"Tangthu hoih zong a tawpna om" cih mah bangin Asia Pacific gam kiim tenga tuallen hun zong hong bei hiaihiai ta ahih manin, mangpha khakna in lai tawm kong at hi.
Ni 577 khawng ka om sungin Nobel Prize ngah mi 7 ka muh lak pan 3 tawh 'Hello' ciin khut kilen in kiho kha ka hih manin keima mimal mahmah leh ka nasepna tawh kisai in mimal tuahphatna khat suak kasa hi. Tua bang kiho khakna in gah lianpi suang ding cih ahih loh hangin leitung mihing (numei sung pan piang ciatciat) lakah a kithei pha diakte ahih manun mimal angtanna khat in ka tuat hi. Ka office uh khaan 1na a om a, 1986 kum a Chemistry tawh Nobel Prize ngah Prof. Y. T. Lee khaan 3na ah a om man, Nobel Prize ngah khat tawh building khat ah nasem khawm ka hih man hi dingin ka um masa kei a, Topa hong geelsaksa hi dingin ka um zaw hi.
Ni hong suak dinga, ni hong tum dinga, zan ahih zawh ciangin kilum in, zingsang khua hong vak dinga, i tho dinga, ni hong suak kik dinga, tua zawh ciang tua bang mahin nih vei hong pai lai leh Taiwan pan lengkhia in MANGPHA ka khakta ding hi.
Ni tampi mah hih mun in ki om in, ki nitum a, khuasung kivak in lawm leh gual tawh kikhawl in, honuam zaideih khiang in hun ka zat hangin Nihon gam hawh leh SiangKang tuikulh hawh laite mah bangin ni nih ni thum sung bek tawh kibangin nuamtakin hun hong beiziau hi. Leitung ngeina - ut in ut kei ta leng hun tawh kalsuan in i tonkhop mah kisam a, ngai ta leng kitaamsuak lo dinga, it ta leeng kikho theilo ding hi. Nuntak i cih khatveivei ciang lungzuanhuai hi.
Zanhal in lawmte tawh "Kikhakna" ci-a Taipei a The Grand Hotel ah sun an (lunch) ka nek uh ciang hong lungzuan huai dektak phial hi. Hih Grand Hotel pen Taiwan a Hotel lian pen hi a, gamdang pan milian, kumpi te hong zin cianga a tunna uh hi. Taiwan a uk kumpi minthang Chiang Kai Shek zi in nuam a sak mahmahna Hotel hi a, apasal in gamdang diplomats, presidents, ministers and officials peuhmah ana zintunna, holimpihna leh annekpihna mun ahih manin a sung i lut ciangin nuamlua ahih manin a kizepna Dragon lim leh pak hoih nono te tawh maingap huailo phial tawh kibang hi. Ahi zongin a sung i lut ciang i muhna peuh a thupipen hi den tawh kibang hi. Tua manin hih Hotel pen a pua pan i et a athupi mah bangin a sung zong thupi takpi mah hi cih kum khat leh a lang Taipei ah ka om ciangin ka mu ban pan hi. Hamphatna khat hi in ka tuat hi. Topa hoih hi.
Hihlai ah, "Mizawng leh namniamte bek in a nek uh," a cih uh Betel nut, Kuhva, Pinglang khatvei zong ka nek khak loh hangin, Tan 10 ka simlai in sum Pek 5 man Kuhva (Betel nut) ka leisak zawh loh manin ka lawmnu in hong nuaksan a, Shillong ka om sung teng Khasi lawmte inn ah hawh peuhmah ciang duh in duhta kei leng Kuhva nekkhat, haikhat neksak kisam, amau a lengla dona uh hi cih khawng lawmte kiangah ka gen ngam tuan kei hi.
Leitung inn khan sangpen Taipei 101 (509 m) tungpan khuadak theiin, Paris Tower (320 m) sanga sangzaw Tokyo Tower (333 m) tungah Zomi filmstar minthang tawh maan kizaih thei in, kong a neilo HongKong ah Zomi sunga i mimuan leh i misuante, i mi minthangte tawh kikhawl thei ka hih manin hih Asia-Pacific kim a tomvei laitual lenna a manpha khat hi in ka tuat hi. "Pasian in leivui panin mizawngte lamto in, ninphual panin domto a... uliante tawh a kikhawlsak hi" (Late 113: 7,8). Zomi sunga i mimuan leh suante tawh kikholh khak pen nuam kasa a, manpha sa in, angtang ka kisa hi.
