Bus a tai zel in Shatin* Bus stop ka tung vua, tua pan 'Zomite mualtungmi hive hang' cih mah bangin lawmte sangkahna zong mualtung mah na hi a, khe tawh paito in ka tungpah uh hi; gamlapi ding ka sak leh a sak mualzang na hi lel tak hi. [* Lamka ka zin masak penpen lai in Kawllukhu pen Shatin na ci uh a, Shatin cih 'aw' ka zaksimin tua ka zinlai ka phawk hi. Meitei pau hiam, Hindi pau hiam hi kha ding hi].
Ha! mualtunga LS sanginn LTS kici om pen ka tun uh ciang a Principal uh hong vakkhia tawh kituak in mithak cih hong theih ciangin ama student te kiangah 'na lawm uh hiam?' ciin, 'he' a cih zawh uh ciang hong 'nohset a' (Sia Lianpi kam ka kawmpak hi ei), tua zawh ciangin ka giakna ding room hong lak in, ka lut pah uh hi. Ka van teng koih in, annekna ding lam ka zuan uh a, Sia Mang leh Sia Lian in annek ding tampi na bawlsak uh a, gilvah taka ka nek khit uh ciang..... 'kua back-hand hoihzaw, kua topspin hoihzaw...' ciin Pingpong ka kimawlpah ngekngek uh hi. Best of three....... khatveivei amau zong hong zo zeel sam, a tamvei zo zaw gen ding hi leng bel amau mah hi e!!
Tuazawh ciang nitak ann nekma dong tawldam, kisil in TV news khawng peuh en in, ka holim uh hi. Nitak ann huanin lawmte hong kipei setset leuleu uh a, innlam ah hi leh 'Sia aw, sia aw... ci a khut muk uh zong a tangding a kiphallo, Topa sathaunilh te vive in ann hong huan takuh ciang Kumpi David lungsim hong lut in, "Topa aw, kei bang hi a, hih bang mi zahtak huaite tawh nong kikhawlsak," ciin ka ngaihsun hi. Ann limtak ne in, ann kham ciang Sianu Man Hau Cing te common room ah Zomi om khempeuh tawh holimna hun khat ka nei uh hi. Melkilahna leh kimeltheihna tuamtuam tawh hunnuam tak ka zat khit uh ciangin 'ak masa khuang' dekta a, ko lupna lam ciat zuanin ka kikhen uh hi. Tua banga zan hun holim nuam, hun hoih cik ciang akimu kik tam! Sia TS Khai la kawmpak leng, "La kik thei leng maw..." cihcih ding, ahih hang lah kila kik thei nawnlo ding hun nuam a kizang, a bei, a mualliam, hong paisan, kipaisan hi zeelllllll......
A zingsang ciang Tsim Tsa Shui lam ah zingsang breakfast nek khit ciangin kizui suk in, Hong Kong ah mun nuam na penpen, a khua muhna hoih penpen leh a nuam penpen na ka en uh hi. Tu zingsang "zing niang" (breakfast) pen Sianu in hong bawlsak hi a, a moh lah lim, a niangtui lah lim, Lengtong Pauno lasak bangin, Meitei guna tui a luanlai tengin tua zingsang "zing niang" kimangngilh thei kei leh kilawm.
Ka kuan lam un LTS sign board ah Siate nih leh Sianu group foto ciin, maan nihvei khawng ka zaih khit ciangin guahzu sengseng nuai ah Shatin KCR metro zuanin ka paisuk uh a, mili in kawllukhu li tawi napi, 3 bek ka zang uh hi! A khat pen The Chinese university of HK ah Sia Pau Lian Mang ading ciin ka siit uh zong hi tuanlo hi. Tua thu tua tan ci phot ni....
