Zomi nih leitungbup kipawlna ah nasem tawh kimuhna

Posted by: "Hau Za Cin" suante2002@yahoo.com suante2002
Wed Jun 4, 2008 3:56 pm (PDT)
Zomi nih leitungbup kipawlna ah nasem tawh kimuhna : A mun Singapore hi. Ka kimuh ding uh ka theihsa hi lo hi. Amau kei hong thei zong hilo a, amau bel mi tampi in a theih mahmah Zomi ahi uh hi. Amau nasep lam ciat ah a hanciam mahmah leh a kuhkal hi ciin kigen den te hi a, a nasep hoihloh lam uh kiza ngeilo hi. Tunglamte mit tunglo cih omlo a, nuaia te zahtak zong a ngah mahmah Zomi ithuai te ahi uh hi. Amau tawh kimuh mengmeng ding a baih hilo a, a sepna uh hangin Zomi tamzaw tawh kisawh kha tamlo uh hi. A kimuhpih peuhmah in maingap huaisa in suakta takin holimpih thei uh a, kisuanna leh kiletsakna neilo in migi mahmah uh hi. Tua bang mihoih Zomi sung pan tampi omte lakah amau tawh ka kimuhkhak ka hamphatna ka gensiam kei ding hi. Ka muh masak zawk pen UNO ah sem hi a, United Nations missions khat ahi Sudan gam ah engineer sem in om hi. UN galkapte in Sudan gamsung buaina a ven theihna dingin kumpi leh gamsungmite kikal ah kilemna a om theihna dingin nasem uh a, tua nasepna ah a kihel Pa Kam Za Thang pen Civil Engineer hi in, kha bangzah hiam hal in tawlngak hun ngah den ahih manin innlam hong ciah zel hi. Tua banga a innkuanpihte kiang Singapore ah hong ciah hun khat ah amah tawh ka kimu kha hi. Lamet hetloh leh theihkholh loh in May 2008 kha bul in a pano in hong nusia cih thu a kizak ciangin Zomi Innkuan Singapore (ZIS) in galna nei ding ciin kikhop tawp ciangin a hi thei zahzah ka pai uh a, mi vekpi 22 pha hi. ZIS pan Nopna Dahna makai in hun kem in Zangkong pan hong pai sianu khat in Hehnepna thugen hi. "Topa mite, Topa aa te" cih la Kawlpau tawh ka sak khit uh ciangin hun siangtho kizo pah hi. Kikhop man ciangin Pa Thang pen mipil hi cih a kitelna khat ka mu pah hi. Lengla khempeuh a banban in hong khutlet a, a theihsa pawlkhat a om hangin a kimuciil zong ka om uh hi. Ahi zongin mi khempeuh a theihtheihsa, a muhmuhsa bangin maitai takin hopih thei a, leitungbup ading nasem ahih hangin a lungsim ah kiliatsakna leh kiphatsakna omvetlo hi cih kilang hi. Ka tun tung vua nungak melhoih mahmah nih in 'avot' (cold drinks pen Zopau in avot kici hi) hong hawmte uh dawn kawmkawm in Pa Thang tawh ka holim uh a, leitungbup huama nasem ahih mah bangin leitung politics leh thupiang tuamtuam, policy tuamtuam thei lua mahmah ahih manin ka theihna tampi hong behlap a, manpha kasa hi. Tua lak ah Sengam (China) in Africa ah meitui tampi a tohkhiat theih dan uh, US leh Sengam a kidem tohtoh ding dan, leitung gamhatpen (super power) hi dinga kitaitehna ah Sengam zong a deu hetloh ding dan hong gente manpha kasa hi (Details later, hun a om leh). Thu tuamtuam kikup zawh ciang ka ciah sawm uh leh .... koi lak ah.... 'anne masa lo in kiciah theilo' cihzah in phial a hong nekngaihna uh leh deihsakna uh kinial theilo a, kinial zolo hi. Leitungbup huam a nasem ding mah in om hi. Zomi pawlkhat sangin nakpi taka a tungnunzawkna ka mu pah hi. Beh leh phung sung kheng vangvangin a ngaihsutna liansak Zomi hita cih kimu pah hi. Zomi khempeuh in a etteh ding Zomi pasal khat hi ka ciamteh hi. Rev. Gin Neih Thang Ngaihte bel OMF International kici ah sem hi. Overseas Missionary Fellowship International pen James Hudson Taylor in kum 1865 peka aphuat Inland China Missions ahi hi. Sengam leh a kiim ah Sen minam te kiangah Pasian thupuak ding a hanciam pawlte hi. A zum bulpi uh Singapore ah om a, Sia Thang leh a zi Sianu Nu Ching zong tua ah sangkhak sung vai pawlkhat tawh Singapore hong pai uh hi. Tu laitak a sepna uh pen Manila, Phillipines hi a, Lai Siangtho sang ah sangsia sem uh hi. Siapa te nupa Singapore ah hong zin hi cih mi khat in hong gen ciangin "thei mah veng e, Shillong ah Khangno makai ka sep lai in Missions Kikhoppi khat ah thugen dingin ka sam ngei uh hi" ka ci a, India pan Zomi hong pai ding kikhaat mahmah ahih manin ka lungsim tawng ah ka nuamtuam mahmah diak hi. Nitak khat ka hopih leh Sianu in phone ah hong dawnga, bang hih a Singapore ah om ka hiam cih leh Taiwan ciklai a nusia cih khawng ka kigen khit uh ciang, "tua ahih leh khatvei peuhmah nong hawh uh kullo dia.." ci a, ko zong lawmte makaihna tawh khatvei ka hawh uh hi. Ka lawm Tg. Pau Za Khup, Bungmual in "Sia Thang pen thunget a hahkat mahmah, Pasian a it mahmah khat hi" ci a Shillong sangkah lai pek a hong gen pen ka phawk den a, amau muh ding ka lawp semsem hi. Ka gennop thu khempeuh uh gen khin manlo in hun in hong ngaklo ahih manin ka kikhen kik uh a, khatvei kimu kik ding ciin Sianu hong lui khiat niangtui leh mohte baan ah theigah, theitui te gilvah taka ne in Topa mai ah kun khawm in ka kikhen phot uh hi. Siate pen a tapa leh tanu USA ah sangkah laizo ding Graduation Day uap dinga pai ding ahi uh hi. Topa in Ama ading a sepna te uh hangin thupha pia in a tate uh a lai uh hoihtak zo in tuin lukhunelkai khu ta ding uh hi (May 24, 2008). Thukhupna: Pasian in leitungbup huam a nasepna ah tavuan lianpi a nei Zomi ulian nih tawh hong kimu sak ahih manin hampha ka kisa a, ka angtang mahmah hi. Topa in leitung melhoihna ding, vantung ah lungdamna a liat mahmah na dingin a nasepna uh thupha hong piaksak in cidam khansauna thupha hong piaksak ta hen. Zahtakna lianpi tawh, Hau Za CinPhuitong Liim