Sushi hual:

Pa Ai Mung zahtakna i pia masa hi***.  Florida khuapi tuamtuam, Tulsa khua, LA khua, Washington DC khawngah "California" , "Hawaii", "Orange", cih bang Zomi te in i hual ziahziah ciangin tua gam, tua thei (fruit) a hual hilo in SUSHI hual hizaw hi. A 'shi' hilo (a tak) zong ahual om ahi tam maw (thei sam kaa'ng)! Su = tuithuk (vinegar), shi = buh (rice) cihna hi a, tua ahih leh Sushi cih pen tuithuk tawh a kidiah buhsih ('vinegared rice') cihna hilel hi. Tuithuk in buhsih hiing saklo ahih manin Buhsih huan khit ciang tuithuk tawh tawk ding, kimhel ding, tua ciang votsak ding, tua ciang a vot a tuipaanteh (sea weeds) tawh zial ding, i zial khit ciang hual ding, tumtan ding, tua ciang nek theih dinga kuang tawh luikhia ding cih dan hi.  Kei zong ka kisin mawkmawk leh lawmte 'kum 8 ka hualta' a cite kiangah bel i manlang dan kibang kei mawk! A man bung nih a hual khit ciang en bel tawnkhat kihualzo thamta sam hi. Hoihtak a Dragon Roll bung 4 i hual bel sun annek hun ngeingai pah sam e!! Manlah cih pen ziakai ding lauhman hi lel hiven .  Sushi limna pen Tedima Niangtui Sai bang mah in, 'a theilote bek in paisan' hih tuak hi. Kei zong ka nek khak loh hangin Zomi te Sushi sai tuamtuam ah vakkawikawi kha ngei ing. Hoih thei mahmah, kiciang ziziai hiven! Sushi hual pen Zomi te ading ngiat a Pasian in a bawl tawh kibang kasa hi. Zomite tawh kiho masakna zong omvetlo in Sushi Buhtang namkhat zong 'ZOMI' mah na ci pah uh hi. 'ZOMI' buhtang Sushi in kihual ziahziah hi. Florida ah Zomite in na pan uh a, tuni tan in kizomto suak lai hi.  Pawlkhat in inn hual khia a, pawlkhat in moto hoih mahmah hual khia a, pawlkhat in zi ding hualkhia a, pawlkhat in pasal ding (a dik mah hi). Pawlkhat in minphatna khawng zong hualkhia in, innkuan nuntakna nangawn hualkhia in, pawlkhat in Pasian gam nasepna ding hualkhia in, innsung, khuasung, gamsung bek thamlo Pasian gam zaina zong semkhia uh hi.  Kimawl ciangin kimawldan diktak mah zui in (Play the games in the spirit of the games) cih mah bangin Sushi hual ciangin zong Sushi hual dan ding diktak mah in hual ding kisam hih tuak hi. Ahang pen kimawl mah bangin a dan i zuih kei leh kigualzo lo hih tuak hi.  Kawlpi ah mi khat in, "Nalemuh a omlai teng Kawlgam nusia kei ning" ci hi, kici hi. Kihosimtheihna, kigullukna a omlai teng ka nungta ding hi cihna hi. Ahi zongin Zogam thak America ah bel tuabanga 'kihosimtheihna, kihosiamna (nalemuh) cihte tamlo (a omlo bel hi kenteh) ahi tam maw. A om zongin kithei kha leh bel thukhenna mai ah guallel kha mawk ding hi. Tua hi a, Sushi hual zong a hual ding dan takmah a i hual kisam hi. Theih ding omte thei a, siam ding kisamte siam a, siate, tungsiahte muan ngam dinga siamtak a sep ding kisam kha ding hi. Tomvei noptuam pak pen sawtpi kikhomlo thei hi.  Zomi te adingin nek leh dawn bek hong pia hilo, neih leh lam leh midang huhzawhna, panpih zawhna hong neisak nasep kician khat ahih manin siamtak, siam mahmah a sep ding hi. Suangpi tunga inn lam bangin kingaihsun ni.  Taiwan ka omlai in i ZONET sungah khatveivei, "Zomi Pastor te nangawn in US a tun ciang Sushi hual..." cih ka mu ngei tawh kibang hi. US ah tua bang a hitakpi hiam cih ka tel kei a (Pastor ten Sushi hual), ahi zongin Pastor hita kei leh nekna dingin nasep kisam himawk ahih manin Pastor zong Pastor lo zong nasep khat neih kul mawk hi. Tua manin Pastor te zong nasep dang tampi omkhollo ahih manin (Zomi galtaite nasep theih pak ding nasep tamlo ka cihna) Sushi mah a hual kei uh leh hamsa dingin ka um hi. Sushi hual mah nekzonna baih pen lai suak ahih manin; leh Sushi hual mah Zomi te in i septheih nasep kician ahih manin (minam dangte in sem siam khollo), Zomi te i mel zong Japan te tawh kibang hiven, piangsakpa gelkholhna - tua hi thugen siamte in Thupha Ngah Minam a cihna uh. Tua hi a, a gal pan et leh a mun ah muh kibang lo hi.  Sushi hual pen Zomi te in i siam mahmah bek hilo a, a hilhthei ding, Sushi Master semthei dingin i hanciam ding hoih tuak kasa hi. Manager khawng i om pah ding ka lamen a, tua dingin inspector khawng zong i om ding hoih tuak kasa hi. Hibanga a paitoh zel leh hun khat ciang 'Sushi hual kidemna' cih zong omleh kilawm hi. Zomi in mainawt zel, khawl kei ni.  [Hih ka laiat kawmin California Roll bung khat khawng ka kiangah om leh ne kawmkawm nuam mah siing maw... he he...]  Hau Za CinPhuitong Liim  *** Upa te in, "Phulum phul nang Leikha in pet let," a cih mah bangin Pa Ai Mung pen America a tung masa lakah Zomi te adingin Sushi hual theih hi cih a mukhia masa leh Sushi hual nasep a kipan masa hi a, ama kiang pan mi tampi in sinin amau Sushi sai tuam nei ciat uh a, tua banga kiban paitoto pen - tu hun in amah a theikha lo te nangawn in Sushi hual siamta, nekzonna namkhat hong suakta hi. Tua manin Sushi Hual tawh kisaia Zomi te ading a LEIKHA amah hi. Lungdam. (-- HZC) Â

Sushi Hual - 2 Sushi hual siam tangvalte in bang hanga zi nei pahpah lo uh hiam cih khat a kidot simna vuah a lawmpa in, "Guai, tua pen maw, tu lai khua lam pan i nu i pate in a zonsa te uh lah hong tung thei paklo, a nawngkaisak tampi in dal. Tua ban ah, Sushi sai ah nungakno, puansilh lamsangah a zawng mahmahte in nisim in Sushi hong lei den uh ahih manin i nu i pate hong zonsak Zolia te zong kilunggulh ngeungau zo nawnlo, kinawh ngaihsut kha nawnlo in ziakai toto kha himai lo diam....." ci kha liang hih tuak hi. Nungak figure hoih nuam, an tawm ne nuam, cidam sinsen, sisan suah, thahat veve utte in Sushi lim nek uh a, ahi zongin a man tawmlo ahih manin mihau leh sum zat ding kicingzaw deuh te bek in kizom in nezo uh hih tuak hi. Tua banga nisima Sushi ne zo nungakno sum hau lak ah puansilh lamsanga mizawng zong tampi om hih tuak hi. A ban bel .... state lama omte in hong zom mai hen la.... he he.. Nungakno pawlkhat bangin Sushi chef special ne nuam sese uh a, a bawl sung kiho khak ding bek zong iplah uh ahi tam maw. A hual zo, a kiho zo, a van a piak ding ciang "Gitta leh pute in anpal ciam masa" cih dan hilo in, a pia nuam masa kituh zong om thei hih tuak hi. Tua pen Sushi hual a nopna khat zong hih tuak hi. Tangvalte bek zong hilo a val nawnlo te zong lawp seem cih khat za ngei ing. Leitung - haksatna, gimna, lungkhamna tamna gamah zong a nuam khat veivei kituak theizel hi ding hi, tua bang tuah khak ding a delh a delh taak hilua mah hi. Lawm Cin Do Khup, Frederick cih mah banga anneng, a them nonote kamsung lot pahpah pen Sushi Chef bek hilo, van leite in zong mu nuam pha lo hih tuak hi. Tua bek hilo, Sushi hualna inn pua pusuak leng i lut kik simin khut silsiang ding, sanitize ding cih khawng hi leh kilawm. Lu tung pan samzang kia ding dalna lutuamna khu lo peuhmah in Sushi hualna sungah kilut theilo a, Sushi leh ann zuakte sungah samzang a kiat ding dalna hi. Khua lamah khual i zin ciang, khat veivei inntekte in huan sung pan a lawhtawm uh ankam khawng ah samzang kikai piatpuat, ankam kung nangawn kilakhia theilo cih khawng omthei hi. Leitung pen phamawh sa kei peuh leng ol lel a, hamsa ngaihsut leng baihlo thei hi. Mizogam ka ciah nunung pen in, "Zawng kamsungah bangmah lutmawh lo," cih khat kam zat tangzang na nei uh hi. Zawng in nek mawh neilo a cihna hi. Nin, siangtho, siangtholo cih kigengen selo, ann ahih nak leh nek ding hilian hi. Lamdang veve. Sushi buhtang bawlte in "No Zomi" hong ci liang tak uh i ci khin a, Zomi ihih lam i theihloh ding amau zong na dah mahmah sam uh hi ding hi. Bang hang ahi tam? Pawlkhat in 'Sushi hual' cilo in, 'Sushi leih' khawng peuh ci zanzan uh hi. 'Leih' het kei veng aw, sathau tawh ka hul kan hiveh' ci zaw hi. Tui leih, tui buak, tui kawtsak sa ahih cianga amah zong uttuan peuhmah lo, 'leih kei ing, tui hel kei ing' ci-a pang veve hih tuak hi. 'California na leih sin aw' khawng peuh ci, a khatpa zong California roll tui buak ding ahih leh ciin tui suak dinga tuikeu tawh a pai leh 'tui tawh bang hih ding na hia' ci leuleu. California leih ding ci na hih cianga tui suak sawm hiveng aw...... buaihuai sam ei.....a buai hilel, a buai..... Kawlpi pan kibawl Zomi video khat "Teek leh Mo" kici et mahmah bang.... Hau Za CinPhuitong Liim