Kitenna maan kiten ma-a na lakte uh nong suaksak masak a kimuh khit ciang tu in kitenna taktaka maante kimu a, monu lah melhoih, nang lah kilawm, kituak-kilawm hilhial uh ciai, kong lungdampih hi. Tun bel Ngaih Anglai Ah hi takpi ta ei maw! Zo Phualva kop bang maciang na suanpih ding na angkawi lianu tawh vondeih zatam tawiin tangbang dam Sian in hong siam hen aw.
Khaih, thutak bekbek zong papi vai lua ven... tawmkhat ciak leeng hilo dia? Akingah diam?
Tua ni, Changi Airport, Singapore na tun laitakin, immigration check na zawh ciang na pusuahna ding kongkhak nambat na gen laitakin Sia Dongbawi, London cih dan hi leh na dip, lungtang kisai pen bangzah a pha dia, 210 rpm pawl mah ahi diam? Gate pua ah na tuanna ding moto tawh hong dawn na 'Cingno' lungtang kisai zah zong e.... muh lah munuam, ngaklah la ngaklah... ahih hang... nervous, maizum sim... huuuiiiii..... kongkhak na pusuah ciang.... internet pan na ngah a maan leh a tak na tehkak ciang a maan sang in a takah a zah za tampi in hoihzaw cih na tel tak ciang... hmmmmm... 'Zogam tangval taktak ka hi'... cih lungsim tawh nui hiuhiau kawma hong dawn 'ngaihno' khut leen nuam a na khut na sawk phei diat duat ciang.... a kikal a electric current pai pen..... na kikhut let uh ciang na khut bek uh hilo in... hmmm... a ban bel a feeling kha te bekin theita inteh... na kiang vua na 'Cingno' tawh hong dawnte zong na mangngilh pak uh minit khat hun sung pen a nuam penpen hun masa (leitung pianzawh) ahih ding ka lamen hi... tua laitak leh a tawp dongin, 'leitung ah nungak khat bek om hi.....'
Khut kilen hialhial a na tuanna ding moto hong tawi uh lamzuana na pai uh ciang bang na kiho masa pen vua leh... Singapore Airport pan khuapi sung lam zuana na taiphei uh ciang 'romance' pen a mang ngeinawnlo ding memory ah omta dingin ka lamen a, Singapore nisa nuai ah lukhu khat khu khawma, 'Cingno in lukhu tawh na pumpi nisa hong liah a na vakkhawm hial hial ding uh aw.... Sakhi nupa Lotul khungah nitum kuana hong taa khia hial hial tawh kibang dinga... Singapore khuapi etlawm sak si in cia maw... na kituakpih Sente leh minam khempeuh in 'hihte geel bel hampha ei' hong ci ngeel ding uh hiven... (gen khia ngam uh hi leh).
Khuapi sung mun hoih tuamtuam leh etnuam kilawm tuamtuam en a na vakna te uh (na vak khak uh leh), a bawlte kisik kei si un cia maw... Zolia leh Taang khavang mubang kingai nunuam ngabang lengkhawmna dingin..
A 'ni' a tun ciang, na mai ah hong kipaipih a, a mit tangtaka na etpak ngamloh laite, a melhoih san hilhial puanngo kilawm tak tawh kikhuh a kuamah in a lemnailoh meel na muhte, a khut na let a zungbulh na bulhsak hunte, kikhahkik ding ut nawnlo zah donga na pomcip ut hunte in tuni in 'tua hun' cih hi ta a.... history hita hi. Hunlui suakta a, ahi zongin lungsim ah cikmah ciangin lui thei dingin kong upsak kei hi.
Mi nih ki itna hangin mipi hi zah biakinn ah hong paikhawm a, nasep ding tampi nusia in sum leh pai tampi beiin hong uap a, mun gamla pi ah om tampi te in lungsim tawh ong phawk in hun nuam na zat ding uh hong deihsak cih ciang ITNA pen a thupi hi mawk mah ei maw! Mi nih ki itna hangin lungdamna om a, mi nih ki itna hangin maitaina om hi. Mi nih ki itna hangin gualnopna om a, mi nih ki itna hangin pawi (celbration) om hi. Mi nih ki itna hangin kimeltheihna tampi pianga, mi nih ki itna hangin cikmah a kimu ngeilo kigawm in pumkhat suak a, sihna lo buangin a khen nawnlo dingin Nupa kop suak uh hi. Mi nih ki itna thupi a, mi nih ki itna zahtak huai hi. Mi nih a ki itte Topa Pasian in thupha pia henla, khansawt Zotang bang damin, vondeih zatam hong tawita hen.
(Lungdampih man hi e, gen khial a om leh hong maisak un).
No comments:
Post a Comment