Sia Evan. Langh Do Khup na piangthak lo hi zenzen leh

Posted by: "Hau Za Cin" suante2002@yahoo.com suante2002
Wed May 14, 2008 1:43 am (PDT)
Sia Evan. Langh Do Khup na piangthak lo hi zenzen leh:A nu leh pa in a piantu'ng in, "Ka tapa uh Nang' adingin kong ap uh hi," acih uh hilo, a tangvalno ciang hong gitlo pian in nu leh pa in kep hak, uk hak a sak uh ciang a hoihtuam khak leh cihna toh, "piangthak mai ve," ci-a a kutkut uh zong hilo... Lai Siangtho sang va kah leh kikhel inteh... ci-a amah deihsakte ngaihsutpiak (advice) man zong hi tuanlo... amah leh amah gilo kisalua in hong piangthak vat, hong kikhel vat zong hilo, Kha Siangtho in a lawn ngiat.......Evan. Langh Do Khup na piangthak lo hizen leh a zi teci panna, "Ka pasal heh thei nawnlo hi," cih kammal a laibu sungah kimu lo ding hi. Sia Do Khup na piangthak lo hi zenzen leh NGAIH ANGLAI AH...... video limciinna te i mu kha nai khol kei ding hi. 'En Ven Ka Ten Nang Gam Nuam' cih la khawng i sa nai khol kei mai thei hi. 'Kiten kum lah hong tam semsem, ngaih mel lah hoih semsem' cih kammalte i lam pihpih kholkei maithei hi. Sia Do Khup na piangthak lo hi zenzen leh gammial nasepna tampi gambu lai dinga, tuni a khuavak a kipuakna mun pawlkhat gammial hilai ding hi. Zomi ka it, Zolai ka zuun, Zokhan ka khual a ci lanlan ngam; ahi zonga Sia Evan. Langh Do Khup laibu HAUHNA LEH KHANSAUNA THUSIM (March 2000) a sim kha lo, a vel kha lo, a lumlet kha nailo te pen zuau gen hi ci leng i khiallua sam dia hia. Singapore ah kammal ka theih behlap khat zang pak le'ng, "a huih lawng sau ngel inteh" cih ding hi. Lengtong Pauno in, "Zogam hong paal ding" ci in mitsi ngei-ngai lianga mipi mai ah a awih ngaingai, ahi zonga ama lasakna tawh kilehbulh in a mipite kigamta damdam. A pil masasa in ZOMI cih sanga a hoihzaw hituanlo, a kilawmzaw (amau ngaihsutna ciat ah) min phuak toto in ZOMI cih min bekbek zong a kisehsatsat hita mawk hi. A min nangawn sehsat ta ci leng a mite bel bangzahta a kisemnen diam kitheilo hi. ZOMI ah i kipumkhat pak diam, ahih kei leh MIZO ah i kipumkhat zaw diam. Sia Do Khup in a pianthak ma in la dawng 30 khawng phuakzo ing ciin a laibu ah at a, a tamzaw kha mangthang veiluat man hih tuak hi (a laibu laimai 235). Tua banga a laphuak lak pan 'Hong Kempa' cih la zong Tangko 90 cassette sungah Sia Tua Mung in sa a, kei zong tua la Sialphei cia a pha Guitar kuah ngei-ngai kawmin mipi mai ah ka sa gamgam ngei sam hi. A la ka theisuak lai tam maw, hong hanciam dih ning: 1. Simlei gua bang ka hinlai, Nisim thupha hong pia a, Ka nunna tha hong dimsak ka Topa........(mangngilh pak)...... Albangdah genthei lenliangte Topa aw, Sakkik:Aw a vanglian ka gumpa aw, Na khut hat tawh nong len a,Simlei lungman launa ah, Aw a vanglian ka gumpa aw, Nisim tuu bang nong cin manLailung damna zaila in hong awi ning maw, 2. Zan in ka ihmut laitak, Na laukhan kei hong kem a,Tai khuaval khangthei ka lawh ciang in ah,Zingdam huih nung hiauhiau in, Sun ni thak mel ka mu a, ...... sun ni a liam zel. [Guai, theisuak nawn kei mawk ing ei. A cassette ka ngaih zawh sawt pianta hi inteh. Shillong omcil lai in U Tg. Sing Khan Thang, Kungfu master blackbelt in Zomi kikhopna ah Solo in hong sak lam ka mitkha ah ka mu ziziai lai hi.] Sia Do Khup in a pianthak ma in zong hih banga la hoih phuak a, a pianthak ciangin a kipulakna (testimony, teci) leh a ki-apna thu a gen pen tomsak mahmah se hi. "Kei Langh Do Khup kikhel ing, na up kei uh leh ka gamtatna na en un, Dim Ciin lasa ou" cih hi ziau hi. A