Cingno tawh lenna gam - 11:

Ka muh dan leh ka phawk thute

Kim het kei in cin, ahi zongin ka muh dan leh ka phawk thu pawlkhat hong gen nuam ing.

I. Ka muh dan:

1. Japan pen nasepna gam hi cih ni thum ka tam sungin ka thei hi. Kuamah hun gelna neilo in gamtanglo uh a, a paina ding, a hawhna ding, a nasep ding, a lengla do ding, a annek hun ding, ... cih bangin gelsa, sehsa, ciamtehsa vive in gamtang uh hi. Tua pen gam khangto peuhmah nuntakzia hi a, tua banga nikhat nai 24 sung hun a hawm ditdet uh ciang a val tamsak mello uh hi. A pian pan a sih dong tua nuntakzia a zangsuak uh hi mawk hi. Sia Rev. Kam Khaw Thang, "vak mawkmawk cih om theilo ding..." ciin gen hi cih a kithang mahmah pen mi gamte in a zang hi a, Zogam ah Zomi a zang tampi omnailo hi. A zang i cihte i makai leh i milian, a ma dawkteng hi pah kha ding hi.

2. Mi khempeuh kizem sitset uh hi. Khua sung, meileng sung, mehzuakna sung, zum sung, etc. hawhna ciahna peuhmah ah mi muh khempeuh limtak kizem sitset uh a, kipuah mello, kizem mello a vak mawkmawk cih kimu lo hi. Nasem hita leh kizem, kikhawm ding hita leh kizem, lawm leh gual tawh kikhawl ta leh kizem, lengla do ta leh kizem ..... hih mawkmawk cih omlo a, siangtho tak, kilawm tak in kizem den uh hi. Numei naupang, a tek a khang amau neih bang ciat tawh a hoih, a siangtho in kizem uh hi.

3. Maitai mahmah uh hi. Midang zahtak siamin maitai uh a, hopih sese ta kei le uh midang khual uh hi. Midang thusim uh a, midang thupi sim in, midang nopmawh ding khual uh hi. Kei sang amah lianzaw ing cih lungsim tawh mi lak ah gamta loin midang adingin ka omdan a nawngkai kha ding cih kidawm uh hi. Zomite mikangpau zat tangzang mahmah khat dan a, ki SHOW OFF cihte - meileng sung, moto sung, khuapi sung vakna te ah -omlo hi.

4. Nin peuhmah ninbawm bek ah kipai hi. Tam gen kul kenteh.

5. Pil gamtat uh hi. Cilsia, zun leh ek, nap nit cihte kimulo a, tua bang tawh kineusek nuam vetlo uh hi. Avek in gen man kei ni, aban pen Rev. Khup Za Go in, "Mi pilte i cih ciangin" (LEIVUI PANIN, 2004) cih a gelh tawh kibang linlian hi.

6. Nasem in sum zong uh a, a semlo, a zonglote a neilo, a ne lo hi pah lian leh kilawm hi. Amau septheih ciat sem in nek zong uh hi. Midanga nekpih pen maizum na hi ciin ngaihsun uh hi.

II. ZOMI omte:

7. Zomi te zong Japan te mah bangin nekzong uh a, semzo, zongzo peuh le uh niamtuan lo uh hi.

8. Khangno nasem thei khat ahih nak leh a gam paizia zui uh a, amau ading ciat, a sep theih ciat uh tawh nu leh pa panpih pah uh hi. Nu leh pa sepsa tawh kizem a, kithupisak a, ki show off, etc. cihte omlo hi.

9. Amau nasep hun kibang lo in pawlkhat zinga kuan, pawkhat nitak a kuan, pawlkhat zan a kuan, pawlkhat sun a kuan cih bang hi. Nasep zia zong kibanglo ahih manin amau sep hun ciat ah sem in, amau tawlngak hun ciat ah tawlnga uh hi. Tua manin India leh Kawlgam khawng banga zing nai 9 pan nitak nai 5 tan sem cih hilo ahih manin amau tawlngak hun pen kinawngkaisak ding kidop huai hi. Tua pen 'privacy' a cih pen uh himai hi.

