Pasian in leitung a bawl laiin bawl masak nei a, bawl nunung nei in, a upa om a, a naupang om hi. Tua pen tuni dongin a kizom paisuak hi a, na khempeuh ah kibang, vai khempeuh kibang, thu khempeuh kibang cih om lo hi mawk hi. A hoihpen suakta a, a hoihpen kihawi a, a hoihpen kizuun toto a, a hoihpen mah kietteh toto hi.
Singkung khempeuh amau hun ciatah hong pak bangin, amau hun ciat ah gah in, amau hunciat ah a teh uh pulh hi. Mihing zong amau pian pan a hunkhat sung nosuak in, hun khat sung thahat in, hunkhat sung khangham uh a, amau hun ciat in kihei in, mihing bawlpa geelna bangin a lampi tawnkim ciat hi. Minam zong amau minam hun ciat ah hong khanglo uh a, amau minam hun ciatah hong khangto in, amau minam hun ciatah kiam kik uh a, a thak hong piang zel in, a luite pulhkik zel hi. Tu laitak ZOMI te khantoh laitak hi a, a khangham dingin a kithawithawi tawh kibang hi. Leitung huihdik dan theiin, leitung kalsuan hong thei uh a, leitung kiheizia en in amau zong gamtat hong kisin laitak ahi hi. Bangtan khangto lai ding cih akigentheih loh hangin a mailam limci mahmah hi.
Sen (Chinese) te khangthu pen kum 5000 bang phazo a, amau khantohna pen tuazahta ahih hangin a ekbuk uh siangtho nailo hi kici hi. Tua pen a khantohna uh a bukim hetlohna khat hi ciin mihing khantohna (civilization) thukan mite in gen hi. Sen te philosophy, a lungsim geelzia uh, nuntakna (life) bang hiam, mihing lungsim bang hiam, mihing ngaihsutna bang hiam, kumpi i ich bang hiam, innkuan i cih bang hiam, etc.... cihte limtakin a theihsa uh, amau khangthu ah a omsa ahih hangin a bah mahmahna khat uh na om veve hi cih hong kilang hi. A pualam pan a kilanglo a sungtawng ah a theite muhdan tua hi.
Leitung mihing tuamtuam i tenna gam leh lei a kibatloh mah bangin i nopsakna zondan, i nekzon dan, i ngaihsut dan, i huihdiik leh i khanna kibang lo hi. Lungkimna kibanglo a, lungnopna kibanglo hi.
Nisuahna lam gama omte "Asian" i cihte in innkuan khawng thupi bawl in, kikholh liailiai, kiholim liailiai, annek khop liailiai, kikhoppi neih liailiai cih khawng nuamsa hanga, nitumna lam gamte in tua bang thupisim khollo uh hi. Moto hat mahmah ah tuang dingin nakpi a sam leeng lianga tai zaza ding cih khawng nuamsa zaw uh hih tuak hi. Kikholh leh kiholim cih khawng thupi in ngaihsunlo uh a, amah bek mah nopsakna thupi sim uh hih tuak hi. Zomi leh Asian te in bel i kiim i kianga mite khempeuh vekpi nopsakna kilunggulh mahmah hi.
Mun pawlkhat ah zi leh pasal khat aneih khit nak leh nupa nuam ahi maw, hilo maw.. sihtan kiteng ding hi pah a, mun pawlkhat ah nop a sak kei leh amau ut hunhun in kikhen kik ding, nopsa lo pipi a kiten teitei loh ding ci uh hi. Biakna leh minam pawlkhat in pasal in zi khatvei thu in khatsang tamzaw a neih theih lai in, a nuntak sung tawntung khat bek mah tawh a tul om a, a zi in omloh san hita leh a neikik nawnlo zong om hi. Pawlkhat leuleu in lah kitenna om sese lo in nupa bangin omkhawm, ta nei, tengkhawm lel uh hi.
I tenna leitung pen tangthu zak nop mahmah bang hi mai hi.
Upna leh lungkimna zon dan kibang lo kawikawi a, singbul suangbul mai ah kun a lungkim ziau a omlai in, bangmah kul asa lo zong om veve hi. nek leh dawn kicing peuh leh lungkim a om laitak in, midangte nek ding zonsak nuam a dim a ha in om leuleu a, nei val, zangval ta leh midang a hawm nuam vetlo, a hopsawm vetlo zong diil zezen zel hi.
Annek a kibatloh manin nuntak sung zong kikimlo a, melhoih dan, sisan suah zong kibanglo zel hi. Kum 40 a putek a omlaitak, kum 70 a zong thahat mahmah minam om zel a, numei sung pan piang vive na hi sawnsawn uh hi. Din tantan a pha om a, kawng ciangciang a pha om in, bil ciangciang a pha om leuleu hi. Saivok banga ngo a omlai in meihol banga vom om leuleu a, Zomi banga melhoih zong om dingin ka lamen hi. Singteh lohing bek a ne nuam a om laiin, ganhing sa leh sisan kihello a anne lo pawl zong om leuleu a, mekawk tan ciat lei (tongue) nei ciatciat i kamlimna kibanglo hi. Sathau (fat) nek phamawh salo a om lai in, singgahthau (vegetable oil) bek ne ding a ci kenkan pawl zong omlai tazen hi.
Naungek a pian pan a sih tan zasan (chilli) nelo a om laitak in, a pian nitaka a kam dim a zasan a kibak zong om hi cihte, mihing mah kikholhpih lawm dinga hoihpen hi ci a omlai in, ui leh ganhing dang khawng lawm dinga deihzaw om cihte i gen khin zo kei ding hi.
Tomcik in gen leng... i tenna leitung pen lamdang i cih nop leh dik, nuihsuakhuai i cih leh zong dik, kilehbulhgawp i cih nop leh zong dik, bukim ci leeng zong a kimlo bang hiam kitheilo ahih manin dik, bukimlo ci leng zong i upmawh banglo ahih manin dik, haksa ci leng zong dik, nuam, baih ci leng zong dik, ............ aaaa..... na ut bangbang ci lel o...
Ken bel a bawlpa pilsi incia ka ci hi.
Hau Za Cin
Phuitong Liim
No comments:
Post a Comment