Posted by: "Thang Siangh" zogampalpi@yahoo.com zogampalpi
Thu Jan 31, 2008 8:49 am (PST)
.Mihing maw, SikhaPumpi pen nucia pacia phata hi. Nu leh Pa ten ih kalsuanzia ih luput enin, lametna lianptawh hong mitsuan suan uh hi. Mawkvak hun hinawnlo hi. Bangkhat peuh seploh phamawhmai ta hi. Kilungtuahpih numei khatpeuh omleh bang masuanin nuntakpih ding, ci-in kilungkham hi. Sumzon sin ning, cin ka kuankhia hi. Sumzian neilo kahih ciangin, vokmul, nglamul, khi cih khawngtawh kipat kul hi.Lomzang khua kapha aa meltheih khat na om hi. Zingsang ciangin anne manphetin sun-an(sunsiah) tunnin kapaikhia hi. Lomzang khuakhung mualvum kakhup phei ciangin Tedim-Tonzang motor lam kaang hettatin kigalmuh a, " hipan paisuk leng motor lam kimanpak thei ding hitah," ci'n mualdung zui-in lozau manin kapai hi. Ka upmawh banglo hi. Mawtaw lam pen nagamla mahmah hi. Tuazang-lei katunleh ni mualah kinga linlen hi. Ka anphel hongin Zalui-tui tawh kameh hi. Katunphet leh pasal kum-30 gual pawl ding khat, kapam aa khawlmunah Theikung kisatliam lipliap nuai ah tuipuan-ip meng lipliap khat kuahin hong khawl hi. A thungsung khawng veelveel a, kei hong en nuam lo hi.Anne kaman ciangin kavan kisuanin kadinleh amah zong dingpah hi. A pai ciangin amah zong pai hi. Laam-10 khawngin kamai-ah napai pai hi. Khuamui hong kipan hi. Lei keu mahmah ahih ciangin, khua khalvak in taang heha lel hi. Tua bangin kapaipai uh hi. Amah mawtawlam zuizui-in pai a, lamdawt-lampelh kaphak ciangin kei katotai hi. Motor lam kaphaktoh leh kamai ah laam-10 halmahin napai hi. Moto lamleh lamdawt pen gamla mahmah kikhai hi-a, bang hang kamai natung thei hiam, ci'n lamdang kasa hi.Ama nung kazuizui hi. Khuakhalvak sung ahih ciangin vommelmel bekin kimuthei ta hi. Hawkguam ngalhawk luanna luino khat kaphak laitak, guamsungaa poto singsang hong kising ziahziah hi. Mupi khawng leengkhia hinteh cin kadon keileh, abulpanin hong lokziahziah hi. Keizong kadeekmul hong tho-in," Mihing ahihleh si in, sikha nahihleh si in," ci-in mikaanghun a suangtum kiciang tawikhopkhop tawh khuahsukin a kim apamteng kadengphial mang hi.Tua khit ciangin Tualzang lampelh tawnin kapaisuak hi. Tualzang phak madeuh kakhangzang Cikhtui gei-ah khuahang meide thum kualpampamin kidelh uh hi. Lutang khuttum ciacia tolkeukau ngentang ahi hi. Leisungah tumdaudau zel pusuakin Cikh kimkot in kidelhdelh uh hi. Suangtum la-in den kasawm a, hong heh zenzen leh khua tungman kei kha ning, ci-in daaitakin Tualzang kadelh hi.Lawm-anneek tawh kituak a, zunungin gamlum mahmah uh hi. Migamlumna innkhatah kalut hi. Kei pen sikha kihta aa vabang kahi hi. Zukham sulin hong ngai petmah uh hi. Ka luksaih hong sangaa innsunglamah koih hi. Kei zu hong suahin an hongpia uh hi. Nataam dia, hong cih ciangin, paisuak ning, cikha kahih manin, anneek khit ciangin laupipi-in kapaisuak hi. Tua zan mawtawlam lian lua, kei neulua kasa hi. Zan khuamial sungah laupipi a tang khatguak paitaitai pen lamsau tuatan kamangngilh thei kei hi. Zingsang nai-3am Lawibual Bu Kap Za Thang inn ah kagiak hi. Sun tawlnga in Tedim khuasungah kavak hi. Lusei tapong ten Tedim hong lakni zan ahi hi. Tuni dong mihing hiam, sikha hiam katelzo kei hi. Kahanloh hang hiding hiam, laucih takin kalau hi. Meide kamuh alu khuttumcia pha aa aktui bangaa tolkeukau pen Cikh sungah lutsek pusuak sek