Singdang Cingno te tawh mangpha kikhak thei in, amau zong tang bang dam a nikhat ni ciang kimuh kik ding lametna pulak uh hi. Koi ah i hei zong, koi ah i tualbual zong lawm ding tampi kimu nailo a, it leh ngaih ding tampi tawh kituakkha nailo hi dingin leitung ka lamen hi. I tuaksa, i pelhsa, i paisan sa leh i khengsa te sangin i mailama omlai te nakpi in limci zaw dinga, i theihsa i kholhpihsa te mah bangin ithuai, ngaihhuai leh thunuam dingin ka lamen hi. Bangbang ahi zongin i khanpih, i sisan kibatpih, i pianpih leh duh leh deih kibangsate kaana lawm hoih leh gual hoih omlo hi ding hiam ka cih hun om hi. Pianna gam a kilamdana, nek leh dawn kidangin, khanna leh duh leh deih a kibatloh ciang nakpi in kilawmta le'hang zong khangluite in - zia leh tong kitheisa kaan omlo - a cih mah uh hong tukik hiam cih hun om.
"Inn sanga nuamzaw omlo, inn mah nuam penpen" (There is no place like home, Home sweet Home") cih mah leitung hawl masa, a khang masa mikangte in zong na ci ngeungau sam uh hi.
Ka research zawh thu ka gelhna research report (paper) ka gelh khit ciang, 'mission accomplished' (phuaisiat zota) hi dinga, buh kung hong gai in, hong pak dinga, zing daingo nuai ah hong gah in, sun nisa in hong emmin dinga, agah lawh ding bek ka ngakta ding hi (publication). Koi koi ah om leng agah kilo theita ding ahih manin, "The bodyguard from Beijing" film mah bangin ka ciahsan kik ding hi. Hih banga kei seppih a kisap kik mateng.... heina peuhah,,, tangbang dam ni!
Thupi kasak mahmah Taipei kongzing leh lamzikpi te, moto hoih nono leh kizemna tuamtuam kipelh zangzangte, ka tuncil laia ka omna ding inn hong laksak uh asiangtho mahmah dante khawng - a hoihna uh kiam hituan kei mah leh 'mangpha' cih taak mai ding ahih manin a hoihna uh keima ngaihsutna ah kibang nawnlo hiam ka ci phial hi. A taktak in bel ahoihna uh a kibang den hi a, 'hoihna siatna i cih khawng a ente etdan ah kinga' ahih dan ka phawk sem hi. I Topa Zeisu zong amah nungzui teekteek amuh dan uh na kibanglo hi. Pawlkhat in Sia in mu uh a, pawlkhat in Pasian ahihna mu in, pawlkhat in galte bangin mu hi.....
Taiwan gam mihing 23 million tenna mangpha ka khak ciangin Taipei a mihing 3 million omte zong mangpha a khak khawm ka hi cihna hi a, khuapih ka neih lak pan a tawm hetlo in ka tuat hi. Avekpi un lawm hilo na pi uh akitawng, a kilai, cih bang ka thei kei hi. Mite hoihdan, mite thusiam dan, mite thukhual dan, pau na tawm a ging ngawh a pau laak laak lo ahih dan uh etteh huai kasa hi.
Zeisu in Vok hon ken ah a hawlkhiat a, a vekpi vua asih khit pen supna lianpi hiding cih a ngaihsutna uh pan meetna a ngah Christian 3% bek a om hangin gammial a khualdan uh, a phawk dan uh leh Pasian nasep a lawp dan uh ka muh ciangin hihzahta a sum leh pai hau a, nek leh dawn kicinga, nuamsa taka nungta thei uh cih pen a lamgdang hilo hi. Little America ci leeng kikhial in ka um kei hi. A vanzatte uh, a nuntakzia uh Japante tawh kibang khin phial a, tua bek hilo in Japante etteh pen in nei uh hi - film, culture, fashion, lifestyle ...
Gennop tam, genkhin zo paklo ding - a toma gen pak in, nuam mahmah, ami te mi hoih mahmah, a gam neu mahmah taleh gamliante zong kuamah engtuan lo uh, kumpi kiukna limtakin zuiin thumang uh, nek leh dawn leh kizepna thupi sim uh, Christian 3% bek om ahi zong biakna tuamtuam zahtak uh.
Rev. Khup Za Go in Zomite adinga a lunggulh tawntung - PAU khat, LAI khat, MINAM MIN khat zangkhawm uh hi.
Ebenezer!
Hau Za Cin
Phuitong Liim
No comments:
Post a Comment