Shatin KCR station pan Kowloon Tong tan tuangphei in, tua pan Mass Transport Rail (MTR) ah tuangin Mongkok ah ka kum uh a, Shopping Mall hoih mahmah sungah lut in, deihdeih en, duhduh en, utna teng hawl, vak kawikawi khit ciangin Shanghai Street ah vanzuakna ka enphei kik uh a, tua pan kik leuleu in Mongkok MTR to Tsim Tsa Shui MTR station pai in, tua ah HK a pai peuhmah in a et teitei uh Victoria Horbour (Victoria Tembaw khawlna) leh Avenue of Stars.... .Bruce Lee te, Jackie Chan te khut lim, khe lim, etc a omna ka hawl ziahziah uh hi. Mongkok Bazar ah ka vak laitak un US pan telephone hong ginga, Zomi mi muanhuai mahmah khat in HK ah Zomi khangnote! kikhawl diamdiam hong gal hopih hi a, ka lungdam thei mahmah uh hi. Pute inn ah i hawh ciang aktui hong kihuansak tawh kibang hi.
Hotel minthang The Peninsula kici mai ah tuiphul so ziahziah om a, tua ah maan kila in, khat khit khat khat ka kilah zawh uh ciangin a group in, etc. ... nuam ei, nuam ei.... NGAIH ANGLAI (2007) ah Cingno leh Thangno te'n gamsungah luai kiluai a, "Nuam ei, Nuam ei" a cih uh zah mah in nuam kasa uh hi.
Hih Tsim Tsa Shui ah The Explorer tembawpi khawl kava tuak phei uh a (a zingciang ka pai kik uh ciang na om nawnlo hi), The Star Cruise kici zong a khualzin ding a Tembaw khawlna nusia laitak ka va tuak man uh hi. Gunkuang neu nono leh luipi kaan na ferry te kimu ziazua a, tuisungah limnga te bual in, tuitungah hingmi te'n nuamsa uh hi. Tua mun a hawh peuhmah maitai in nui siu seu uh a, a kop kop a kikhut let tawh, vatawt nokai lampi kaan mahmah banga a inkuan a kizui ngeetngaat tawh, sun glass nalh deuhdeuh bulh a maan kizaih tawh, a camera uh lah hoih, a video camera uh lah hoih.... Hong Kong ah pawipi tung hiam kici phial hi (Tunkim ni hiam? cih khawng hong phawksak hi).
Ko pawl leuleu pen, Sia Lianpi ama camera tawh buai, kuateng maan zaih hiam kitheilo, etkik lah phallo (a nitak ciang nungak ka zaih.. cih mah neiven, muhpih loh i hih ciang ki um ngam sam kei), Sianu leh Sia Mang in maan kizaihna ding a mun hoih na zong zel uh, hong gen uh ciang ken zaih zel, amau zaih zel, kikhek toto, a tawpna lam ciang Sia Lianpi zong a khut kham hi inteh a camera Sia Mang na tawisak ngeng ngong mawk. Nuam ei, nuam ei.....
(a). Ngaihno te tawh namza zialna,
Lumsuang a po na ah po lai e.
(b). Lumsuang a po na ah po lai,
Nguikhau a zamna ah zam lai e.
cih bangin hih hun nuamte bei mah leh hih ka kikholhna munte uh kikhel ngeilo dinga, a veh, a hawl, a zin kik zelte in zong hong mu toto lai ding hi cih ka phawk hi.
Sun hun nuamtak a ka zat zawh uh ciang ka nuih nuih na uh, maan kizaih ciang, ka mukvun na tawm uh ton liang hiam kici dekta cih ciangin nitaklam hong hito a, ni zong nitumna lam ah kihei suk hiai huai ta hi. Tua takciang ka Zolia tonpih uh Sianu zong a gim a tawl a gen loh hang gim ding, siate zong gimta ding cih ngaihsun in ciah ding ka vaihawm uh a, cik ciang hih mun ah eiteng kikhawl in vakkhawm kik ding cih theihbat hi kei mah leh, ngaita leng ki kho zolo, it ta leng kisam kik theilo dingin khialah pipi in HongKong khuadakna nuam penpen mun ka nungngat san hiai hiai uh hi.
Zomi lia leh taang hong khangto te in mailam ah Zomi Film tuamtuam kizaih in hihmunte hawh dingin ka lamen hi.
No comments:
Post a Comment