10. Nupi hi ta leh, papi hi taleh, amau sep theih ciat sem uh a, kuamah semlo omlo hi. A cidam nak uh leh sem a, semlo hih ding pen ut vetlo uh hi. Tua pen Zomi lungsim, khanglui hun pek pan a omsa hi a, tuni tanin a kizom suak hi. Japan te inzong tua lungsim na nei uh hi. Sem thei napi semlo-a mi sepsa nekpih pen zumhuai in a ngaihsun uh hi.

11. Naupang pattah uh a, zawhthawh bawl lo uh hi.

12. Numei simmawh tuanlo uh hi.

13. Hun kiciam a hih nak leh tua hun in zanglian uh a, ziakai cih omlo, makhelh cih omlo hi. Zomi te zong i tenna gamin zil peuh leh mi i phaklah omlo hi.

III. Ka phawk thute:

14. I pianna gamah, gammi i neihna mun ah milian milal hi khin tampite mi gam mi lei ah mi nautang a suak mawk uh pen khasiat huai kasa hi. A pilna, a siamna tawh zong kituak nasep semkhinsa, mite zahtak kaisa khat mi ngeina - 'mipi laka mimal khat,' 'mipi member khat' a suak mawk pen dah huai bek hi lo, khasiat huai hi. Sen nungak Senpau leh lai bek a thei khat India ah sangkah, English siamlo, Hindi siamlo, kuamah tawh kiho theilo ahih manin, 'I am very wise in my country.....'

15. Ut man, hanciam man hi masa lo a, gilkial ding, guaktanga om ding lauh mana - utlo pipi, maizum pipi, haksa sa pipi a - mite maiet, mi kiangah kiphumphum cihte nakpitakin khasiat huai hi. Ahi zongin "zum leh sailing-a si kuamah omlo" cih Zomi Paunak i neih bangin kuamah tuate hanga bahlawh omlo hi. [Hih ka cih ciang Zomite tua bang uh ka cihna hilo a, haksatna i thuak pawlkhat a gen nuam ka hizaw hi].

16. Sum leh pai tampi nei uh, moto hoih, inn hoih, van hoih tampi nei uh - ahih hang it leh ngaih tawh zeek khawm lo, ne khawm lo, kimuhpih lo.... khasiat huai hi.

17. It leh ngaih tampi - pianna nu leh pa, sanggam laizom, meltheih tanau, sung leh pute, teek leh mote..... omkhawmlo ahih manin lungdam hun, dah hun, cinat hun in tukhawm theilo, lungdam khawm theilo, dah khawm theilo, zong kidelh theilo a om pen khasiat huai kasa hi. Ei ut man, ei deihtel, i nasepna hanga khualzin pak man hi lo a, thudang tuamtuam hanga - i nu si, i pa si vui theilo a i om pen mihing a khatvei i pian sunsun buangpawh, a na mahmah khat hi mawk hi.

18. A gilsung pan piang teekteek tano tawh a omkhawm theilo nu leh pate adingin bangzah takin a khuangaih huai tam ka ci hi. Deihtel man hi lo, ut man zong hilo, nekzonna hang zong hilo!

Ahi zongin Pasian minam i hi a, Pasian beel Zomite i hih manin i haksatna, i lunglenna, i vaikhempeuh, ei ngaihsut zawh zah sangin hong khualzaw a, hong vengsak lua mahmah ding hi cih ka um hi.

Topa in tuu banga kei hong cingpa hi a,
bangmah ka kisam kei ding hi.

Lono na ah kei hong lumsak a,
tui kiangah kei hong paipih hi.

Ka nuntakna tha hong dimsak a,
Ama min a thanna dingin thuman lampi ah kei hong paipih hi.

Khuamial thukpi sung na ngawn ka nawk hangin ka lau het kei hi.
Bang hang hiam cih leh kei tawh na hong omkhawm a,
na molhtum leh na ciangkhut in kei hong lungmuang sak hi.

Ka galte omna mai ah kei ading an nong lui a,
ka lu sathau nong nilh a, ka hai a dimlet hi.

Hoihna leh hehpihna in
ka khan tawntungin kei hong zui taktak dinga,
Topa inn sungah ka om tawntung ding hi.
--------------- Late 23: 1-6


Pasian pen ei a hi. Ei a bek hilo in, eite khempeuh hong CINGPA hi.
Pasian pen Zomi te a hi a, Zomi te pen Pasian a ahi hi.
Ka lungmuang.