ZBC Silver Jubilee

The Jubilee -2 : Tunkim Ni
Posted by: "Hau Za Cin" suante2002@yahoo.com suante2002
Sun Jan 27, 2008 10:42 pm (PST)
The Jubilee - 2: Tunkim NiKa pa zong Murlen pan Jubilee sim dingin hong pai phei ahih manin zing nai 10:00AM in anne khawm in ka holim khit uh ciang kisil in sun nai 12 Noon pawl in Zomi Baptist Hall lam ah ka vak suk leh ka muh ngei, ka muh ngei nailoh Siate pawlkhat tawh kimu in, Zomi Baptist Hall kongmai ah ka dinkhawl liliai uh a, tua tak leh siapa khat in, "Sia Job Thawngno te tawh na kimuta hia Sia?" ciin hong dot bawl ciangin, "Kimu nai kei si ing e, hong pai ding maw?" ka cih leh, "Inn sungah om uh, tuzing hong tung uh a, tun kisil laitak hi.." hong ci a, ka bil hong vang hanhan tawh kibangin.. innsung lam ka zuan uh a, kongkhak hong in ka lutphei uh leh lupna nuai ah van neu nih leh lupna tungah puanza lom khat ka mu uh a, .... Siapa kisil lai hi inteh maw ka ci uh hi. Kei mahmah zong Singapore pan December 3, 2007 nitak nai 4:20 PM a Delhi ciah ka hih manin, Delhi - Kolkatta- Imphal - Aizawl - Champhai ka tun ciangin December 5 nitaak hi a, a zingciang Dec 6 ni a thupiang ding khat mahmah zong ka ciahna lampi ah ka thei man kei hi. Ka hand phone lah India ka tun ciang kizang theilo, India ah phone connection la nuam hi leeng tulai leitung buaina hangin kumpite kidawm uh ahih manin Lai kisam tamsak uh a, khualzinna ah kimawk lei theilo ahih manin khuaza lo in Taiwan-Singapore- India ka tung hi. Siapa pen kisil hi ngei ngei takpi ahih manin kimuh ut huai si ahih manin a room kongkhak ngei ah ngak dimdem in ka ding uh a, a sawtlo in a kisilna pan hong kik a, khut kilen in "si leh hing kimu" a cih bangun ka gen masak ding uh zong theilo in ka ki en heei haai uh hi. Tua zawh ciang' tukhawm in Topa tungah 'ei teng hong kimusak Pa' tungah lungdamkohna hong neih khit ciangin ka holim uh hi. A kamkhum bek hilo, a kamsiam bek hilo, a itna bek hilo in - thupha leh letsong tampi hong puak a, tua ni zaha Laibu letsong ka ngah tamzawk ni ka thei nai kei hi. Tua nitaak lam, December 6, 2007 pen Zomi sungah a kigen vangvang Pasian sathaunilh siate lak ah khat, ka muhnop mahmah den Sia Job Thawngno a mu ka hi leltak hi. "Nunga lam sabah" hi takpi e. Hong pai ding zong kuamah kam pan ka zakkholh hi lo hiven. Kimu bek hilo in, holim in, ka laibu KA LAIKUNG PANIN present dinga ka khak zong a ngah thu hong gen a, ka angtang mahmah hi. Tua banga koteng Siapa tawh ka gualnop laitak un, Ngur pan, Vapar pan, Tedim pan, Aizawl pan, Sesih pan, Leisenzo pan, ...... aw! Mizogam a khua ZBC omna khua khempeuh pan ci pak ni... khua 21 pan a Jubilee siim dinga hong pai te Motor tung ah lasa ziahziah in Zomi Baptist Hall kong mai ah hong tung ziahziah uh a, vaidawnte in Niangtui leh Buhman nganhul tawh na muak in.......... . aw.... a nop dan.... a nop dan... Hong tung masasa a zintunna ding uh inntekte sehsa bangin zin kihawm ziah ziah a, nitaak nai 5 Jubilee honna hun ah kimu kik dingin Champhai sun nitum kuan ah ka kikhen phot uh a, a sawtlo in kikhop dak hong ginga a....... Rev. Gin Lam Thang, Executive Secretary leh a seppih siate hong kizui in mipi lam nga in hong tu dimdiam uh a, Rev. Suan Khan Thang, Rev. GK Nang, Rev. Dai Do Thang, Rev. Job Thawngno, .... etc. Rev. GK Nang in Pa min, Tapa min leh Kha Siangtho min tawh Jubilee a hon khit ciangin Jubilee program kipan pah a, a baan baanin hong kizom deudeu hi. Khangno te in Jubilee Meivaak hong lutpih uh a, meivak 25 mi 25 in hong tawi in biakinn sungah hong gual diamdiam uh a, tua meivak bek in innsung taan ahih manin lungsim hong phawng mahmah hi. Tua tak ciang HALLELUIJAH CHORUS (ZOKAM) in hong sa uh a, nu leh pa, pi leh pu, leh siate pawlkhat ZBC kipat tuung.... 1982 a thei kha ciangte khitui mualtuanglo omlo hi. Bangzah takin lungdam huai a, bangzah tak in lawp huai hiam! Job nuntakna bangin a kipatna a haksat hangin a tawpna lam gahpha a, thupi in, lungdam huai hi. HALLELUIJAH. Zomi Baptist Churches, Mizogam Makaipipa (President, ZBC) Upa JK Thang, Aizawl in vaidawnna thugen zawh in, khua tuamtuam pan lapawl siam takin kingai a, Rev. Suan Khan Thang in JUBILEE SOUVENIR mipi mai ah hong pulak a, CBA Lamka pan hong pai Executive Secretary Rev. Dr. Enn Za Sian in thuhilhna nei in, Rev. Dai Do Thang in thupha piakna tawh hunte khak a, hun masa, Tunkim Nitaak Kikhop a kizo hi mawk hi. Khe tawh lampaina, Motor tungah tuanna, leh zin suk zintoh gimna khempeuh kiphawk vetlo in Jubilee nuamtakin a zan khatna pan kizang hi. Zotaang bang nong dam maw sanggam ciin leh tuai, Lungdam maitai banzal ziatsuan kilen in Tung Sianmang hawmsiam Silver JubileeNun nuam lambang paak khawm ni. Tung Sianmang in hong siam henla,Selung vabang pil khangthak Zo vontawiteKilbang khang, guabang hing inSian sinthu philtangbang theh hanlung ciam leng e. (zop lai ding)Hau Za CinPhuitong Liim