Lawlaw se

Posted by: "Hau Za Cin" suante2002@yahoo.com suante2002
Tue Jun 3, 2008 5:24 pm (PDT)
Lawlaw se: Awng lawlaw se, damdam pau hiathiat peuh lo a. Pawlkhat in, "lawlaw se, tembawta sem hi" hong cih ciangin ka dotna khial ka hiam ka ci phial hi. "Lawmpa bang sem hiam?" ka cih lel pen ka aw sang sa lua ahi tam.... "lawlaw se" hong ci tanghial ka ci a, ka kisuanglah phial hi. Kei lah a heh hilo, a awsang zang zong hilo, a thusit zong hivetlo, holim ngeina tawh ka dot hi a, "lawlaw se" hong cih sese ciang dongkhial ka hi tam maw; hihzah a hong leh dawn, hong khauh dawn gamgam mawk ka ci a, ka maimial dektak phial hi. Tuibuk muam a kamdim a pau phuauphuau hi leng bel ka aw khawng ging buabua dinga, na aw suah kilawm kei, lawlaw se teh na kamdim tuibuk muam tawh hong ci leh phamawh sa keng.... ahi zong - holim ngeina kamdam a kiho napi "lawlaw se" hong cih bel lamdang kasa veve mawk hi. Ka nu tawh ka pi tawh lokuan in alu, tangkha, samphok, bal leh kaithum khawng ka khop uh ciang a lian, a limci, a cihtak deuh ka muh ciang ka lungdam lua in ka aw tawp tawh ka kiko a, ka lungdamna ka selzo kei hi. WOW.... ci in ka awtawp in kiko in gamlak losung ah ka awng buaibuai thei hi. Tua bang ciang ka pi leh ka nu in, "lawlaw se... " ciin hong khaam thei uh hi. Awng kei in, awsang kei in gamsungah awsang kizang ngeilo hi, mi khatpeuh in hong za leh patau sa dinga hong delh ding hi. A kilawmlo pi in patau sa in hong kidelh leh kilawmlo ahih manin maizum huai ding hi. Tua ahih manin awng lawlaw lo ding, gamdai tak in nasem ding hong ci thei uh hi. Awt lawlaw se pen kizang thei deksuai lo mawk hi. Pawlkhat leuleu lasiam mahmah bangin awng lawlaw se uh hi. Lasak bel siam hi khol lo, ahih hang awng lawlaw zo lel uh ahih mana gingkhia damdam sam, puak kaihkaih sam hi. Awngkhia lawlaw zo lel uh ahih manin Cassette, CD, DVD, etc cih bangah khum in 'zuak ding maw, zuak lo ding' cih khawng tawikhai thei uh hi. A aw nei peuh, a awng lawlaw zo peuh lakhum ding hi leng Zogam ah zong lasiam kitawm deksuai lo ding hih tuak hi. Zomi pawlkhat awng lawlaw se lo in thuhoih, thunuam, thunamtui, thulimci, thuthuk, thumanpha... . tampi genkhawm in, gam leh lei khantohna ding kikum uh a; pawlkhat leuleu bel thusia, thuhoihlo, thugilo.... gen in innsung, khuasung, lamzik, kongzing lak natawm ah awng lawlaw, kiko lawlaw se uh hi. Kipawlna, sepkhopna khatpeuh ah kei thu bek kizang hen ciin kiko lawlaw se lo in, a hoih ding a pha ding gel khawm, gen khawm, gelh khawm sem khawm leng Zomi nam hong khangto in, eite zong minam khangto i suak ding hi. Zolai pen leitung minam tampi in hong zatpih a, Kawlte nangawn in hong koppih hi. Hong ngen lo uh a, zat phalna zong Zolai saite tung pan ngah masa tuanlo uh hi. Ahi zongin Zolai tampi suakta takin hong zatpih uh hi. Bangbang ahi zongin tuate thupi masa lo a, Zomi khempeuh in Zolai limtak i zat a, i zuun khop ding a kisam masa pen leh a thupi penpen hi, lawlaw se! Tua hileh Zolai khanto dinga, khangto in khangnote in zong khangsawnte adingin kem toto, zuun toto ding uh hi. Hau Za CinPhuitong Liim