Khangno Retreat ah:
Ko, khangnote in kumlui a mah bangin Evergreen Fellowship Retreat 2007 pen May 18-20 sung nei dingin ka hanciam uh hi. Tun a ding khia ding hi ta ing.
Amun: Shihmen Shan, Taoyuan, Taiwan (http://www.cyh.org.tw/)
Ahun: May 18-20, 2007
Thulu: Sowing, Reaping, Keeping.
Thugen: Tim Gillette.
Lutman: NTD 2000 (approx. 62 USD = 2750 INR) per head.
Hih khangno kikholhkhop kikna hun ah Christian khangno khat adingin bangci gamtat ding, bangci upna kipsak den ding, bangci mite itna lak thei ding, bangci mite Pasian thu hilh thei ding, bangci i upna mite theisak ding, bangci thu umlo te lakah khuavak bang hi ding, etc... cihte a tuamtuam kigen khawm ding, kisin khawm ding hi. Pianthakna thu hilo in nuntakpih dan ding thu kigenzaw ding, kikum khawm zaw ding hi ung.
I theihsa mah bangin hih gam pen Christian tam lohna gam hi a, nipikal simin biakinn ah Pasian thu a za nuam peuhpeuh a hong kikhawm om den hi. Hih retreat ah zong Pasian thu um nailo seh 3 suah seh 1 peuhmah hong kihel kik ding in kilamen hi. Kha 3 hal in ka biakinn uh Grace Baptist Church, Taipei in thu um thakte tuiphumna hun nei zel a, tuiphum thak ding mi om den hi. Pasian thu um khang, kibehlap cihna hi. Ahi zongin a mihing tam tawh teh in thu um kibehlapna niam hi.
Tua ahih manin Pasian a thei nuam te, a theisa te, a makaih ding te, a thei nailo a theisak dingte, leh a dang khempeuh zong upna ah i sanggam ahi eite in Topa maiah phawk leeng ciin kong zasak hi. Na thungetna ah hong phawk un. Khangno 30 kiim pha dingin kilamen hi.
Zomi te in kum 100 beisa hun a i tuak, i theih, i up thu pen tu in a thei panpan, a thei nailo om lai hi cih phawk ni. Anlak ding tam, a la ding tawm!
Round the clock Prayer Chain: Retreat neih hun sung khempeuh, tunkim hun pan ciahkhiat ma nai khat tan pen thungen kilaih ngekngek in mi khat in naikhat ta tawlnga lo in thungen hi. Tua bangin khat hun a bei ciangin a zom a in hong laih in kilaih ngekngek a, ni 3 sung pen hunzatna mun ah thunget kitatsat lo hi.
Sowing, Reaping, Keeping: Retreat thulu dingin Tuhin, Atin, Nuntakpihin cih kizang hi.
John 4 na sungah Samaria numei leh Jesuh Tuikhuk gei ah a kihona pan in tua numei in suahtakna a ngah bek hi lo in mi kiangah a tangko kawikawi bangin Pasian thu zong i tangko ding hi cih tawh kigen khawm hi.
[A lamdang mahmah kasak khat pen Zomi te zatngei banga thugen te in thugen in mipi in ngai cih hiden lo in mipi te mi 8 ta in pawl kikhen in tua thugenpa thugen kikum in, ei tuak thutek gen khawm zel cih bang hi. Eima ngaihsutna zong kizang cihna hi.]
Lasakna: La pen kilim sak mahmah hi. Worship time cih pen kilim zata, tulai khanlawhna la vive kisa hi. Worship time beina ding lam, hun kipat ding ciangin biakna la (Hymns) kisa a, tualo teng pen khanlawhna la, leh phatna leh pahtawina la (praise and worship songs) vive kizang hi.
