Bye Bye Hong Kong
English laiat siam minthang khat in, "Goodbye is the hardest word to say" na ci hi. Mangpha kikhak pen Zomi te in zong hamsa i sak penpen khat ahi hi. Ngabeng Pawl lasa (Fishers Quartet) te in zong, "Mangpha kikhak nawn kei ni vantung i tun ciang" ciin siamtak in awi daldal uh hi. Zomi lasiam Lia Cingsan in,
Eite kikhen nangin
Hun leh ni hong naita,
Eite kikhen ciangin,
Lungsim dahna piang.
Khitui luanga kikhenna hi leitungah,
Lungkhamna meipi zing nuai ah
Khut tawh hong len ding I Topa in,
I kimuh kik matengin (Mangpha man ni),
A tawntung gungal khat ah
Vankhuapi tualnuam ah,
A tung masa kingak ni,
Hinna gun luanna, singgah khum kilawhna
Aw... tua mun ah..
ciin lunglen huaitak in na sa a, Khoppi tawpni, zin ciahni a la kisa tengteng lakpan a khasiat huai penpen leh a lunglen huai penpen ahi hi. A dik penpen, a kilawm penpen zong hisi. Leitung pen lungdamna i cihzong lungzuanna khawng hi zel....Ahi zongin,
Tu in kikhen hangin,
Nung ciang kimu kik ding,
Thangvan khuapi tual ah
Kikhen nawnlo ding,
ciin lametna hong pia kik pak a, a tawptawpna ah 'nothing last forever' cih bangin, 'leitungah a kip bangmah omlo' cih bangin, ut in ut kei leeng, a hun in hong paipih veve ding ahihna tawh hong khup veve hi.
Mangpha man ni, mangpha
Khenta ni, khenta ni,
Omkhawm lai leng nuam lai,
Hunten hong khengta..
Lungzuang takin ciai guai, lungzuanna a tuamtuam tawh!!
Tuesday, September 25, 2007: Zan ni mah bangin lawmte in class nei uh a, keibek ka vak ni hi kik hi. Kei bek ka vakni bek hilo in, Taipei zuana ka ciah kik ni ding hi a, zingsang breakfast nekkhop pen LTS lawmte tawh ka kimuh tawp ding hita hi. Amau zong lawp lo, kei zong lawplo, amau lah lungleng, kei lah lungleng khol.... takpi in ah... bangbang ahi zongin life must go on....
First step: Zingsang dangte mah bangin Sianu in zingniang dawn dingin hong zawn a, ka paito uh hi. Ka gil uh a vah phit phet ciangin khut kilen in, mangpha ka kikhak uh a, amau class lam zuan, ken khuasung lam zuan, nitak ciang vanlengtual ah hong kha ding ci uh, tua mateng, a kikhen phot hi ding... huiha... zingsang ankham tung ding buangin khut tha khauh kei tak ei, kikhutlet zolo, mangpha khakna khutlet pen a zaw niangnuang ngeina mah hi e.....
Ka van teng la, Sia Dal Mang leh Sianu in innkongah Bus stop ah hong khak khit uh ciang pai suk, nitak vanleng nai 8:25PM a lengding ka lap nak leh tuama sung teng HK khuasung hawlna ding hun nei lai... the last hour... a tawpna taktak, a mangpha khakna hita.... khuasung meileng tuanna ding lam zuan, Shatin pan zanni a ka vak lohna lam ah pai, Tsuen Wan tan tung, tua ah vak khia in, bazar peuh ah vak kawikawi, kileh kik in, Lai King pan Airport kianga Tung Chung station tan pai in, innkhan sangpipi leh sight seeing view tuamtuam ah khuadak... tua pan kileh kik in, Disneyland te pelh ah, Kowloon ah kum, [Kowloon pen Shillong omlai ka phawkthu a masa pen ah ka gen khinta hi], tua pan Hong Kong station ah ka kum leuleu hi.
This is the real Hong Kong: Hong Kong station pen Hong Kong taktak hi ka ci hi. A paam ah khetawh pai phei leeng Central Hong Kong kici om a, tua kiim teng pen innsang pipi, International Finance Centre 2 Building, AIG buidling, HSBC Hq. Building, Bank of China building, etc. omna hi a, summet bawlna innpi taktakte omna ahi hi. Inn lah sang, a mun lah siangtho, hih san ka tun, mite ka muh ciangin hauh ka ut hi! Tuma khempeuh in hauh ka ut ngei kei hi. Ahi zongin tuamun ka muh in, hauh ka ut hi. HK ka zinna ah ka lungsim hong lawng penpen hun ahih ding ka um hi...
