Vangam Maleep

Posted by: "Hau Za Cin" suante2002@yahoo.com suante2002
Wed Jun 13, 2007 1:58 am (PST)
Insung nuam vangam bang hi cih pen tuma deuh in limtak in ki at khinzo a, na sim khalo na hih leh ZONET ah om ding um ing. Vangam Maleep cih tawh kisai na lamet bangin kong gen thei kei zong keima ngaihsut dan tawm khat hong kum sawm ning. Vangam Maleep:Hici zaw deuh hen cih a om nawnlohna; kikhen cih a om nawnlohna; it leh ngaih kicinna; gilkial dangtak om nawnlohna; nang' kei', no' ko' cih om nawnlohna; kihhuai leh niin a omlohna; vantung misiangtho te in Pasian tokhom mai ah Siangtho, Siangtho, Siangtho... ciin a kha uh zaap in a phat cimtheih lohna mun; suangmanpha te ziahziah tawh a kizut khuasungah nuamtaka khamuang lungnuam a tuallenna mun ding hi....... ciin thugen siamte in a hoih theithei in na gen uh a, tuate sangin nuamzaw lai thamtham ding hi. Laphuakpa Evan. Do Khup in, "Mizawng mi poi te leh tagahte nopsakna mun.... lungdamna luankhi a luanna mun.... ciin na gen hi. Tua zah sanga a zah tampi a nuamzaw ding hih vangam pen leitungah kimaleep thei hi mawk hi. Tu laitak Mizogam, Manipur, Assam, etc ah Mautam ding ciin zusa in lokho te buh leh vaimim te a nekkhit sak khak ding, nek ding a kisap khak ding lau in mipi te linglawng mahmah hi. Ahi zongin vangam ah tua bang linglawngna (tensions) omlo ding hi. Gilkial khakding lau in kilau khol nawnlo ding cihna hi. Kial cih peuhmah kiza nawnlo dinga, annek cih zong om nawnlo ding hi. Ngalkhat banga a tuam vak, Zusa tolpi banga a tol teen te in zong anhuan, kuangsawp, puansawp cihte om nawnlo ding cihna hi. Zi te heh ding laua puansawp saisai, anhuan daidai, naukem bubu, inzut cihte om nawnlo ding.... vangam pen nopci tuak mawk hi.... Ngeisok leh Neisok leh Heisok cihte kinial om nawnlo dinga, Zusa leh Vasa cihte zong kinial om nawnlo ding hi. Halleluijah! A pak hoihna liim ah tawldam in a hoihna bek kithupi sim dinga, a min leh puam ah kibuai nawnlo ding hi. Mi khempeuh khoppi zintun ni bangin kimaitai tuah ciat dinga, khoppi beini bangin kikhialah ciat ding uh hi. Manipur gam MLA kitelna cih om nawnlo dinga, meltheih tanau zong kiho liailiai ta ding hi. Contractor te in lampi hoih bawl kei lua ci-a sangnaupangte laisim manlo zen a DC office leh public office tengah a diangdiang uh kisam nawnlo dinga, sangnaupang leh contractor cih zong om nawnlo ding hi. A hau, a zawng cih om nawnlo dinga, a cina, a zawngkhal cih om nawnlo ding hi. Pasian in khuasung khempeuh suangmanpha tawh zut ding ahih manin contractor te nasep ding omnawnlo ding hi. Kei hong teel un ci a mipi leh makaite kiangah awhut lianga awtawt kisam nawnlo dinga, Khuado ni zingsang bang den mai ding hi. Nungak te zong Miss Universe kizem bang vive (tuasang zong hoihzaw thamtham) vive in kizem dinga, a sam uh a san, a kang, a gial cih bangin a ut ut un bawl thei lel ding uh hi. Nuamlua ding cihna hi. "Ka pu R ti rawh le" cih ciang, "aal" cih mana Aizawl Jail, Champhai jail leh Police station lock up te kipelh ta ding a, "hajeng da lah aw" (zing ciang hong pai kik in) ci a Imphal leh Lamka kikal kilehleh kul nawnlo ding hi. Zomi i cih ciang, tuate, tuate, tuate, tuate, tuate,...... . kigawm hi ci a hilhcianna laidal tampi kisam nawnlo dinga, ko Lai Siangtho, no Lai Siangtho, amau Lai Siangtho, ........ cih bei ding hi. No tribe, ko tribe, amau tribe, cih te om nawnlo ding a, zangkhat suan zong tribe tuamtuam cih bang kiza nawn lo ding hi. Khuasung khat hi napi hanmual tuamtuam ah kivui cih om lo dinga, a zi huan khang lam hanmual ah, a pasal huansak lam hanmual ah cih bang om nawn lo ding hi. International boundary kantan peuh leng minam hihna zong kikhek cih om nawnlo ding a, state boundary khat in hong hal leh zong minam kikhek cih kiza nawn lo ding hi. Pastor kici om nawnlo dinga, pawlkhen kham pa hi cih a minsiat zong om nawnlo ding hi. Sum hau ahih manin ama thu i zuih masak kisam hi cih bang lauhna beita dinga, sum neilo ahih manin a pil hang a pilna kizahtaksaklo cih om nawnlo ding hi. Veng leh paam mehteh mehgah kikholh a, ankhing tuibuk zek khawm a, a lim a al nei leh a kisam liailiai, a ki nekngaih te bang vive hita ding hi. Gamlapi ah om taleh telephone tawh a itna thu gen vangvanga, laidal tawh a khutma lakin, a pumpi mahmah tawh a veh vangvang ki itna bangin kikhualna, kihuaina, kiphawkna, cihte om ding hi. Tua te hangin lungdamna khitui luang dinga, lungdamna, nopna, kilemna om ding hi. Zukham cianga hagawi ngamngam, pakaan leeng dada cihte om nawnlo dinga, ta no te zong lupna nuai ah, bizu liah ah, tutphah nuai ah kibuk kul nawnlo ding hi. Delhi ah ciamnuih ka zak khat bang hi den dingin um mai veng aw:A pasal nasepna pan inn a tun ciang a zi in, na vaidawn in, na maitai a, hoihtak na holimpih saisai hi kici hi. "Lawm, ann na ne masa diai, na kisil masa diai, ahih loh leh......... .... " .... he he.... ci hi kici hi. Tua banga lungnopna, maitaina, lungkimna tawh leitungah vangam nopna ki maleep thei hi dan hi. Kuamah eng kei in, kuamah tawh kitawng kei peuh leng vangam maleep hi mai lo hiam?Hau Za CinPhuitong Liim