Lungdamna thu tangko dan: Gospel i cih lungdamna thu pen mi kiangah mawk gen a mi lungsim bun ding hilo ahih manin Pasian itna thu i gen ding ciangin - a mi, a thu, a gen dan (Masses, Message, Method) - tua teng kisam hi. Bangmi, koi ah teng, bangsem, bang lunglut cih theih kisam a; Nang bangthu gen nuam na hiam, bangthu tawh Gospel gen thei ding na hiam, Jesu thu tawh panpah lecin tello ding uh hi; Bangci gen lecin mite a lunglut in telsiam ding hiam cihte kisam hi kici hi.
[Hih te a kigenna pen mihing a tamzaw Pasian thu thei nailo leh za nailo ahih manin Gospel theihsak ding dan tulai khangno te in lim ngaihsut mahmah uh hi.]
Tua ahih manin amau ngeina zuiin mite theihsiam dingin Pasian thu genpih siam in, mimal kisap leh panpih ngaih dan en kawmkawm in Pasian hoihna genpih in, na thugenna khat peuh pan mite in Pasian hoihna leh ithuai ahihna a theih takpi nadingin damdam in genpih in cihte kisin hi. Kigen khawm hi.
Cockcroach Theology: Hih pen Inlawi lungsim leh nuntakzia tawh kibang thuzuihna hi kici hi. Inlawi pen meivak ah koih leng nuamsalo, om theilo in khuazingna lam zuanin kihemkhia, taimang pah, a mialsung ah lut pah hi kici hi. Tua ahih manin tuabang hilo in khuavak tate bangin i nungta dinga, mite zong tuabanga pholak hilo in kidawmtak, siamtakin Pasian thu i hilh ding hi cih - a kisam mahmah thunih (eima nuntak zia leh mi kiangah gen kik zia) kisin, kigen khawm hi.
Mary Jane, Missionary to China, kum 77 phata tangthu tawm: A pian ding lai in Doctor te in mihing ngeina banglo ding hi, a nu gilsung pan suak kei leh amah hampha zaw ding hi kici hi. A nu in phallo a, a hi bangbangin ka kem ding hi ciin susia nuamlo in suaksak hi. Doctor te gen bangin mingeina banglo in, Zomi te in 'mi phalo' ci hiam, mibanglo i cihte hong suak hi. Dingtang theilo, pau awk puatpuat, kawi langlangin om a, pau ding hileh kisat thapai hi kici hi. Nungkal May 2007 kha bulin China pan Taiwan ah ong zin a, amah tu in kum 77 pha ta hi.
Retreat thugenpa Tim Gillette in "Amah tawh ankuang khatvei um khawm kha ka hih manin hampha ka kisa hi" a cih zaha thupi hi.
Kum 14 a phak in China gamah missionary sem nuam ing ciin kipia a, ahi zongin kum 70 a phak kum in tua a sawmna gam tung pan hi, tun kum 7 semta in amah kum 77 pha hi. Ka sihtan ka sem ding hi ci hi, kici hi. Ken mu kha kei ing. Taiwan ah kal khat a tam zawh ciang a sepna China gamah kik kik ta hi.
Moses banga pau awk, pau awk bek hilo, mi ngeina hilo... mihing ngeina banga zi leh pasal nei thei ding zong hih tuak lo hi. Ahi zongin aman a gen bang hiam cih leh, "Na paulap bang hiam?" (What is the excuse?") ci hi ci hi.
Pasian thu gen thei kei ing na cih pen, "Na.... nan.. na naa.. pa.... paaa.. pauu.... lap ba... ba... ba... bang hiii... hi.. iii.... hiam?" ciin nai khat sunga kammal kician tak 30 zong a gen theilo piteek in nang hong hopih siousiou hi, "Na paulap bang hiam?" ..... bangci'n na dawng dinga?
"What is the excuse?"
Lawptaka kuan, lungdam tak nuamtak in hun kizanga, ngaihsut kikkik ding thu lian pipi tawh innlam kiciah kik hi.
Hih, Nazareth mi kici pa, hizaha leitungin a buaipih banghang hipeuhmah ding hiam cih na ngaihsun ngei na? Topa in thupha hong pia ciat ta hen.
Hau Za Cin
Phuitong Liim
No comments:
Post a Comment