Kilimneihna leitung

Posted by: "Hau Za Cin" suante2002@yahoo.com suante2002
Tue Jun 12, 2007 11:06 pm (PST)
Kilimneihna Leitung:Kum 400 val paita, AD 1564-1616 sunga a nungta English lai at siam minthang Willliam Shakespeare in, "Leitung pen i kilimneihna dawhtam hi" (All the World's a Stage) na ci hi. Tua kilimneihna dawhtam ah mi khempeuh, numei pasal hi ta leh lut in pusuak a, amau hun ciat bangin a kilak uh hi ci hi. Aman a gen pen mihing khat nuntakna ahi hi. A pian pan a sihtan thu genna hi a, a nuntakna kilamdan dan a gen ahi hi. Naungek in a pianga, awmbawh vak in a kemte khutme peuh tawpsak in tua zawh ciang sangkah dingin kisawl a, ut lo pipi in sanginn ah kipaisak hi. Hong khangno suah in nungak tangval hong thei in a khangualte itna ngahsawm in limtak in hanciam in tua ciangin galkap nasep hun tunga, mukmul hawi leh ...... hehbaih in kitot baihsak a, tua zawh ciangin hong pilta a, thudik gamtat ding hong hanciam hi. Tua zawh ciangin a sia a pha theician ta a, a naktungah mitlimlang (spectacles, eye glass, reading glass, miatmaan) leh a tutphah kiangah thung-ip khat, tua zawh ciang a khangno lai-a a zat tangzang mahmah a ngaltaak hong ciip ta ahih manin leitung hong lianlua ta (vakzo nawnlo), tukbel teep in aw thuum duahduah in a pau hang, a lungsim naupang suah kik in ha neilo, mit neilo, limsak neilo, duh neilo in, a tawpna taktak ah bangmah a nei nawn kei a, amah zong abei hi, ci hi. Kilimneih (drama) ciangin mi khat ama hun ah mipi muh dingin puankhai liah pan hong pusuak a, a lah ding khempeuh a lah khit ciangin puanpi liah ah a lut kik hi. A dang khat hong pusuak kik a, ama lah ding khempeuh lak in tua puanpi kawm mahah a lut kik hi. A banban in a lak uh a, a tawpna a tun ciangin a limlah uh, a kilimneih uh a bei hi. Mihing nuntakna zong tua banga kilim neihna hi ciin mikang lai at siampa in na gen hi. Bangmah theilo a piang bangmah theilo mah in a bei kik a, a kikal ah nuntakna themkhat kilaih toto hi lel hi. Singtung kah bang hi a, a bul pan kah, a dawn tung in a bul ah kumkik tawh kibang hi. Tomcik na nuntak sung na kilimneihna ah bang lim na lak hiam? Mihoih lim na lak hiam, misia gamtat na lak hiam? Na kiim na kianga te kiangah nopna na puak hiam, gimna na tun zaw hiam? Dahna hehna na piangsak hiam, nuihna maitaina na pia zaw hiam? Bang lim na lak hiam? Thupha na hi hiam, vangik na hi hiam? Thupha pia na hi hiam, thupha ngen na hi zaw hiam? I kianga te kiangah thupha bawl ciat leeng i nisim nuntak nuam dinga ei zong thupha i sangciat dinga, thupha zong i hawm ciat dinga, i nuntak nuam mah mah ding hi. Tomcik, kum 60, 70 na nuntak sung leltak in mi lungdamna na bawl maw, mi hehna ding na bawl? Mikang lai at siampa ama thu tuni i gengen hanga amah a om nawnlo, a bei hita hi. Ei zong amah bangin i bei ni hong tung ding hi. Ahi zongin ama nusiat thu pen tuni in kisutsut hi. Amah i ngaia, i kiangah om leh i ut hi, holim in mukha in, kikhawl kha leeng i ut hi. Ahi zongin kum 400 val leisungah ciahkik zo hi. Nang nuntakna zong tua bangin nikhat ciang hong bei ding hi. Hong piang lai ding khangthakte bang na nusiat tam? Bang lim na kineih tam? Mite in a phawk ding hiam, a phawk nuam ding uh hiam, a thei nuam ding uh hiam? Nang bang role na play hiam? A hoih penpen role na play ve. A hoih penpen gamtat na lak ve. Mite paktat mahmah lim na piah ve. A kimangngilh ngeilo ding limin na kilak ve. Mikhempeuh, pitek, putek, naupang, nupi papi na ngawn in a paktat ding lim na lak teitei ve. Hau Za CinPhuitong Liim