Hong nai deuhdeuh.... a thawm ngaih deuhdeuh.... ZOMUS te hiam le?

Posted by: "Hau Za Cin" suante2002@yahoo.com suante2002
Sun Feb 3, 2008 7:22 pm (PST)
Hong nai deuhdeuh.... a thawm ngaih deuhdeuh.... ZOMUS te hiam le?:ZOMUS te bek hi kei e. Malaysia Zomi te thawm hizaw e! A sak hong thawn, a khang hong thawn. Kiim leh paam hong zeel ta, nopci tuak mahsi. Khuado sial kaaite hong tung ding tawh kibang, khuapi guahzu ding mah tawh kibang.... a thawmging uh'n khuasungteng leh Zomi te omna muncin, gamcin hong thawn zuazua... Nopci mah si!! Zomi te kimuhkhop ding. Zomi i hih nuam ngiat ei. Malaysia Zomi te nasem khawm thawmging bek zong hi kei e, ki itna thu a tangko uh thawm zong kiza e. Lasak Pawipi a mipi tutna ding tutphah gual a nasemte tutphah kaih ging bek hi kei e, tuilu tuitaw a hei pianpih laizom Zomi te a sapna aw uh zong kiza e. Nasem khawm Zomi te anne khawm sikkeu ging hi khin kei e, sum leh pai kilot sumneen kitat ging zong hi sam e. Galkap laam banga kalsuan kikim in khe khat khai, khut khat vik, mailam enkhawm in a pai diamdiam Zomi te bangzah in etlawm ahia! Hong en mah dih ve vua. A din a sawk uh kikim kei, ahi zongin a kalsuan uh kikim in, a paina lam uh kibanga, a hih khat peuh uh kithutuak hilo maw. Talent tuamtuam a neihte ciat uh siit lo in semkhawm uh hilo maw ---- a thu ngaihsun pawl, thatang tawh Zomi leh Zogam it tak a sem pawl, zindo pawl, vaidawn pawl, niangtui leh moh hawm pawl, ..... en ve vua muhnop lua hilo maw. Zomi te Paunak bangin... "kim cit ciat lubawk kiguan in, kim cit ciat tangzang kiguan uh hizen veh." I pu i pa khangah KHANTOHNA a cihcih uh guai, khangthakte in a taktak in a tangtungsak himawk ven, ZOMI te a khangtoto hi mawk veh e. Hih i pawipi zawh ciang bel i Zolai simna a tawpna, a gualzawhna kammal leh Pu King Mang lai at sim a a thukhupna kammal: "Z = Zomi te hanlungciam khangto diam" cih hi nawnlo in, 'Z = Zomi te nasem khawm, khangtoto' i cih kisamta mai ding hi. Tua mah i Zolai sin ding a kigeel lai a a saite deihna leh vision (muhkholhna) hi mawk hiven. Kum 100 tam kingaklo in a deihna uh leh a tupna uh a pil Zomi te in tangtungsak cihna hi. Zomi in mainawt zel, nuam lua. Nuam ei nuam ei nuam ei ............ ..Japan gal hun lai a vantungah hong leeng diaidiai cianga Buh pho hunga tu pitek putek leh nupi naupang te in Mupi sa a Akciang tawh a satkhiat sawm uh Vanleng tungah i Zomi lasiamte hong tuang dinga, a khenuai vua buan leh leivui kaai natawm a om ding phallo in a nulsiang dinga kigingsa Vai vom te in a paina ding khempeuh uh na zutsiang kiuh keuh dinga, a vot a lum a thuak lohna ding un Singapore kumpi leh Malaysia kumpi te in vanleng tual leh vanleng sung khempeuh Zogam Khuahun tawh kituak in na bawlsak ding uh hi. Vanleng sung hita leh, Vanleng tual hi taleh nek theih khat peuh a nek ciang a khut niin ding gen loh Moh themcik khat na tawm a kibang kha ding ciin a nulna ding laidalneel (Tissue paper) tawh dinpih den ding uh a, zun leh ek suak leh zong ZOMI te ngeina SIANGTHONA mah tawh na kem sitset ding uh hi. Hih zah a i Zomi lasiamte hong it pih Vanleng nasemte leh gamdang kumpi te tungah Zomi te nakpi takin lungdam ding hi. I sikna ding hong zutsiangsak mivomte zong neu muh pah tuan sam kei ni. PASIAN bek mah thupisak in nuamtak a khualzinna hong bawlsak mikangte, misante zong nuai et pah samlo in, lawmbawl siam ni. Tua banga tuipi gal pan, mual leh guam kantan a KL lam zuana pai khempeuh tua ZOMUS LASAK PAWIPI kong mai ah hong kisuktuah tak uh ciangin "Zotaang bang hong dam maw lawm" ciin KHUT KILEN in I KIBANSAH VAANG kici ziahziah dinga, lungdamthu leh itna thu kimop cim theilo ding uh hi. Tua 'Historical Events' a mukha Zomi pen a hampha mahmah mi ka ci hi. Ahangin, tua bang hun thupi Zomi te khangthu ah tampi omkhin hi mah leh amah teekteek a kihelkhakna tampi omlo kha ding hi. A nop luat dan ding pen kigen theilo hi. I khankhiatna ann Vaimim leh Gatam kihuanlo in Buhsih leh Aksa a kimeh zongin ankamlimna kiam tuan peuhmah lo ding hi. Pakaan kiliik den veve ding hi. Anthuk innteknu in pakaan kilik mu den ding cihna hi. Lungdamtak a annek leh lungzuang taka annek pen pakaan gikdan kibanglo hiven (mate lawm Tg. Sianpu)!! A thawm bekbek uh i zak zong hihzah in nopci ci leeng a taktak ding hi cih tel in, amau kiangpan hiam a vaisaite kiangpan hiam, ahih kei leh ZOMUS te kiangpan hiam Hunzeekna (Program Sheet) khawng mipi in kimu in a hunzatdan ding uh a kicingin cingam khang, a hampi (highlights) beek kithei hizen leh i lawpna, i lunggulhna leh i utna a zahtampi in kibehlap thamtham ding hilo hiam ka ci hi (Nupi te in Ommuang lungngaih a cih dan uh e). Ahih kei leh zong Malaysia ah kithawina hiciang kitungta, hiteng kisam lai, Zomi Lasiamte zong hongpaita, hi ciang hong tungta, hih bang kamgen uh, hih bang puansilh uh, tuate tawh kimu phot, tua san ah shopping pai, sunglass a vom, asan hong bulh hi, etc.... cih khawng zong e... a puansilh ding designer tua hi... etc. etc. etc.... kiza pongpong leh bel ei mipi, a kihel zo khinlo te adingin zong nakpi in i lawp hong phatuam ding, i mitkha in tuasan ah, tuasan ah cih bawltawm thei ding........ .. Nuam ei, Nuam ei .... Zomi i hih mahmah!Hau Za CinPhuitong Liim