Posted by: "J. Thang Lian Pau" zotop@yahoo.com zotop
Fri Apr 25, 2008 3:56 pm (PDT)
Ciau khua/Zokhawthar: India lam sang Kawlgam lamah inn tamzaw (300 pawl), hoihzaw, sumbuk thupizaw hi. India lama om tampi takin a tate Kawlgam lamah sang kahsak zaw uh hi. India lam bel electric leh lampi hoihzaw hi. Gamgi lei tawh kimat phialin India in border trade zum ding building lianpi lam khin ta hi.Sumkhek:Rs. 100 = Ks. 2600 pawl hi a, pocket money lel natawm ipta sungah hen metmat kul. Kum dang bang loin tu kum sumkhek sawt niam! Kawlgamah van man a khan sawnsawn si tawh sumbawlte maitai thei mel lo. Niangtui hai khat Ks. 300, Ann kham khat Ks. 1500-2000, Zomite duh mahmah khaini bung khat Ks. 300 pawl. Mawtaw:Kawlgam lamah zong Ciau tan bus (manlong) tung ta a, mawtaw sap a dangte tawh kibangin, Kawlpi tan Ks. 7000-10000/- kikal hi a, rate nei loin, mi tawm mi tam thuah kingasakin, mawtaw-pute in ut zahzah sa mai uh hi. Jeep khatah leihoihza bag 20 bang a guan khit uh teh mi 40 bang kihen thei lai hi. Lentang tan ni a satdan, laitui tan guah thuak a gentheih huaidan, thangmual dung a vawhdan aw!Lampi (Tonsim-Ciau 35 km, Ciau-Tedim 52 km, Tedim-Kawlpi 92 km):Mawtaw lam pen Ciau pan Kawlpi dong kipuahsan a, suang omna teng toi lai pianin, mun pawlkhatkhat bus ta mialmial hi. Tua lo a keekna vanglak uh jeep thumthum ton thei ngel in teh; zai acihin zai. Ciktui tam mana lam siatna dung ahi den Haimual-Lentang kikal kipuah diaka, alkatra belhna om neknek sam, tua lo suang kiphahin a tungah kawlte alkatra ahi suangneng leh lei helin sung. Laitui leh Lamzang/Tedim kikal lam lui teng mah keek mawk, mun pawlkhat 60 degree khawngin awn liang; ai’zong mawtaw in zawh loh nei lo. Mansuang lei a lim mah bangin a tak zong hoih. Ciau-Kawlpi road a kipuahdan leh Lamka-Sinzawl/ Aizawl road puahdan kilamdang lo – a letdan, sep saan ahihdan, vui a khukdan, suangmun sante a toidan… kibang lua. A kibat lohna Lamka lampi pen contractor ten meetpih sawmin seem a, Kawlpi lam bel force labour leh prisoner vive semsak bang.Check gate/post:Haimual khaw thakah department teng in gate khat zangkhawm cihloh, India gamgi dung, Ciau-Tedim-Kawlpi- Tamu kikalah galkap uk gam e ci loin check-na om nawn lo suak. A democracy gam zaw India sung, Moreh leh Imphal kikal bangah ki-check thithe mai, i bang lo teng san tanin galkap ten mai keei uh.Zogam ki-itzaw deuh bang:Khaw khal lai hi napi, nidang bang loin gam hal muh ding leh ama muh ding mel om nawnlo bilbel, kihal lo top bel hi kei; Pa Khup Khan Thang (USA)’ te pawl hanciamna leh a thugelhgelhte khawng ziak hi vem, mai kinawt zek ta, lungdamhuai. Zogama singkung khat pen Zogama po ahih manin it-huai diak, manpha diak hi. Thangmual dunga a biak nop huai liang singkungpite lou neihna ding hanga a kiphuk ekek bel, pamaih acihin pammaih… ei sang Zogam luah masa zaw/innteek zaw lai ding uh ci leng!Tu kum mautam kial kum hi a, gua teng siin keu khin ahih manin Mizoramah gam a naak kat ding lauh leh dal kithuah a, kum dang sangin kang lo zaw bilbel. Mizoram bel a gam hing/niim diak hi ven…Zogam in gim nei:Zogam i tun ciang, tua taaksing gim leh innkhing/meikhu gim kihel hiam hong nam hiauhiau dan pen mundangah kiza khol lo hi. Zogam gim ahih man hiin teh namtui vangvang bang mai hi.Zomi ten zawn siam lo Nuntaak haksa ciin kithuum2 napi, a tui a ha sai tengah a sun a zanin mi dim dimdem den mawk! Gamdanga naklah lianga naseem, a innkuanpih khat peuh ten a nek ai a dawn ai vua a khak uh sum tawh a nuamtai pawl khawng zong hi ding ci leng, ki-awi huai sa ing. Zomite i dinmun tawh kituak loin kinuamtai nuam lua deuh bang, Kawlte hong lawhin kigongsan zawmah lai. I nei i hau ahi zongin i habit kheek ngai om ding hi. Mailam khualna kinei kha ban lo, i tuni bek khual zong hi kha thei hang. (Zomi ten i zawn kiseel nuam lai hi – Khampu Hatzaw) Kawlgama Zomite nunnopzia i genna hi sam. En thalawhsak i hih ciang…‘Ka hah lile ka mihsit’ kici mah hia le?- JTLP
No comments:
Post a Comment