Tung sunni tum theilo ding sa'ng! Tungsolkha hong suak ngeilo ding sa'ng!! Nunnop ngabang i len ni, honuam zaideih i khian ni, lungtuak ngabang i len ni. Lungmawl lia leh taang kopin i lengkhawm, kumsawt zong ngilh loh ding nuihciam i lel. Zalmang hiam ci'ng, tak sinthu hi. Taka sinthu zil ding sa'ng zanciang ka zalmang bang..... La kik thei hi leng maw, la kik thei zen leng.... sam kik thei hi leeeeeng? Ngaita leng sul heilo dia, sam ta leng nungkiklo ding. Hun in hong kheng a, delh ta leng huihnung delh bang, tai ta leng hong kheng semsem. Lengtong Pauno mah pil sa'ng:
Hih bang lianga zuanna ding,
Bang ding mel kong mu se hiam....
Biakinn pan inn lam zuan a ciah, meileng tutna 2 a awng kei leh ding zaw ding cih kigen se lo-a kumpite thukhun zah a zuih diam lai khawng. Kei lam sang nang lampan huih hong nungzaw henla, kei huih diik nunungzaw hi leng cih ka ngaihsutna khawng.... kong gen tuanloh ha'ng.... Na kalsuan, na khe khai leh na sam leng siausiaute... ngilh lo ka hi aw! LUN 4 leh ZA 2 te annekna ding innsung i lut ciang, NGAIH ANGLAI AH lah ahi lo, "Cingno leh Thangno te lah na hi hialhial uh a..." khawng a cih uh, ciammuih ahih hang, video kizaih hi kha zen leh kuaman a en nuam kei zong a encimlo ding mittang 2 leitungah om sam hi ven maw!
Phualva kop banga Tokyo Tower tung vum ah i tuanlai, a sangna pen pan zong kuamah kilensanlo a i kah i tuak dante, sakhi gamta banga khuapi lamdung tengah i kizuih hialhial laite, cik ciang taang lungmawl in ka ngilh thei tam?
Ngaih aw hong leng in la,
Ka nen ah hong khawl aw,
Taang kei zuan nuamtuam dingin,
Na mel hong mu nuam veng.
- Lengtong Pauno
ci nuam phial ing. Ahi zongin mel kimuh kik ding sa'ng, lenna mual leh guamte kidang semin, kigamla zaw ding a, hun leh ni tamzaw in hong hal kha ding cih ka lau hi. Nuntakna ei khut ah omlo a, na khempeuh leh lei leh van leh a sunga om khempeuh a bawlpa khut ah om hizaw hiven. 'Upna ankam tangcia' beek a nei hizen leng maw... (Fuji mual pan kipan khin suk nuam siing).
Japan ah zinling mun lua, zinling a tuak tunga a lauhluat dan ka theih ciang, tuani, Tokyo Tower ka kah laitak un, a lauhuai kholloin zin hong liing leh bangciin ka om tam uh? he he.. zinling khempeuh a lauh nawnloh dante ka zak ciang 'a lauhuai mello zinling' ta mah leh Ngaih Anglai ahilo kei anglai ah hong belh tuan peuhmah lo ding hi-a.... khawng ciin ka ngaihsutna ka kholsan hi. Khatveivei bek hilo, hun tamzaw ah leitung pen Laituite cihdan in 'ka upmawh na bang kei!'
A nop dan ding ken theilo, a muh nop ding ken theilo, aman thei. Tua manin meileng tutna gual masa pen ah tukhawm in Yokohama lamah nitum ding nungngat heeihaai in Odaiba lam manawh in, Narita Airport pan vangleng lengkhiate kimu ziaiziai kawm in Fuji TV Station kigalmuh ciaiciai dongin ka taiphei uh a, leitung khempeuh suangmanpha tawh kizem hiam ka ci hi. Rainbow Bridge tunga meivak kithuahte tangsilsial ta a, "tee diamdiam ding mi siangte aksi bang taang ding.." cih la bangin tee diamdiam uh hi. Meileng hong tai zazaa a, tua leisaupi Sakhituihup banga kibawl a pelh khit ciangin a gallam ah station tawpna kitunga, tua pan kilehkik in ka kipatna mah ka tungkik uh hi. Sia Do Khup om hi leh video series 7na ding beek in hong zaih dingin ka ngen ding hi. Ka nget zoh kei leh zong ka kun dinga, ka kut zawh kei leh zong ka thuum lai ding hi. Ei zong video sungah, "Nuam ei, nuam ei" i ci nuam keei sam veleh! Hilo maw?
An lah lim, thu lah lim, Cingno lah maitai, a maitai lah etlawm. A phat zong hi keng, a hihna gen sawm ka hizaw hi (alang zong ka gensiam loh hang). Tua ni bel mikangpau a Lunch a cih gemgam uh, Zomi ten sun an i cih ziau pen, hi thei hileh zing pan nitak dong kine leh zong phamawh asa lo hi mai ing. Ka kianga tu khuva nunnem in bel bangci'n a ngaihsun tam, dong ngam sam ke'ng.
