Lam tawntung A' hong paipih hi
Cingnote lenna gam ah Cingno tawh ka len khop tak ciang ka ngaihsutna tampi hong kikhek zangzang hi. Ka takpi mah hiam, ka mang lam hizaw hiam! Nuam ei, nuam ei! Nuam ngelngel ei.
Ngaih aw nang leh To Zeisu ka nunna ah hong om ciang,
Sapna bangmah om nawn kei,
Ngaih aw nang leh kei leh Zeisu maciang suan khawm peuh leng,
Lungdeih teng li bang kicing ta.
cihla bang a tak hong suak phialphial hi. Tua lam nidang ciang mailam ah damin zomto lai ni.
Taipei ah USD 6 tawh visa fee ka khit khit, Japan Exchange officer nu in "have a nice trip" hong cih zawh ni thumna hi a, nitak nai 1-a leng ding ka hih manin ka thobaih a, vanleng tual a hunlap in ka tung hi. Cingnote lenna gam zin ding cih mah kilawp lua ka hitam ka breakfast nek zong ka valhsuk luapluap hi. Meileng sungah ka tuan lai, Bus tawh vanlengtual ka zuatlai, ka kim ka kiangah mi tampi kiho zuazua in kiphu maaimaai tase leh kua bang mel pua cih ka tel kei hi.
Vanleng ticket ka lakkhit ciang ka tutna ding 49H ahi cih ka thei a, HK te vanleng minthang Cathay Pacific Airlines ka khatvei tuanna ding ahih manin ka lawpna hong kibehlap semsem hi. Gate ah lutsuak pah in, immigration ah ka kigual a, Japanese journalist tampi video camera lianpipi tawite lakah ka kigual hi. Nai deuhdeuh, lawp deudeuh hi mai ing. Ka hun hong tunga, ka lut khit ciangin vanleng dinkhiat hun ding ngak in ka om sungin coffee leh cake themkhat ne in, tua ciangin zinpak ding hawl in ka diangkhia hi.
Taipei vanlengtual ka meltheih mahmah ta ka kisak leh nidanga ka muh ngei hetloh "Prayer Room" kici ka mu a, ka etphei leh Christian, Tao, leh a dang pawlkhat na om a, Topa tawh kikholhna hun nuamtak ka zang hi. Topa in Jacob a khualzinna a mapui dan ka lungsim ah hong kilanga, Lai Siangtho bu lem in Piancilna sung munkhat ka sim hi.
Vanleng din khiat hun hong tun ciangin ka van teng ka liangah kuah in ka ticket ka khut ah tawi in a kongkhak lam ka zuan hi. Ka ticket hong 'tepsak ziau' (Ngaih Anglai Ah te cih dan in) khit uh ciangin a sung ka lutphei a, kongkhak gei a newspaper bel Japan pau a kigelh ahih manin ka la kei hi. 'Aistirio' (hong it mahmah ing, I love you) cih natawm hong kihilh nailo ahih manin!
Ka tutna ka tut khit ciang ka khuadak phei leh 'kalaisai...' Grace Baptist Church, Taipei ah ka khangno makai seppihte lak ah khat Miss Jenifer Chen hong lut phei a, ka et gige leh kei kiang hong zuan hi. Akigen khol hetlo, a kithei khol hetlo, Topa in vanleng sungah hong kimusak ahih manin lamdang sa in Topa hoihna ka phat uh hi. Buddhist pan Christian a suah zawh kum nih a pha pan Jenifer pen Pasian lamah lawpna lianpi nei a, a lungkim in Pasian hing a theih khak zenzen pen a gengen nuam nuam ahi hi. Music ngaihna ding headphone hong kihawm ciangin zong 'hih pen zang kei ni, Topa hoihna gen khawm zaw ni' ciin hong gen hi. Tua bangin Pasian a it mahmah Chinese nungak khat tawh Taipei pan Tokyo dong ka tu khawm uh a, Topa hoihna ka phatcim thei kei uh hi.
Nai 4 sung ka len khit uh ciang Tokyo vanlengtual Narita Airport kici tu dingin ka vanleng uh mupi in ak a bawh bangin niamsuk diaidiai a, a pei in leilak zutkha in a kha hong kisinga, ka tutna uh hong kiling detdet in a gallam a vanleng khawl hithiatte zong a taizangzang bangin kimu a, Cingnote lenna gam a tung ka hi leltak uh hi. Vanlengtual tunma a Saitama Football Stadium, 2002 FIFA World Cup, Korea - Japan omlaia kimawlna munte a etlawm dan zong ka mangngilh pah malam hi.
Tua bangin cidam tak in Topa in gam khat pan gamdang khat ah hong puak in leithak hong sik sak a, huih thak hong dik sak in, mi thak tawh hong kimu sak in, pupa gualgen Japan khuapi ka tung takpi hi. Laphuakpa khat in, "Ama khut in kei hong kha hi" (He leadeth me) a cih mah bangin Topa khut hat in kei hong len hi. Tua ahih manin, "lam tawntung A' hong paipih hi" ka ci hi.
Lam tawntung A' hong paipih hi
A dang bang ka gen nawn diam
Nuntakna lam hong hilh zo hi
Hong itna ka muangkhial diam
Amah muang leng leitung ah zong
Vantung nopna pha ka nei
// Kei tungah bangbang hong tung zong
Zeisu'n a pha bawl ka thei //.
No comments:
Post a Comment