Tua pan ciahto in, Admiralty ah, Mong Kok ah khawlto in lunch ka ne a, ka tunni a ka vak masakna uh Shanghai Street vanzuakna te ka zonkik leh ka mu kei a, ngasano zuakna leh um zuakna ka mu hi. Um pen ka nu in tuibukthei ding leh sam sathau buk dingin a zat zel hi a, ka inn vua vokthau leh vom thau khawng, ngal thau khawng sam nuh dinga umneu sunga ka thun thun hunte ka mitkha ah hong kilang hi. Khanglui hun ah nungak pasal nei peuhmah in, sathau biing khat a ken loh phamawh ahih thu khawng ka phawk a, Zomi leh Sente in kibatna pawlpawl zong nei kha i hi tam ka ci hi.
The Chinese University of Hong Kong ah Sia Pau Lian Mang tawh: Ka ciahna ding pen a nai bekbek in sam ta, a nai tawm hiai hiai ahih manin zanni a ka gelna sa bang un Sia P L Mangno sangkahna Chungchi College leh tua college anei, The Chinese Univ of HK pen hawl dingin Sia Mangno omna lam ka zuan a, University Station ah meileng pan ka tuak khiat ciangin Vaphual singkeu dawn tuang biaubuau mah banga etngalh ah hong na dawn siapa ka mupah hi.
Amau College lam zuan in ka pai toh laitak un a khanglama Football Ground om pen kawk a, "hia pen college ground hi in, HK national football team te zong khatveivei hong kimawl zel" ciin hong gen a, maikum Olymics 2008 ciang zong qualifying pawlkhat hihsan ah kimawl maithei hi hong cih ciangin, tua Univ. thupi ding dan ka tuatsiam pah hi. Zogam ah tuabang i nei pakta tam maw? Cikciang, cikciang mah cici lai phot ding i hiam ....
Ama room ah: Lai Siangtho sangkahte omna room ah ka lutto uh a, ama room pen kawlgam pan a pai mi 3 na om hi. Zanni a maan kilakte kisuang nailo a, a lupna gei ah a 'ngaihno' maan thum khawng kisuang zihziah hi. A laisim ciang a etphei zel ding ahih manin lai a siam mahmah pen 'a hang' hoih mahmah hi! Sia Lianpi' Taang' Lungtup CD sungah, "It luat ngaihno, hong en en nuam ing na sakmel...." cih la limtak in ngai ngei hi kha ding hi, theisam keng...
Ama room pan University campus sungteng ka hawl toh khit uh ciang, a gate ah "The Chinese University of Hong Kong" sign board tawh maan kizaih in, "nungakte tuibualna, a sak lam niangtui sai pan kimu thei" a cihna gei ah ka ciahsuk uh a, nitaak lam nikaai luata ahih manin ama room zong pha kik man nawnlo in vanlengtual lam zuan dingin ka meileng khawlna ka zuansuak uh hi. Univ. KCR Station pan Shatin Bus station ah Sia Lianpi tawh kituah in, tua pan City Bus a hat mahmahte tawh vanlengtual lam ka zuansuak uh hi. Nai khat phial ka taai zawh uh ciang vanleng tual tungin, checkin ka lut khit ciang, "the last photograph for this visit" ciin Sia Mangno thusiamna tawh maan khatvei kizaih kik in, immigration lam ah ka lutsuak a, amau zong inn lam zuanin hong ciahsan uh hi.
Ka kikhen zawh uh nai nih sungin ka omna Taipei Thai Airways tawh ka tungkik a, amau nungak enkawmkawm in a pai uh leh keisang tunghakzaw ding uh hi... hehe....
Thukhupna:
Airport ah Sia Lianpi leh Sia Dal Khan Mang in hong dawna, maitai takin ka ki 'nohset' uh hi. Sia Lianpi leh Sia Pau Lian Mang in hong kha uh a, lungdam, lungkim takin ka kikhen uh hi, "Nikhat ni ciang kimu kik dingin" (Sia Mangno cih dan tak leh... 'mopawi ciang'....) .. he he...
Sianu Breakfast leh niangtui, Sia Dal Mang leh Sia Lianpi lunch leh dinner, Sia PL Mangno hong Zolai kuppihte ka ngawih mah mah ding hi.
I kikholhna te khempeuh, nong kikholhpihna te khempeuh uh nakpi in lungdam ing. Na vekpi un Topa na maban ciat uh cidam in hong gualzawhpih in, Ama nasem dingin a 'hiamzaw semin, muibunzaw semin' hong zang henla, Pasian leh minam minthangsak Zomi galhangte hita un.
It leh ngaih na nusiatte khempeuh uh zong Topa pha in cidam lungnuamin na kepsak ding hi cih ka thungetna leh ka lametna, ka thungetna ah kong phawk dingte hi.
Itna, ngaihna, phawkna, lungdamna leh zahtakna lianpi tawh,
Note hanga a hampha,
Hau Za Cin
Phuitong Liim
Taipei, Taiwan
October 8, 2007
NB: Ciamnuih, kimaingapna kammal lak ah genkhialh, genval a om khak leh hong maisak un.
..... KIMUH KIK MATENG HONG KONG MANGPHA ....
No comments:
Post a Comment