Singapore map pen bak tawh kibang

Posted by: "Hau Za Cin" suante2002@yahoo.com suante2002
Sun May 25, 2008 7:41 pm (PDT)
Singapore map pen bak tawh kibang:Taiwan gamlim (map) pen kawlkai tawh kibang hi kici a, India map pen akpi tawh kibang hi kici hi. Singapore map pen bak tawh kibang hi (ka ci hi). Bak lenglai a nuai pan i ettoh tawh kibanga, a kha zaak diadua tawh kibang hi. I veilam ah Jurong om a, i taklam ah Changi Airport om in, a lu lamah Woodlands, a taw lam ah Zolia hoih nono te tawh Sea Food ka nekna uh.... he he... Bak lenglai bangin ngaihsunin, ei a nuai pan a to et bangin kingaihsun leng a taklam khut, eh, a kha dawn, sorry a khe hizaw hia... ah! Hong gen masa dih vo guai, Bak kha dawn a pen a khut maw, a khe? Ahih kei leh Bak thallup bangin ngaihsun zaw mai diam? Bak thallup in a kha zaak a, a taklam khut tawh Jurong len in, a veilam khut tawh Changi len a, Woodlands lukhap in, Sentosa a khe ngakna in nei hi ci leng theihnop zaw tam maw. A awm ah ganhing khawina (Zoological Garden) om a, a khe! ah kawlgam pan hong paite kimuhkhopna leh Zomi te in zong a lim zat mahmah uh Peninsula Plaza cih om a, a gil ah Little India kici om in Zomi Innkuan Singapore te kikhopna munpi hi. A veilam khut pen Zomi sung pan i muan mahmah UNO in zong Engineer hoih mahmah in a ciamteh uh Pa Thang leh a zi Nu Cherry te inn omna lam hi a, a taklam khut pen Zo suan khempeuh kipawlkhopna CCF makaipi Pa Michael Hmun Hei leh a zi Nu Betty Mang Huai te inn omna lam hi. Singapore a nop mahmah na khat pen English sang Singlish (Singapore English a cih pen uh) kilimzat zaw a, a pianpih Zopau sang kawlpau a siamzaw te adingin zong Singlish zat tangzang mahmah hi. Can or cannot? cih na zatsiam leh sun thapai in Singapore gamsung khempeuh na vak thei ding hi.... i.e. Singlish! Zomi Innkuan Taiwan pan khualzinsuk te in haksa a sak masak pen uh Hotel leh Restaurant ah Tissue Paper napkins a kikoih loh hi. I zatnop leh eima napkins ding kitawi pahpah kul se hi. Tua manin a pua lamah anne ding na hih leh napkins na tawi kisam hi. Ka phawk khat om (mi khat thugen ka zak). Khatvei mi khat a lawmte inn ah a hawh leh annek laitak tuak a, Inntekpa in lengla pa kiangah -Inntekpa: Lawm, ann hong nekpih ve.... Innteknu: Sikkeu kicing kei...Lenglapa: Ken sikkeu hong pua pah ing ei...Inntekpa: Pah lek aw! Tua dana ei leh ei i kisap ding te kitawipah kul ding ahi hi. Singapore ah Phalbi omlo cih pen i theihsa hi a, a om khempeuh in a ciapsa, a pai lai ding khempeuh in zong a theihpah ding thu hi. Voksa tampi kizuak napi vok lu a kizuak lohna khua hi citciat a, gam khat hi napi nikhata moto tawh a kivial vak zo gamlianpi hi. Malaysia ah parcel a kipuak dingte'n pal kha ahih manin mothak dingte a mel hoih maw, a lungsim hoih maw cih a kimuh masakna khua hi. Kawlpau i siam nop leh Zomi te kikhopna ah kikhop lel ding hi a, kawlte lak ah kihel sese a kul lohna khua hi. A free hi zaw mah lai! Piahtana vetlo. Aana huai vetlo hi lai. Ana sang aana a tamzawkna mun. Kawlgam kumpi in kawlpau sinsakna ding ci-a sum hong khak kulse lo a Zomi te missionary muanhuai taka sepna khua khat hi. Zomi te in Zomi zin leh leng kawl ann tawh a vaidawnna, sen ann tawh a zindo na, mikang ann leh vai ann cihte (a kamphat uh leh) a ciappih khakna khua hi. A free a dik ding ngapik gim leh a uih tuamtuam, a thuk tuamtuam a kingahna khua hi. Kisuanglah hetlo a khepeek peek de-da a phanat bulh guap guap theihna khua hi (khua lum ahih manin). Zomi tampi in nuntakna thak leh a hoihzaw a kisintheihna khua hi a, ciangtan omlo a sangpen a tun theihna pilna leh siamna zon theihna khua hi. Biakna leh Lai Siangtho suakta taka a kizuun theihna khua hi a, minam tuamtuam tawh kikholh siamna a kisin theihna khua hi. Pilna leh hauhna muh theihna khua hi a, siamna leh theihna behlap theihna khua ahi hi. Hau Za CinPhuitong Liim