pianthak ma a la phuah "Aw, Pasian nanglo lawm dang nei keng" cih la sa sak a, tua pen pulpit tung pan a teci panna masa penpen hi. Tua teci in gah tampi suangin a dimlet a teci panna pulpit mun tuamtuam, gam tuamtuam ah nei kawikawi hi. Sia Do Khup a pianthak man in mi tampi USA tun pah lo a, ahi zongin vangam lampi tawnsak in khamuanna tampi in ngah lawh hi. Tuate lak ah khamuanna ngah masa pen a zi hi a, a tate zong hipah hi. A vengte, a lawmluite, a thugen a za te, a nasepna munte leh Zogam bek hilo Australia gam dongah mite in lungdamna ngahlawh hi. Amah ka muh ngei hi kei, ka hopih khak zong thei keng. Ka meltheihna masa penpen bel NGAIH ANGLAI AH video hong bawl pan hi. Khitui Gospel nasepna ahih mah bangin tua video te in mi tampite khitui luangsak ziahziah takpi hi. Ahi zongin ka zinna khat ah hong gen uh pen, Japan ah a NGAIH ANGLAI AH video series a bawllai in 'mi kuhkal' a hihdan mite in hong limgen penpen uh hi. A sawmkhat pen lunglut takin sem a, a zawh mateng khawllo hi, ci uh hi. A seppih dingte a kiman kei leh zong a man dong ngak in tutpih a, lungduaitakin ngak hithiat hih tuak hi. A ngakzote in thupha ngah ding hi, cih tawh thupha lala hi mawk hi. Mi khat kikhelna ah Pasian lungdam a, a mang 99 te sangin a kimukik 1 tungah lungdamna lianzaw hi cih i Lai Siangtho in zong hong hilh hi. Mihing khat peuhpeuh kha mangthang ding a kihotkhiat ciangin vantungah lungdam lian hi. A kihonkhia khempeuh in mi dang adingin thupha hi khin tuan lo a, ama ading, a vengte ading, a lawm leh gual ading - thupha bek hi thei hi. Sia Do Khup pen Zomi khempeuh leh gampua ah zong thupha suak toto lai hi. Bangzahta in lungdam hiam! Topa in thupha pia zel lai hen la....... A laibu ka sim ciangin thupi ka sak mahmah pawlkhat om hi, gen suk zel zel leng. 1. A laibu buppi (HAUHNA LEH KHANSAUNA THUSIM) sungah a paipi khat pen lametna nei tawntung, kimuanna tawh kalsuan den cih kitel hi(positive outlook). 2. Nu leh pa kidem zolo hi cih kiteltak in hong lak a, zahtak mahmah ding cih tawh hong khup hi. Tua zahtakna ah tate adingin nahlawhpek hi, ci.3. Zomite ngeina ah a kithupisim mahmah 'Pute leh lamphung kineh zolo' cih pen kitel sitset in hong lak hi. 4. Tulaitak Lai Siangtho siamte leh Christian te in leitung bup ah a kibuaipih mahmah pu leh pa mawhna hanga thupha taanna, thupha ngahlohna... . tua khempeuh pan suahtakna Jesu sungah om hi, ci. 5. Dawi nangawn hawlkhiat theihna dingin antang in thu ka ngen hi ci. Pasian nasem ka hi a kici mi bangzah in tua zahta in thu a ngen tam cih hong ngaihsun sak hi. 6. Abraham Lincoln lungsim nei hi (ka ci hi). America President lak pan a kizahtak penpen khat ahi hi. A lungsim thupi hi. Ka suah ka khanna tualniamlua cilo in mailam bekbek en in Pasian muanna tawh kalsuan a, Pasian leh Zomi ading na lianpipi semkhia hi. A kipatna, a khankhiatna mi aa zah phazo a sakloh hang a tunna ding a dawn ciangtansa om lo hi. 7. Nicky Cruz laibu minthang RUN BABY RUN cih tawh Sia Do Khup laibu a kibatna om ka sa hi. Na tehkaak mah dih ve. Thukhupna: Zomi khempeuh in ankhing tuibuk kham ding i lunggulh a, tua khempeuh leh kha nuntakna ngahna dingin Pasian thu upna leh zuihna ah kinga hi cih limlanga ki-et bangin hong musak sinsen hi. Sia Do Khup na piangthak lo hi zenzen leh Zomi te in bangzahta in i sum tam? Sawltak Paul zong Damaskas khua lampi ah meivak in na salpuk lo hi zenzen leh Christian masa te in bangzahta in a tagah lawh uh tam? 'Kiten kum lah hong tam semsem, Ngaih mel lah hoih semsem'Hau Za Cin