam ah amau at sa, gen sa bang in thu a paipai ki hi mawk ta hi. Thusia hi cih na hi pah sam lo hi. Hamphat na a ngah uh teh ki eng nuam zel sam hi. Hih bang dan in hong paipai leh mailam ah hong huzap na zai zaw, na sia zaw thei lai dinghi. A hoih lam vive in hong pai leh phat mawh na om sam lo dinghi. US congress vai pen Sia Khawmpau gen na te ka kup pihna hi. Congress thukimna tawh 2005 pan ki pan in Kawlgammi ( atamzaw Karente) 30,000 val US ah ki puak khin cih i thei hi. Karente zom ah Chinte hamphatna hong kipia hi a, hih ei hun sung in i Zomipihte a tam thei thei tun zawh nang deihsak na tawh kikupna a om na te ah Zomi vs Chin vai tawh a ki zom khak na te a ki kum hi zaw in a ngaihsun hi ingh. Christiante kimuhkhopna tam ki nei a, Siate, makaite huzap na lian mahmah hi. Zomite zong a tam zaw Christian kihi aa, a beisa hun leh tu hun mahmah in zong biakna makaite huzapna lian mahmah hi. Politics, Social service, Social action tuamtuam te ah Siate, makaite san dan zui in mipi ten ki zuizui zaw hi.Paunak 16:9 ah "Mihing in thu geel a, ahi zongin Topa' deihna bangin kisemkhia hi". Mihing lampan utna tawh sepkhiatna leh Pasian ukna ( God's sovereignty and free-will ) kimu thei hi. Mihing lam pan septuak, sephuaite i sep ding a hihi. Lawmte khat in " Kawlgam thu, Zomi nam vai buaibuai ding hi kei. Thungenngen peuh leng Pasian in Israel te dan in hong lamsang in nikhat ni teh Kawlgam ah kumpi in hong koih in kumpinam te in hong bawl ding hi" hong ci gei hi. Thunget ding hi mah hi. A hih zong Israelte Pasian in gupkhiatna thu ah Ama geelna a tangtun na dingin teltuam in a lamdangpi in na panpih hi. A lamdang a hih man in minamdang te kiangah tua cih pian lo kha dinghi. Tua bang dan in piang pahpah hi leh lamdang, teltuam ki ci lo kha dinghi. Mailamah ZOMIte i lai, i minam, i gam leh lei mangthang lo a kepcing zawh nang lampi hoih pen khat in Zomite i khantot ding hi sa ingh. ZOMI hih na ki laih thei lo mah hi. Tua banah khangto in hi peuh leng i tu i ta ten ZOMI ki cih ding hamsa sa lo ding uh a, ZOMI a ut ZOPAU siam ZOGAM ah a teng nuam ki behlaplap zaw dinghi. Kei ngaihsutna bang hi leh khantot na ding lampi a hih nak leh a hun zui leh a mun zui in ( period) Zomi (Chin) cih zang lel phot in, Zolai Zopau banah Mangpau, Manglai leh i om na gamte pau leh lai zang thei leng hoih sa pen ingh. A ki gengen thu khat ( aman mah hiam thei lo), ei ZOMIte khat Pu Zo Tum Hmung in sandahpiah ( demonstration) ding in zawn in, ei Zomi pa' " Kei asylum ong khin" cih san ki ci hi. Tu hun bang hi leh " Kei gamthumna tung khin" cih hi lo dia. Hih lian cih i gen theih loh hang ei ZOMI te Politics lam a hih zong, leitung bup kipawl na te ah a hi zong a ki cian tak in i neih zawh loh, i kipawl zawh loh man in mailam ah supna tampi hong om veve ding hi. Makai hoih, makai siam ki sam mahmah hang, ahi zong mipi mah ki sam sa pen ingh. Mipi thalawp in kipawl zo peuh leng "sinbeng zong kim ciatciat tang zaang ki guan" a cih mah bangin makai ding hong om lel dinghi. Makai khat hong kah in makai khat hong khawl lel ding hi. Thudikna, cihtakna ( Loyalty) i makaite tungah kinga sak kei ni. I minam tungah kinga sak ni. I minam hoih na ding, khantot na ding a hih nak leh makai kician lo te hem khia gam ni. Gensia gam ni. Kuppih gam ni. Thu hoih la hoih penpen tawh ikalsuan theih na ding in thukiselna ( debate) tha pia ni. Makai ki cian te i kepcing zawh na ding in a kisap na te et siam huh siam ni. Nang' minam a ding bangteng sem khin na hiam kicihcih sang, makai tawh makai lo tawh, numei pasal, gamthumna tungsa leh a tunglai ding te khempeuh i vekpi in thalawp in kipawl thei leng piang zo pan dinghi. Mi nih leh thum phuat kipawl na i ki sam nawn kei a, mipi phuat, mipi thuneih na tawh a kalsuan kipawlna liante i ki sam mahmah hi. A - Ak khuangta thawh hun taZ - ZOMI te hanlung ciam khangto diam!Genkhialhna aom leh ki maisak ni.Zomi sungah,KhupNY
No comments:
Post a Comment