Pasal Pu Cin Sian Thang

Posted by: "Hau Za Cin" suante2002@yahoo.com suante2002
Sat May 31, 2008 9:05 am (PDT)
Pasal Pu Cin Sian Thang:Pasal khempeuh 'pasal' zolo a, Pu Cin Sian Thang bel 'pasal cing', 'pasal taktak', 'pasal' kasa hi. Mai kituah a mel ka muh ngei hilo a, tu khawm a holungkum khawm ngei zong ka hi kei hi. Mi genna pan ama thu leh la, a nuntakzia, a gamtatna te ka zak bek hi a, a nasep leh a hanciamnate zong mi gen, mi gelh leh mi kam pan ka zaksawn bek ahi hi. Ahi zongin tuate khempeuh ama kam pan ka zak bangin ka muanga, a melmu bangin ka kingaihsun a, ka zak thu te ka muanglah kei a, PASAL ka sa hi. "PASAL CING" kasa mahmah hi. Zomi National Congress a phuan pan kipan tuni ciang dong makai a sep dan leh Zomi leh Zogam ading bek hilo kawlgambup gam mite hoihna ding leh khantohna ding a sepnate ka ngaihsut ciangin thupi kasa a, zahtakhuai kasa semsem hi. Gambup bek hilo leitungbup hoihna dinga a nasepna te thupi ka sakna a ni ni in khangsemsem in, tua bang nasep a baihloh dan ka phawk semsem ciangin PASAL kasa semsem hi. Zomi bek hilo kawlgam mite hoihna ding ngaihsutna tawh a nuntakna kham ngam hi (mortgage). Sikdo leh sekpi kikal ah a om hangin thuhoih leh thudik hangsan tak in gen ngam a, mihing leh gamsung khantohna ding thuhoihte ip neilo in hangsan takin phuang ngam hi. Thong (Jail) leh ciangkang hangin thudik leh thuman gen lo in a om ngei kei hi. Hen leh kaih thuak ta leh a lungsim nem tuan lo a, sik bangin khauh in thudik leh thuman dinpih ngam hi. Mahatma Gandhi tawh kibang kasa liang hi. India gama laigelh siam minthang Kushwant Singh in, "Mahatma Gandhi ka phak lohna khat bek om in thei ing," ci hi. "Hauhna ci leng ka nu leh pa a hauh dan uh kibang inteh, laisiamna ci leng England, London ah ka sangkahna uh kibang, thu leh la ci leng ka phak lohna thei kei ing. Ahi zongin ka phaklohna khat pen ama'n 'hoih hi' acih khat pen a nuntakna kham ngam hi," ci hi. Tua manin India in suahtakna ngah a, leitung bei dongin Gandhi hangsanna leh thupina kigen tawp nawnlo ding hi. Thagum kihello (non-violence) galdona tawh suahtakna ngahzo hi. Thudik leh thumaan i cih pen mual leh guamte a pianma pek in na om khinzo hi ciin Gandhi in gen a, Pasian thu tawh zong hong kituak toto hi (Gandhi zong Lai Siangtho simsim ngei khat ahih manin Pasian thu thuk thei a, South Africa a omlaiin Biakinn kikhopna tutphah kipia hi leh Christian a suak ding pa hi). Tua thudik leh thumaan pen Pu Cin Sian Thang in a mipihte leh a gam mi te suahtakna dingin leitunga kumpi gilo penpen laka khat mai mial hetlo in a hihna bang pulak ngam hi. Zomi bek hilo leitung mibup nuntak hoihzaw ding a lunggulh leh ama theihna, pilna, siamna bek hilo a thatang leh a nuntakna mahmah nangawn khaam ngama sem Zogam Tangval, Pasal Pu Cin Sian Thang - Topa in cidamna hoih pen hong piaksak henla, a khan kum sawt in zotaang bang hong dam hen. Amah pipi pahtawi dingin kilawm kei mah leng, Itna, zahtakna leh hong damkik pah ding deihsakna lianpi tawh, Hau Za CinPhuitong Liim