Meh kisuah pen kawlgam a omte in kawlte cihdan zuia 'inntekte in lengla te deihsakna aa apiak uh' hi cih ka zinpi ah ka theihsa ahih manin 'ama'n' ama kuangsunga sa leh anteh limci nono te hong suah a, ka kuangah hong piaktak ciang inntek siamtakin hong zindo a, deihsakna leh itna hong lakin meh hong suah hi cih ka theisiamta a, lungdam luat mana nuih ging lela ding lah hong hisamlo ahih manin, a zak khom in 'lungdam' ka ci hiat hi. Tua awging a zak ciang hong dakto a, kei lam hong hek hiau in a nuihciau (smile) pen... aw.... ka khuak hatlo hiam, ka mit hoih lo hiam kacih leh tuni tanin ka khuakin na ciamtehsak e, ka mit-in a lim hong laklak lai, lungdam siing..... Mikang laiat siam minthang John Keats in, "A thing of beauty is a joy forever" acih pen a taka theikha hizen veng. "Na hoih khat i muh khakin i khantawn hong lungdamsak" hi takpi e.
Meileng letmat (ticket) lei ding sim a kei buaipih ngai hetlo a aman hong hihsak ziauziau khawng ka muh ciang ka zinma pek a, 'ka Japanpau sin zota ing ei' ci-a message hong tung vangvang khawng ka phawk hi. A kamsiam takpi banga,"Japan lai ah 'e' a lehlam a om na muhsim in hong phawk in aw" ka cihciang ka kamsiam tawp ka suah hi cih theisiama hong paktatsak a hong nuihsan ciauciau khawng.... Oh! my God, she is so cute!! (Ka english theih sunsun khawng hong lengkhia liangta ei).
A bag san hilhial nisa in a kap cianga tee sialsial ka muh ciang themkhat bek lawngkha nuam siing ciin meileng khawlna ka lut ding uh ciang, "koi na bag kong tawisak thei diam?" ka cih buat khak mah leh, ka aw liing zong a theilo kineih in, "a hang" theisiam lua ahih manin hong tawisak a, ka lungdam dan ka genzo kei hi. Tua sanga ka lungdam zawkna bel zinling lah hi samlo, ka khutliing in ka kim ka kianga mite ka khawnkhak loh mahmah hi. Praise the Lord ci nuam liang ing. Japante kinawk khak ding, kikhawnkhak ding khawng kidawm mahmah uh ahih manin ka pumpi tunga zinlingin bangmah siatna a tutloh manin ka nuam diak hi.
Cingno mai taang ta leh mundang khuazingta ahih manin cimlo pipi in ciah kul a, amah zingciang sangkah ding ahih manin a tawlngak kul hi. "Japan ah ni a toi penpen ni" (The shortest day in Japan) ka ci mai hi. What to do?
Ahi zongin ka telloh khat om. Bangci'n hong khakhia hiam cih hi. Jerusalem ah sun tangpi a thakhat thu a zin hong linga, biakinn sung kidalna puanpi kiphelkham a, khua a mialcip bangin ka mit in khua hong mulo citciat ahih man hi. Sawltak Pawl Damascus lampi ah meivak in a kaptuk khit bang a ka khuamuhna ka ngah kik tak ciang ka khuadak leh, ka pusuahna ding meileng gate pen khial ka hi cih ka phawk a, ka khialh thaman ka piak khit ciang ka lupna tungah "tu sun ka tuah thute ka tak mah hiam, ka mang hizaw hiam" ciin ka ngaihsut leh lusu suak ka hidiam, Nu Haukhek in, "Cinpu tuni na vanleng nai bangzah a?" hong cih ciangin ka lu ka phot vat leh zingsang na hita a, breakfast ne dingin ka thoto a, ihmut nuamtak a tawldam ka na hi gige hi. Khoppi tawpni mah banga, ciah ding pen thadah pian hi.... (frankly speaking)...
Vanleng tual pan sumnen pawlkhat phone bawmsung ah khia in, "tun a lengkhia ding hita ung...." ka cih leh,"......cidam.... mangpha maw....," Nu ei!.... ka lu hong khang muaimuai a... ka kiim ka kiangate muhnopte ka mu nuam nawn kei a, a etlohna lam uh ka mu nuamzawta a... sawtpi ka muhnop kikhel tuanlo a... "vanleng sung lut theih ta" cih hong kipulak a ......... Nu ei!....Nu ei!.... na tei ei......
BSc ka simlai a, HG Wells laigelh, "The Time Machine" bang a taksuak hi leh ka ut saan hi. "Hunlui ah khualzin kik thei ding" cih thu peuhmah ataka hithei ding a thei na om uh leh hong hilh un, hehpihtakin, hehpihtakin.... sau gen nawn dah ni... i naptolh...
No comments:
Post a Comment