Beyond ZOLAI

Posted by: "Hau Za Cin" suante2002@yahoo.com suante2002
Mon May 26, 2008 4:21 am (PDT)
Beyond ZOLAI: Zolai sinna ah T = Tedim pau eima pau cih pen ZOLAI bulpi hi. Tua ZOLAI bulpi pen kawlgam, vaigam, sengam, mikanggam, etc ah i om ciangin zong ki zangciat a, tu ciangciangah haksatna omlo hi. Leitung khantoh tawh kituak in Zomi honkhat i ten masakna gam nisuahna lam gamte pan aisa banga vakkhia in, i thawlna peuhpeuh ah aisa bangin i kihen a, i sik vak a, uino bangin a vangna khat peuh ah i lutsuak ziauziauta hi. "Khuitu pauh" ki limzat simta cihna hi. Hih banga i vakkhiatna gamte ah e'n ZOLAI leh ZOPAU kilimzat mahmah ta leh a zangmi tawmzaw in pau dang a zang tamzaw a, sawt i vaithaam ciangin i zinna gamte pau leh lai in hong tumcip in a khanglai Zomi lia leh taang te in Zolai leh Zopau sangin pau dang nuam hong sa zaw ta uh hi. Sangkahna khuasung vakna, lawm leh gual tawh kikholhna, sum leh pai zonna, nasepna cihte khempeuh ah Zolai sangin paudang kilimzat zaw ahih manin innsungah pauzat a theisate simloh a kisintawmte adingin a kitamzat penpen sin masak hong hi hamtang hi. Tua banga pau kitaitehna gam ah ZOLAI leh ZOPAU inntek tang hetlo kawikawi hi. Tunsung khat pan piang laigui kizom Zomi te lakah a inn sak inn khang tawh a kampau awsuah themcik khat a kilamdan leh 'tribe dang' ahih kei leh 'minam dang' dana kituambawl sawm a om khak leh tu zawh a sawtlo in Zomi sung pan 'tribe thak', 'minam thak' tampi hong piang ding hi cih muhkholh thei hi. Ahang pen Zomi pawlkhat Japan gamah pem a, pawlkhat Sengam ah pem a, pawlkhat mikang gam ah pem a, pawlkhat vaigam ah pem hi. Tua khangthak hong piang ding Zomi in pau a tuam ciat hong zang ding uh, amau tenna gam pau ciat hong khanpih ding uh ahih manin Zomi sungah sisan tawh hilo a, Pau leh Lai tawh minam tuamin kikhen ding i sawm leh leitungah minam khang, pung, multiply hat veve te lakah i kihel ding hi. Tua bek hilo in i tenna mun (location) leh i tenna lam (direction) tawh minam min phuak ding i hih leh zong minam thak a hauto pah ding Zomi te ihi hi. A pa leh a ta a minam kibang nawn lo dinga, unau khat zong a minam kilamdang ding uh hi. Tua ni ciang ZOMI sunga minam khempeuh, a thak leh a luite, a hi masa leh a hi nunung te a kiho ding ciangin tuni a i Zolai bulpi tawh kiho thei nawnlo in T = Tedim pau eima pau cih pen hong zattheih nawnloh ding hi. Tua hi leh bang pau tawh a kiho ta tam? Zomi hi masa te in tu laitak a Zomi thak a piang laitak te kiangah, "ko masa zaw ung ko pau i zang ding" ci ding hiam, ahih kei leh tribe thak, minam thak te in, "ko a tulai zaw (modernized zaw) ciin amau aa zat ding a deih diam? Ahih kei leh koimun koigam ah i teng zongin Zomi hi hang ciin - Zolai, Senlai, Mikanglai, etc khat peuhpeuh i zang phial zongin ZOMI ah i lungkim ciat lel diam? Zolai khen lamah ZOMI i hi lai diam? I tenna mun leh gamte thupi bawl in Zomi minam thak i piangsaksak lai zaw diam? I pauzat themkhat hong kilamdang leh mituam hi hang ciin i kituambawl toto lai zaw diam? Hau Za CinPhuitong Liim