Tsim Tsa Shui pan kik leuleu in Shatin pan khe tawh ciahto in, mualtunga LTS sanginn ka tungto uh a, kisil in, nitak kikhop ka kuan uh hi. Kikhopna pen Lutheran Biakinn a hih mah bangin kei kikhopna zelte tawh na kibanglo deuh a, tan 10 ka simlai a Champhai ah ka tan 7 siapa hong zinlai amah zui a khatvei ka kikhopna RC biakinn tawh kibang kasa hi. Biakinn pen a tuamtuam hi in, biak piak dan a tuamtuam hi mah leh i biak kibanga, PASIAN, i up kibang in, i muanpa kibang hi, a biakpiak dan bek a tuamhi takpi hi cih ka mu semsem hi.
Biakinn kikhop tawp ciang Dinner Fellowship ciin a kikhawm khempeuh annkuang um khawm in, ann kine khawm a, tukum adingin tuanitak a kikhawm tampen hun, guahzu mah leh mi tamin biakinn a zuat pen hun hi kici a, ann a nunung lamte bangin kicinglo phialphial hih tuak hi. Tua nitak a thupulaknu a lungdam dan gena, hi bang Nipini simin hih leh ka ut hi... Pasian thei nailo HK ah zong tampi om a, Biakinn zuanlo mihing tampi omlai hi ci hi. "Pai in sem, a mangte honkhia in" cih la khawng hong phawksak hi.
Lamet ngam loh lamet ngamloh! Zomi bek hilo, leitung bup in zong laibu hoih leh minthangin a gen leh, a kithupisim mahmah Rick Warren gelh, THE PURPOSE DRIVEN LIFE ("Ngiimna Tawsawn Nuntakna") kici Zokam a tei Sia Pau Lian Mang tawh ka kikhutlet kha hi! Halleluijah!! Kikhutlet bek hilo in, kikhop tawp ankuang kikholhna ah zong ka tukhawm kha uh a, Zomi te mithupi te a mu kawikawi hi veng e, ka lungsim in ka ci hi. Sia Lianpi Zomi lasiam hi a, Sia Pau Lian Mang Zomi laibu teisiam hi a, Sianu Man Hau Cing Zomi Christian Literature Society (ZCLS) ah a sem leh Zomi Baptist Convention khawngah numei makai muan mahmah hi a, Sia Dal Khan Mang lah Zomite laisimna lam ah a tawsawn ut mahmah a, laisimna innpi MOMNO PILNA SAWM (YOUTH ACADEMY) kici khat Tahan ah a hong khia in, a zi in keem a, kei adingin Tuiphumpa Johan in, "Ama khedap a tawisak dingin zong ka kilawm zo kei hi" a cih bangin ka tung et ding vivete a hi uh hi.
The Purpose Driven Life, "Ngiimna Tawsawn Nuntakna" laibu pen hih Taipei biakinn ah nakpi in mipi leh cell groups te ah akigen khawm, a kikum, a kisin leh thalakna in a kinei hi a, mi tampi Christian hong suak lawhna laibu ahi hi. A diak in Sente in thupi sim mahmah diak uh a, inn khat in bu khat bang a neih ding uh ka um phial hi. Tua zah a kisim laibu ahi hi. Hih a laibu bek hilo, a practical guide leh practical lessons te zong a kimin ko kikhopna Grace Baptist Church, Taipei bangin a nei zihziah hi. Tua zaha laibu minthang ZOKAM tawh eima taptung tek ah meilum awi kawm, vaimim em kawm peuh a zong i sim theih ding hong bawlsak Siapa tawh kimu thei, kiholim thei, kikhawl khawm thei leh ankuang sawkkhawm thei ka hih manin ka lungdamna ka gensiam kei hi. Tua bek hilo in, HK ah a kithupi sim penpen leh a lianpenpen pilna sang, leitung in zong a theihpih thama minthang, "The Chinese University of Hong Kong" zong hong vakpih, hong hawlpih, Science buidling, Engineers building leh Library pan kipan nungakte tuibualna dong hong lak dikdek ding amah ana hi gige ahih manin ka lungdamna, ka angtanna ka gensiam kei hi.
Chungchi College, the Chinese University of HK pan Sia Pau Lian Mang hong tung, ahih kei leh LTS ah hong hawh phei ahih manin ko a omsa tengin "guai, tun Zolai lam ah i thudotpi khat ei tawh om ahih manin zanitak a i holimna pen a bul pan panpha kik ni ei" ciin Sianu Hostel common room lam mah ka naihsuk kik uh a, Siapa khalim nuai ah tawldam in ka holim litlit kik uh hi. Siapa in maban ah a nasep dingte, a sepsate ah a sep dante leh Zolai mahmah a khanna dingin kisam a sakte ama muhna bangbang hong gen a, bil sik in ka ngai dimdem uh hi. Tua nitak in Solo kisam lo ahih manin Sia Lianpi Video Camera kilensak hi. Sianu mah "inntek" hong siam a, niangtui, niangha ka duh bangbang uh a kicing tak in ama 'pocket' pan hong lui khia zihziah hi.
Lia Cingsan in,
Omkhawm lai leng nuamlai,
Hun ten hong khengta....
a cih bangin, ka holim uh nuam panpan maw cih ciangin vantung solkhapi zong tumding na kithawita in mualtungah ko hun zawh ngakin na kinga litliat ta a, Siapa lah ama sanginn lam ah (aman bel 'ka zi maan kisuanna ka lupna mah' ci sese in) ciah ut teitei ahih manin, holim kham manlo in naupangte mangpha kikhak danin, "Zingciang kimu kik diamdiam" cih tawh 'hunte'n hong khengta', ka kikhen phot uh hi.
Khuazan luata hiam i cih leh US lamah sun hun hito panpan ahih manin ka kikhen khit uh ciang ka hawi pawlkhatkhat bel ihmut cih thadah khuaphawk saan ve'm! Ahi zongin 'US return' hilo teng bel khapi tawh mangpha kikhak khawm in, lupna lam ciat mah ka zuanpah uh hi.
No comments:
Post a Comment