Sila pan Sia ah

Posted by: "Hau Za Cin" suante2002@yahoo.com suante2002
Tue Jun 12, 2007 12:13 am (PST)
Sila pan Sia ah:A nu gilsung pan a pian pan a kipatna leivui ah a ciah kik dongin numei in nuntakna tamveipi khek toto hi. Hih pen Zomi numei te a gen nuam ka hi hi. Zan khuamial lak ah meivak gina zong neilo in a nu sung pan a pian ciangin amah a dom a ni in, "nu ei, numei hiveh" ci kha liangin ka um hi. Pasal hi peuhmah leh, "pasal hi ei" ci ding a, a pianni pan zong ama tungah kammal kizang pen lamdangsakna, lungkim zawh lian lohna kammal hikha thei ding hi. Theisam kei ing, ka upmawh hi. Ahang pen Zomi innkuan ah numei leh pasal - naungek piangtungte zong kikhen hun na om ngei hi. Papi khat in, "ka zi tutung a nau neih pen numei hi kik leh khua lamah ciahsak phot ding ka cih hiven" ciin mi lak ah ciamnuih in gen ngam hi. Pasal piang ahih manin a lungdam luat man hita se leh kilawm khollo hi. Minam in pilna siamna a khuavak a muh tung, a deih theih tungin pasal te kipattah masa a, numei te inn ah ki om sak in, lo peuh kuansak in, inn nasep khempeuh semsak in, a lawm leh gual tawh kikholhna hun ding zong kipia lo hi. Sila in kizang hi mawk hi. A pa puan niin leh sawp, a nu niik niin leh sawp, a sanggam u leh nau puansilh niin khat peuh sawp in, a dangteng bangmah sep ding omlo bangin khuasungah zateep in vak eeleel lel hi. Na sanggamnu inn ah sila in khoi cin a, nang na vaksan hiau pen kilawm nasa hiam? Innkuan nasep bek hilo, zin leh leeng khat peuh om leh zong a thasaan kisam hi (extra work, extra effort). Hoih takin ngaihsun leeng Zomi pasal te in i sanggam numei te sila in a zang hi mawk hi hang. A nasep i mit tung kei leh gensia in, tawng gawpgawp in, a zum huai mahmah in ko thei lai hi hang. Tua pen Gospel i neih zoh, Lai Siangtho i sim pat zawh kum 100 cing ta leh kipaai nailo na mun omlai mawk hi. Innkuan pawlkhat ah a kipaisan ta a, pawlkhat ah uang zat mahmah lai hi. I hai lai hunte hi a, numei leh pasal liangko kikim nai loh hun te hi. I khan kiton lo a, i khan kikim lo hi. I veng leh pam ah i kitheihsak ding, i kihilh ding thu hoih khat hi a, sila in i sanggam numei te i zat nawnloh ding mimal khat ciat tavuan hi. Innkuan pil leh khangto, a khuamu taktak te leuleu in sila nuntakna pan in sia nuntakna ah a sanggam numeite na lamsang leuleu uh hi. Pilna zong a kingap bangin sinsak, a hi thei tanin nasep amau a ciat sem, amau leh amau ciat ki en, a hun neizaw leh a kinaipih te in nu leh pa vaan in om uh a, et lawm in, muh nuam a, zahtak huai in, etteh huai hi. Innkuan nuamsa hi a, nek ding tam in tawm ta leh nuamsa uh hi. Topa phat thei uh hi. Pasian thugen siamte in "Christian innkuan" a cih te uh hi a, leitungah vangam a maleep te a hi uh hi. Nopna ah, dahna ah om dan gamtat dan siam uh hi. Mi uap zo in, a kisam te huh thei uh a, sum leh pai hi kei leh zong lungsim takpi tawh uap thei uh hi. Paradise zong tua kaan hi tuan ding hiam?Zomite khangthu ah numei te hun khat laiin sila bangin kizanga, leitung khantohna leh pilna hangin tu hun ciangin sia za ah kilamsangta hi. Sia taktak a sem zong omta a, pasal sep theih khempeuh mah a sem thei hi ta hi. Lokhawh ciang a matual pen zawhna ciangciang i matutna tan a hihmah bangin i minam khantohna ah zong a tawnung pen, a tuantual pente tunna pen i tunna ciang hi phot hi. Numei leh pasal liangko kikim dinga Zomi mimal innkuan ciat ah i ki pattah pen i minam bup khantohna ding a kipatna taktak hi a, pasal in numeite sila bangin i zat theih na ding thu om tuan lo hi (amau ut uh ahih kei leh). Pasal tunna tan bek a tung hilo in, pasal mawkmawk sang zong a sangzaw a tung omta hi. Tua manin sila pan sia za ah i lut toh laitak in i kalsuan a kikim hiam? Khuapi a tengte kalsuan a kikim lai in, khuata leh khuapi a tengte kalsuan a kikim hiam? A kikim kei leh a madawkzaw te in a nunga hong paite a khutlet a, a kaihtoh a, a hilh, a pattah, a seppih, a tawsawn ding, a khantoh sak ding (kawllam sanggam te uang zatmahmah kammal kawm leeng uplift ding) ahi hi. I kiim i kiang ciat khuavak sak leeng, i minam bup khuavak sungah a teeng pah ta ding hi. Na dinmun bang hiam? Koi lai ah om na hiam - hih thu ah.Hau Za CinPhuitong Liim