Cikh kimkotin kidelh aa tai kaukau pen zong kamitkha ah mang lo hi. Ahih hangin tuhunin hi bangdan tawmmahmah ta hi. Banglam zangin mihingte khem ahitam mailamah kikumkum ding hihang.Sikha tauuJapan galven khit ciangin, Phalbi hunsung Sikha-tauu om den hi. Ko innah tauumun mahmah hi. Khatveivei Pi. Song Dim kici meigong khat innah tauu thei zel hi. Nupi-taima te pen zan-12 dong tu-in khaukheek thei uh hi. Khuata khuaneute ah nai-9 in mi gamdai mahmah hi. Sikhatauu pen nai-10 hunpawl khawngin kipan hi. Acilin neukhakha-in dammawhgim bangin tauu tihtih a, asawt ciangin ngeih semsem hi. Innnsualzui in kheng ngamngam hi. Meihlah-ciim khat de-in niinphiatna awngvangsin singpeek hongkhiat-sai- in meikuang khesuk hi. A et ciangin voktal thau mahmah khat khanglam nga-in tu kamu ci hi. Amau khawi pen vokkhial khat bek ahi hi. Tangvalte tho khengkhangin anawh uleh. a phaitam-tualah vokno-phei minsa lumlatlat hong kia, ci uh hi. Amau lau uh-a tawm ngamlo hi.Khanglui paapi ten agen ciangin ih biak Pusa-Innsungpi thawih ding ngen hi, ci-in gen uh hi. Ih Pu ih Pate biakngei dawi tuamtuamte pen atuamtuam-in kihil thei hi. Bia nuamkei peuhleng a taimang ding hilel hi.Sikha-tauu pen, agei vanaii leng gamlapi hizel, paikhia leeng innnuaimah hong hizel a, asawt ciangin dekmultho in lauloh phamawh mawk hi. Tuhun ciangin kiza nawnlo hi. Dawimah hizelleng ding hi. Bicing ah naak thei hi. Lampai laitak ih bilah zong naak thei hi.KhagiloKhampat Church Pastor kasep laitak ahi hi. Tuikhal ah Hang Khan Zam kici naupang khat om hi. A nu pen meigong hi a, ta khatbek nei hi. Khagilo in a paina khempeuhah kawizuih hi. Logiak buuk sungah a luplaitak un buukkongpua aa kikoih baalke tawh ihmu theilo dongin deng hi. A ciah ciangin lamtawng tungah suang tawh kidengaa lawhna ding theilo uh hi. Khatveivei anhuanbeel sungah eek nakoih thei hi. Puanzawng aa ihmu kimlai a zun peek thei hi. Tua pen Hang Khan Zam omna khempeuhah gamtaang hi. Omkeileh bangmah cilo hi. Hang Khan Zam in lah theilo hi.Pawlpi tuamtuam panin Dawihawlkhia dingin pai uh hi. Bangmah lawhtheilo uh hi. AG siapa'n thungen a, vaimimkung tawh nadeng ek hi. Sawbua panin khangno pawlkhat va kisin uh hi. Antangin thungetsak hi. Kilamdang tuanlo hi. Kei hong sam a, zankhat giakin kataam hi. Hunbawlin thungetna kanei uh hi. Tua laitakin Hang Khan Zam pen kagei-ah katusak hi. Ngawngkawisa- in lasa-in thu kangen uh hi. Tua laitakin meikhuk aa singkhuah-aam sumtawng hong leengin Upa-pa ngawngzang khaphei hi. Hunman lian leh tuibeel tungaa kikoih galkap-hai tuitawh hong leeng leuleu a, Kham Hau pangpi hong kha leuleu hi. Ciah dingaa kapaikhiat ciangin, innmai bikha nuai aa om kuangsau tuikoihna, temtaat ciangaa kizang hong lawn a sualtung hong tuto hi.Ameel muhtheih hilo agamtatna te lauhuai thei mahmah hi. Keizong bangmah lawhzolo-in kaciah hi. Kapteel ah zong tua bangkhat piang ngei ci-in kaza hi. " Innnuai aa navok lianpen tawh hong thoih in" ci-in kihil hihtuak hi. Khangham zawdeuh ten, Pusa-dawi kitom hi, ci uh hi. Tua Dawi pen khatbek hinapi, tulnih bang pha thei hi, cin gen hi.Satan Dawi mangpa inbel ama tactic hong kheltoto ding hi. Lawkihun aa tactic te tuhunin muibun nawnlo hi. Kamsaang peuh hong kinei ding hi. Sawlna ngah ing ci-in mikhatpeuh gim hong pia ding hi. Kidawn ni.Thang Siangh
No comments:
Post a Comment